1 K'e̱ nga jye k'oa̱s'ín komà kjoa̱ koi, nga komà i̱skan, jñà xi̱ta̱ judío tsibíjna jngoò s'eí ján Jerusalén. Jesús kiì ìjngoò k'a ján Jerusalén. 2 Ya̱ Jerusalén tíjna jngoò chrjó nandá xi 'mì Betesda nga 'én hebreo. 'Òn ma nguitjoa̱ xi tjín-la̱. Ya̱á tíjna chrañàt'aà-la̱ xòhotjoa̱ ts'e̱ orrè. 3 Ya̱ nguitjoa̱-la̱ kjìn xi̱ta̱ xk'én ki̱yijòngui: xi mì kiì tsejèn-la̱, xi tsáyá kjoàn, xi mì kiì ma síkjaníyá. Ngats'iì xi̱ta̱ koi nchikoña-la̱ k'e̱ nga síjtiya-la̱ nandá xi 'ncha jè chrjó. 4 Jngoò àkja̱le̱-la̱ Nainá xi tà kjé tà kjé bitjojen-ne nga síjtiya-la̱ nandá. Jè xi̱ta̱ xk'én xi fahas'en-jiìn ítjòn nandá k'e̱ nga jye tíya-la̱, ni̱to̱ón mandaà-ne ni̱ta̱ mé ch'in xi tjín-la̱. 5 Ya̱ kijna-jiìn jngoò xi̱ta̱ xi jye tjín-la̱ kan chrj'oòn jàn nó nga xk'én. 6 Jesús, k'e̱ nga kijtseèxkon nga ya̱ kijna, kisijiìn-la̱ nga jyeé 'ñó kjòtseé xk'én. Kitsò-la̱: —¿A mejèn-le ko̱ndaà-ne? 7 Jè xi̱ta̱ xk'én, kitsò: —Na̱'èn, mì yá xi síchját'aà-na nga kinísen-jiìn-na k'e̱ tiya-la̱ nandá. 'An, k'e̱ nga mejèn-na fahas'en-jñà kj'eií xi̱ta̱ síkijne-na nga fahas'en-jiìn ítjòn. 8 Jesús, kitsò-la̱: —Ti̱sítji̱in, chjoí nijña-lè, ti̱tjájmì. 9 Xi̱ta̱ jè ni̱to̱ón kjòndaà-ne, kiskoé-ne nijña-la̱, komà tsajmeè-ne. Na̱chrjein jè, na̱chrjein nìkjáya-né. 10 Jñà xi̱ta̱ judío kitsò-la̱ jè xi̱ta̱ xi kjòndaà-ne: —Na̱chrjein i̱'ndei̱, na̱chrjein nìkjáya-né. Mì kiì tjí'nde-lè nga kíkoi̱i nijña-le. 11 Xi̱ta̱ jè kitsò: —Jè xi̱ta̱ xi kàsindaà-na̱, jè sobà xi ko̱kàtsò-na: “Chjoí nijña-le, ti̱tjájmi.” 12 Jñà xi̱ta̱ koi kiskònangui-la̱, kitsò-la̱: —¿Yá-né xi o̱kàtsò-le: “Chjoí nijña-le, ti̱tjájmì”? 13 Jè xi̱ta̱ xi jyeé kòndaà-ne mì kiì beèxkon yá xi̱ta̱-ne xi kisìndaà-ne nga jè Jesús jyeé xìn kiì nga itjokàjiìn-la̱ xi̱ta̱ xi kjìn ma-ne xi ya̱ títsa̱jna. 14 Xi komà i̱skan, Jesús kisatiìkjoò ìjngoò k'a xi̱ta̱ jè ya̱ i̱yà i̱ngo̱, kitsò-la̱: —Jyeè kòmondaà-ne; ta̱nga kì ti̱ jé binchaàtsji-ne, mé-ne nga mì ìsa̱ ch'o tjín kjoa̱ xi ko̱matin. 15 Xi̱ta̱ jè kiìkon jñà xi̱ta̱ judío, tsibèno̱jmí-la̱ nga jè Jesús xi kisindaà-ne. 16 Jñà xi̱ta̱ judío kiìtji̱ngui kondra̱-la̱ Jesús, mejèn-la̱ si̱ìk'en koií kjoa̱-la̱ nga k'oa̱ás'ín s'ín k'e̱ nga na̱chrjein nìkjáya. 