1 Jesús tsibeèno̱jmí ìjngoò-la̱ kjoa̱ xi mangásòn, jñà xi̱ta̱ xi kota'yàt'aà-la̱, kitsò-la̱: —Jngoò k'a, jngoò xi̱ta̱ nchi̱ná, tíjna jngoò-la̱ xi̱ta̱ xi síkinda̱ chi̱'nda. Xi̱ta̱ xi kj'ei̱í kiì nga nguixko̱n nei-la̱ nga kitsjaàt'in 'én nga tsojmì-la̱ tísíkje. 2 Jè nei-la̱, k'e̱é kiìchja̱-la̱, kitsò-la̱: “¿Mé 'én xi tsját'in-lè xi̱ta̱? Tjiì-ná kinda̱ kjoa̱ ts'e̱ xá-lè; mì-la ti̱ kiì chi̱'nda sko̱-la̱ ki̱jna-ne.” 3 Chi̱'nda jè, k'e̱é tsohóko̱ yijo-la̱, kitsò: “¿Mé xi s'iaàn? Jè nei-na̱ mì ti̱ kiì tsjá-na xá. An, mì kiì chíkjoa̱-na nga siìxákoa̱a nangui. Masobà-na tsà to̱n siìjé kjo̱tjoà. 4 Jyeé be mé xi s'iaàn mé-ne nga s'e̱-na amigo xi tsjá'nde-na ni'ya-la̱ k'e̱ nga tjáxìn-na xá jè.” 5 K'e̱é kiìchja̱ ìjngoò ìjngoò-la̱ jñà xi̱ta̱ xi tje̱n-la̱ to̱n ts'e̱ nei-la̱. Kitsò-la̱ jè xi ítjòn: “¿Kó tjín kitje̱n-lè ts'e̱ nei-na̱?” 6 Xi̱ta̱ jè kitsò: “Jngoò sìndo̱ barril asìti̱ kitje̱n-na.” Jè chi̱'nda kitsò-la̱ xíkjín: “Chjoí xo̱jo̱n-lè, ti̱jni, ni̱to̱n tìndaà ìjngoiì xi kj'ei̱í xo̱jo̱n xi tà icháte chjí-la̱.” 7 I̱kjoàn kiskònangui-la̱ xi ìjngoò, kitsò-la̱: “Ngaji̱, ¿kó tjín kitje̱n-lè?” Xi̱ta̱ jè kitsò: “Jngoò sìndo̱ naxá trigo kitje̱n-na.” K'e̱é kitsò-la̱: “Chjoí xo̱jo̱n-lè; tìndaà ìjngoiì xi tà ñijòn kaàn chjí-la̱.” 8 Chi̱'nda jè, kijtseèxkón nei-la̱ nga tjín-la̱ kjo̱hítsjeèn nga amigo tsohótsji, na̱s'ín ch'o kis'iìn nga kiskoòna̱cha̱n-la̱ nei-la̱. Jñà xi mì tsà xi̱ta̱-la̱ Nainá, ìsa̱á tjín-la̱ kjo̱hítsjeèn kó s'ín ótsji amigo-la̱ xi skoétjò mì k'oa̱á-ne koni jñà xi̱ta̱ xi iseèn tjín kjo̱hítsjeèn-la̱. 9 ’K'oa̱á xán-nò, ti̱kjeén to̱n ko̱ tsojmì xi tjín i̱ i̱sò'nde nga kàtas'e-nò amigo mé-ne k'e̱ nga mì ti̱ kiì ko̱chjeén-ne i̱ i̱sò'nde, ján ngajmiì s'e̱-nò amigo xi skoétjò-nò ya̱ ñánda ki̱tsa̱jnaà ni̱ ta̱ mé na̱chrjein-ne. 10 ’Jè xi ndaà síkitasòn jè kjoa̱ xi chiba tjín, ti̱koa̱á ndaà síkitasòn jè kjoa̱ xi tse tjín; ta̱nga jè xi kona̱cha̱n kjoa̱ xi chiba tjín ti̱koa̱á kona̱cha̱n-né kjoa̱ xi tse tjín. 11 Jñò, tsà mì ndaà titsa̱nìchjeén tsojmì ko̱ to̱n xi tjín i̱sò'nde jè, mì kiì tjoé-nò kjoa̱ xi nguiì ndaà tjín ts'e̱ ngajmiì. 