1 Jñò xi xi̱ta̱ nchi̱ná 'mì-nò, ti̱ná'yaà 'én xi xán-nò. Chihi̱ndáyaà ba ba i̱t'aà ts'e̱ kjo̱'in xi si̱kjioón. 2 Kjoa̱ nchi̱ná-nò, nìmé chjí-la̱, tíbi'ndo-né. Nikje xi kichíkjá, jye nchisíkje cho̱ kixo. 3 To̱n oro-nò ko̱ to̱n plata-nò jye tímachi̱. Jè na̱chrjein k'e̱ nga sindaàjiìn, jñà chi̱-la̱ ko̱chjeén xi kondra̱ tsa̱jòn. Ko̱ó ni'ín ko̱kà yije yijo-nò. Nga jñò, titsa̱bincháxkó to̱n na̱s'ín jye tífehit'aà na̱chrjein. 4 Jñà xi̱ta̱ chi̱'nda xi kisíxá nangui-nò, nchikjindáya nga ótsjiya chjí-la̱ nga jñò kichona̱cha̱n-là. Nainá xi ts'e̱ yije nga'ñó xi tjín, jyeé kiì'nchré-la̱ koni s'ín nchikjindáya. 5 Jñò, nga i̱ titsa̱jnaà i̱t'aà nangui, ndaà titsa̱jnaà nga nìmé chija-nò, 'bì-la kjo̱tsja yijo-nò. Titsa̱nìsiín-là ini̱ma̱-nò nga 'bì-là kjo̱tsja xi síjé k'oa̱á ngaya-la̱ koni cho̱ xi mì kiì tíjiìn-la̱ tsa jye ijchò na̱chrjein-la̱ nga ki̱yá. 6 Jñò, tsohònè-là jé koa̱ kinìk'eèn jñà xi xi̱ta̱ kixi̱ xi mì jé tjín-la̱. Jñà xi̱ta̱ koi, mì kì komà tsasìko̱ yijo-la̱. 7 Jñò ndí 'ntsè, chíñakjoa̱ kóni skanda k'e̱ nga kjoi̱í ìjngoò k'a Na̱'èn-ná. K'oa̱s'ín chíña koni s'ín xi̱ta̱ xi síxáko̱ nangui nga koñakjoa̱á-la̱ jè jtsí xi 'ba ítjòn ko̱ xi i̱skan 'ba nga síxáko̱ jñà tsojmì tjè mé-ne nga ko̱ma koi̱ìxkó-ne tsojmì tjè-la̱ xi majchá nga 'ñó chjí-la̱. 8 Jñò, k'oa̱á ti̱s'ín chíñakjoa̱, 'ñó t'e-là takòn nga jye nchrobá machraña nga kjoi̱í ìjngoò k'a Na̱'èn-ná. 9 Ndí 'ntsè, kiì xki̱ xi ján tsajét'aà-là xinguio̱o, mé-ne nga mì kjo̱'in si̱nè-nò. Nga̱ jè Na̱'èn-ná jyeé tíjnanda nga kjoi̱í mé-ne koi̱ìndaàjiìn-la̱ xi̱ta̱. 10 Ndí 'ntsè, jñò, k'oa̱ás'ín t'e̱èn koni s'ín kis'iìn jñà xi̱ta̱ xi kiìchja̱ ngajo-la̱ Nainá nga kichíkjoa̱ko̱-la̱ nga kisìkjeiín kjo̱'in koií kjoa̱-la̱ nga 'én-la̱ Nainá kiìchja̱ya. 11 K'oa̱á s'ín 'ya-la̱ nga jñà xi̱ta̱ xi chíkjoa̱ko̱-la̱ kjo̱'in, s'eé-la̱ kjo̱ndaà. Jye tíjiìn-nò nga jè Job k'oa̱á ti̱ s'ín kichíkjoa̱ko̱-la̱ kjo̱'in. Ko̱ ijyeé 'yaà mé xi kitsjaà-la̱ Na̱'èn-ná k'e̱ nga jyehet'aà-ne kjoa̱. Na̱'èn-ná 'ñó ndaà xi̱ta̱, tjín-la̱ kjo̱hi̱ma̱takòn. 12 Jñò ndí 'ntsè, k'e̱ nga 'bioò 'én-nò, kì yá xi nìkítsa̱jna ítjòn. Kiì jè ngajmiì ko̱ nangui o̱ xi kj'eií tsojmì nikjeén. Tà k'oa̱ás'ín tixón: “jon” o xi “majìn,” mé-ne nga mì kjo̱'in si̱nè-nò tsa mì kiì ki̱tasòn. 13 Tsa tjín i'nga xi̱ta̱ xinguio̱o xi ba tjín-la̱, kàtìtsi'ba-la̱ Nainá. Tsa tjín i'nga xi tsja tjín-la̱, kàtaseè-la̱ Nainá nga jeya kàtasíkíjna. 14 Tsa tjín i'nga xi̱ta̱ xinguio̱o xi xk'én, kàtakinìkjaá xi̱ta̱ jchínga xi tjín-la̱ xá ya̱ i̱jiìn na̱xa̱ndá-la̱ Cristo mé-ne nga kàtítsi'batjiì-ne ko̱ i̱t'aà ts'e̱ nga'ñó-la̱ Na̱'èn-ná kàtasíkajno-la̱ asìti̱. 15 K'e̱ nga bítsi'batjiò xi̱ta̱, tsà ndaà mokjeiín-nò, jè xi̱ta̱ xi xk'én ko̱ndaà-ne. Jè Na̱'èn-ná si̱ìndaà-ne nga ko̱ma ko̱sítje̱n-ne. Tsà jé tjín-la̱ jcha̱at'aà-la̱ jé-la̱. 16 Chja̱hatakòn-là xi̱ta̱ xinguio̱o jé-nò. Ti̱koa̱ títsi'batjiò xinguio̱o mé-ne nga ko̱ndaà-nò. K'e̱ nga jngoò xi̱ta̱ kixi̱ bítsi'ba, tjín-la̱ nga'ñó nga ki̱tasòn. 17 Jè xi̱ta̱ xi kiìchja̱ ngajo-la̱ Nainá xi ki'mì Elías, k'oa̱á ti̱ s'ín xi̱ta̱ koni jñá. 'Ñó kisìjét'aà-la̱ Nainá nga mì ti̱ jtsí k'oa̱-ne; ko̱ ján nó osen mì ti̱ kiì ts'a-ne jtsí. 18 Ijngoò k'a tsibítsi'ba-la̱ Nainá nga kà'ta jtsí. Ts'aá ijngoò k'a-ne jtsí ko̱ jè nangui kòjchá tsojmi tjè. 19 Ndí 'ntsè, tsà tjín i'nga xinguio̱o xi chinchat'aàxìn-la̱ xi kjoa̱ kixi̱, koa̱ tsà jngoò xi̱ta̱ ki̱chja̱-la̱ nga kàtjanchrobát'aà ijngoò k'a-la̱ Nainá, 20 jè xi̱ta̱ xi ki̱chja̱-la̱ nga k'eno̱jmí-la̱ nga ch'o tjín ndi̱yá xi tsó'baya, k'oa̱s'ín kàtasijiìn-nò nga jngoò xi̱ta̱ tíhochrjekàjiìn kjo̱'in xi ts'e̱ kjoa̱biyaà. 'Ñó kjìn jé jcha̱hat'aà-la̱.