17 Ta̱nga Jesús kitsò-la̱: —Na̱'èn-na̱ skanda na̱chrjein i̱'nde k'oa̱á tjín xá xi tís'ín, ti̱koa̱á 'an k'oa̱á ti̱ s'ín tís'ian. 18 K'oa̱á ma-ne jñà xi̱ta̱ judío ìsa̱á 'ñó ndaà kiìtji̱ngui kondra̱-la̱ Jesús nga mejèn-la̱ siìk'en. Mìtsà tà koií kjoa̱-la̱ nga mì kiì beèxkón na̱chrjein nìkjáya, ti̱koa̱á koií-né nga jè Jesús Na̱'èn-na̱ tsò-la̱ Nainá. K'oa̱ás'ín tísiìngásònkjoò yijo-la̱ koni Nainá nga k'oa̱ tsò. 19 Jesús kitsò-la̱: —Xi nguiì o̱kixi̱ xi xan-nò, 'an xi Ki'ndí-la̱ Nainá nì mé kjoa̱ xi s'iaàn xi tà kjo̱hítsjeèn ts'a̱n, tà koií kjoa̱ s'iaàn xi be koni s'ín Na̱'èn-na̱. Ngats'iì kjoa̱ xi s'ín Na̱'èn-na̱, 'an xi Ki'ndí ma, k'oa̱á ti s'ín s'iaàn. 20 Jè xi Na̱'èn-na̱ ma, 'ñó tsjakeè-na nga Ki'ndí-la̱ tsò-na; okó yije-na̱ mé xi s'iaàn. Ko̱kó ìsa-na kjoa̱ xi ìsa̱ 'ñó xkón tjín, mé-ne jñò k'e̱ nga jcha̱a ìsa̱ 'ñó ndaà ko̱xkón-nò. 21 Koni s'ín s'ín Nainá nga síkjaáya-la̱ mik'en ko̱ sikítsa̱jnakon ini̱ma̱-la̱ ni̱ta̱kjé-ne, 'an xi Ki'ndí-la̱ ma k'oa̱á tis'ín tsjaà-la̱ kjoa̱bijnachon yá-né xi mejèn-na nga tsjaà-la̱. 22 Jè xi Na̱'èn-na ma, mìtsà jè bíndaàjiìn-la̱ xi̱ta̱, 'an-ná xi Ki'ndí-la̱ ma kisìnga̱tsja yije-na kjo̱tíxoma nga ko̱ma koìndaàjiìn-la̱ xi̱ta̱, 23 mé-nè ngats'iì xi̱ta̱ skoe̱xkón-na nga Ki'ndí-la̱ ma koni s'ín beèxkón Na̱'èn-na̱. Jè xi mì kiì beèxkón-nanga Ki'ndí-la̱ ma ti̱koa̱á mì kiì beèxkón Na̱'èn-na̱ nga jè kisìkasén-na. 24 ’Xi nguiì okixi̱, k'oa̱á xan-nò: Jè xi 'nchré 'én-na̱ koni s'ín chjà, ti̱koa̱ mokjeiín-la̱ i̱t'aà ts'e̱ xi kisìkasén-na̱, tjín-la̱ kjoa̱bijnachon ni̱ta̱kjé-ne. Mìtsà kjo̱'in si̱nè-la̱, jyeé itjokàjiìn kjo̱'in ts'e̱ kjoa̱ biyaà, jyeé tíjnakon inìma̱-la̱ i̱t'aà ts'e̱ Nainá. 25 Xi nguiì okixi̱ xi xan-nò: Nchrobá na̱chrjein, tejè-ne hora jè, k'e̱ nga jñà mik'en kji̱'nchré jta̱-na̱ xi Ki'ndí-la̱ Nainá ma; jñà xi kji̱'nchré jta̱-na̱, kítsa̱jnakon-né. 26 Jè Na̱'èn-na̱, ti̱ jè-ne xi kjoa̱bijnachon; ko̱ 'an xi Ki'ndí-la̱ ma, k'oa̱á ti̱ s'ín kitsjaà-na nga ti̱ 'an-na xi kjoa̱bijnachon. 27 Ti̱koa̱á kitsjaà-na kjo̱tíxoma nga 'an kíndaàjiìn-la̱ xi̱ta̱, nga 'an-ná xi Ki'ndí-la̱ Xi̱ta̱ xan-la̱ yijo-na̱. 28 Kiì maxkón-nò 'én koi, ki̱jchò na̱chrjein k'e̱ nga ngats'iì xi̱ta̱ xi títsa̱jnak'en ján ínchíbá mik'en ki'nchré-la̱ jta̱-na̱. 29 Ko̱sítje̱n ìjngoò k'a-ne ya̱ nga̱jo̱ mik'en. Jñà xi̱ta̱ xi ndaà kis'iìn, kjoa̱áya̱-la̱ nga s'e̱-la̱ kjoa̱bijnachon, ta̱nga jñà xi̱ta̱ xi ch'o kis'iìn, kjoa̱áya̱-la̱ nga s'e̱-la̱ kjo̱'in. 30 Jesús kitsò: —An, nì mé xi s'iaàn xi ta̱ kjo̱hítsjeèn ts'a̱n. K'oa̱ás'ín bìndaàjñaà koni s'ín tsò-na̱ Na̱'èn-na̱. Kixi̱í bìndaàjñaà; mì tsà k'oa̱s'ín s'iaàn koni s'ín mejèn-na̱. K'oa̱ás'ín s'iaàn koni s'ín mejèn-la̱ Na̱'èn-na̱ xi kisìkasén-na̱. 