1 Ta̱nga Jesús, ján kiì ya̱ nindoò Yá Olivo. 2 Nga komà nchijòn ta̱jñòyaá j'iì-ne ya̱ i̱ngo̱ ítjòn. Ngats'iì xi̱ta̱ j'iì tji̱ngui-la̱ Jesús ñánda tíjna. K'e̱é tsibìjna nga tsakóya-la̱ jñà xi̱ta̱. 3 Jñà xi̱ta̱ xi okóya kjo̱tíxoma-la̱ Nainá xi kiskiì Moisés ko̱ xi̱ta̱ fariseo ijchòko̱ jngoò chjo̱ón xi ki'yatin-la̱ nga kjoa̱ chijngui tís'ín. Tsasíjna osen ñánda títsa̱jna ngats'iì xi̱ta̱; 4 Jñà xi̱ta̱ koi kitsò-la̱ Jesús: —Maestro, chjo̱ón jè, ndaà kà'yatin-la̱ nga kjoa̱ chijngui tís'ín. 5 Jè kjo̱tíxoma-la̱ Moisés, k'oa̱á s'ín tíchja̱ nga jñà íchjín xi k'oa̱ tjín kjoa̱ xi ótsji ndo̱jo̱ó ki̱yá-ne . Nga̱ji̱, ¿kó si? 6 Jñà xi̱ta̱ koi, koií k'oa̱ s'ín kitsò-la̱ Jesús nga mejèn-la̱ skót'aà, mé-ne ko̱ma ko̱óngui-ne i̱t'aà ts'e̱ xi̱ta̱xá. Ta̱nga Jesús, tsasìñia-t'aa nangui nga kiskiìjno-ne ko̱ jnótsja i̱t'aà nangui. 7 Xi̱ta̱ koi nga siì nchis'ín nga kjònangui, Jesús tsasíjna kixi̱ kitsò-la̱: —Jñò, tsà tjín i'nga xi̱ta̱ xinguio̱o xi tsjìn-la̱ jé, jè katínè ítjòn ndo̱jo̱ chjo̱ón jè. 8 Jesús ìjngoò k'a tsasíñia nga kiskiìjno ìsa̱ i̱t'aà nangui. 9 Jñà xi̱ta̱ koi, k'e̱ nga kiì'nchré koni s'ín kitsò Jesús, tà íjngó íjngó kiì-ne, nga kijtse nga mì kiì ndaà tjín kjo̱hítsjen xi kiìchja̱, tsibítsia-ne xi xi̱ta̱ jchínga, i̱kjoàn kiì-ne i̱xti. Tà jè ta̱jngoò Jesús ko̱ chjo̱ón tsibìtsa̱jna. 10 Jesús tsasíjna kixi̱-ne, kijtseè nga mì ti̱ yá xi̱ta̱ tjín-ne. Ta̱ jè ta̱jngoò chjo̱ón síjna. K'e̱é kitsò-la̱: —¿Ñánda títsa̱jna xi̱ta̱ xi óngui-le? ¿A ni̱ jngoò xi kòhónè-le kjo̱'in? 11 Jè chjo̱ón kitsò: —Na̱'èn, ni̱ yá-jèn. Jesús kitsò-la̱: — Ti̱koa̱á an, mì kiì kinè-le kjo̱'in. Tin-ne ni'ya-le; kì ti̱ jé binchaàtsji-ne. 12 Jesús, ìjngoò k'a kiìchja̱-jiìn-la̱ jñà xi̱ta̱, kitsò-la̱: —An-ná ni'ín xi síhiseèn-la̱ i̱sò'nde. Jè xi 'an fìt'aà-na s'e̱é-la̱ ni̱'ín xi tsjá kjoa̱bijnachoòn. Mì ti̱ kiì ya̱ ko̱jmejiìn-ne kjoa̱jñò. 13 Jñà xi̱ta̱ fariseo kitsò: —Ti jií tí'bi-ne 'én i̱t'aà tsi̱ji. 'Én xi nokjoì, ni̱ mé chjí-la̱. 14 Jesús kiìchja̱ kitsò-la̱: —'Én xi chjà, chjí-la̱-né, na̱s'ín ti̱ 'an tsjaà-na 'én xi i̱t'aà ts'a̱n. Nga be-ná ñánda j'i̱-na ko̱ ñánda tifia. Ta̱nga jñò mì kiì 'yaà ñánda j'i̱-na ko̱ ñánda tifia. 