1 Jesús k'e̱ nga jye k'oa̱s'ín kiìchja̱, kiskoòtsejèn ngajmiì, kitsò: —Na̱'èn, jyeé ijchò hora-la̱, jeya ti̱kíjni Ki'ndí-le, mé-ne jè Ki'ndí-le ti̱koa̱ ngaji̱, jeya si̱ìkíjna-le, 2 koni s'ín kits'iì-la̱ kjo̱tíxoma Ki'ndí-le i̱t'aà ts'e̱ ngats'iì xi̱ta̱ nga tjí'nde-la̱ nga tsjaà-la̱ kjoa̱bijnachon ni̱ta̱ kjé-ne ngats'iì xi̱ta̱ xi ji kits'iì-la̱. 3 Jè kjoa̱bijnachon xi tjín ni̱ta̱kjé-ne, jè-né nga skoe̱xkon-le, nga ta ji̱ ta̱jngoò-né xi kixi̱ kjoa̱ nga Nainá 'mì-le, ti̱koa̱ skoe̱xkon Jesucristo xi Ki'ndí-le xi xó ji kinìkasén-ne. 4 ’An, jeya kisìkíjna-le i̱ i̱sò'nde, nga jyeé kisìjngoa xá xi ji kinìnga̱tsja-ná. 5 Na̱'èn, i̱'ndei̱, k'oa̱s'ín jeya ti̱kíjna-ná nga nguixkoìn koni tjín kjoa̱ jeya xi kis'eè-na̱ nga tsohótijna-t'aà-le k'e̱ nga ti̱ kj'eè sindaà i̱sò'nde. 6 ’Jñà xi̱ta̱ i̱sò'nde xi xó ji kichjaàjiìn-ne nga an kinìnga̱tsja-ná, jyeè tsibèno̱jmí-la̱ i̱t'aà tsi̱ji. Xi̱ta̱ tsi̱ji-né, nga ji kits'iì-ná, ko̱ nchisíkitasòn-né koni tsò 'én-lè. 7 Jñà xi̱ta̱ koi, i̱'ndei̱, jyeé beè nga ngats'iì kjoa̱ xi an kits'iì-ná, i̱t'aà tsi̱ji nchrobá-ne. 8 An, tsibèno̱jmí-la̱ jñà 'én xi ji kits'iì-ná; jñà xi̱ta̱ koi, jahas'enjiìn-la̱; jyeé kijtseè nga kixi̱ kjoa̱ nga i̱t'aà tsi̱ji i̱nchrobà-na̱. Mokjeiín-la̱ nga ji kinìkasén-ná. 9 ’Jñà xi̱ta̱ koi, bitsi'batjia. Mìtsà jñà xi̱ta̱ i̱sò'nde bitsi'batjia; tà jñà-né xi ji kits'iì-ná, nga̱ xi̱ta̱ tsi̱ji-né. 10 Ngats'iì xi̱ta̱ xi ts'a̱n, ti̱koa̱ tsi̱ji-né, koa̱ jñà xi̱ta̱ xi tsi̱ji, ti̱koa̱á ts'a̱n-ná. I̱t'aà ts'e̱é xi̱ta̱ koi, nga jeya óti̱jna. 11 ’'An, mì ti̱ kiì tsee kóti̱jna-na̱ i̱ i̱sò'nde; ta̱nga jñà xi̱ta̱ koi, i̱í kítsa̱jna i̱sò'nde. 'An, ya̱á tìfìkon-lè nga ya̱ kótijna̱ko̱-le. Na̱'èn tsjeè, ndaà ti̱kindi̱ xi̱ta̱ koi nga ko̱ nga'ñó-le, ti̱jè-ne nga'ñó xi ji kits'iì-ná mé-ne nga ndaà kítsa̱jnajtín-ne koni jñá ndaà titsa̱jnakjoaá ngaji̱ ko̱ 'an. 12 K'e̱ nga tsohótijnakoa̱a i̱ i̱sò'nde, ndaà kisìkinda̱ nga ko̱ nga'ñó-le, ti̱jè-ne nga'ñó xi ji kits'iì-ná. Ni̱jngoó xi kichijà, tà jé kichijà jè xi k'oa̱s'ín tjínè-la̱ nga k'oa̱s'ín ko̱matin, mé-ne ki̱tasòn-ne koni s'ín tíchja̱ Xo̱jo̱n-lè. 13 ’Ta̱nga i̱'ndei̱ ya̱á tìfìkon-le ñánda tijni. Jñà 'én xi tìchjà k'e̱ nga tákó i̱ tijna̱ i̱sò'nde, koi-né nga 'ñó ndaà kàtasijiìn ini̱ma̱-la̱ jñà