1 Chibaá na̱chrjein chijà ìsa nga kitjo s'eí Paxko̱ ts'e̱ xi̱ta̱ judío. Jesús jyeé tíjiìn-la̱ nga jye ijchò na̱chrjein nga siìkíjna i̱sò'nde nga jye tifìko̱-ne Na̱'èn-la̱. Ta̱nga Jesús tjokeè kijtseè yije xi̱ta̱-la̱ i̱ i̱sò'nde kóni skanda jyehet'aà na̱chrjein-la̱. 2 K'e̱ nga jye kòjñò, Jesús tíkjèn-ko̱ xi̱ta̱-la̱, ko̱ jè xi̱ta̱ nei̱í jyeé k'oa̱ s'ín tsibíjiìn ini̱ma̱-la̱ jè Judas Iscariote, ti-la̱ Simón, nga jè si̱ìnga̱tsja Jesús i̱t'aà ts'e̱ xi̱ta̱ kondra̱-la̱. 3 Jesús jyeé tíjiìn-la̱ nga jè Na̱'èn-la̱ kisìnga̱tsja yije kjoa̱ nga jè ko̱tìxoma-la̱ nga i̱t'aà ts'e̱ Nainá i̱nchrobá-ne ko̱ ti̱jé tífì-ko̱ ìjngoò k'a-ne. 4 Jesús tsasítje̱n-t'aà ími̱xa̱, jahaxin na̱chro̱ xi kisòn'nga-la̱, kiskoé jngoò nikje toalla, tsibìkjá ndáyá-la̱. 5 I̱kjoàn kiskoé jngoò tìna̱, tsibíya nandá, tsibíts'ia̱ nga tsaníjno ntso̱ko̱ xi̱ta̱ xi kota'yàt'aà-la̱, i̱kjoàn kisìxìjno-ne jè nikje toalla xi tíkjá ndáyá-la̱. 6 K'e̱ nga ijchò kasìt'aà-la̱ Simón Pedro nga mejèn-la̱ ko̱níjno ntso̱ko̱, Simón kitsò: —Na̱'èn ¿a o̱kín-na nga ji ko̱nìjnoi ntso̱koaà? 7 Kiìchja̱ Jesús, kitsò: —I̱'ndei̱ mì kiì machi̱ya-lè mé kjoa̱ xi tìs'iaàn, ta̱nga ko̱ma i̱skan k'e̱é ko̱chi̱ya-lè. 8 Jè Pedro kitsò: —Mì kiì tsjaà'nde nga ntso̱koaà ko̱nìjnoi. Jesús kitsò-la̱: —Tsà mì kiì koniìjnoa ntso̱koiì mìtsà xi̱ta̱ ts'a̱n xán-le. 9 K'e̱é kitsò Simón Pedro: —Na̱'èn, mìtsà tà ntso̱koaà tanìjnoiì, ti̱koa̱á tanìjnoiì ntsa̱a ko̱ skoaà. 10 Kiìchja̱ Jesús kitsò-la̱: —Jè xi jye tsangáya, tà jè ntso̱ko̱ mochjeèn nga saníjno, nga jyeé tsjeè yije yijo-la̱. Jñò, tsjeé kjoàn na̱s'ín mìtsà kóhotjión. 11 Jesús koií k'oa̱s'ín kitsò-la̱: “mìtsà tà ngats'ioò nga tsjeè kjoàn,” nga jyeé tíjiìn-la̱ yá-né xi si̱ìnga̱tsja i̱t'aà ts'e̱ xi̱ta̱ kondra̱-la̱. 12 K'e̱ nga jye tsaníjno ntso̱ko̱ jñà xi̱ta̱-la̱, tsohókjá-ne na̱chro̱ kisòn'nga-la̱. Tsibìjnat'aà-ne ími̱xa̱, kitsò-la̱: —¿A machi̱yaá-nò kjoa̱ xi kàsiìko̱-nò? 13 Jñò, k'oa̱á bixón nga Maestro ko̱ Na̱'èn 'mì-ná. Ndaà bixón, kixi̱í kjoa̱ xi 'mì-ná. 14 An, xi Maestro ko̱ Na̱'èn 'mì-na, koniìjnoa ntso̱koò, jñò ti̱koa̱á mochjeèn-né nga k'oa̱tis'ín ta̱nìjnoò ntso̱ko̱ xìnguio̱o. 15 An, k'oa̱ás'ín kìjna jngoò-nò xkósòn mé-ne jñò k'oa̱tis'ín ti̱ko̱o xinguio̱o koni s'ín kàsiìko̱-nò. 16 Nguiì kjoa̱ kixi̱í xi xan-nò, jè xi chi̱'nda tíjna, mì tsà jè tíjna ítjòn-la̱ nei-la̱. Ti̱koa̱ jè xi satíxá-la̱ mì tsà jè tíjna ítjòn-la̱ jè xi otíxá-la̱. 17 I̱'ndei̱ nga jye machi̱ya-nò kjoa̱ koi, mé ta ndaà-nò tsà k'oa̱s'ín sikitasòn nga ko̱s'ín s'e̱en. 18 ’Mìtsà ngats'ioò k'oa̱tíxan-nò; bexkon-ná jñà xi̱ta̱ xi 'a̱n jahàjña. Machjeèn-né nga katitasòn koni s'ín tíchja̱ Xo̱jo̱n-la̱ Nainá nga tsò: “Jè xi kjenko̱-na, ti̱jè-ne xi kondra̱ kiìtji̱ngui-na.” 19 Tìbeèno̱jmí-nò kjoa̱ koi k'e̱ nga ti̱kjeè k'oa̱á ma, mé-ne k'e̱ nga jye k'oa̱s'ín ko̱ma, ko̱kjeiín-nò nga 'An-ná [xi Nainá]. 