1 Tsibíjna jngoò xi̱ta̱ fariseo xi tikoa̱ xi̱ta̱ ítjòn tsibíjna i̱t'aà ts'e̱ xi̱ta̱ Judío; Nicodemo ki'mì. 2 Jngoò k'a j'iìjkon Jesús k'e̱ nga jñò, kitsò-la̱: —Maestro, 'ya-náje̱n nga jè Nainá kisìkasén-lè mé-ne ko̱kóya-náje̱n. Nga jngoò xi̱ta̱ xi mìtsà Nainá tíjnako̱, mì kiì ko̱ma-la̱ s'i̱in kjo̱xkón xi ji 'nì. 3 Jesús kitsò-la̱: —Xi nguiì o̱kixi̱, k'oa̱á xan-lè, jè xi̱ta̱ xi mì kiì jts'ín xi̱tse̱ ìjngoò k'a-ne, mì kiì skoe̱ kó s'ín otíxoma Nainá. 4 Nicodemo kiskònangui, kitsò: —¿Kós'ín ko̱ma jts'ín xi̱tse̱ ìjngoò k'a xi̱ta̱ xi jye kòjchínga? Ni̱ i̱tsé ko̱ma kjoa̱has'en ìjngoò k'a i̱ntso̱'ba̱ nea̱-la̱ nga jts'ín ìjngoò k'a. 5 Kiìchja̱ Jesús kitsò: —Xi nguì o̱kixi̱, k'oa̱á xan-lè, jè xi mì i̱t'aà ts'e̱ nandá ko̱ Ini̱ma̱ Tsjeè-la̱ Nainá jts'ín-ne, mì kiì ko̱ma kjoa̱has'en-jin ñánda tíhotíxoma Nainá. 6 Jè xi ts'iìn i̱t'aà ts'e̱ xi̱ta̱, xi̱ta̱-né. Koa̱ jè xi ts'iìn i̱t'aà ts'e̱ Ini̱ma̱ Tsjeè-la̱ Nainá, ini̱ma̱-né. 7 Kì maxkón-le koni s'ín tixan-le: “Mochjeèn-né nga jts'ín xi̱tse̱ ìjngoò k'a-ne jñà xi̱ta̱.” 8 Jè tjo̱ 'ba-né ni̱ta̱ ñánda-ne; na'yá-la̱ nga one. Ta̱nga mì kiì 'ya-la̱ ñánda nchrobá-ne, ti̱koa̱ mì kiì 'ya-la̱ ñánda fì. K'oa̱á ti s'ín ma yije ngats'iì xi i̱t'aà ts'e̱ Ini̱ma̱ Tsjeè-la̱ Nainá ts'iìn-ne. 9 K'e̱é kitsò Nicodemo: —¿Kós'ín ma-ne nga k'oa̱s'ín ko̱ma-ne kjoa̱ koi? 10 Jesús kitsò-la̱: —Ngaji̱, maestro tijni ts'e̱ xi̱ta̱ na̱xa̱ndá Israel. ¿Mé-ne mì kiì tíjiìn-le kjoa̱ koi? 11 Xi nguì o̱kixi̱, k'oa̱á xan-le: Jè kjoa̱ xi ma-naje̱n, k'oa̱ás'ín nokjoà-je̱n; xi jye kina'yà-je̱n, k'oa̱ás'ín beèno̱jmí-je̱n. Jñò, mì kiì mokjeiín-nò 'én-na̱je̱n. 12 K'e̱ nga beèno̱jmí-nò kjoa̱ xi tjín i̱sò'nde, mì kiì mokjeiín-nò. ¿A ko̱kjeiín-nò tsà ke̱èno̱jmí-nò kjoa̱ xi tjín ján ngajmiì? 