1 An, Santiago, xi chi̱'nda-la̱ Nainá ma, ko̱ ts'e̱ Na̱'èn-ná Jesucristo, tisihixat'aà-nò, jñò, xi ya̱ inchrobát'aà-nò xi tejò tje̱-la̱ na̱xa̱ndá Israel xi xki̱ xi ján nangui titsa̱jna nga tíjtsa i̱sò'nde. 2 Jñò, xi 'ntsè chibá i̱t'aà ts'e̱ Cristo, ngui tsja t'è-là ini̱ma̱-nò k'e̱ nga ni̱ta̱mé kjoa̱ xi ko̱mation. 3 'Ya-nò k'e̱ nga tsà mé kjoa̱ xi ko̱matioòn nga chìt'aà-nò koni s'ín mokjeiín-nò, jñà kjoa̱ xi ko̱tojioòn, ya̱á sakò-nò nga'ñó nga ki̱chìkjoa̱ko̱-nò ni̱ta̱mé kjoa̱ xi ko̱tojioòn. 4 K'oa̱á ma-ne jè nga'ñó xi sakò-nò, ndaà kàtasíxájiìn ini̱ma̱-nò mé-ne nga nda ko̱jchínga-ne ko̱ tíjngo-ne kjo̱hítsjen-la̱ ini̱ma̱-nò nga ni̱mé si̱chijat'aà-la̱. 5 Tsà tjín i'nga xi̱ta̱ xi chijat'aà-la̱ kjo̱hítsjen, ti̱jét'aà-là Nainá; jè tsjá-nò. Nga̱ jè Nainá nguì ko̱ó ini̱ma̱-la̱ nga tsjá ko̱ mì tsà ch'o tsò-la̱ xi̱ta̱ k'e̱ nga síjé. 6 Ta̱nga nguì nda katakjeiín-nò k'e̱ nga si̱jé. Kiì jò 'beé-là takòn. Jè xi̱ta̱ xi jò 'beé-la̱ ikon, k'oa̱ás'ín ngaya-la̱ koni ndáchikon k'e̱ nga 'ba tjo̱, fìjen fìkjáko̱. 7 Jè xi̱ta̱ xi jò 'beé-la̱ ikon, kì k'oa̱á s'ín síkítsjeèn nga tjín xi tjoé-la̱ i̱t'aà ts'e̱ Na̱'èn-ná, 8 nga mìkiì tíjngoò ikon. Na̱chrjein i̱'ndei̱ kj'eií s'ín tísíkítsjeèn, nchijòn-le tikoa̱á kj'eií kjo̱hítsjeèn tjín-la̱. Mì tsà nguì jngoò ndi̱yá kjoé. 9 Jñà xi̱ta̱ xi 'ntsè chibá i̱t'aà ts'e̱ Cristo xi i̱ma̱ títsa̱jna, tsja kàtas'e-la̱ nga 'nga títsa̱jna nga nguixko̱n Nainá. 10 Ta̱nga jñà xi̱ta̱ nchi̱ná, tsja kàtas'e-la̱ nga nangui kítsa̱jna ya̱ nguixko̱n Nainá, nga jè xi̱ta̱ nchiná, k'oa̱á s'ín ko̱matin koni jngoò naxó xi mì kiì fìchrjein-la̱. 11 K'e̱ nga 'ñó matsjeè ndobá, jñà ijñá, xì-né, i̱kjoàn bixójen jè naxó-la̱; chi̱ja i̱sén-la̱ nga ndaà kjoàn. K'oa̱á ti̱s'ín ko̱matin jñà xi̱ta̱ nchi̱ná, k'e̱ nga 'ñó nchisíxáko̱ xá xi tjín-la̱, ta ni̱to̱ón ki̱yá. 12 Mé ta ndaà-la̱ jè xi̱ta̱ xi chíkjoa̱ko̱-la̱ k'e̱ nga chìt'aà, mé-ne k'e̱ nga jye si̱ìkijne-ne, tjoé-la̱ kjoa̱ bijnachon koni s'ín kitsjaà-la̱ 'én Nainá, ngats'iì xi̱ta̱ xi jè matsjakeè. Tjoé-la̱ kjoa̱ bijnachon k'oa̱á ngaya-la̱ koni jngoò corona sí'a sko̱ xi̱ta̱ xi síkijne k'e̱ nga síská. 