1 ’Kì makájno-nò. Kàtakjeiín-nò i̱t'aà ts'e̱ Nainá, ti̱koa̱ kàtakjeiín-nò i̱t'aà ts'a̱n. 2 Ján ni'ya-la̱ Na̱'èn-na̱ tjín jchán i̱'nde ñánda ma nìkjáya. Tsà mì kixi̱ kjoa̱ nga k'oa̱s'ín tjín, mì-la tsà tàchjà k'oa̱xán-nò nga tìfìkíndaà-nò jngoò i̱'nde xi tsa̱jòn. 3 Koni s'ín kjián nga kìndaà-nò i̱'nde, k'oa̱á ti̱ s'ín kjoia̱a ìjngoò k'a nga kjíko̱-nò, mé-ne ya̱ ñánda kóti̱jna, ti̱koa̱ ya̱ ki̱tsa̱jnako̱-ná. 4 Jñò jyeé 'yaà kós'ín fì ndi̱yá ñánda tífià. 5 Tomás kitsò: —Na̱'èn mì kiì 'ya-je̱n ñánda tí'mì. ¿Kós'ín jcha̱-naje̱n ndi̱yá? 6 Jesús kitsò-la̱: —An-ná xi ndi̱yá, an-ná xi kjoa̱kixi̱, an-ná xi kjoa̱bijnachon. Ta̱jngoò i̱t'aà ts'a̱n ko̱ma ki̱jchò jñò ñánda tíjna Na̱'èn-ná. 7 Jñò, tsà yaxkon-ná, ti̱koa̱ jcha̱xkon-nò Na̱'èn-na̱. Ta̱nga i̱'ndei̱, jyeé yaxkon ko̱ titsa̱chìtsejèn-la. 8 Felipe kitsò: —Ta̱kó-náje̱n yá-ne xi Na̱'èn 'mì. Ta̱ k'oa̱á tjín xi ko̱jngoò-ni takòn-je̱n. 9 Jesús kiìchja̱ kitsò-la̱: —Ji Felipe, kjòtseé tijna̱ko̱-nò, ¿A tà kj'eè yaxkon-ná? Jè xi jye kijtseèxkon-na̱, jyeé kijtseèxkon Na̱'èn-na̱. ¿Mé-ne ko̱si-ne: Ta̱kó-náje̱n xi Na̱'èn 'mì? 10 ¿A mì mokjeiín-le nga an, ya̱ tijna̱koa̱ Na̱'èn-na̱, koa̱ jè Na̱'èn-na̱ ya̱ tíjnako̱-na? Jñà 'én xi an chjà-ko̱-nò, mìtsà kjo̱hítsjeèn ts'a̱n; jè Na̱'èn-na̱ xi tíjnako̱-na, jè-né xi tísíxá i̱t'aà ts'a̱n. 11 Kàtakjeiín-nò nga an ya̱ tijna̱koa̱a Na̱'èn-na̱, ko̱ jè Na̱'èn-na̱ ya̱ tíjnako̱-na. Tsà mì kiì mokjeiín-nò i̱t'aà ts'a̱n, na̱s'ín tà jè kàtakjeiín-nò i̱t'aà ts'e̱ xá-na̱ xi an tìs'iaàn. 12 Nguì o̱kixi̱í xi xan-nò, jè xi mokjeiín-la̱ i̱t'aà ts'a̱n, ti̱koa̱á ko̱maá-la̱ s'i̱in xá xi an s'iaàn; skanda ìsa̱á tsato s'i̱in, nga an, ján tìfia ñánda tíjna Na̱'èn-na̱. 13 Ni̱ta̱mé xi sijé-la Na̱'èn-na̱ xi i̱t'aà ts'a̱n, an sìkitasoàn, mé-ne jè Na̱'èn-na̱ jeya kíjna-ne i̱t'aà ts'e̱ Ki'ndí-la̱. 14 Tsà mé xi sijé i̱t'aà ts'a̱n, 'an, sìkitasòn-ná. 15 ’Jñò, tsà matsjachaà-ná ti̱kitasòn kjo̱tíxoma-na̱. 