xi̱ta̱-na̱, jè kjo̱tsja xi tíjiìn ts'a̱n. 14 'An, jyeé tsibèno̱jmí-la̱ 'én-le jñà xi̱ta̱-na̱; ta̱nga jñà xi̱ta̱ i̱sò'nde síjtìkeè-né, koií-né nga mìtsà ti̱ xi̱ta̱ ts'e̱ i̱sò'nde-ne, ti̱koa̱á 'an, mìtsà ti̱ i̱ i̱sò'nde chjà-na. 15 Mìtsà xan-lè nga chja̱àxìn i̱ i̱sò'nde, tà jè-né xi xan-lè nga ti̱kindiì i̱t'aà ts'e̱ xi̱ta̱ nei̱í. 16 Koni an mìtsà i̱ i̱sò'nde chjà-na, ti̱koa̱á jñà xi̱ta̱-na̱ mìtsà ti̱ i̱-ne i̱sò'nde chja̱-ne. 17 I̱t'aà ts'e̱ kjoa̱ kixi̱-le, tsjeè ti̱kítsa̱jni nga ngui xi̱ta̱ tsi̱ji kàtama; nga jñà 'én-le, nguì kjoa̱ kixi̱-né. 18 Ji, koni s'ín kinìkasén-ná i̱ i̱sò'nde, 'an, k'oa̱á tis'ín sìkasén jñà xi̱ta̱-na̱ i̱t'aà ts'e̱ xi̱ta̱ i̱sò'nde. 19 Xi kjo̱ndaà ts'e̱ xi̱ta̱-na̱, 'an, jyeé tsjeè tìsìnga̱tsja-lè yijo-na̱ mé-ne jñà xi̱ta̱-na̱ ti̱koa̱ tsjeè si̱ìnga̱tsja-lè yijo-la̱ xi i̱t'aà ts'e̱ kjoa̱ kixi̱-lè. 20 ’Mìtsà tà jñà bìtsi'bà-tjià jñà xi̱ta̱ ts'a̱n; ti̱koa̱á bìtsi'bà-tjì-ná jñà xi̱ta̱ xi i̱skan ko̱kjeiín-la̱ i̱t'aà ts'a̱n k'e̱ nga kji̱'nchré 'én-na̱ xi ke̱èno̱jmí-la̱ jñà xi̱ta̱-na̱, 21 mé-ne ngats'iì jñà xi̱ta̱ koi, tà jngoò ko̱ma-ne, koni jñá nga jngoò ma-ná koni s'ín tijnako̱-ná ngaji̱ Na̱'èn, ti̱koa̱ an tijnako̱-le. Jñà xi̱ta̱ koi, ti̱koa̱ kàtìtsa̱jnako̱-ná mé-ne jñà xi̱ta̱ i̱sò'nde ko̱kjeiín-la̱ nga ji kinìkasén-ná. 22 Jè kjoa̱jeya xi ji kits'iì-ná, an, k'oa̱á ti̱s'ín kitsjaà-la̱ jñà xi̱ta̱-na̱ mé-ne nga tà jngoò ko̱ma-ne koni jñá nga tà jngoò ma-ná. 23 An tijna̱koa̱ jñà xi̱ta̱-na̱ ko̱ ji tijnako̱-ná, mé-ne nga nguiì jngoò ko̱ma-ne. K'oa̱ás'ín skoe̱-ne jñà xi̱ta̱ i̱sò'nde nga ji kinìkasén-ná ko̱ ti̱koa̱ skoe̱ nga matsjachiì jñà xi̱ta̱-na̱ koni s'ín matsjachaà-ná an. 24 ’Na̱'èn koií xi mejèn-na nga jñà xi̱ta̱ xi ji kits'iì-ná ya̱ kítsa̱jnako̱-na ñánda kóti̱jna, mé-ne nga skoe̱-ne kjoa̱ jeya-na̱ xi ji kits'iì-ná nga ti̱koa̱ matsjachaà-ná skanda k'e̱ nga ti̱kjeè sindaà i̱sò'nde. 25 Na̱'èn xi xi̱ta̱ kixi̱ 'mì-lè, jñà xi̱ta̱ xi tjín i̱sò'nde, mì kiì beèxkon-lè, ta̱nga an, beèxkoòn-le. Ti̱koa̱ jñà xi̱ta̱ xi ji kits'iì-ná jye kisijiìn-la̱ nga ji kinìkasén-ná. 26 Jñà xi̱ta̱-na̱ jyeé tsibèno̱jmí yije-la̱ i̱t'aà tsi̱ji; tákó sa̱á kéno̱jmí ìsa̱-la̱ mé-ne jè kjoa̱ tjòchaà xi tjín-le i̱t'aà ts'a̱n, ti̱koa̱ s'e̱-la̱ jñà xi̱ta̱ koi koa̱ an sobá kótijna̱jña ini̱ma̱-la̱.