20 Nguiì kjoa̱ kixi̱í xi xan-nò, jè xi skoétjò xi̱ta̱ xi 'an siìkasén, 'aán skoétjò-na; ko̱ jè xi skoétjò-na, jè skoétjò jè xi kisìkasén-na. 21 Jesús k'e̱ nga jye o̱kitsò, 'ñó jchán kòkájno-la̱; ìjngoò k'a kiìchja̱, kitsò: —Nguiì o̱kixi̱í xi xan-nò, i̱ tíjnajiìn jngoò-nò xi si̱ìnga̱tsja-na i̱t'aà ts'e̱ xi̱ta̱ kondra̱-na̱. 22 Jñà xi̱ta̱ xi kota'yàt'aà-la̱, xki̱ xi ján kiskoò'an xíkjín nga mì kiì tíjiìn-la̱ yá-ne xi o̱títsò-la̱ Jesús. 23 Jngoò xi̱ta̱ xi kota'yàt'aà-la̱ Jesús ya̱ tíjnakjoòko̱ k'e̱ nga nchikjèn, jè xi̱ta̱-la̱ xi jè Jesús 'ñó matsjakeè. 24 Jè Simón Pedro, kitsjaà-la̱ seña jè xi̱ta̱ xíkjín xi ya̱ tíjnakjoòko̱ Jesús nga sko̱nangui-la̱ yá-né xi o̱títsò-la̱. 25 Jè xi̱ta̱ jè, isa̱ 'ñó tsibìjnat'aà chrañà-la̱; kiskònangui-la̱, kitsò-la̱: —¿Na̱'èn yá-né xi o̱tí'mì-la̱? 26 Kiìchja̱ Jesús kitsò: —Jè xi tsjaà jngoò-la̱ i̱nchra̱jín 'nchi̱, jè-né xi o̱tíxan-la̱. K'e̱é kitsjaà-la̱ jè Judas Iscariote, ti-la̱ Simón. 27 Jè xi̱ta̱ nei̱í ni̱to̱ón jahas'enjiìn ini̱ma̱-la̱ Judas k'e̱ nga kiskoé i̱nchra̱jín. Jesús kitsò-la̱: —Jè kjoa̱ xi s'i̱in xátíya ko̱tiìn. 28 Jñà xi̱ta̱ xi títsa̱jnat'aà ími̱xa̱ xi nchikjèn, ni̱jngoò xi kjòchi̱ya-la̱ mé-ne ko̱s'ín kitsò-ni Jesús. 29 Tjín i'nga xi̱ta̱ xi k'oa̱s'ín kisìkítsjeèn; maá-la̱ tsà títsò-la̱ Jesús: “Tsojmì ti̱ndí xi ts'e̱ s'eí.” O tsà títsò-la̱: “To̱n tjiì chiba-la̱ xi̱ta̱ i̱ma̱.” Nga jè Judas nga̱tsja chijtsa to̱n. 30 Judas, k'e̱ nga jye tsakjèn i̱nchra̱jín, ni̱to̱ón itjo ni'ya; kiì; nga jye jñò chon. 31 K'e̱ nga jye itjo ni'ya Judas nga kiì, Jesús kitsò: —I̱'ndei̱, jè Ki'ndí-la̱ Xi̱ta̱, jyeé jeya tíjna. Ti̱koa̱ Nainá jyeé jeya tíjna i̱t'aà ts'e̱ Ki'ndí-la̱. 32 Nainá tsà jeya tíjna i̱t'aà ts'e̱ Ki'ndí-la̱, ti̱jè-ne Nainá jeya siìkíjna Ki'ndí-la̱. Ni̱to̱ón jcha̱-la̱ kjoa̱ jeya-la̱. 33 Jñò, xi ndí i̱xti-na̱ xan-nò, mìtsà ti̱tse kóti̱jnako̱ ìsa̱-nò. Jñò, ki̱nchátsji-ná ta̱nga k'oa̱á xan-nò koni kixan-la̱ jñà xi̱ta̱ judío: Ya̱ ñánda tífia, jñò, mì kiì ko̱ma konguió. 34 Jngoò kjo̱tíxoma xi̱tse̱ tsjaà-nò: Ti̱tsjachaà xinguio̱o nga jngoò ìjngoò. K'oa̱s'ín ti̱tsjachaà xinguio̱o koni s'ín an kisìtsjakeè-nò. 35 Tsà k'oa̱s'ín si̱tsjachaà xinguio̱o nga jngoò ìjngoò, k'oa̱ás'ín skoe̱-ne ngats'iì xi̱ta̱ nga kixi̱ kjoa̱ nga ya̱ chíta'yàt'aà-ná. 36 Simón Pedro kiskònangui-la̱ Jesús, kitsò-la̱: —Na̱'èn, ¿ñánda tì'mì? Jesús, kitsò-la̱: —Ya̱ ñánda tífià, mì kiì ko̱ma kjíti̱ngui-ná xi kjoa̱ ni̱to̱n, ta̱nga k'e̱ nga ko̱ma i̱skan, ko̱maá kjíti̱ngui-ná. 37 Simón Pedro kitsò-la̱: —Na̱'èn, i̱'ndei̱, ¿mé-ne mì kiì ko̱ma kjíti̱ngui-le? Tíjngoò takoàn nga 'an ki̱yá ngajo-lè. 38 Jesús kiìchja̱, kitsò-la̱: —¿A kixi̱í kjoa̱ nga tíjngoò takoìn nga ji̱ ki̱yá ngajo-ná? Nguiì o̱kixi̱í xi xan-lè, k'e̱ nga tikj'eè kjindáya kóxtí, jàn k'a tsjámatin-ná nga mì kiì yaxkon-ná.