16 An, kìtsi'bà-la̱ Na̱'èn-na̱ nga kàtasíkasén jngoò-nò jè xi ko̱si̱ko̱-nò, mé-ne kjit'aà na̱chrjein kíjnako̱-nò. 17 Jè xi si̱ìkasén-nò Na̱'èn-na̱, jè Ini̱ma̱ Tsjeè-la̱ xi nguì kjoa̱ kixi̱. Jñà xi̱ta̱ i̱sò'nde, mì kiì ko̱ma skoétjò nga mì kiì beèxkon, ta̱nga jñò yaxkon-nò nga ya̱ tíjnako̱-nò, ko̱ ya̱ kíjnajiìn ini̱ma̱-nò. 18 Mì kiì sikítsa̱jna jcha̱n-nò, kjoi̱kon ìjngoò k'a-nò nga kótijnako̱-nò. 19 Tà chibaá na̱chrjein chija-la̱ nga jñà xi̱ta̱ i̱sò'nde mì ti̱ kiì skoe̱xkon-na; ta̱nga jñò jcha̱xkon-ná; ti̱koa̱á ki̱tsa̱jnakoòn-nò nga an tijna̱kon-ná. 20 K'e̱ nga ki̱jchò na̱chrjein jè, jcha̱-nò nga ya̱ tijna̱akoa̱a Na̱'èn-na̱, koa̱ jñò ya̱ titsa̱jnako̱-ná, ko̱ an ya̱ tijna̱ko̱-nò. 21 Jè xi tíjiìn-la̱ kjo̱tíxoma-na̱ ti̱koa̱ síkitasòn-né, jè-né xi matsjakeè-na. Ko̱ jè xi matsjakeè-na ti̱koa̱á ko̱tsjakeè Na̱'èn-na̱. An, ti̱koa̱á matsjakeè-ná koa̱ ko̱kotsejèn-la̱ yijo-na̱. 22 Kiskonangui Judas (mìtsà jè Iscariote). Kitsò-la̱: —Na̱'èn kós'ín ko̱ma nga tà ngaje̱n ko̱kótsejèn-náje̱n yijo-le nga mìtsà jñà xi̱ta̱ i̱sò'nde ko̱kótsejèn-la̱ yijo-le. 23 Kiìchja̱ Jesús, kitsò-la̱: —Jè xi matsjakeè-na̱ si̱ìkitasòn 'én-na̱; ko̱ jè Na̱'èn-na̱ kjo̱tsjakeè-né. Na̱'èn-na̱ ko̱ an kji̱nchrobá chón-náje̱n; ya̱á ki̱tsa̱jnako̱-je̱n. 24 Jè xi mì kiì matsjakeè-na mì kiì síkitasòn 'én-na̱. Jñà 'én xi jñò titsa̱na'yà, mìtsà ts'a̱n, ts'e̱é Na̱'èn-na̱ xi kisìkasén-na. 25 ’K'oa̱á s'ín tibeèno̱jmí yije-nò 'én koi k'e̱ nga tákó tijna̱ko̱ ìsa̱-nò. 26 Jè xi ko̱si̱ko̱-nò, jè Ini̱ma̱ Tsjeè-la̱ Nainá xi i̱t'aà ts'a̱n si̱ìkasén-nò Na̱'èn-na̱, jè ko̱kóya yije-nò koa̱ si̱ìkítsjeèn-nò ngats'iì 'én xi tixan-nò. 27 ’An, tsjaà-nò kjoa̱'nchán; ya̱á síkíjnajña ini̱ma̱-nò. K'oa̱ás'ín tsjaà-nò koni s'ín 'nchán tijna̱, mìtsà k'oa̱s'ín tsjaà-nò koni s'ín tsjá i̱sò'nde. Kì makájno-nò ko̱ kì tsàkjon-jèn. 28 Jñò, jyeé kina'yà koni s'ín tixan-nò nga an tífia ta̱nga kjoi̱i ìjngoò k'a. Tsà kixi̱ kjoa̱ nga matsjachaà-ná, jñò, ti̱koa̱á ko̱tsjaá-nò nga xan-nò: Jye tífia ñánda tíjna Na̱'èn-na̱; nga jè Na̱'èn-na̱ ìsa̱á tíjna ítjòn mì k'oa̱-ne koni 'an. 29 K'oa̱ás'ín tibeèno̱jmí ítjòn-nò kjoa̱ koi, mé-ne k'e̱ nga jye ki̱tasòn ko̱kjeiín-nò. 30 ’Mì ti̱ kiì kjìn 'én kichjàko̱ ìsa̱-nò. Jyeé nchrobá xi̱ta̱ nei̱í xi tíhotíxoma-la̱ jè i̱sò'nde; ta̱nga nìmé nga'ñó tjín-la̱ nga jè si̱ìkijne-na. 31 K'oa̱ás'ín ki̱tasòn, mé-ne skoe̱-ne jñà xi̱ta̱ i̱sò'nde nga matsjakeè Na̱'èn-na̱ nga tìsìkitasoàn kjo̱tíxoma xi kitsjaà-na. Ti̱sítjeèn, tíkjiaán.