12 Tsà mì ndaà titsa̱nìkjeén tsojmì ko̱ to̱n xi mì tsa̱jòn-jèn xi Nainá kisìnga̱tsja-nò i̱ i̱sò'nde, ti̱koa̱á mì kiì tjoé-nò xi nguiì tsa̱jòn ján ngajmiì. 13 ’Ni̱ jngoò chi̱'nda xi jò ko̱ma nei-la̱ nga si̱ìxá-la̱; tsà jò ko̱ma nei-la̱, jngoò ko̱jtikeè koa̱ jngoò ko̱tsjakeè; jngoò ndaà kjit'aà-la̱ koa̱ ch'o si̱ìko̱ xijngoò. Jñò, tsà kjoa̱ nchi̱ná si̱ìs'in-là, mìkiì ko̱s'in-la̱ kjoa̱ ts'e̱ Nainá. 14 Jñà xi̱ta̱ fariseo nga tsjakeè to̱n, k'e̱ nga kiì'nchré ngats'iì kjoa̱ koi, tà tsijnòkeè Jesús. 15 K'e̱é kitsò-la̱ jè Jesús: —Jñò, ndaà nìkítsa̱jnaà yijo-nò nga nguixko̱n xi̱ta̱, ta̱nga Nainá, beè ini̱ma̱-nò nga mì tsà kixi̱ kjoa̱ nga ndaà 'nè. Jè kjoa̱ xi jeya síkíjna xi̱ta̱, Nainá ochrje-kàngui-né. 16 Jesús kitsò-ìsa: —Jñà Xo̱jo̱n-la̱ Nainá xi kiskiì Moisés ko̱ xi̱ta̱ xi kiìchja̱ ngajo-la̱ Nainá, jñà tímakjeén xo̱jo̱n koi skanda k'e̱ nga j'iì Juan xi kis'iìn bautizar xi̱ta̱. Tje̱n-ne na̱chrjein koi, skanda i̱'ndei̱, tínakjoàya 'én ndaà-la̱ Nainá kó s'ín otíxoma Nainá. Ngats'iì xi̱ta̱ xi mejèn-la̱ kjoa̱has'en-jiìn ñánda tíhotíxoma Nainá, bìnè-la̱ yijo-la̱. 17 ’Ñó 'in tjín tsà jè i̱sò'nde ko̱ ngajmiì chi̱ja, ta̱nga ìsa̱á ta 'ñó 'in tjín nga chi̱ja jngoò letra ts'e̱ kjo̱tíxoma-la̱ Nainá xi kiskiì Moisés. Mì kiì chi̱ja ni̱ ta̱ kjé-ne —kitsò Jesús. 18 ’Ni̱ ta̱ yá-ne xi tsjeiìn chjo̱ón-la̱ i̱kjoàn bixan-ko̱ jngoò chjo̱ón xi kj'ei̱í, kjoa̱ chijngui tís'ín; ti̱koa̱á jè x'i̱n xi bixan-ko̱ chjo̱ón xi kitsjeiìn x'i̱n-la̱, ti̱koa̱á kjoa̱ chijngui tís'ín, —kitsò-ìsa Jesús. 