31 Tsà ti̱ an tsjaà-na̱ 'én xi i̱t'aà ts'a̱n. 'En xi tsjaà, jñò kixòn-nò “nì mé chjí-la̱”. 32 Ta̱nga tjín jngoò xi kj'ei̱í xi tsjá 'én xi i̱t'aà ts'a̱n, beè-ná nga jè 'én xi tsjá i̱t'aà ts'a̱n nguiì 'én kixi̱-né. 33 Jñò kinìkasén-la̱ xi̱ta̱ Juan nga kiskònangui-la̱. Jè Juan, kitsjaà kixi̱ 'én xi i̱t'aà ts'a̱n. 34 Mì tsà kjo̱'ñó tjínè-la̱ nga kj'ei̱í xi̱ta̱ tsjá 'én xi i̱'taà ts'a̱n, koií k'oa̱ xan-nò mé-ne nga ki̱tjokàjño kjo̱'in kjoa̱ ts'e̱ jé. 35 Juan k'oa̱s'ín ngaya-la̱ koni jngoò nì'ín xi títì nga síhiseèn, ta̱nga jñò tà chiba na̱chrjein kinitsjako̱ kjoa̱ iseèn-la̱. 36 Jè xá xi tis'iaàn, ìsa̱ 'ñó ts'e̱ chjí-la̱ mì k'oa̱-ne koni 'én xi kitsjaà Juan, nga jè Na̱'èn-na̱ kitsjaà-na̱ nga sìkitasoàn; ti̱ jè-ne̱ xá xi tís'iaàn okó i̱t'aà ts'a̱n nga kixi̱ kjoa̱ nga jè Na̱'èn-na̱ kisìkasén-na̱. 37 Jè Na̱'èn-na̱ xi kisìkasén-na̱, tsjá 'én xi i̱t'aà ts'a̱n. Jñò, kj'eè kiì na'yà-là jta̱-la̱, nì mì kiì yaxkon kó kji i̱sén-la̱; 38 tikoa̱á jè 'én-la̱ mì kiì fahasenjiìn ini̱ma̱-nò. Jè xi Nainá kisìkasén, mì kiì mokjeiín-nò i̱t'aà ts'e̱. 39 Ndaà binchaàtsjijñoò Xo̱jo̱n-la̱ Nainá nga k'oa̱s'ín nìkítsjeèn nga ya̱ sakó-nò kjoa̱bijnachon ni̱ta̱ kjé-né. Jè Xo̱jo̱n-la̱ Nainá, tsjá 'én xi i̱t'aà ts'a̱n, 40 ta̱nga jñò, mì kiì sasén-nò nga nchrobátji̱ngui-ná, mé-ne nga s'e̱-nò kjoa̱bijnachon koi. 41 ’Mì tsà koi kjoa̱ otsjia nga jeya si̱ikíjna-na xi̱ta̱. 42 Ta̱nga an, beèxkoòn-nò, nga jñò, mì kiì matsjachaà Nainá nga ko̱ ini̱ma̱-nò. 43 'An, i̱t'aà ts'e̱ Na̱'èn-na̱á j'iì-na̱; jñò majìn-nò nga chjoétjò-ná. Ta̱nga tsà kj'ei̱í xi̱ta̱ kjoi̱í xi ta kjo̱tsja ts'e̱ kjoi̱í-ne, isaá-là ni̱to̱n chjoétjò. 44 Jñò ¿kós'ín ko̱ma ko̱kjeiín-nò? Nga tà jè binchaàtsjioò nga ndaà ki̱tsa̱jna nga nguixko̱n xi̱ta̱, ko̱ mìtsà jè binchaàtsjioò nga ndaà ki̱tsa̱jna nga nguixko̱n Nainá xi tà jngoò ma. 45 Kì k'oa̱ás'ín nìkítsjeèn nga 'an tsjaàtin-nò 'én nga nguixko̱n Na̱'èn-na̱. Jè xi tsjátin-nò 'én, ti̱jè-ne Moisés xi jè ma'ñót'aàtakòn. 46 Jñò, tsà mokjeiín-nò koni s'ín kiskiì Moisés, ti̱koa̱á ko̱kjeiín-nò i̱t'aà ts'a̱n nga jè Moisés i̱t'aà ts'a̱án kiìchja̱ nga kiskiì. 47 Tsà mì kiì mokjeiín-nò koni s'ín kiskiì Moisés, ¿kós'ín ko̱kjeiín-nò 'én-na xi beèno̱jmí-nò?
