1 ’'Aán ngaya-la̱ yá je-la̱ toò uva; jè Na̱'èn-na̱ xi síxá-ko̱. 2 Ngats'iì chrja-la̱ yá uva xi i̱t'aà ts'a̱n nchrobát'aà-ne xi mì kiì ojà-la̱ toò, Na̱'èn-na̱ otet'aà-né; koa̱ jñà xi ojà-la̱ toò, ta sítsjeè-né, mé-ne nga ìsa̱ ndaà ko̱ja̱-la̱ toò. 3 Jñò, jyeé k'oa̱s'ín kjòtsjeè-nò xi i̱t'aà ts'e̱ 'én xi o̱kixan-nò. 4 Jñò, mochjeèn-né nga ya̱ ki̱tsa̱jnako̱ kjit'aà-ná koa̱ 'an, ya̱á kótijna̱ko̱ kjit'aà-nò. Jngoò chrja-la̱ yá toò uva, mì kiì ko̱ja̱-la̱ toò tsà mì kiì 'ñó tjít'aà jè yá je-la̱. I̱t'aà tsa̱jòn, k'oa̱ tis'ín tjín, nìmé xi s'e̱en tsà mì 'an ki̱tsa̱jnako̱ kjit'aà-ná. 5 ’An-ná xi yá je-la̱ toò uva, jñò-nó xi chrja-la̱. Jè xi an kíjnako̱ kjit'aà-na̱ ko̱ an kóti̱jnako̱ kjit'aà, ndaà jchán ko̱ja̱-la̱ toò. Ta̱nga ni̱mé xi s'e̱en tsà titsa̱jnat'aà xìn-ná. 6 Jè xi mìtsà an kíjnako̱ kjit'aà-na, k'oa̱ás'ín tjáxìn koni chrja-la̱ yá xi nìmé toò ojà-la̱; k'e̱ nga jye xì, maxkó-né i̱kjoàn sinchájiìn ni'ín nga tì. 7 ’Jñò, tsà ya̱ ki̱tsa̱jnako̱ kjit'aà-ná, koa̱ tsà kixi̱ ki̱tsa̱jnako̱ 'én-na̱ xi an tsakoòya-nò, ti̱jé ni̱ta̱mé xi mejèn-nò, k'oa̱ás'ín ki̱tasòn-nò koni s'ín kixón. 8 K'oa̱ás'ín ma-ne jcha̱-la̱ kjoa̱jeya-la̱ Na̱'èn-na̱ k'e̱ nga 'ñó kjìn toò ko̱ja̱-nò ko̱ k'oa̱á s'ín ma-ne nga 'ya-la̱ nga kixi̱ kjoa̱ nga ya̱ chíta'yàt'aà-ná. 9 Koni s'ín matsjakeè-na̱ Na̱'èn-na̱, jñò, an, k'oa̱ tis'ín matsjakeè-nò. Machjeèn-né nga k'oa̱s'ín titsa̱jnako̱ kjit'aà kjoa̱ tsjachaà-na̱. 10 Tsà si̱kitasòn kjo̱tíxoma-na̱, ya̱á ki̱tsa̱jnajioòn kjit'aà kjoa̱ tsjachaà-na̱. An, k'oa̱á ti̱ s'ín sikitasoàn kjo̱tíxoma-la̱ Na̱'èn-na̱ ko̱ ya̱á tijna̱jñaà kjit'aà kjoa̱ tsjacha-la̱. 11 ’Jñò, k'oa̱ás'ín chjàko̱-nò mé-ne si̱jnajiìn-ne ini̱ma̱-nò kjo̱tsja xi 'an tjín-na ko̱ nguiì ndaà s'e̱-nò kjo̱tsja. 12 Kjo̱tíxoma-na̱ xi an tsjaà-nò, jè-né nga ti̱tsjachaà xinguio̱o nga jngoò ìjngoò, koni 'an matsjakeè-nò. 13 Jè xi̱ta̱ xi biyàtjì ngajo-la̱ amigo-la̱, jè-né xi ìsa̱ 'ñó matsjakeè xíkjín. 14 Jñò-nó xi amigo-na̱ xan-nò, tsà si̱kitasòn koni s'ín binè-nò. 15 Mì ti̱ chi̱'nda-na̱ xan-nò nga jè chi̱'nda mì kiì beè mé xi s'ín nei-la̱. Amigo ts'a̱án xan-nò nga jyeé tsibèno̱jmíya yije-nò kjoa̱ xi tsakóya-na̱ Na̱'èn-na̱. 