1 Jesús k'e̱ nga tífì ya̱ ndi̱yá, kijtseè jngoò xi̱ta̱ xi mì kiì tsejèn-la̱ xi xó k'oa̱s'ín kits'iìn-ne. 2 Xi̱ta̱ xi kota'yàt'aà-la̱ Jesús kiskònangui-la̱ kitsò-la̱: —Maestro, xi̱ta̱ jè, ¿mé-ne k'oa̱s'ín kits'iìn-ne? ¿Yá xi tsohótsji jé? ¿A jñà xi̱ta̱ jchínga-la̱ o xi jè xi̱ta̱ xi mì kiì tsejèn-la̱? 3 Kiìchja̱ Jesús kitsò-la̱: —Mìtsà jè xi̱ta̱ xi mì kiì tsejèn-la̱ tjín-la̱ jé, ni̱ mìtsà jñà xi̱ta̱ jchínga-la̱ tsohótsji jé. Koií-né nga i̱t'aà ts'e̱ xi̱ta̱ koi jcha̱-la̱ kjo̱xkón ndaà-la̱ Nainá. 4 Mochjeèn-né nga sikitasoàn kjo̱xkón ndaà-la̱ jè xi kisìkasén-na̱ nga na̱chrjein ìsa̱. Ki̱jchò na̱chrjein k'e̱ nga ko̱jñò; ni̱ ti̱ jngoò-ne xi ko̱ma siìxá. 5 K'e̱ tókó i̱ tijna̱a ìsa̱ i̱sò'nde, an-ná ni'ín xi sìhiseèn-la̱ xi̱ta̱ i̱sò'nde. 6 K'e̱ nga jye o̱kitsò, tsibíchrá i̱t'aà nangui. Jè ndána̱chrá-la̱ tsibíndaà-ne ndási, i̱kjoàn kisìkaàjno xko̱n jè xi̱ta̱ xi mì kiì tsejèn-la̱. 7 I̱kjoàn kitsò-la̱: — Tin, kaníkjoìn ya̱ chrjó nandá Siloé (jè 'én xi tsòya-ne, jè xi kinìkasén). Jè xi̱ta̱ xi mì kiì tsejèn-la̱ kiì kaníkjoa̱n, k'e̱ nga i̱nchrobá-ne jye tsejèn-la̱. 8 Jñà xi̱ta̱ i̱ndi ni'ya-la̱ jè xi̱ta̱ xi mì kiì tsejèn-la̱, ko̱ jñà xi̱ta̱ xi jye kjòtseé beèxkon nga to̱n síjé kjo̱tjò, kitsò-la̱ xíkjín: —¿A mìtsa jè xi̱ta̱ jè xi bìjna nga síjé kjo̱tjò to̱n? 9 Tjín i'nga xi̱ta̱ xi tsò: —Jè-né. Koa̱ jñà xi̱ta̱ xi i'nga kitsò: —Kjo̱meè k'oa̱á kji, ta̱nga mìtsà jè. K'e̱é kiìchja̱ xi̱ta̱ xi mì kiì tsejèn-la̱ nga sa ítjòn, kitsò: —'An-ná. 10 Jñà xi̱ta̱ kiskònangui-la̱ kitsò-la̱: —¿Kós'ín komà nga kitjáxa̱-ne xkoiìn? 11 Xi̱ta̱ jè kitsò: —Jè xi̱ta̱ xi 'mì Jesús, kisindaà ndási, kisìkaàjno xkoaàn, i̱kjoàn kitsò-na̱: “Tin, kaníkjoin ya̱ chrjó nandá Siloé.” An, kiaà, k'e̱ nga jye tsaníkjoa̱n, komà kotsejèn-na. 12 Jñà xi̱ta̱ koi kiskònangui-la̱ kitsò-la̱: —Xi̱ta̱ jè, ¿Ñánda tíjna? Jè xi̱ta̱ xi jye kjòndaà-ne, kitsò: —Mì kiì be ñánda tíjna. 13 Jè xi̱ta̱ xi mì kiì tsejèn-la̱ nga jye kjòndaà-ne kiìko̱ ñánda títsa̱jna xi̱ta̱ fariseo, 14 koií kjoa̱-la̱ nga na̱chrjein nìkjáya-né k'e̱ nga tsibíndaà ndási Jesús nga kisikaájno xko̱n jè xi̱ta̱ xi mì kiì tsejèn-la̱ mé-ne ko̱ma kitjáxa-ne xko̱n. 15 Jñà xi̱ta̱ fariseo ìjngoò k'a kiskònangui-la̱ jè xi̱ta̱ xi mì kiì tsejèn-la̱ xi jye kjòndaà-ne, kitsò-la̱: —¿Kós'ín komà nga kitjáxa-ne xkoiìn? Xi̱ta̱ jè kitsò: —Ndásií kisìkaájno xkoaàn; i̱kjoàn tsaníkjoàn; i̱'ndei̱ jyeé tsejèn-na̱. 