13 ’Ni̱ saà jngoò xi̱ta̱ xi jye kiìmijìn ján ngajmiì; tà jè Ki'ndí-la̱ Xi̱ta̱ xi ngajmiì tíjna nga ya̱ itjojen-ne. 14 Koni s'ín kis'iìn Moisés nga kiskímiì'nga yá xi tjo̱hòt'aà ye̱ ki̱cha̱ bronce ya̱ i̱'nde i̱t'aà xìn ñánda kixì chon, k'oa̱á ti̱ s'ín tjínè-la̱ jè Ki'ndí-la̱ Xi̱ta̱ nga tjámiìtje̱n-t'aà jè yá, 15 mé-ne ngats'iì xi̱ta̱ xi ko̱kjeiín-la̱ i̱t'aà ts'e̱, mì kiì chi̱ja, s'e̱é-la̱ kjoa̱bijnachoòn ni̱ta̱kjé-ne. 16 ’Nainá 'ñó tsatoò kjòtsjakeè xi̱ta̱ i̱sò'nde nga kitsjaà Ki'ndí-la̱ xi tàjngoò ma-ne, mé-ne ngats'iì xi̱ta̱ xi mokjeiín-la̱ i̱t'aà ts'e̱, mì kiì chi̱ja; s'e̱é-la̱ kjoa̱bijnachoòn ni̱ta̱kjé-ne. 17 Nainá mìtsà koi xá kisìkasén-ne Ki'ndí-la̱ nga kjo̱'in kiìnè-la̱ xi̱ta̱ i̱sò'nde; koií xá kisìkasén-ne nga ko̱chrjekájiìn kjo̱'in xi̱ta̱ kjoa̱ ts'e̱ jé-la̱. 18 ’Jè xi mokjeiín-la̱ i̱t'aà ts'e̱ Ki'ndí-la̱ Nainá, mìtsà kjo̱'in sinè-la̱ xi kjoa̱ ts'e̱ jé-la̱, ta̱nga jè xi mì kiì mokjeiín-la̱ jyeé kjo̱'in tjínè-la̱, koií kjoa̱-la̱ nga mì kiì mokjeiín-la̱ i̱t'aà ts'e̱ Ki'ndí-la̱ Nainá xi ta̱jngoò ma-ne. 19 Jñà xi̱ta̱ xi mì kiì mokjeiín-la̱, jyeé kjo̱'in tjínè-la̱, koií kjoa̱-la̱ k'e̱ nga j'iì i̱ i̱sò'nde jè xi̱ta̱ xi j'iìko̱ kjoa̱hiseèn, mì kiì kisaseèn-la̱ kjoa̱hiseèn; ìsa̱á ndaà kisaseèn-la̱ kjoa̱jñò, nga ch'o tjín kjoa̱ xi nchis'ín. 20 Ngats'iì xi̱ta̱ xi ch'o s'ín, majtikeè kjoa̱hiseèn; mì kiì ya̱ síchrañàt'aà ñánda iseèn choòn, mé-ne nga mì kiì jcha̱-la̱ kjoa̱ xi ch'o nchis'ín. 21 Ta̱nga jñà xi̱ta̱ xi kjoa̱ kixi̱ nchis'ín, nchrobá kinchat'aà chrañà-la̱ ñánda iseèn choòn, mé-ne nga jcha̱-la̱ nga ndaà tjín kjoa̱ xi nchis'ín koni s'ín mejèn-la̱ Nainá. 22 Nga jye komà kjoa̱ koi, Jesús kiìko̱ xi̱ta̱ xi kota'yàt'aà-la̱ ján nangui Judea; ya̱á tsibìtsa̱jna chiba na̱chrjein nga kis'iìn bautizar xi̱ta̱. 23 Juan tikoa kis'iìn bautizar xi̱ta̱ ya̱ na̱xa̱ndá Enón, jngoò i'nde xi chrañàt'aà-la̱ ya̱ na̱xa̱ndá Salim, koií kjoa̱-la̱ i̱'nde jè tjín jchá nandá. Jñà xi̱ta̱, ya̱á ijchòkon Juan nga komà bautizar. 