16 Mìtsà jñò kiìchjaà-jiìn-ná, ta̱ saà an jaàjiìn-nò. Kitsjaà-nò xá nga konguió mé-ne nga ndaà si̱xá-nò. Jè xá-nò si̱jna-né ni̱ta̱kjé-ne, mé-ne k'e̱ nga mé xi si̱jé-là Na̱'èn-na̱ xi i̱t'aà ts'a̱n, tsjá-nò. 17 Jè kjo̱tíxoma xi 'ñó tibinè-nò: Nga tjòcha jcha̱a xinguio̱o nga jngoò ìjngoò. 18 ’Jñò, tsà si̱ìjtikeè-nò jñà xi̱ta̱ i̱sò'nde, kàtasijiìn-nò nga an, k'oa̱ás'ín kisìjtikeè ítjòn-na. 19 Jñò, tsà tákó ya̱ titsa̱jna-jiìn-là xi̱ta̱ i̱sò'nde, jñà xi̱ta̱ i̱sò'nde kjo̱tsjakeé-nò koni s'ín matsjakeè xi̱ta̱ xíkjín. Ta̱nga jñò, mìtsà ti̱ i̱-ne i̱sò'nde tsa̱jòn. An jaàjiìn-nò nga tsachrjekàjiìn-nò kjoa̱ xi tjín i̱sò'nde, koií kjoa̱-la̱ nga majtikeè-nò jñà xi̱ta̱ i̱sò'nde. 20 Ndaà ti̱kítsjeèn koni s'ín kixan-nò: “Jè xi chi̱'nda tíjna, mìtsà ìsa̱ tíjna ítjòn-la̱ nei-la̱.” Koni s'ín kiìtji̱ngui kondra̱-na̱ jñà xi̱ta̱, jñò, k'oa̱á tis'ín kji̱tji̱ngui kondra̱-nò. Tsà kisìkitasòn 'én-na̱, ti̱koa̱á si̱ìkitasòn tsa̱jòn. 21 Ngats'iì kjoa̱ koi, k'oa̱á si̱ìko̱-nò jè nga̱tji-la̱ i̱t'aà ts'a̱n nga mì kiì beèxkon jè xi kisìkasén-na. 22 ’An, tsà mì-la kiì j'ia̱a ko̱ tsà mì-la kiì tsoòkoa̱a, ni mé-la jé tjín-la̱. Ta̱nga i̱'ndei̱, mì ti̱kiì ko̱ma ko̱siko̱-ni yijo-la̱ kjoa̱ ts'e̱ jé-la̱. 23 Jñà xi̱ta̱ xi an majtikeè-na, ti̱koa̱ majtikeè Na̱'èn-na̱. 24 Nimé-là jé tjín-la̱ jñà xi̱ta̱ tsà mì-la kiì kijtseè jñà kjo̱xkón xi an kis'ian xi ni̱ saá jngoò xi̱ta̱ k'oa̱s'ín s'ín. Ta̱nga jyeé kijtseè kjo̱xkón xi 'an kis'ian, ta̱nga tákó majtikeè-na̱ ti̱koa̱ majtikeè Na̱'èn-na̱. 25 K'oa̱s'ín tíma nga tíbitasòn 'én xi tjít'aà Xo̱jo̱n-la̱ Nainá xi kótá'yá xi̱ta̱ koi, nga tsò: “Tisìjtikeé-na̱ na̱s'ín nì mé kjoa̱ tìsiìkoa̱.” 26 ’Ta̱nga k'e̱ ki̱tjojen jè xi ko̱si̱ko̱-nò, xi an sìkasén i̱t'aà ts'e̱ Na̱'èn-na̱, jè Ini̱ma̱ Tsjeè-la̱ Nainá xi nguì o̱kixi̱, xi i̱t'aà ts'e̱ Na̱'èn-na̱ nchrobá-ne, jè tsjá 'én i̱t'aà ts'a̱n. 27 Jñò, ti̱koa̱á k'io̱o 'én i̱t'aà ts'a̱n nga ya̱á titsa̱jnako̱-ná kóni nga tàts'en-la̱ kjoa̱.
