1 Tsibíts'ia̱ Jesús nga tsibeèno̱jmíya kjoa̱ xi mangásòn. Kitsò: —Jngoò xi̱ta̱ tsibítje̱ toò uva, tsibíndiì-la̱ ínchíbá, i̱kjoàn tsibíndaà jngoò i̱'nde ñánda tsi'ñòngui nandá-la̱ toò uva. Ti̱koa̱ tsibíndaà jngoò torre xi síkinda̱ yije kóho̱tjín. I̱kjoàn kisìkìña-la̱ nangui xi̱ta̱ xi kj'ei̱í nga kisìxásòn. I̱kjoàn kiì jè nei-la̱ nangui ñánda i̱'nde kjiìn. 2 K'e̱ nga ijchò na̱chrjein-la̱ nga kòjchá toò uva, jè nei-la̱ nangui kisìkasén jngoò xi̱ta̱ chi̱'nda-la̱ nga kisìjé-la̱ xi jè tjoé chiba-la̱ ts'e̱ tsojmì xi kòjchá. 3 Ta̱nga jñá xi̱ta̱ xi síxásòn nangui kitsobá'ñó koa̱ kiskaànko̱, tà kisìkasén tiyaá-ne. 4 Jé nei-la̱ nangui kisìkasén ìjngoò xi̱ta̱ chi̱'nda-la̱. Ti̱koa̱á tà ndo̱jo̱ tsibínè, tsate sko̱, kisìki'on ko̱ ch'o kisìko̱. 5 Jè nei-la̱ nangui íjngoò kisìkasén xi̱ta̱ chi̱'nda-la̱. Ti̱koa̱á kisìk'en-né. Kjìn xi̱ta̱-la̱ kisìkasén-ìsa, ta̱nga tjín xi kiskaànko̱, koa̱ tjín xi kisìk'en. 6 'Ko̱ jè nei-la̱ nangui tà jngoò xi̱ta̱-la̱ tíjna-ìsa; tà jè ki'ndí-la̱ xi 'ñó matsjakeè kisìkasén, kitsò: “Skoe̱xkón-la̱ ki'ndí-na̱.” 7 Ta̱nga jñà xi̱ta̱ xi síxá-jiìn nangui, tsajoóya-ne, kitsò-la̱ xíkjín: Jè jèe xi tjoé kjo̱tjò-la̱ i̱'nde, si̱k'eén, tsa̱ján ko̱ma i̱'nde. 8 Kitsobà'ñó, kisìk'en, i̱kjoàn kisìkatje̱n ján i̱jto̱n nangui ñánda títje̱ toò uva. 9 ’Jñò ¿kó bixón?, K'e̱ nga kjoi̱í nei-la̱ nangui, ¿mé xi si̱ìko̱ jñà xi̱ta̱ koi? Si̱ík'en-né; kj'ei̱í xi̱ta̱á si̱ìnga̱tsja jè nangui ñánda tjín toò uva. 10 '¿A kj'eè bixke̱ejñoò Xo̱jo̱n-la̱ Nainá? Tsò-né: Jè ndo̱jo̱ xi tsachrje-kàngui chji̱ne̱chrjó nga sa̱ ítjòn, jè-né xi komà ndo̱jo̱ tàts'en chrjó-la̱ ni'ya; 11 K'oa̱ás'ín kis'iìn Nainá. Jñá, tà maxkón-ná. 12 Jñà xi̱ta̱ sko̱-la̱ no̱'miì, ko̱ xi̱ta̱ xi okóya kjo̱tíxoma-la̱ Nainá ko̱ xi̱ta̱ jchínga mejèn kitsobà'ñó Jesús nga kiskaàya-la̱ jè kjoa̱ xi mangásòn xi tsibeèno̱jmí nga kondra̱ ts'e̱-né, ta̱nga jñà kitsakjòn-la̱ xi̱ta̱ na̱xa̱ndá; kisìkíjna, i̱kjoàn kiì-ne. 13 Kisìkasén i'nga-la̱ Jesús xi̱ta̱ Fariseo ko̱ xi̱ta̱ ts'e̱ Herodes nga mejèn-la̱ ótsji'nde-la̱ kós'ín si̱ìko̱ nga ko̱hòngui. 