1 Koií kjoa̱-la̱, mochjeèn-né nga nguiì sa̱ ndaà si̱s'in-lá 'én xi jye kina'yá, mé-ne nga mì xìn ndiyá kjiaán koni s'ín tjín ndi̱yá-la̱ Nainá. 2 Jñà kjo̱tíxoma xi Nainá kitsjà nga kisìkjeén àkja̱le̱ na̱chrjein xi jye tsato, tjín-la̱ o̱kixi̱, ko̱ jñà xi̱ta̱ xi tsohótsji jé nga mì kiì kisìkitasòn kjo̱tíxoma xi ki'tsi-la̱, kjo̱'iín kitjoé-la̱ koni s'ín o'kìn-la̱. 3 Ko̱ jñá xi titsa̱jnaá na̱chrjein i̱'ndei̱, isa̱á 'ñó s'e̱-ná kjo̱'in tsà mì kì si̱'siaán 'én-la̱ Cristo nga jè ko̱chrjekàjiìn-ná kjo̱'in. Nga̱ jè sobá Na̱'èn-ná kitsjà ítjòn-ná 'én koi. Ko̱ jñà xi i̱skan kiì'nchré 'én koi, ti̱koa̱á tsibeèno̱jmí-ná nga kixi̱ kjoa̱. 4 Nainá, ti̱koa̱á kisìkixi̱ya 'én koi nga kjìn sko̱ya kjo̱xkón kis'iìn xi okó kjoa̱ jeya-la̱ Nainá, ti̱koa̱ kisìka'bísòn kjo̱tjò ts'e̱ I̱nima̱ Tsjeè-la̱; k'oa̱á s'ín kitsjaà koni s'ín mejèn-la̱ jè. 5 Nga̱ Nainá mìtsà jñà àkja̱le̱ kitsjaà-la̱ nga jñà ko̱tìxoma-la̱ jè i̱sò'nde xi i̱skan kjoi̱í, jè xi titsa̱chibàya-ná. 6 Ta saá tíchja̱á jngoò k'a Xo̱jo̱n-la̱ Nainá ñánda nga tsò: Ji̱ Na̱'èn, ¿yá-né xi xi̱ta̱? ¿a o'kín-la̱ nga ji̱ nìkítsjeèn-ne ko̱ makájno-lè i̱t'aà ts'e̱? 7 Ìsa̱á nangui kinìkíjni koni jñà àkja̱le̱, ki'tsiì-la̱ kjoa̱ jeya ko̱ 'nga kinìkíjni nga tsatìxoma, 8 ji̱ ki'tsi-la̱ nga'ñó nga ma ko̱tíxoma-la̱ nga'tsiì tsojmì xi tjín. Tsà Nainá kitsjaà-la̱ nga'ñó nga jè ko̱tèxoma-la̱ nga'tsiì tsojmì xi tjín tsòyaá-ne nga ni̱mé tsojmì tjín xi mì jè otíxoma-la̱. Kixi̱í kjoa̱, na̱chrjein i̱'ndei̱, kj'eè kiì ndaà 'ya-la̱ tsà jè tíhotíxoma-la̱ nga'tsiì tsojmì xi tjín. 9 Ta̱nga 'ya-ná nga jè Jesús, na̱s'ín nangui kinìkíjna chiba na̱chrjein koni jñà àkja̱le̱, ta̱nga i̱'ndei̱, jeyaá tíjna ko̱ 'ngaá tíjna nga tíhotíxoma, koií kjoa̱-la̱ nga kjo̱'in kisìkjeiìn k'e̱ nga k'en. Nainá, 'ñó matsjake-ná nga kisìkasén Jesús nga jè kisìkjeiín kjo̱'in ts'e̱ kjoa̱biya xi kjo̱nda ts'e̱ ngats'iì xi̱ta̱. 10 Jè Nainá, xi tsibínda yije ni̱ta̱mé xi tjín, ndaá ok'in-la̱ koni s'ín kis'in k'e̱ nga kisìkatojin kjo̱'in Ki'ndí-la̱ mé-ne nga i̱t'aa ts'e̱ kjo̱'in xi tsotojin-ne, ni̱mé kjoa̱ xi kichijat'a-la̱ nga ko̱ma ko̱chrjekájin-ná kjo̱'in kjoa̱ ts'e̱ jé-ná nga'tsì xi i̱xti-la̱ Nainá maá xi jè mejèn-la̱ nga ya̱ kítsa̱jnakoa̱á ñánda nga jeya tíjna jè. 11 Jè xi tísítsjeè xi̱ta̱ xi tjín-la̱ jé, ko̱ jñà xi̱ta̱ xi tjímatsjeè, tajngoó Na̱'én ma. Koiì kjoa̱-la̱ jè Ki'ndí-la̱ Nainá mì kiì masobà-la̱ nga 'ntse̱ tsò-la̱ xi̱ta̱ xi sìtsjeè. 12 Jè Xo̱jo̱n-la̱ Nainá k'oa̱s'ín tjít'aà nga tsò: Keèno̱jmí-la̱ jñà xi̱ta̱ 'ntsè xi i̱t'aà tsi̱ji, seè-lè ya̱ i̱jiìn-la̱ xi̱ta̱ na̱xa̱ndá-le. 13 Ti̱koa̱á tjít'aà ñánda tsò: Jè Nainá ma'ñót'aà takoàn. Ijngoò k'a tjít'aà ñánda tsò: I̱í tijnakoa̱a i̱xti xi Nainá kitsjaà-na. 14 K'oa̱ás'in tjín koni i̱xti-la̱ xi̱ta̱, ta̱jngoò jní-né ko̱ tajngoò yijo-né, Jesús k'oa̱ tis'ín jní ko̱ yijo kis'eè-la̱ mè-ne nga i̱t'aà ts'e̱ kjoa̱ biyaà ma kisikìjne-la̱ xi̱ta̱ nei̱í xi tjín-la̱ nga'ñó nga ma-la̱ sík'e̱n xi̱ta̱. 15 Jesús k'oa̱ás'in komàtin mé-ne nga komà kisìkítsa̱jnandei̱í ngats'iì xi̱ta̱ xi kitsakjòn-la̱ kjoa̱ biyaà nga k'oa̱ás'ín títsa̱jnà koni tsà tjít'aà'ñó-la̱ kó tjín na̱chrjein bitsa̱jnakon xi̱ta̱. 16 Jesús mìtsà koií xá j'iì-ne nga jñà àkja̱le̱ si̱ìchját'aà-la̱, jñà xi̱ta̱ tje̱-la̱ Abraham si̱ìchját'aà-la̱. 17 K'oa̱ás'ín komà-ne, jè Jesús tjínè-la̱ nga ngásòn k'oa̱s'ín xi̱ta̱ komà koni 'ntse̱, mé-ne nga no̱'miì ítjòn komà-ne xi tjín-la̱ kjo̱hi̱ma̱takòn xi ndaà síkitasòn xá-la̱ Nainá nga ko̱ma ki̱ìchjítji-ne jé-la̱ xi̱ta̱ i̱t'aà ts'e̱ kjoa̱ biyaà-la̱. 18 Koni s'ín kichit'aà nga kits'ì-la̱ kjo̱'in, jè, k'oa̱á tis'ín ma-la̱ osìko̱ jè xi̱ta̱ xi ko̱ kjo̱'in tíchit'aà-ne.
