1 Jñò, tji̱tsjachaà xi̱ta̱ xinguio̱ò xi 'ntsè chibá xi i̱t'aà ts'e̱ Cristo. 2 Kì nìjcha̱ajioòn jñà xi̱ta̱ xi bijchókon-nò ni'ya-nò, ti̱sin-là nga kàtasíkjáya. K'oa̱á komàtin i'nga xi̱ta̱, kiskoétjò xi̱ta̱ xi mì kiì beèxkon, ta̱nga àkja̱le̱-né. 3 Ti̱kítsjeèn jñà xi̱ta̱ xi nda̱yá títsa̱jna; k'oa̱ás'ín t'è-là takòn koni tsà ngásòn kjo̱'in titsa̱jnaà. Tikítsjeèn jñà xi̱ta̱ xi tíyatoòn koni tsà jñò xi ti̱koa̱ k'oa̱s'ín tíyatoòn-nò. 4 Jñò xi jye chixan, ngásòn jcha̱xkón xinguio̱o. Kì ch'o bitsa̱jna-ko̱ò xinguio̱o. Nga jñà xi kjoa̱chijngui s'ín, Nainá tsjá-la̱ kjo̱'in. 5 Kì to̱ón 'ñó matsjachaà; kàtajngoò takòn koni kji tjín-nò. Nainá k'oa̱á tsò: “Mì kiì tsjeìn tàkòn-nò, ko̱ mì kiì ta̱jngoò sikíjna-nò.” 6 K'oa̱á ma-ne nga ma k'oa̱s'ín kixoàn: Jè Na̱'èn-ná ko̱si̱ko̱-ná, mì kiì kiskoán mé kjoa̱ xi si̱ìko̱-ná xi̱ta̱. 7 Ti̱kítsjeèn jñà xi̱ta̱ xi chincha ítjòn nga tsakóya-nò 'én-la̱ Nainá; ti̱kítsjeèn kó s'ín kisìjchá yijo-la̱ xi̱ta̱ koi ko̱ k'oa̱á s'ín chjíngui-là koni s'ín kòkjeiín-la̱. 8 Jesucristo mì kiì fahatjiya, ti̱jè-ne ngojña̱, ti̱jè-ne na̱chrjein i̱'ndei̱, ko̱ ti̱jè-ne ni̱ta̱ mé na̱chrjein-ne. 9 Kì kiì nìs'in-là kjo̱hítsjeèn xi kj'ei̱í tsò ko̱ xi mì kiì yaxkon-la̱ nga xìn ndi̱yá fìko̱-ná. Ìsa̱á ndaà tjín nga jè ini̱ma̱-ná s'e-la̱ nga'ñó i̱t'aà ts'e̱ kjo̱ndaà-la̱ Nainá mì k'oa̱á-ne koni ts'e̱ tsojmì xi ma chine; nga jñà tsojmì xi ma chine, nì mé nga'ñó kitsjà-la̱ jñà xi k'oa̱ tjín kjoa̱ kisì'sin-la̱. 10 Jñá, tjín jngoò-ná i̱'nde tsjeè [ñánda kitsjaà kjo̱tjò yijo-la̱ Cristo nga k'en], ta̱nga jñà no̱'miì xi tákó ya̱ síxá i̱t'aà ts'e̱ kjoa̱ jchínga ya̱ Ni'ya xi nikje, mì kiì tjí'nde-la̱ nga tjoé-la̱ kjo̱ndaà nga ya̱ ko̱kje̱n. 11 Nga̱ jè yijo-la̱ cho̱ xi sík'en jñà no̱'miì, [mì kiì tjí'nde-la̱ nga tjoé-la̱ nga ski̱ne̱]; ta jè jní-la̱ cho̱ fìko̱ jè no̱'miì ítjòn ya̱ i̱'nde tsjeè-la̱ Nainá xi kjoa̱ ts'e jé. Ta̱nga jè yijo-la̱ cho̱, i̱t'aà xìn i̱'nde fìko̱ nga tì. 12 K'oa̱á ti̱ s'ín komàtin Jesús, i̱t'aà xìn-la̱ na̱xa̱ndá kisìkjeiín kjo̱'in, mé-ne nga kisìtsjeè-ne na̱xa̱ndá i̱t'aà ts'e̱ xi ngui jní ts'e̱. 