14 Xi̱ta̱ koi, kií kitsò-la̱: —Maestro, 'ya-náje̱n nga 'én kixi̱í xi nokjoì; mì kiì 'nì kinda̱ koni tsò-le xi̱ta̱; ko̱ mìtsà jè chìtsejèn-jnoi kó kjoàn xi̱ta̱; k'oa̱á s'ín okoòyi ndi̱yá-la̱ Nainá koni s'ín tjín xi kjoa̱ kixi̱. ¿A ndaà tjín nga kíchjítjì-je̱n tsojmì i̱t'aà ts'e̱ xi̱ta̱xá ítjòn ts'e̱ Roma o xi majìn-né? ¿A kíchjí-náje̱n a xi mì kiì kíchjí-je̱n? 15 Jesús jye beè nga jò tjín ini̱ma̱-la̱; kitsò-la̱: —¿Mé-ne nga chona̱cha̱an-ná? Nchrohóko̱ jngoò-ná to̱n nga skoe kó kji. 16 K'e̱é kiìko̱ jngoò-la̱ to̱n. Jesús kitsò-la̱: —¿Yá ts'e̱ i̱sén jè ko̱ jè 'ín xi tjít'aà? Kitsò-la̱: —Ts'e̱é César, xi̱ta̱xá ítjòn ts'e̱ Roma. 17 K'e̱é kitsò Jesús: —Tjiì-là César xi ts'e̱ César koa̱ tjiì-là Nainá xi ts'e̱ Nainá. Tà k'oa̱á ko̱ma-la̱ nga kiì'nchré koni kitsò Jesús. 18 Jñà xi̱ta̱ Saduceo ijchòkon Jesús. Jñà xi̱ta̱ koi mì kiì mokjeiín-la̱ nga fa̱áya-la̱ xi jye k'en. Kiskònangui-la̱, kitsò-la̱: 19 —Maestro, jè Moisés, k'oa̱á s'ín kiskiì: tsà jngoò xi̱ta̱ xi ki̱yá 'ntse̱, tsà tsjìn-la̱ i̱xti k'e̱ nga ki̱yá, jè chjo̱ón-la̱, ti̱jè-ne 'ntse̱ ki̱xan-ko̱ ìjngoò k'a-ne mé-ne nga s'e̱-la̱ i̱xti xi tje̱ ts'e̱ 'ntse̱. 20 Kis'e xó jngoò k'a xi̱ta̱ xi itoò komà 'ntse̱. Jè xi síjna ítjòn, kis'e xó-la̱ chjo̱ón; ta̱nga k'e̱ nga k'en, mì kiì kis'e-la̱ i̱xti. 21 Jè xi ma jò-ne chixàn-ko̱ chjo̱ón ka'àn-la̱ 'ntse̱. Ti̱koa̱á jè k'en. Mì kiì kis'e-la̱ i̱xti. K'oa̱á ti̱ komà jè xi ma jàn-ne. 22 Ngásòn komà nga itoò. Ni̱ jngoò xi kis'e-la̱ i̱xti. Nga jye i̱t'aà-ne k'en jè chjo̱ón. 23 K'e̱ nga tsà kjoa̱áya-la̱ mik'en, nga itoò 'ntse̱, ¿yá-né xi chjo̱ón-la̱ ko̱ma? Nga jñà tsibìtsa̱jnako̱ nga itoò 'ntse̱. 24 Kisìkátji-ne 'én Jesús, kitsò-la̱: —Jñò, koi maskáya-nò nga mì kiì 'yaà kó s'ín tíchja̱ Xo̱jo̱n-la̱ Nainá ko̱ nga'ñó xi tjín-la̱ Nainá. 