15 Jñò, tà kjo̱hítsjeèn ts'e̱ xi̱ta̱á nìkjeén k'e̱ nga jé bínè-ná. Ta̱nga an ni̱jngoò xi̱ta̱ bìnè-la̱ jé. 16 Ta̱nga an, tsà yá xi̱ta̱ xi konè-la̱ jé, kjoa̱kixi̱í xi s'iaàn. Nga mìtsà ta̱jngoò bindaàjiaàn, ko̱ó Na̱'èn-na̱ xi kisìkasén-na̱ bíndaàjiìn-ko̱-na. 17 Kjo̱tíxoma tsa̱jòn k'oa̱s'ín tíchja̱ nga tsò: K'e̱ nga tsà jò ma-ne xi̱ta̱ xi tsjá 'én, tsà ngásòn tsò ingajò, kixi̱í kjoa̱, chjí-la̱ né. 18 Ti̱ aán-na̱ xi tsjá 'én i̱t'aà ts'a̱n. Ko̱ ti̱koa̱á jè Na̱'èn-na̱ xi kisìkasén-na̱ tsjá 'én i̱t'aà ts'a̱n. 19 Jñà xi̱ta̱ fariseo, kiskònangui-la̱ kitsò-la̱: —¿Ñánda tíjna Na̱'èn-le? Kiìchja̱ Jesús, kitsò-la̱: —Jñò, an, mì kiì 'yaxkon-ná, ni̱ jè Na̱'èn-na̱ mì kiì 'yaxkon. An, tsà 'yaxkon-ná ti̱koa̱á jcha̱xkon-nò Na̱'èn-na̱. 20 K'e̱ nga tsakóya jñà 'én koi Jesús, ya̱á tíjna ya̱ i̱ngo̱ ítjòn ya̱ chrañàt'aà-la̱ i̱'nde ñánda maxkón to̱n kjo̱tjò. Ni̱ jngoò xi̱ta̱ xi kitsò ikon nga kitsobà'ñó Jesús nga kj'eè kiì bijchó na̱chrjein-la̱ nga ki̱yá. 21 Jesús ìjngoò k'a kitsò-la̱: —An, tìfi-ná. Jñò, ki̱nchátsi-ná. Ta̱nga jñò ya̱á ki̱yájñoò jé-nò. Ya̱ ñánda an tìfia, jñò mì kiì ko̱ma konguió. 22 Jñà xi̱ta̱ judío kitsò-la̱ xíkjín: —¿A ti̱jé si̱ìk'en-ne yijo-la̱? ¿Mé-ne k'oa̱ tsò-ne, nga tsò: Ya̱ ñánda an tífia, jñò mì kiì ko̱ma konguió? 23 Jesús kitsò-la̱: —Jñò, i̱í i̱t'aà nangui tsa̱jòn, ta̱nga an ján ngajmiì ts'a̱n. Jñò, i̱í i̱'nde-nò i̱sò'nde, an, mìtsà i̱sò'nde i̱'nde-na̱. 24 Koií k'oa̱s'ín kixan-nò nga ya̱ ki̱yájño jé-nò nga mì kiì mokjeiín-nò nga An-ná (xi Cristo). Koií kjoa̱-la̱ nga ki̱yájño jé-nò. 25 Xi̱ta̱ judío, kiskònangui-la̱, kitsò-la̱: —¿Yá-ne ngaji̱? Jesús kiìchja̱, kitsò-la̱: —Jyeé o̱kixan-nò nga sa̱ ítjòn yá-ná 'an. 26 I̱t'aà tsa̱jòn, kjín kjoa̱ tjín ìsa̱ xi an keno̱jmí-nò, ko̱ xi an kíndaàjiìn-ko̱-nò. Jè xi kisìkasén-na nguì 'én kixi̱í xi chja̱. Koni s'ín ki'nchrè-la̱, k'oa̱á tjín 'én xi an chjà-jiìn-la̱ jñà xi̱ta̱ i̱sò'nde. 27 Ta̱nga jñà xi̱ta̱ judío mì kiì kjòchi̱ya-la̱ tsà i̱t'aà ts'e̱ Na̱'èn-ná xi Nainá tíchja̱ Jesús. 28 Jesús kitsò-la̱: —Jñò, k'e̱ nga chjímiì'nga-ná 'an xi Ki'ndí-la̱ Xi̱ta̱ xan-la̱ yijo-na̱, k'e̱é ko̱chi̱ya-nò nga An-ná (xi Cristo). Ni̱ mé kjoa̱ xi s'iaàn xi ta̱ kjo̱hítsjeèn ts'a̱n. K'oa̱s'ín chjà koni s'ín tsakóya-na xi Na̱'èn ma. 29 Jè xi kisìkasén-na i̱í tíjnako̱-na. Mì kiì síkíjna ta̱jngoò-na Na̱'èn-na̱. Koií kjoa̱-la̱ nga kjit'aà na̱chrjein sìkitasoàn koni s'ín sasén-la̱ jè. 30 Jesús, k'e̱ nga kiìchja̱ 'én koi, kjìn jchán xi̱ta̱ kòkjeiín-la̱ i̱t'aà ts'e̱. 