13 Jñò, k'e̱ nga chìt'aà-nò nga mejèn-nò nga ch'o s'e̱en, kì k'oa̱á s'ín nìkítsjen nga jè Nainá tíkot'aà-nò. Nga jè Nainá mì yá xi ko̱ma-la̱ skót'aà nga ch'o kàtas'ín Nainá. Ti̱koa̱á jè Nainá mì kì kot'aà xi̱ta̱ nga ch'o kàtas'ín. 14 Jngoò xi̱ta̱, k'e̱ nga chìt'aà, ti̱ jñà-ne kjoa̱ ch'o-la̱ xi matsjakeè bínga nga tsoba'ñó. 15 Ko̱ jè kjoa̱ ch'o xi matsjakeè, k'e̱ nga jye bitasòn, ya̱á sakò jé. K'e̱ nga jye bitasòn kjoa̱ ts'e̱ jé, i̱kjoan 'fiì kjoa̱ biyaà. 16 Jñò ndí 'ntsè xi matsjake̱-nò, kì yijo-nò chòna̱cha̱n-là. 17 Ngats'iì kjo̱ndaà ko̱ kjo̱tjò xi tjoé-ná, i̱t'aà ts'e̱ Nainá xi tíjna ngajmiì nchrobá-ne, jè xi tsibíndaà ngats'iì tsojmì xi 'ya-la̱ ngajmiì, jñà xi síhiseèn. Nainá, mì k'oa̱á s'ín fatjìya-la̱ koni ma jñà tsojmì xi síhisen ngajmì nga fatjìya-la̱ koni ma 'nguién. 18 Nainá k'oa̱ás'ín kjòmejèn-la̱ nga kisìkítsa̱jnakon xi̱tse̱ ìjngoò k'a-ná xi kjoa̱ ts'e̱ 'én kixi̱-la̱, mé-ne nga jñá singa̱tsjaá yijo-ná Nainá koni tsojmì xi majchá ítjòn xi jè tsibínda. 19 Jñò, ndí 'ntsè xi matsjake̱-nò, ti̱kítsjeèn ngats'ioò, isa̱ ndaà titsa̱jnandaà nga ki̱ná'ya-là xi̱ta̱ xinguiaá xi kj'eií, chiba chiba ti̱nókjoa̱à, ko̱ kì taxki̱ majti-nò. 20 Jngoò xi̱ta̱ xi jti takòn, mì kiì kixi̱ síkitasòn koni s'ín mejèn-la̱ Nainá. 21 Chjaàxìn-là yijo-nò ngats'iì kjoa̱ tjé ko̱ kjoa̱ ch'o xi xki̱ xi ján tjín, mé-ne nga indaàjiìn chjoé-nò jñà 'én ndaà-la̱ Nainá xi jye kinà'yà, jñà 'én koi xi ko̱ma ko̱chrjekàjiìn-nò kjo̱'in. 22 Ti̱kitasòn koni tsò 'én-la̱ Nainá. Kì tà na'yà-jèn. Tsà mì kiì si̱kitasòn, ti̱ yijo-nò titsa̱chona̱cha̱n-là. 23 Ni̱ta̱ yá xi̱ta̱-ne xi 'nchré 'én-la̱ Nainá, tsà mì kiì si̱ìkitasòn, k'oa̱á ngaya-la̱ koni jngoò xi̱ta̱ xi chi̱tsín tíkotsejèn-ya. 24 K'e̱ nga jye beè i̱sén-la̱ kó kji, i̱kjoàn fì, ya̱á jchahajiìn-la̱ kó kji i̱sén-la̱. 25 Ta̱nga jè xi nguì ndaà kotsejèn-la̱ kjo̱tíxoma kixi̱ xi síkíjnandei̱í-ná, nga koií 'én síkítsjeèn kjit'aà koni tsò kjo̱tíxoma, ko̱ mì kiì síjchajiìn 'én xi 'nchré nga ndaà síkitasòn, xi̱ta̱ jè, ya̱á sakó-la̱ kjoa̱machikon-t'in k'e̱ nga koa̱s'ín tís'ín. 26 Tsà jngoò xi̱ta̱ xi tsò: “beèxkón-ná Nainá”, koa̱ tsà mì kiì bichjoà-la̱ ni̱je̱n-la̱ nga chja̱ ngats'iì 'én xi ch'o tsò, yijo-la̱à tikona̱cha̱n-la̱; nìmé chjí-la̱ nga tsò: “beèxkón-ná Nainá.” 27 K'e̱ nga nguì kixi̱ kjoa̱ nga Nainá xi Na̱'èn-ná yaxkoán, koni s'ín mejèn-la̱, jé-né nga si̱chját'aà-lá xi i̱xti cha̱n, ko̱ íchjín ka'àn xi jye k'en x'i̱n-la̱, jñà xi kjo̱'in tjín-la̱, ti̱koa̱ mì kì ki̱'nde-lá yijo-ná nga kjoa̱ ch'o chjinìjñaá xi tjín i̱sò'nde.
