1 Nga ti̱sa̱ kjòtseé, jè Nainá kjìn k'a kiìchja̱-la̱ xi̱ta̱ jchínga-ná nga jñà kisìkjeén xi̱ta̱ xi kiìchja̱ ngajo-la̱, nga kjìn ska̱ya tjín-ne kós'ín kiìchja̱-la̱. 2 Ta̱nga i'ndei̱, nga tífehit'aà na̱chrjein, Nainá, jè ki'ndí-la̱ tísíkjeén nga tíchja̱ko̱-ná ko̱ ti̱jè-ne ki'ndí-la̱ kisìkjeén nga tsibíndaà i̱só'nde ko̱ jè kjònga̱tsja ngats'iì nga yije tsojmì xi tjín i̱só'nde. 3 Ko̱ jè Ki'ndí xi okó jè kjoa̱ i̱sén ko̱ kjoa̱ jeya-la̱ Nainá; ko̱ i̱t'aà ts'e̱, 'ya-ná kó kji kòn-ni Nainá. I̱t'aà ts'e̱ nga'ñó xi tjín-la̱ 'én-la̱ Cristo síjnangui'ñó-la̱ i̱sò'nde. K'e̱ nga jye kitsjaà kjotjò yijo-la̱ nga kisìtsjè-ná jé-ná i̱kjoàn tsijin ngajmiì nga tsibìjnat'aà chrja kixi̱-la̱ Nainá. 4 Nga jè Ki'ndí-la̱ Nainá tíjna ítjòn; ìsa̱á 'ñó 'nga tíjna mì k'oa-ne koni jñà àkja̱le̱, koi kjoa̱-la̱ nga ìsa̱á 'ñó 'nga tíjna jè 'ín xi kitjoé-la̱. 5 Nga jè Nainá, ni̱ jngoò k'a koa̱s'ín kitsò jngoò-la̱ àkja̱le̱: Jiì-né xi ki'ndí-na̱ xan-lè, An-ná Na'èn-lè. Tikoa̱á ni̱ jngoò àkja̱le̱ xi kitsò-la̱: An ko̱ma Na'èn-la̱, jè ko̱ma ki'ndí-na̱. 6 K'e̱ nga kisìkasén ki'ndítjòn-la̱ i̱ i̱sò'nde ti'koa̱á k'oa̱á s'ín kitsò: Ngatsiì àkja̱le̱-na̱ kàteèxkón. 7 I̱t'aà ts'e̱ àkja̱le̱, k'oa̱á tsò: Nainá, maá-la̱ tjo̱ s'ín àkja̱le̱-la̱; jñà chi̱'nda-la̱ maá-la̱ ni'ín s'ín. 8 Ta̱nga i̱t'aà ts'e̱ ki'ndí-la̱ tsò-né: Ji-ní xi Nainá, kixi̱í ko̱tixomoi ni̱ta̱kjé-né, 9 Matsjacha-né kjoa̱ xi ndaà tjín ko̱ majticha-né kjoa̱ xi ch'o tjín; koi kjoa̱-la̱, 'an xi Nainá 'mì-na̱ xó jaàjiìn-le nga isa̱ nda jcha̱xkón-le mé-ne nga isa̱ tsee kjo̱tsja s'e̱-lè koni jñà xi̱ta̱ xingui̱i xi báhijtako̱-le. 10 Tikoaá tsò-né: Ji Na'èn xi Nainá 'mì-lè nga ji̱ otixomoi, nga sa̱ tjàts'en-la̱ kjoa̱, ji̱í tsibíndi i̱sò'nde, ti̱ji̱í-ne xi tsibíndi ngajmiì. 11 Nga̱ji̱ ki̱jna-né ni̱ta̱ mé na̱chrjein-ne. Ta̱nga jè i̱sò'nde ko̱ ngajmiì kjoe̱hit'aà-né; k'oa̱á s'in ko̱jchá koni ma nikje nga ma jchínga, 12 K'oa̱á s'ín kíxkóyi koni jngoò xió, k'oa̱á s'ín si̱ìkjahatjìyi koni s'ín fatjìya nikje. Ta̱nga ngaji̱ mì kì kjoa̱tjìya-lè ni̱ta̱ kjé-ne ko̱ jñà na̱chrjein-le mì kiì kjoe̱hit'aà. 13 Nainá ni saà jngoò k'a kitsò-la̱ jngoò àkja̱le̱-la̱: Ti̱jnat'aiì chrja kixi̱-na̱ skanda k'e̱ nga sikíjnanguia kondra̱-le ya̱ ñánda nga nchasòn ntso̱koiì. 14 Ngats'iì àkja̱le̱, ini̱ma̱-né nga síxá-la̱ Nainá; jñà nikasén nga síchját'aà-la̱ jñà xi̱ta̱ xi tjoé-la̱ kjo̱ndaà nga bitjokàjiìn kjo̱'in kjoa̱ ts'e̱ jé-la̱.