31 Jesús kitsò-la̱ jñà xi̱ta̱ judío xi kòkjeiín-la̱ i̱t'aà ts'e̱: —Tsà kixi̱ si̱ikitasòn 'én-na̱ xi okoòya-nò, jñò-nò xi nguiì kixi̱ kjoa̱ nga 'an kota'yàt'aà-na. 32 Jcha̱xkoòn xi kjoa̱ kixi̱, koa̱ jè kjoa̱ kixi̱ si̱ìkítsa̱jnandeií-nò. 33 Kiìchja̱ xi̱ta̱ judío, kitsò: —Ngaji̱n, xi̱ta̱ tje̱-la̱ Abraham-náje̱n. Ni̱sa̱á jngoò xi̱ta̱ xi kj'ei̱í síkítsa̱jna'ñó-naje̱n. Ngaji̱, ¿Mé-ne k'oa̱ si-ne nga ki̱tsa̱jnandeií-naje̱n? 34 Jesús kitsò-la̱: —Nguiì kjoa̱ kixi̱í xi xan-nò, ngats'iì xi̱ta̱ xi jé ótsji, ya̱á títsa̱jna'ñó i̱t'aà ts'e̱ jé-la̱, k'oa̱á ngaya koni jngoò xi̱ta̱ chi̱'nda xi tíjna'ñó-la̱ nei-la̱. 35 Jngoò xi̱ta̱ xi chi̱'nda tíjna, mì kiì tjí'nde-la̱ nga ya̱ kíjna kjit'aà ya̱ ni'ya ñánda síxá. Ta̱nga jngoò xi ki'ndí ma, tjí'ndeé-la̱ nga kjit'aà na̱chrjein ya̱ kíjna ya̱ ni'ya-la̱ na̱'èn-la̱. 36 K'oa̱á ma-ne, tsà jè Ki'ndí-la̱ Nainá si̱ìkíjnandeií-nò, nguiì kixi̱í kjoa̱ nga jñò, ki̱tsa̱jnandeií-nó. 37 An, be-ná nga tje̱-la̱ Abraham-nò; ta̱nga jñò mejèn-nò nga si̱ìk'en-ná, koií-né nga mì kiì mokjeiín-nò 'én-na̱ xi chjà. 38 An, k'oa̱ás'ín chjà koni s'ín tjín xi kijtseè k'e̱ nga ti̱sa̱ tijna̱koa̱a Na̱'èn-na̱. Jñò, k'oa̱á ti̱ s'ín 'nè koni s'ín kina'yà-là na̱'èn-nò. 39 Jñà xi̱ta̱ judío kitsò: —Jè tje̱-na̱je̱n, ya̱á inchrobát'aà-ne ts'e̱ Abraham. Jè na̱'èn jchá kjiìn-naje̱n. Jesús kiìchja̱ kitsò-la̱: —Tsà kixi̱ kjoa̱ nga i̱xti-la̱ Abraham 'mì-nò, k'oa̱ás'ín s'e̱en koni s'ín kis'iìn Abraham. 40 An, na̱s'ín jye k'oa̱s'ín tsibeèno̱jmí kixi̱-nò, nga Nainá kitsjaà-na 'én xi chjà, jñò mejèn-nò nga siìk'en-ná. Abraham mì k'oa̱á kis'iìn. 41 Jñò, k'oa̱s'ín 'nè koni s'ín na̱'èn-nò. Jñà xi̱ta̱ judío kitsò: — Ngaji̱n, mìtsà kjoa̱ chijngui kits'iìn-jiìn-je̱n. Ta̱jngoò jè Na̱'èn-naje̱n, jè Nainá. 42 Jesús kiìchja̱, kitsò-la̱: —Tsà kixi̱ kjoa̱ nga jè na̱'èn-nò Nainá, an tjòchaá-la s'e̱n-ná nga i̱t'aà ts'e̱ Nainá inchrobà-na; mìtsà tà kjo̱tsja ts'a̱n nga j'ia̱a; Nainá kisìkasén-na. 43 ¿Mé-ne mì kiì machi̱ya-nò 'én-na̱ xi chjà-ko̱-nò? Koií-né nga mì kiì ma-nò na'yàñijon. 44 Na̱'èn-nò, jè xi̱ta̱ nei̱í, jè nokjoà-nò. K'oa̱ás'ín 'nè koni s'ín mejèn-la̱ na̱'èn-nò. Jè xi ma-la̱ sík'en xi̱ta̱ kóni nga tisa tàts'en-la̱ kjoa̱. Mì tsà kjoa̱ kixi̱ s'ín nga tsjìn-la̱ kjoa̱ kixi̱. K'e̱ nga chja̱ 'én ndiso, k'oa̱á tsò koni s'ín tjín ini̱ma̱-la̱ nga nguiì xi̱ta̱ ndiso-né. Jè na̱'èn-la̱ ts'e̱ 'én ndiso. 