16 Tjín i'nga xi̱ta̱ fariseo xi kitsò: —Xi̱ta̱ jè, mì-la tsà Nainá kisìkasén nga mì kiì beèxkón na̱chrjein nìkjáya. Ti̱koa̱ tjín i'nga xi kitsò: —¿Kós'ín ma-ne nga ma-la̱ s'ín kjo̱xkón xi ndaà tjín tsà xi̱ta̱ jé-né? I̱kjoàn kòjòya xi ti̱ jñà-ne xi̱ta̱ fariseo; mì kiì kjòngásòn kjo̱hítsjeèn-la̱. 17 Ìjngoò k'a kitjànangui-la̱ jè xi̱ta̱ xi mì kiì tsejèn-la̱ xi jye kjòndaà-ne, kitsò-la̱: —Ngaji̱, ¿Kó si, yá xi̱ta̱-ne xi kiskíx'a-ne xkoiìn? Xi̱ta̱ jè kitsò: —Jngoò xi̱ta̱ xi chja̱ ngajo-la̱ Nainá. 18 Ta̱nga jñà xi̱ta̱ judío, mì kiì kòkjeiín-la̱ tsà kixi̱ kjoa̱ nga jè xi̱ta̱ xi mì kiì tsejèn-la̱ nga k'oa̱s'ín kits'iìn koa̱ i̱'ndei̱ jyeé tsejèn-la̱. K'e̱é kiìchja̱-la̱ jñà xi̱ta̱ jchínga-la̱, 19 kiskònangui-la̱ kitsò-la̱: —Jè xi̱ta̱ jè, ¿a ki'ndí-nò ma? ¿A kixi̱í kjoa̱ nga mì kiì tsejèn-la̱ k'e̱ nga sa̱ kits'iìn? ¿Kó ma-ne nga tsejèn-la̱ i̱'ndei̱? 20 Jñà xi̱ta̱ jchínga-la̱ kitsò: —'Ya-náje̱n nga ki'ndí-naje̱n ma. Kixi̱í kjoa̱ nga mì kiì tsejèn-la̱ k'e̱ nga sa̱ kits'iìn. 21 Ta̱nga mì kiì 'ya-je̱n mé-ne nga ma tsejèn-la̱ i̱'ndei̱, ti̱koa̱á mì kiì 'ya-je̱n yá-né xi kiskíx'a̱-ne xko̱n. Jè sobà chji̱nangui-là, jè kàteèno̱jmí-nò, nga jyeé xi̱ta̱ jchínga. 22 Jñà xi̱ta̱ jchínga-la̱ koií k'oa̱s'ín kitsò-ne nga jñà tsakjón-la̱ xi̱ta̱ judío. Jñà xi̱ta̱ judío jyeé k'oa̱s'ín tsajoóya-ne nga jngoò k'aá ki̱tjokàjiìn ya̱ ni'ya i̱ngo̱ sinagoga, tsà yá xi̱ta̱ xi ki̱tso̱ nga jè Jesús jè xi Cristo [xi xó kisìkasén-ne Nainá.] 23 Koií k'oa̱ tis'ín kitsò-ne jñà xi̱ta̱ jchínga-la̱, nga kitsò: “Jè sobà chji̱nangui-là, nga jyeé xi̱ta̱ jchínga-né.” 24 Jñà xi̱ta̱ judío ìjngoò k'a kiìchja̱-la̱ jè xi̱ta̱ xi mì kiì tsejèn-la̱, kitsò-la̱: —Tèno̱jmí kixi̱-náje̱n nga nguixko̱n Nainá. Ngaji̱n 'ya-náje̱n nga jè xi̱ta̱ jè, xi̱ta̱ jé-né. 25 Jè xi̱ta̱ xi mì kiì tsejèn-la̱ xi jye kjòndaà-ne kiìchja̱, kitsò: —'An, mì kiì be tsà xi̱ta̱ jé-né. Tà jè xi be, k'e̱ nga sa̱ kits'iaàn mì kiì tsejèn-na, ta̱nga i̱'ndei̱ jyeé tsejèn-na. 26 Ìjngoò k'a kitsò-la̱: —¿Mé xi kis'iìn ko̱-lè? ¿Kó s'ín kis'iìn ko̱-lè nga kitjáx'a̱-ne xkoiìn? 