1 K'e̱ nga itjo-ne ndi̱tsin i̱ngo̱ ítjòn, Jesús, jngoò xi̱ta̱ xi kota'yàt'aà-la̱ kitsò-la̱: —Maestro, chítsejèn-la̱ mé tà ndaà kjoàn ni'ya ko̱ ndo̱jo̱-la̱. 2 Kitsò Jesús: —Chítsejèn-là ngats'iì ni'ya koi xi ií kjoàn. Nì ti̱ jngoò ndo̱jo̱ si̱yijòsòn-la̱ xíkjín. Ki̱xa̱ña yije-né kóho̱tjín 3 Jesús, k'e̱ nga tíjna ya̱ nindoò Yá Olivos ya̱ kixi̱-la̱ I̱ngo̱ Ítjòn ts'e̱ Jerusalén, jè Pedro, Jacobo, Juan ko̱ Andrés, ijchò kinchat'aà-la̱ Jesús, kiskònanguit'aàxín-la̱ kitsò-la̱: 4 —Koa̱tìn-náje̱n, ¿mé na̱chrjein-ne nga o̱ko̱ma kjoa̱ koi? Mé seña xi s'e̱ k'e̱ nga jye mejèn ki̱tasòn yije kjoa̱ koi. 5 Kiìchja̱ Jesús, kitsò-la̱: —Ti̱kinda̱a yijo-nò nga mì yá xi̱ta̱ xi skóna̱cha̱n-nò. 6 Kjìn xi̱ta̱ kjoi̱í xi 'ín ts'a̱n si̱ìkjeén; ki̱tso̱: “'An-ná xi Cristo, [nga 'aán kisìkasén-na Nainá].” Ko̱ kjìn xi̱ta̱ skóna̱cha̱n-la̱. 7 'Jñò, k'e̱ nga ki̱ná'ya kjoa̱ ts'e̱ kjo̱jchán nga xki̱ xi ján i̱'nde tjín, kì tsakjoòn-jèn; xó k'oa̱á ko̱ma-ne, ta̱nga kj'eè tsà i̱sò'nde tífehit'aà. 8 Na̱xa̱ndá ska̱ànkjoò xi kj'ei̱í na̱xa̱ndá. Koa̱ xi̱ta̱xá koi̱íts'ia̱ nga ska̱ànkjoòko̱ xi̱ta̱xá xi kj'ei̱í na̱xa̱ndá. Xki̱ xi ján k'oa̱ ch'ón. S'e̱ kjinchrá. S'e̱ kjoa̱siì. Jñà kjoa̱ koi, tà jè xi sa̱ tímats'ia̱-ko̱ kjo̱'in. 9 'Ndaà ti̱kinda̱a yijo-nò nga ya̱ ski̱nìt'aà-nò nguixko̱n xi̱ta̱xá. Si̱ki'on-nó nga ska̱ànko̱-nò xi̱ta̱ ya̱ ni'ya i̱ngo̱ sinagoga. Kji̱ko̱-nò nguixko̱n xi̱ta̱xá gobernador ko̱ xi̱ta̱xá ítjòn, tà koií kjoa̱-la̱ i̱t'aà ts'a̱n. K'oa̱á s'ín ko̱ma ki̱nókjoa̱-là 'én xi ts'a̱n. 10 Mochjeèn-nè nga ítjòn ko̱bísòn 'én ndaà-la̱ Nainá xi kjoa̱ ts'e̱ Cristo nga tíjtsa i̱sò'nde. 11 K'e̱ ki̱jchò nguixko̱n xi̱ta̱xá, kì makájno-nò kós'ín ki̱nókjoa̱a. Kì nìkítsjeèn-jèn. Nga ti̱ k'e̱-né, Nainá tsjá-nò 'én xi ki̱nókjoa̱a. Nga mìtsà jñò xi ki̱nókjoa̱a; jè Ini̱ma̱ Tsje̱-la̱ Nainá xi ki̱chja̱ ngajo-nò. 12 Ti̱jè-ne 'ntse̱ si̱ìnga̱tsja 'ntse̱ xi̱ta̱ nga si̱ìk'en. Jè na̱'èn-la̱ si̱ìnga̱tsja ki'ndí-la̱ nga si̱ìk'en xi̱ta̱. Jñà i̱xti-la̱ si̱ìnga̱tsja na̱'èn-la̱ nga ki̱yá. 13 Ngats'iì xi̱ta̱ i̱sò'nde ko̱jtikeè-nò xi kjoa̱ ts'a̱n; ta̱nga jè xi ki̱chíkjoa̱-la̱ skanda k'e̱ nga kjoe̱hit'aà-ne kjoa̱, jè xi ki̱tjokàjiìn kjo̱'in. 14 ’K'e̱ nga jch'a̱a nga 'ñó ch'o tíma ya̱ I̱'nde Tsjeè-la̱ Nainá ñánda mì kiì ok'ìn-la̱, [koni s'ín kiskiì Daniel xi̱ta̱ xi kiìchja̱ ngajo-la̱ Nainá.] (Kàtasijiìn-la̱ jñà xi̱ta̱ xi bíxke̱ xo̱jo̱n jé.) K'e̱ nga o̱ko̱ma kjoa̱ koi, jñà xi̱ta̱ xi títsa̱jna Judea, kàtanga, kàtjì ñánda nindoò chon. 15 Jè xi tíjnasò'nga ni'ya-la̱, kì ti̱ kiì nchrobájen-ne, kì ti̱ kiì fahas'en-ne ni'ya tsà mé xi mejèn-la̱ nga skoé; 16 Jè xi tísíxájiìn nangui-la̱ kì ti̱ kì nchrobá-ne nga nchrohókjà nikje-la̱. 17 ¡I̱ma̱ xó-ne jñà íchjín xi ki'ndí 'ya ko̱ xi i̱xti xó nchisíkaki jñà na̱chrjein koi! 18 Ti̱jét'aà-là Nainá nga mì k'e̱é o̱ko̱ma k'e̱ nga na̱chrjein-la̱ cho̱n 'nchán. 19 K'e̱ nga jè na̱chrjein nga o̱ko̱ma, 'ñó tse kjo̱'in s'e̱, kj'eè ñà o̱ma skanda tje̱n-ne tsibíndaà i̱sò'nde Nainá koa̱ mì ti̱ kiì o̱ko̱ma-ne nga ko̱ma i̱skan. 20 Tsà mì k'oa̱á ki̱tso̱ Nainá nga ìsa ko̱chiba na̱chrjein, ni̱ jngoò xi̱ta̱ ki̱tjokàjiìn kjo̱'in. Ta̱nga koií kjoa̱-la̱ jñà xi̱ta̱ xi xó jaàjiìn-ne Nainá, ko̱chibaya na̱chrjein. 21 'K'e̱ nga tsà yá xi ki̱tso̱-nò: “Chítsejèn-là, i̱í tíjna Cristo [xi̱ta̱ xi xó kisìkasén-ne Nainá]” o tsà ki̱tso̱-nò: “Chítsejèn-là, ján tíjna ján” kì kiì mokjeiín-nò. 22 Kjoi̱í xi̱ta̱ ndiso xi Cristo ki̱tso̱-la̱ yijo-la̱, ti̱koa̱á kjoi̱í xi̱ta̱ xi koa̱ ti ki̱tso̱ nga jñà xi chja̱ ngajo-la̱ Nainá. K'oa̱á tis'ín ko̱kò seña ko̱ kjo̱xkón xi ndaà tjín nga skóna̱cha̱n. Skanda jñà xi̱ta̱ xi jye jaàjiìn Nainá mejèn skóna̱cha̱n-la̱ tsà ko̱kjeiín-la̱. 23 Ti̱kinda̱a yijo-nò. Nga jye tìbeèno̱jmíya yije-nò ngats'iì kjoa̱ xi ko̱ma i̱skan. 24 'K'e̱ nga ko̱ma i̱skan nga jye ko̱to na̱chrjein ts'e̱ kjo̱'in, jè ts'oí ko̱jñò-né, mì ti̱ kiì ko̱tsjè-ne ndobá-la̱; ti̱koa̱á jè sá mì ti̱ kiì ko̱hiseèn-ne. 25 Ni'ño xi tjín ngajmiì, ki̱xo̱ngui-nè. Jñà nga'ñó xi tjín ngajmiì ki̱ti̱ya yije-la̱. 