45 Ta̱nga an, 'én kixi̱ beèno̱jmí-nò; koií kjoa̱-la̱ jñò, mì kiì mokjeiín-nò. 46 ¿Yá xi̱ta̱ xinguio̱o xi ko̱ma-la̱ ko̱kò mé jé xi tjín-na? K'e̱ nga chjà-ko̱-nò, nguiì 'én kixi̱ chjà, ko̱ ¿mé-ne mìkiì mokjeiín-nò? 47 Jè xi xi̱ta̱-la̱ Nainá, 'én-la̱ Nainá 'nchré. Ta̱nga jñò, nga mì kiì na'yà, koií-né nga mì tsà xi̱ta̱-la̱ Nainá 'mì-nò. 48 Jñà xi̱ta̱ judío kiìchja̱, kitsò-la̱ Jesús: —Ngaje̱n, koií kjoa̱-la̱ k'oa̱s'ín 'mì-lèje̱n: ji xi̱ta̱ Samaria-né, ini̱ma̱ ch'o-la̱ neií tíjiìn ini̱ma̱-le. 49 Kiìchja̱ Jesús kitsò-la̱: — An, mìtsà ini̱ma̱ ch'o-la̱ nei̱í tíjiìn ini̱ma̱-na̱. Jè kjoa̱ xi tís'ian, jè-né nga bexkoán Na̱'èn-na̱. Ta̱nga jñò mìkiì yaxkón-ná. Tà sa̱á nachrjengui-ná. 50 Mìtsà jè kjoa̱ tìhòtsjia nga jeya sìkíjna yijo-na̱. Tíjna jngoò xi tíkoson-la̱, jè-né xi jeya síkíjna-na. 51 Nguì 'én kixi̱ xi chjàko̱-nò, jè xi siìkitasòn 'én-na̱ koni s'ín xan-nò, mì kiì ki̱yá ni̱ta̱kjé-ne. 52 Xi̱ta̱ judío kiìchja̱, kitsò: —I̱'ndei̱ jyeé 'ya-je̱n nga ini̱ma̱ ch'o-la̱ neií tíjiìn ini̱ma̱-le. Abraham ko̱ ngats'iì xi̱ta̱ xi kiìchja̱ ngajo-la̱ Nainá kjotseé, k'en-né. Ta̱nga ji si-né: "Jè xi síkitasòn 'én-na̱ koni s'ín xan-nò, mì kiì ki̱yá." 53 Nga̱ji̱, ¿a ìsa̱ tíjna ítjoi a mì k'oa-ne koni jè Na̱'èn-na̱je̱n Abraham? K'en-né. Ko̱ ngats'iì xi̱ta̱ xi kiìchjaya̱ ngajo-la̱ Nainá ti̱koa̱á k'en-neé. ¿Yá-ne ji nga ti̱ji ti̱na̱chrje jeya-ne yijo-le? 54 Kiìchja̱ Jesús kitsò-la̱: — Tsà ti̱ an jeya sìkíjna-na yijo-na̱, nìmé chjí-la̱. Jè xi jeya síkíjna-na, jè Na̱'èn-na̱ xi Nainá 'mì-là. 55 Jñò mì kiì yaxkon Nainá, ta̱nga an beèxkon-ná. Tsà xán-nò mì kiì bexkoan, xi̱ta̱ ndiso ko̱ma koni jñò nga xi̱ta̱ ndiso-nò. An, bexkon-ná koa̱ sìkitasòn-ná 'én-la̱. 56 Xi̱ta̱ jchínga-nò Abraham, tsja komà-la̱ nga mejèn-la̱ skoe̱xkon na̱chrjein-na̱ nga j'ia̱a. K'e̱ nga kijtseè na̱chrjein-na̱ ìsa̱ 'ñó ndaà kjòtsja-la̱. 57 Jñà xi̱ta̱ judío kitsò-la̱: —Skanda kj'eè tjín-le icháte nó, ¿Kós'ín komà-ne nga kiyaxkoin Abraham? 58 Jesús kiìchja̱ kitsò-la̱: —Nguiì kixi̱ kjoa̱ xi xan-nò, 'An-ná xi ìsa̱ kjòtseè tijna̱ koni jè Abraham. 59 Jñà xi̱ta̱ judío, kiskoé ndo̱jo̱ nga mejèn-la̱ ko̱sén-la̱ Jesús. Ta̱nga Jesús tsibìjna'ma, itjo-ne ndi̱tsin i̱ngo̱, jahajiìn osèn-la̱ xi̱ta̱, i̱kjoàn kiì.
