1 Jñò ndí 'ntsè, xi xi̱ta̱-la̱ na̱xa̱ndá tsjeè-la̱ Nainá 'mì-nò, xi xó k'oa̱á s'ín jaàjiìn-nò Nainá nga xi̱ta̱ ts'e̱ tsò-nò, k'oa̱á s'in ndaà ti̱kítsjeèn nga jè Cristo Jesús xi xó tsibíxáya-la̱ Nainá ko̱ jè tíjna nga no̱'miì ítjòn i̱t'aà ts'e kjoa̱ xi mokjeiín-ná. 2 Jesús ndaà síkitasòn xá-la̱ Nainá, nga xó k'oa̱á s'ín kits'iì-la̱ koni jè Moisés, ndaà kisìkitasòn i̱t'aà ts'e̱ na̱xa̱ndá-la̱ Nainá. 3 Jesús ìsa̱á jeya tíjna koni jè Moisés. K'oa̱á ngaya-la̱ koni jngoò xi̱ta̱ xi bíndaà ni'ya, ìsa̱á jeya bíjna nei-la̱ mì k'oa̱á-ne koni tijè-ne ni'ya. 4 Ngats'iì ni'ya, tsejeén tjín xi̱ta̱ xi tsibíndaà; ta̱nga jè Nainá xi tsibíndaà yije tsojmì xi tjín i̱sò'nde. 5 Xi nguiì o̱kixi̱, jè Moisés, nga xi̱ta̱ chi̱'nda-la̱ Nainá ma, ndaà kisìkitasòn xá-la̱ i̱t'aà ts'e̱ xi̱ta̱ na̱xa̱ndá-la̱ Nainá. Jè xá xi kis'iìn, jè-né nga kitsja 'én kó s'ín ki̱chja̱ Nainá k'e̱ nga ko̱ma i̱skan. 6 Ta̱nga jè Cristo, nga Ki'ndí-la̱ Nainá ma, jè otíxoma i̱t'aà ts'e̱ na̱xa̱ndá-la̱, jè na̱xa̱ndá-la̱ xi tijñà-ná, tsà kixi̱ titsa̱jnaá skanda k'e̱ nga kjoe̱hit'aà na̱chrjein koni s'ín nga mokjeiìn-ná i̱t'aà ts'e̱ Nainá nga ko̱ ko̱tsjaà-ná titsa̱chiñaá xi kjo̱ndaà-la̱ Nainá. 7 K'oa̱á tsò jè Ini̱ma̱ Tsjeè-la̱ Nainá jè xo̱jo̱n xi tjít'aà 'én-la̱ Nainá, nga tsò: I̱'ndei̱, tsà titsa̱na'yà jñò 'én-la̱ Nainá, 8 kiì tájaàjiìn bitsajnaàko̱ ini̱ma̱-nò koni s'ín kis'iìn jñà xi̱ta̱ xi kondra̱ kiì-la̱ Nainá nga kiskoót'aà ya̱ i̱'nde i̱t'aà xìn ñánda nangui kixì chon. 9 Jñà xi̱ta̱ jchínga-nò kiskoòt'aà-na na̱s'ín jye kijtseè ichán nó kjoa̱ xi kis'ian. 10 Koiì kjoa̱-la̱ nga tsohóti̱jna jchán-la̱ jñà xi̱ta̱ koi, k'oa̱á kixan-la̱: “Jñò, kjit'aà na̱chrjein xìn ndi̱yá tjaàko̱ò kjo̱hítsjeèn-la̱ ini̱ma̱-nò ko̱ mì kiì yaxkon ndi̱yá-na̱.” 11 Xi kjoa̱ jti-na̱, k'oa̱á s'ín kitsjaà ntsoba nga mì kiì kjoa̱has'enjiìn i̱'nde ts'a̱n ñánda ma nikjáya. 12 Ndí 'ntsè, t'e̱èn kinda̱ yijo-nò, ni̱ jngoò xi ch'o síkíjna ini̱ma̱-la̱ nga mì kiì mokjeiín-la̱ mé-ne nga mì ki̱nchat'aà xìn-lá Nainá xi tíjnakon. 13 Ta sa̱á, na̱chrjein nchijòn tjiì nga'ñó-la̱ xinguio̱ò, k'e̱ nga tíjna isa̱ na̱chrjein, mè-ne nga mì kiì ko̱tájaàjiìn-ne ini̱ma̱-nò nga mì kiì ma skónachan-nò kjoa̱ ts'e̱ jé. 14 Jñá ya̱á nokjoà-aná i̱t'aà ts'e̱ Cristo, tsà k'oa̱ s'ín ndaà ko̱kjeiín-ná skanda k'e̱ nga kjoehit'aà na̱chrjein koni s'ín ko̱kjeiín-ná nga ti̱sa̱ tàts'en-la̱ kjoa̱. 15 Xo̱jo̱n-la̱ Nainá k'oa̱ás'ín tíchja̱ nga tsò: I̱'ndei̱, tsà titsa̱na'yà jñò 'én-la̱ Nainá, kiì tájaàjiìn bitsajnaàko̱ ini̱ma̱-nò koni s'ín kis'iìn jñà xi̱ta̱ xi kondra̱ kiì-la̱ Nainá. 16 ¿Yá xi̱ta̱-ne xi kiì'nchré 'én-la̱ Nainá, ikjoàn kondra̱ kiì-la̱? Ti̱ jñà-ne ngats'iì xi̱ta̱ xi jè Moisés tsachrjekàjiìn i̱'nde̱ Egipto. 17 ¿Ko̱ yá xi̱ta̱-ne xi ichán nó tsibìjnajchán ko̱ Nainá? Jñà-né xi̱ta̱ xi tsohótsji jé, xi ya̱ k'en ya̱ i̱ya ndi̱yá ya̱ i̱'nde i̱t'aà xìn ñánda nangui kixì chon. 18 ¿Ko̱ yá xi̱ta̱-ne xi Nainá kitsò-la̱ nga mì kiì kjoa̱has'enjiìn i̱'nde̱ ñánda tjín kjoa̱ nìkjáya? Jñà-né xi̱ta̱ xi mì kiì kiì'nchréñijon-la̱. 19 Ko̱ k'oa̱ás'ín tísijiìn-ná nga mì kiì jahas'enjiìn i̱'nde ñánda ma nìkjáya, koiì kjoa̱-la̱ nga mì kiì kòkjeiín-la̱.