19 Jesús kitsò: —Tsibìjna jngoò xi̱ta̱ nchi̱ná xi 'ñó ndaà kjoàn nikje chjí xi tsohòkjá; na̱chrjein inchijòn kis'iìn s'eí xi ta̱xki̱ 'ñó ndaà ma. 20 Ti̱koa̱á tsibìjna jngoò xi̱ta̱ i̱ma̱ xi Lázaro ki'mì, xi jtsé tjín yijo-la̱. Ya̱á bìjna xòhotjoa̱ ni'ya-la̱ jè xi̱ta̱ nchi̱ná. 21 Xi̱ta̱ i̱ma̱ jè, fahajiìn xó-la̱ jñà xi̱-la̱ tsojmì xi kine jè xi̱ta̱ nchi̱ná nga bixòngui ími̱xa̱; ti̱koa̱á jñà nañá bijchó xó nga tomàjno jtsé-la̱. 22 K'e̱ nga k'en jè ndí xi̱ta̱ i̱ma̱, jñà àkja̱le̱-la̱ Nainá kiìko̱; ya̱ kisìkíjnat'aà-la̱ Abraham. Ti̱koa̱á chaán k'en jè xi̱ta̱ nchi̱ná; i̱kjoàn kisihi̱jiìn. 23 ’Ya̱ i̱'nde ts'e̱ mik'en ñánda nga tísíkjeiín kjo̱'in jè xi̱ta̱ nchi̱ná, kiskoòtsejèn, kijtseèxkon Abraham nga kjiìn tíjna; ya̱á tíjnat'aà-la̱ jè Lázaro. 24 Xi̱ta̱ nchi̱ná, k'e̱é 'ñó kiìchja̱ kitsò: “¡Na̱'èn Abraham, cha̱hi̱ma̱-takòn-ná! Ti̱kasín Lázaro nga kàtasíkanchi̱ jnótsja ya̱ i̱jiìn nandá nga kàtasíkijne 'nchán ni̱je̱n-na̱; 'ñó tse kjo̱'in tìsìkjiaán i̱ i̱jiìn ni'ín.” 25 Jè Abraham kitsò-la̱: “Na̱'èn, ti̱kítsjiìn k'e̱ nga tsijni i̱sò'nde, 'ñó ndaà tsijni. Jè Lázaro, kjo̱'iín kisìkjeiín, ta̱nga i̱'ndei̱, ndaà tíjna i̱jndé. Ngaji̱, kjo̱'iín tìnìkjeiín. 26 K'oa̱á s'ín tjín, ti̱koa̱á jngoò xa̱jngá jñò xi 'ñó na̱nga̱ kijna-ikòn mé-ne nga mì kiì ko̱ma ján ko̱tot'aà jñà xi̱ta̱ xi i̱ títsa̱jna; ti̱koa̱ xi títsa̱jna ján, mì kiì ko̱ma kji̱nchrobà i̱jndé.” 27 ’Kitsò jè xi̱ta̱ nchi̱ná: “Na̱'èn Abraham, an bìtsi'bà-lè ti̱kasín Lázaro ya̱ ni'ya-la̱ Na̱'èn-na̱; 28 òn ma-ne 'ntsè xi títsa̱jna; kàteèno̱jmí-la̱ xi o̱kixi̱ mé-ne nga ti̱koa̱ mì i̱í kji̱nchrobà-ne i̱'nde ts'e̱ kjo̱'in.” 29 Abraham kitsò-la̱: “Xi̱ta̱ xingui̱i, jyeé tjín-la̱ xo̱jo̱n-la̱ Moisés ko̱ ts'e̱ xi̱ta̱ xi kiìchja̱ ngajo-la̱ Nainá; ¡jñà kàta'nchré-la̱!” 30 K'e̱é kitsò jè xi̱ta̱ nchi̱ná: “Majìn, na̱'èn Abraham, tsà jngoò mik'en xi jye kijtseè kjo̱'in kjoi̱ ke̱èno̱jmí-la̱, si̱ìkájno jé-la nga mì ti̱ jé ko̱ótsji-ne.” 31 Jè Abraham kitsò-la̱: “Tsà mì kiì 'nchré-la̱ Moisés ko̱ xi̱ta̱ xi kiìchja̱ ngajo-la̱ Nainá, ti̱koa̱á mì kiì ko̱kjeiín-la̱ na̱s'ín kjoa̱áya jngoò-la̱ mik'en.”
