1 ¿Ñánda nchrobá-ne kjo̱jchán nga bixkànko̱ò xinguio̱o? Ya̱á nchrobá-ne kjoa̱ch'o xi kjit'aà na̱chrjein síjé ini̱ma̱-nò nga bixkan-ko̱ò kjo̱hítsjen ch'o-nò. 2 Mejèn-nò tso̱jmì xi tsjìn-nò ta̱nga mì kiì sakò-nò, k'oa̱á ma-ne nga nìk'eèn xi̱ta̱ koa̱ maxìtakòn-chaà xi̱ta̱, ta̱nga mìkiì sakó-nò tsojmì xi mejèn-nò. K'oa̱á ma-ne nga sakó-nò kjo̱jchán nga bixkànko̱ò xinguio̱ò. Mì kiì sakó-nò tsojmì xi mejèn-nò koií kjoa̱-la̱ nga mìkiì níjé-là Nainá. 3 K'e̱ nga nìjé-la Nainá, mì kiì tsjá-nò nga mì kiì ndaà nìjé-la. Nga̱ jè xi mejèn-nò nga ya̱ si̱chjeén i̱t'aà ts'e̱ kjo̱tsja xi ch'o síjé yijo-nò. 4 Jñò xi mìtsà xi̱ta̱ kixi̱ 'mì-nò, ¿a mìtsà 'ya nga jè xi matsjakeè kjoa̱ ts'e̱ i̱sò'nde, kondra̱ ts'e̱é Nainá? Ni̱ta̱ yá-ne xi mejèn-la̱ ko̱tsjakeè kjoa̱ ts'e̱ i̱sò'nde, kondra̱-la̱ Nainá ma. 5 Koií k'oa̱ tsò-ne Xo̱jo̱n-la̱ Nainá nga tsò: "Jè Ini̱ma̱ Tsjeè xi Nainá kitsjaà-ná, skanda machi̱ni̱-né nga 'ñó matsjakeè-ná." 6 Ta̱nga Nainá, nga ko̱ kjo̱ndaà-la̱ ndaà síchját'aà-ná. K'oa̱á tsò Xo̱jo̱n-la̱ nga tsò: “Nainá kondra̱á tíjna-la̱ jñà xi̱ta̱ xi 'nga ikon, ta̱nga ko̱ kjo̱ndaà-la̱ ndaà síko̱ jñà xi xi̱ta̱ i̱ma̱ kjoa̱.” 7 Tjiì'nde nga Nainá katatíxoma-nò, ko̱ 'ñó tájaàjiìn titsa̱jna-là xi̱ta̱ nei̱í mé-ne nga ko̱sit'aàxìn-nò. 8 Ti̱chrañàt'aà-là Nainá mé-ne jè Nainá si̱ìchrañat'aà-nò. Jñò xi jé binchaàtsjioò, kì ti̱ jé binchaàtsji-nò, ti̱tsjeè ntsa̱a. Ti̱tsjeèya kjo̱hítsjeèn-la̱ ini̱ma̱-nò, jñò xi jò kjo̱hítsjeèn tjín-nò nga o̱kji matsjachaà Nainá ko̱ o̱kji matsjachaà i̱sò'nde. 9 Ti̱kájnoò jé-nò, ba titsa̱jnaà ko̱ chìhindáyaà. Jè kjoa̱ bijnò-nò, kjoa̱ ts'e̱ ndáxko̱òn katama. Ko̱ jè kjo̱tsja-nò, kjoa̱ba kàtama. 10 Nangui titsa̱jna-là Nainá mé-ne jè Nainá 'nga si̱ìkítsa̱jna-nò. 11 Ndí 'ntsè, kiì nokjoàjno-là xinguio̱o. Jè xi chja̱jno-la̱ 'ntse̱ nga tsò “mì kiì ndaà tís'ín”, jè kjo̱tíxoma tíchja̱jno-la̱ nga tsò nga mì kiì ndaà tjín kjo̱tíxoma. Ko̱ tsà k'oa̱ás'ín si nga mì kiì ndaà tjín kjo̱tíxoma, mì kiì tinìkitasoìn koni tsò kjo̱tíxoma. K'oa̱á ngaya-la̱ koni tsà xi̱ta̱xá tijni nga ji tìbindaàjiìn. 12 Tà jngoò ma-ne xi tsjá kjo̱tíxoma, ti̱jé-ne xi xi̱ta̱xá tíjna nga bíndaàjiìn-la̱ xi̱ta̱. Ko̱ ti̱jé-ne xi ma-la̱ ko̱chrjekájiìn-ná kjo̱'in, ti̱koa̱ ti̱jé-ne xi ma-la̱ tsjá-ná kjo̱'in. ¿Yá-ne ngaji̱ nga jé bínè-la̱ xingui̱i? 13 Jñò, ndaà ti̱ná'yaà koni xán-nò. Jñò bixòn-nò: “Na̱chrjein i̱'ndei̱ o nchijòn-le, xìn na̱xa̱ndá kjiaán, jngoò nó ki̱tsa̱jnaá nga si̱xá mé-ne tse to̱n si̱kijneé.” 14 Ta̱nga jñò, mì kiì tíjiìn-nò mé xi ko̱mation nchijòn-le nga titsa̱jnakon. Jñò, k'oa̱ás'ín ngaya-la̱ koni ifi. Jngoò tjò fahaya, ikjoàn ni̱to̱ón fìya-ne. 15 Jñò, kií s'ín tinòkjoa̱à, “Tsà Nainá mejèn-la̱ nga si̱íkítsa̱jnakon-ná, ko̱maá s'e̱én xá koi o s'e̱én xá xi kj'ei̱í.” 16 Ta̱nga jñò, 'ñó 'nga 'én nokjoà na̱s'ín mì kiì tíjin-nò mé xi ko̱ma nga tífì isa̱ na̱chrjein. Ngats'iì 'én 'nga xi nokjoà, jé-né. 17 Jè xi tíjiìn-la̱ kjoa̱ xi ndaà tjín ko̱ mì kiì síkitasòn, jé tíhótsji-la̱ yijo-la̱.