26 I̱kjoàn skoe̱-na xi̱ta̱ xi Ki'ndí-la̱ Xi̱ta̱ xan-la̱ yijo-na̱ nga kji̱nchrobájñaà i̱jiìn ifi; tse nga'ñó ko̱ kjoa̱jeya kjoi̱ikoa̱a. 27 Siìkasén àkja̱le̱-na̱ nga koi̱ìxkóya xi̱ta̱-na̱ xi 'an xó jaàjiìn-na nga ñijòn chrja̱ngui̱-la̱ nga tíjtsa i̱sò'nde ko̱ nga tíjtsa ngajmiì. 28 ’Chíta'yaàko̱ò jè yá-la̱ toò i̱ko̱ mé xi okóya-ná; k'e̱ nga ma kindíya chrja-la̱, i̱kjoàn bíjts'én xka̱-la̱, tíjiìn-nò nga jye nchrobá machrañà cho̱n ndobá. 29 K'oa̱á ti̱ s'ín tjín, k'e̱ nga jch'a̱a nga k'oa̱ s'ín tíma kjoa̱ koi, kàtasijiìn-nò nga 'an xi Ki'ndí-la̱ Xi̱ta̱ xan-la̱ yijo-na̱ jyeé ni̱to̱n kjoia̱à, k'oa̱á ngaya̱-la̱ koni tsà jye tijna chrañà xòhotjoa̱-la̱ ni'ya. 30 O̱kixi̱í xi xan-nò, ngats'iì kjoa̱ koi, k'oa̱s'ín ko̱ma k'e̱ nga ti̱kj'e biyaà xi̱ta̱ xi tjín na̱chrjein i̱'ndei̱. 31 Jè ngajmiì ko̱ i̱sò'nde kjoe̱hit'aà-né, ta̱nga jñà 'én-na̱ mì kiì kjoe̱hit'aà; ki̱tasòn-né. 32 'Ta̱nga k'e̱ nga o̱ko̱ma, mì yá xi tíjiìn-la̱ mé na̱chrjein-ne ko̱ mé hora-ne; ni̱ jñà àkja̱le̱ xi títsa̱jna ngajmiì ko̱ ni̱ jè Ki'ndí-la̱ Nainá tíjiìn-la̱; ta̱jngoò Nainá xi Na̱'èn-ná tíjiìn-la̱. 33 'T'e̱èn kinda̱ yijo-nò, ti̱tsa̱jnakon, tìtsi'ba nga mì kiì tíjiìn-nò kjé-né nga o̱ko̱ma. 34 K'oa̱ás'ín t'e̱en koni s'ín chi̱'nda-la̱ xi̱ta̱ xi kjiìn i̱'nde tífì, jè xi̱ta̱ xi fì sínga̱tsja ni'ya-la̱ xi̱ta̱ chi̱'nda-la̱. Tsjá-la̱ xá nga ìjngoò ìjngoò, tsò-la̱ jè xi síkinda̱ xòhotjoa̱ ni'ya: “Ti̱jni, ti̱jnakoin.” 35 K'oa̱ás'ín titsa̱jnakoòn ngats'ioò nga mì kiì 'yaà mé na̱chrjein kjoi̱í-ne Nei-la̱ ni'ya. ¿A k'e̱é-nè nga kjòhoxòn o xi k'e̱é-nè nga ki̱jchò os'en ni̱tje̱n o xi k'e̱é-nè nga skindàya kóxtí o xi k'e̱é-né nga jye s'e̱ i̱sén? 36 Kì tsjayijofè-jèn tsà koi na̱chrjein-la̱ tà ni̱to̱n j'iì-ne nei-la̱ ni'ya. 37 Koni s'ín xan-nò jñò, k'oa̱á xan yije-la̱ kóho̱tjín xi̱ta̱: Titsa̱jnakoòn.