27 Jè xi̱ta̱ xi mì kiì tsejèn-la̱ kitsò: —Jyeé koa̱ kàxan-nò, ta̱nga jñò mì kiì na'yà. ¿Mé-ne mejèn-nò nga ìjngoò k'a k'oa̱ xán-nò? ¿A ti̱koa̱á mejèn-nò nga xi̱ta̱-la̱ ko̱ma nga ya̱ chíta'yat'aà-là? 28 Jñà xi̱ta̱ judío k'e̱ nga k'oa̱ ki'mì-la̱, kòjti-la̱, kiìchja̱jno-la̱ jè xi̱ta̱ xi mì kiì tsejèn-la̱, kitsò-la̱: —Ji̱-né xi̱ta̱ xi ya̱ chita'yat'aà-la̱. Ta̱nga ngaji̱n ya̱á chita'yat'aà-la̱je̱n Moisés. 29 'Ya-náje̱n nga jè sobà Nainá kiìchja̱ko̱ Moisés. Ta̱nga jè xi̱ta̱ jè mì kiì 'ya-je̱n ñánda j'iì-ne. 30 Jè xi̱ta̱ xi mì kiì tsejèn-la̱ kitsò: —Kjoa̱ jè, tà maxkón-ná nga jñò, mì kiì 'ya ñánda j'iì-ne xi̱ta̱ jè, ta̱nga an be-ná nga jè kiskíx'a̱-ne xkoaàn. 31 'Yaà-ná jñà xi̱ta̱ xi tjín-la̱ jé, mì kiì 'nchré-la̱ Nainá. Ta̱nga jñà xi̱ta̱ xi tsakjónkeè Nainá ti̱koa̱ síkitasòn koni s'ín mejèn-la̱, jñà-né xi 'nchré-la̱. 32 Kóni nga ti̱sa̱ kjòtseé, ni̱ saá jngoò xi̱ta̱ na'ya-la̱ xi ma-la̱ kíx'a-ne xko̱n jngoò xi̱ta̱ xi mì kiì tsejèn-la̱ k'e̱ nga k'oa̱s'ín kits'iìn. 33 Xi̱ta̱ jè, tsà mìtsà Nainá kisìkasén, ni̱ mé xi ko̱ma-la̱ nga k'oa̱s'ín s'i̱in. 34 Jñà xi̱ta̱ judío kitsò-la̱ jè xi̱ta̱ xi mì kiì tsejèn-la̱: —Ngaji̱ xi ta̱xki̱ 'ñó tsee jé tjín-le, ¿a jií mejèn-le ko̱kòya-naje̱n? I̱kjoàn tsachrje ni'ya i̱ngo̱ sinagoga. 35 Jesús kiì'nchré nga jè xi̱ta̱ jè kinachrjekàjiìn ya̱ ni'ya i̱ngo̱ sinagoga. K'e̱ nga kisatiìkjoò ìjngoò k'a, kiskònangui-la̱ kitsò-la̱: —Ji, ¿a mokjeiín-le i̱t'aà ts'e̱ xi Ki'ndí-la̱ Xi̱ta̱ tsò-la̱ yijo-la̱? 36 Xi̱ta̱ jè kitsò: —Na̱'èn, k'oa̱ tìn-ná yá-né, mé-ne nga ko̱kjeiín-na i̱t'aà ts'e̱. 37 Jesús kitsò-la̱: — Jyeé ki'yi, an-ná xi tíchjàko̱-le. 38 Xi̱ta̱ jè tsasìjnaxkó'nchi-t'aà-la̱ Jesús nga kijtseèxkón, kitsò-la̱: —Na̱'èn mokjeiín-na̱ i̱t'aà tsi̱ji. 39 I̱kjoàn kitsò Jesús: —An, koií xá j'iì-na̱ i̱ i̱sò'nde; nga an skosòn-la̱ mé-ne jñà xi̱ta̱ xi mì kiì tsejèn-la̱ ko̱tsejèn ìjngoò k'a-la̱, koa̱ jñà xi tsejèn-la̱ mì kiì ko̱tsejèn-la̱. 40 Tjín i'nga xi̱ta̱ fariseo xi ya̱ títsa̱jnako̱ Jesús, k'e̱ nga kiì'nchré 'én koi, kiskònangui-la̱ kitsò-la̱: —Ngaje̱n, ¿a ti̱koa̱á mì kiì tsejèn-naje̱n? 41 Jesús kiìchja̱ kitsò-la̱: —Jñò, tsà mì kiì tsejèn-nò, tsjìn-nò jé. Ta̱nga bixón-nò: “tsejèn-naje̱n”, k'oa̱á ma-ne nga ya̱ tjínè-nò jé-nò.