24 Na̱chrjein koi, ti̱ kj'eè nda̱yá fìs'en Juan. 25 Jñà xi̱ta̱ xi kota'yàt'aà-la̱ Juan ko̱ jngo xi̱ta̱ judío tsohótiya-ne kjo̱tíxoma-la̱ xi̱ta̱ judío xi xkón tjín kós'ín matsjeèya-ne xi̱ta̱. 26 Kiì jñà xi̱ta̱ ñánda tíjna Juan, kitsò-la̱: —Maestro, jè xi̱ta̱ xi ijchòko̱i ján xìjngoaà xajngá nandá Jordán, jè xi̱ta̱ xi ji̱ kits'i 'én i̱t'aà ts'e̱, i̱'ndei ti̱koa̱ tis'ín bautizar; saá jé fìtji̱ngui-la̱ ngats'iì xi̱ta. 27 Kiìchja̱ Juan, kitsò: —Ni̱ mé xi s'e-la̱ xi̱ta̱ tsà mì jè sobà Nainá tsjá-la̱. 28 Jñò, ndaà tíjiìn-nò koni s'ín kixan-nò nga mì tsà 'an xi Cristo; 'an-ná xi kinìkasén ítjòn-na i̱t'aà ts'e̱ xi̱ta̱ jè. 29 Jè xi̱ta̱ x'i̱n xi sa̱ kóbixan, tíjna chjo̱ón-la̱; jè amigo-la̱ xi kóbixan síjnat'aà chrañà-la̱ nga tí'nchré-la̱ koni s'ín tíchja̱. Tsja jchá ma-la̱ k'e̱ nga 'nchré-la̱ xi̱ta̱ xi sa̱ kóbixan. 'An, k'oa̱ ti s'ín matsja-na k'e̱ nga 'nchrè koni s'ín tís'ín xi̱ta̱ jè. 30 Xi̱ta̱ jè, mochjeèn-né nga kàtasìjna ítjòn. 'An, kósi̱jna tji̱ngui-ná. 31 Jè xi nchrobá-ne ngajmiì, jè tíjna ítjòn-la̱ ngats'iì xi̱ta̱. Jè xi i̱ i̱sò'nde ts'e̱, xi̱ta̱ i̱sò'nde-né, ko̱ jñà 'én xi chja̱ kjoa̱ ts'e̱ i̱sò'nde-né. Ta̱nga jè xi ngajmiì nchrobá-ne, jè tíjna ítjòn-la̱ ni̱ ta̱ yá-ne. 32 Jè tsjá 'én mé xi kijtseè ko̱ mé xi kiì'nchré. Ta̱nga 'én xi tsjá, ni̱ yá xi mokjeiín-la̱ koni s'ín tsò. 33 Ta̱nga jè xi̱ta̱ xi mokjeiín-la̱ 'én xi chja̱, jè tsjá 'én nga Nainá, nguì 'én kixi̱í xi chja̱. 34 Xi̱ta̱ xi Nainá kisìkasén, 'én-la̱ Nainá chja̱, nga mì kiì fehet'aà koni s'ín síxájiìn ini̱ma̱-la̱ jè nga'ñó xi tjín-la̱ Ini̱ma̱ Tsjeè-la̱ Nainá. 35 Na̱'èn-ná tsjakeé Ki'ndí-la̱; jè kisìnga̱tsja yije ni̱ta̱ mé kjoa̱-ne. 36 Jè xi mokjeiín-la̱ koni tsò 'én xi chja̱ Ki'ndí-la̱ Nainá, tjín-la̱ kjoa̱binachoòn ni̱ta̱kjé-ne. Ko̱ jè xi mì kiì mokjeiín-la̱ mì kiì kíjnakon ini̱ma̱-la̱; kjo̱'in sinè-la̱ xi kjo̱jti-la̱ Nainá.