13 K'oa̱á ma-ne jñá, ki̱tjokàjiaán na̱xa̱ndá. Jè ki̱tji̱ngui-lá Jesús nga si̱kjiaán-koa̱á kjo̱'in xi jè kisìkjeiín. 14 Nga i̱ i̱t'aà nangui tsjìn-ná na̱xa̱ndá xi nguiì jngoò k'a tíjna ni̱ ta kjé-ne; jè titsa̱chiñá-lá na̱xa̱ndá xi i̱skan ko̱tsejèn. 15 Koi kjoa̱-la̱ mochjeén-né nga kjit'aà na̱chrjein jeya sikíjna Nainá i̱t'aà ts'e̱ Jesucristo koni jngoò kjo̱tjò xi 'bì-lá Nainá, 'én xi nguiì tso'baá bitjo-ne nga bèno̱jmiá yá-né jè. 16 Kì nìjchajioòn nga ndaà t'e̱èn, tjiì i̱tsé-là xinguio̱o mé xi tjín-nò; k'oa̱á tjín kjo̱tjò xi sasèn-la̱ Nainá. 17 Ti̱kitasòn-lá jñà xi̱ta̱ xi jncha ítjòn-nò, tináyañijòn-là. Nga̱ jñà síkinda̱-nò nga mì jchi̱ja ini̱ma̱-nò koií kjoa̱-la̱ nga tjínè-la̱ nga tsjá-la̱ kinda̱ Nainá. Ti̱kitasòn-là koni s'ín ki̱tso̱-nò mé-ne nga ngui ko̱ kjo̱tsjaà-la̱ si̱ìxá-ne nga mì ba s'e̱-la̱; tsà ba s'e̱-la̱, nìmé kjo̱nda s'e̱-nò. 18 Ti̱jét'aà-là Nainá i̱t'aà tsaji̱n, nga k'oa̱á s'ín tíjngoò takon-je̱n nga ndaà tjín kjo̱hítsjeèn-na̱je̱n, mejèn-na̱je̱n nga ndaà s'e̱n-je̱n ni̱ta̱ mé kjoa̱-ne. 19 Isa̱ ndaà síjé-nò nga ti̱jét'aà-là Nainá xi i̱t'aà ts'a̱n, mé-ne nga kàtatsjá'nde-na nga ni̱to̱n kjíkon-nò. 20 Jè Nainá xi tsjá kjoa̱'nchán xi kisìkjaáya-la̱ i̱t'aà ts'e̱ kjoa̱ biyaà Na'èn-ná Jesucristo, xi paxto ítjòn-la̱ ts'e̱ orrè, jè xi ko̱ jní-la̱ tsibí'ñó-ne jngoò kjoa̱ xi̱tse̱ xi mì kiì kjoe̱hit'aà ni̱ta̱ kjé-ne, 21 kàtasíkixi̱yandaà-nò nga'tsiì kjoa̱ xi ndaà tjín, mé-ni nga kàtitjasòn-ne koni s'ín mejèn-la̱ Nainá; i̱t'aà ts'e̱ Jesucristo, k'oa̱sín kàtasíko̱-ná koni s'ín sasén-la̱ Nainá. ¡Jeya kàtìjna Cristo ni̱ta̱ mé na̱chrjein-ne! K'oa̱á s'ín katama. 22 Bìtsi'ba-nò ndí 'ntsè, ndaà chjoétjò 'én xi tìkjiì-nò koni s'ín tìbìnè-nò nga̱ ta chiba 'én tìkjiì-nò. 23 Kàtasijiìn-nò jè 'ntsè Timoteo jye tíjnandeií-ne xi kjoa̱ ts'e kjo̱'in; tsà kjoi̱í ni̱to̱n, kjíko̱-ná k'e̱ nga kjián katsejèn-nò. 24 Ti̱xat'aà yije jñà xi̱ta̱ xi jncha ítjòn-nò ko̱ ngats'iì xi̱ta̱-la̱ Cristo. Jñà xi Italia ts'e̱ nchisíhixat'aà-nò. 25 Ngats'ioò, jè kàtìjna-ko̱-nò kjo̱ndaà-la̱ Nainá.
