1 Ngats'iì kjoa̱ xi chibàya-ná, tjín jngoò xi ìsa̱á 'ñó chjí-la̱, jè-né nga tíjna jngoò-ná no̱'miì ítjòn xi tsibìjnat'aà chrja kixi̱-la̱ íxi̱le̱ kjo̱tíxoma-la̱ Nainá ján ngajmiì. 2 Ya̱á síxá ya̱ ñánda tíjna xi nguì Ni'ya Tsjeè-la̱ Nainá, xi jè sobà Nainá tsibíndaà; mìtsà ta̱xki̱ xi̱ta̱ tsibíndaà. 3 Ngats'iì no̱'miì ítjòn, k'oa̱ás'ín satíxoma-la̱ nga kjo̱tjò tsját'aà-la̱ Nainá ko̱ cho̱ sík'en; k'oa̱á ma-ne nga jè Cristo ti̱k'oa tjínè-la̱ nga kis'e-la̱ mé kjo̱tjò xi kitsjaàt'aà-la̱ Nainá. 4 Jè Cristo, tsà i̱ tíjna i̱t'aà nangui, skanda mì-la kiì ko̱ma nga no̱'miì kíjna, nga i̱ i̱taà na̱ngui, jyeé tjín no̱'miì xi tsját'aà-la̱ kjo̱tjò Nainá koni s'ín tjín kjo̱tíxoma xi kiskiì Moisés. 5 Ta̱nga jñà no̱'miì xi tjín i̱ i̱t'aà nangui, ya̱á síxá ni'ya xi tà i̱sén-la̱-né ko̱ 'nguién-la̱-né jè Ni'ya Tsjeè-la̱ Nainá xi tíjna ngajmiì; nga̱ jè Moisés k'e̱ nga jye mejèn koi̱í'tsia̱ nga ki̱ìndaà ni'ya tsjeè-la̱ Nainá xi nikje, jè Nainá kitsò-la̱: "Ndaà chítsejìn, k'oa̱ kó kji t'i̱ìn koni kji xi tsako-le ya̱ nindoò Sinaí." 6 Ta̱nga na̱chrjein i̱'ndei̱, ìsa̱á ndaà tjín xá xi kitjoé-la̱ Jesucristo nga no̱'miì ítjòn tíjna, nga jè osìjnajiìn jngoò kjoa̱ xi̱tse̱ xi isa̱ ndaà tjín xi tsibíndaàjiìn Nainá ko̱ xi̱ta̱, nga ya̱á nchrobát'aà-ne 'én xi isa̱ ndaà tjín koni s'ín jye kitsjaà tso'ba Nainá. 7 Tsà ni̱mé xi kisichijat'aà-la̱ jè kjoa̱ xi kisindaàjiìn ítjòn, mì-la kiì mochjeén nga ijngoò k'a sindaàjiìn xi ma-ne jò k'a. 8 Ta̱nga Nainá k'e̱ nga tsohótiìko̱, k'oa̱á kitsò: Kijchó na̱chrjein k'e̱ nga kìndaàjiìnko̱ jngoò kjoa̱ xi̱tse̱ jñà xi̱ta̱ Israel ko̱ xi̱ta̱ Judá, —kitsò Nainá. 9 Jè kjoa̱ xi̱tse̱ xi kìndaàjiìn-koa̱a, mìtsà k'oa̱s'ín si̱ndaàjiìn koni ts'e̱ xi̱ta̱ jchínga-la̱, k'e̱ nga 'an sobà kitsobà tsja nga tsachrjekàjñaà nangui Egipto. Jñà xi̱ta̱ koi, mì kiì kisìkitasòn koni s'ín kisindaàjiìn, k'oa̱ komà-ne nga kitsjìn takoàn, —tsò Nainá. 10 K'e̱ nga jye ko̱ma i̱skan, jè kjoa̱ xi̱tse̱ xi kìndaàjñaàkoa̱a xi̱ta̱ Israel, kiìs'ín s'e̱, —tsò Nainá: Kjo̱tíxoma-na̱ ya̱á kíjnajñaà ya̱ kjo̱hítsjeèn-la̱, ko̱ ya̱á skiaà i̱jiìn ini̱ma̱-la̱. 'An-ná xi Nainá ki̱tso̱-na, ko̱ jñà-né xi ko̱ma xi̱ta̱ na̱xa̱ndá-na̱. 11 Mì ti̱ kiì ko̱chjeén-ne nga xi̱ta̱ xíkjín ke̱èno̱jmíya-la̱ ni̱ mì tsà jè 'ntse̱ ke̱èno̱jmí-la̱ nga skoe̱xkon Nainá, nga ngats'iì xi̱ta̱ skoe̱xkon-na̱ mats'ia̱ko̱-ne xi sa i̱xti skanda jñà xi 'ñó xi̱ta̱ jchínga. 12 'Aán siìjcha̱at'aà-la̱ ngats'iì kjoa̱ ch'o xi kis'iìn, mì ti̱ kiì siìkítsjeèn-na̱ jé xi tjín-la̱. 13 K'e̱ nga Nainá síkaxki̱ ijngoò kjoa̱ xi̱tse̱, tsòyaá-ne nga jè kjoa̱ xi kisìndaàjiìn ítjòn, jyeé kòjchínga. Mì ti̱ kiì tímochjeén-ne, jyeé tíchija.