25 K'e̱ nga kjoa̱áya-la̱ mik'en, íchjín, íchjá mì ti̱ kiì ki̱xan-ne. K'oa̱ás'ín s'e̱ koni jñà àkja̱le̱ xi títsa̱jna ngajmiì. 26 Jè kjoa̱ ts'e̱ mik'en nga kjoa̱áya-la̱, ¿A kj'eè bìxke̱jñoò xo̱jo̱n-la̱ Moisés ya̱ ñánda tíchja̱ ts'e̱ yá na'yá xi títì? Nainá kitsò-la̱ Moisés: “An-ná xi Nainá tsò-na Abraham, Isaac, ko̱ Jacob.” 27 ¡Jñà xi jye k'en, mì tsà Nainá tsò-la̱ xi Nainá; tà jñà xi títsa̱jnakon xi Nainá tsò-la̱! Jñò, 'ñó maskáyaà-nò. 28 Jngoò xi̱ta̱ xi okóya kjo̱tíxoma-la̱ Nainá xi kiskiì Moisés kiì'nchré-la̱ Jesús nga ndaà kiìchja̱; k'e̱ nga nchijoókjoò ijchò-kasìt'aà chrañà-la̱, i̱kjoàn kiskònangui-la̱, kitsò-la̱: —¿Ñá-la̱á kjo̱tíxoma-la̱ Nainá xi tíjna ítjòn? 29 Kiìchja̱ Jesús, kitsò-la̱: —Jè kjo̱tíxoma xi tíjna ítjòn tsò-né: “Ti̱ná'yaà xi̱ta̱ Israel, jè Nainá xi Na̱'èn-ná, ta jè ta jngoò-né xi otíxoma-ná. 30 Ti̱tsjachi Na̱'èn-ná xi Nainá 'mì-la̱, nga ko̱ ini̱ma̱-lè ko̱ yijo-lè ko̱ kjo̱hítsjeèn-lè ko̱ nga'ñó-lè.” 31 Jè xi ma-ne jò: “Ti̱tsjachi xi̱ta̱ xingui̱i koni tsà ti̱ yijo tsi̱ji-ne.” Mì ti̱ tsjìn-ne kjo̱tíxoma xi ìsa̱ xkón tjín. 32 Jè xi̱ta̱ xi okóya kjo̱tíxoma-la̱ Nainá kitsò: —Ndaà tjín, Maestro. O̱kixi̱-né koni s'ín nokjoì. Jngoò ma-ne Nainá ko̱ mì ti̱ yá tjín-ne xi kj'ei̱í. 33 Ìsa̱ chjí-la̱ nga ko̱ ini̱ma̱-ná cha̱xkoán Nainá, ko̱ kjo̱hítsjeèn-ná ko̱ nga'ñó-ná ko̱ nga cha̱xkoán xinguia̱á koni tsà yijo-ná. Ìsa̱ chjí-la̱ koni ngats'iì cho̱ xi tisòn imi̱xa̱ tsjeè-la̱ Nainá, kjo̱tjò xi tsjá jñà xi̱ta̱. 34 Jesús k'e̱ nga kijtseè nga ndaà kiìchja̱ jè xi̱ta̱ xi okóya kjo̱tíxoma-la̱ Nainá, kitsò-la̱: —Mìtsà kjiìn ti̱jni i̱t'aà ts'e̱ kjo̱ndaà xi tjín-la̱ jñà xi̱ta̱ xi Nainá otíxoma-la̱. Mì ti̱ yá xi kjò'ñó-ne ikon nga kiskònangui-ìsa̱-la̱. 35 Jesús k'e̱ nga tíhokóya ya̱ ndi̱tsin i̱ngo̱ ítjòn, kiskònangui-la̱, kitsò-la̱: —¿Mé-ne ko̱tsò-ne jñà xi̱ta̱ xi okóya kjo̱tíxoma-la̱ Nainá xi kiskiì Moisés nga jè xi Cristo, [xi̱ta̱ xi xó si̱ìkasén-ne Nainá], nga ya̱ kji̱nchrobát'aà-ne tje̱-la̱ xi̱ta̱xá ítjòn David? 36 Ti̱jè-ne David k'e̱ nga kiìchja̱ nga ko̱ nga'ñó-la̱ Ini̱ma̱ Tsjeè-la̱ Nainá, kitsò-né: Jè Nainá kitsò-la̱ jè xi Nei-na̱: “Ti̱jnat'aà-ná i̱ kixi̱-na̱ skanda k'e̱ nga sìkítsa̱jnanguia ntso̱koiì jñà xi kondra̱-lè nga 'an jye kisìkijne-la̱.” 37 Jè David, tsà Nainá kitsò-la̱ Cristo, [xi̱ta̱ xi xó si̱ìkasén-ne Nainá], ¿kó s'ín tjín-ne nga tje̱-la̱ ma-ne David? Ngats'iì xi̱ta̱ xi kjìn ma-ne, tsja ma-la̱ nga 'nchré-la̱ Jesús koni s'ín okóya. 38 Jesús k'oa̱ás'ín tsakóya-la̱ xi̱ta̱. Kitsò-la̱: —Ti̱kinda̱a yijo-nò i̱t'aà ts'e̱ xi̱ta̱ xi okóya kjo̱tíxoma-la̱ Nainá xi kiskiì Moisés. Sasén-la̱ nga nikje ndojò ókjá. Ti̱koa̱á sasén-la̱ nga skoe̱xkón xi̱ta̱ xi kj'ei̱í, ndaà si̱ìxat'aà ya̱ ndi̱tsi̱n. 39 Ti̱koa̱á jñà ótsji íxi̱le̱ xi jncha ítjòn ya̱ ni'ya i̱ngo̱ sinagoga, ko̱ mejèn-la̱ nga jñà kítsa̱t'aà ítjòn ími̱xa̱ k'e̱ nga kjèn xi̱ta̱ ñánda tjín s'eí. 40 Koa̱ faà'an ni'ya-la̱ xi tjín-la̱ íchjín ka'àn xi jye k'en x'i̱n-la̱. K'e̱ nga chjat'aà-la̱ Nainá 'ñó ndo̱jo̱ fìko̱ o̱chikon nga mejèn-la̱ nga bítsa̱jna'ma nga mì jcha-la̱ mé kjoa̱ xi s'ín. Jñà xi̱ta̱ koi ìsa̱á tse kjo̱'in s'e̱-la̱. 41 Jesús tsibíjna ya̱ kixi̱-la̱ ñánda tíjna kaxa̱ xi sinchá to̱n kjo̱tjò-la̱ Nainá. Tíkotsejèn-la̱ xi̱ta̱ na̱xa̱ndá nga bítsa̱jna to̱n kjo̱tjo-la̱ Nainá. Kjìn xi̱ta̱ nchi̱ná xi tse to̱n bítsa̱jna. 42 Ijchò jngoò chjo̱ón ka'àn xi 'ñó i̱ma̱. Jò ndí to̱n jtobá tsibíjna xi chiba chjí-la̱. 43 Jesús kiìchja̱-la̱ xi̱ta̱ xi kota'yàt'aà-la̱, kitsò-la̱: —K'oa̱á xan-nò xi nguì o̱kixi̱, jè chjo̱ón ka'àn xi 'ñó i̱ma̱, jè xi ìsa̱ tse to̱n kòbíjna mì k'oa̱á-ne koni jñà xi̱ta̱ xi i'nga. 44 Tà jè tsjá xi ningui-la̱ ta̱nga jè ndí chjo̱ón i̱ma̱, na̱s'ín nìmé tjín-la̱, jngoò k'a kàtsjá yije ngats'iì ndí to̱n xi tíjna-la̱ xi tísíjchá-ne yijo-la̱.
