1 Jñò 'ndí 'ntsè ko̱ 'ndí tìchjaá, tsà tjín i'nga xi̱ta̱ xi jé ótsji, jñò xi ndaà onguít'aà-là jè Ini̱ma̱ Tsjeè-la̱ Nainá, jñò ti̱si̱ko̱ò nga kàta kixi̱ya ìjngoò k'a-ne nga indaà kjoa̱ ti̱nókjoa̱-là. Ta̱nga jñò, t'e̱en kinda̱ yijo-nò, mé-ne nga mì jé ska̱jiìn-nò. 2 Ti̱siko̱o xinguio̱o k'e̱ nga tsa mé kjoa̱ xi 'in tjín títsa̱jnajiìn; k'oa̱á s'ín ko̱ma-ne nga si̱kitasòn jè kjo̱tíxoma xi kitsjaà Cristo. 3 Tsà tjín i'nga xi̱ta̱ xi ndaà ochrjengui yijo-la̱, koa̱ tsà mìtsà kixi̱-ne kjoa̱, jñà xi̱ta̱ koi, tà yijo-la̱á nchikona̱cha̱n-la̱. 4 Ìsa̱á ndaà-ne nga chít'aà yijo-nò nga jngoò ìjngoò-nò, a ndaà titsa̱'nè; tsa ndaà titsa̱'nè, ta ya̱ tijin takon, kì k'oa̱á s'ín nìkítsjeén nga jñò, isa̱ ndaà titsa̱'nè mì k'oa̱-ne koni jñà xi̱ta̱ xi kj'eií. 5 Nga jngoò ìjngoò, ya̱á kjinè-la̱ kós'ín tísíjchá yijo-la̱. 6 Jñà xi̱ta̱ xi nchikota'yà 'én ndaà-la̱ Nainá, mochjeén-né nga kàtatsjá-la̱ mé xi ko̱chjeén-la̱ maestro-la̱ nga 'én okóya. 7 Kì yijo-nò chona̱cha̱n-là; nga Nainá mì kiì ko̱ma si̱skákoa̱á. Nga ìjngoò ìjngoò xi̱ta̱, koni tjín kjoa̱ xi s'ín, k'oa̱á ti̱ tjín kjoa̱ xi sakò-la̱. 8 Nga jè xi k'oa̱s'ín s'ín koni s'ín mejèn-la̱ yijo-la̱, kjoa̱biyaá tjoé-la̱ i̱t'aà ts'e̱ kjoa̱ ch'o xi síjé yijo-la̱, ta̱nga jè xi k'oa̱s'ín s'ín koni s'ín mejèn-la̱ Ini̱ma̱ Tsjeè-la̱ Nainá, i̱t'aà ts'e̱ Ini̱ma̱ Tsjeè-la̱ Nainá tjoé-la̱ kjoa̱bijnachoòn xi mì kiì fehit'aà ni̱ta̱kjé-né. 9 Mì kiì ndaà tjín tsà ko̱siì-ná nga ndaà s'e̱én; nga ki̱jchò na̱chrjein nga sa̱kò-ná kjo̱ndaà tsà mì kì si̱hinda-lá takoán. 10 Koi kjoa̱-la̱, k'e̱ ma xi 'né i̱tsé, ndaà si̱koa̱á ngats'iì xi̱ta̱, jñà titsa̱jna ítjòn jñà xi̱ta̱ xinguia̱á xi ngásòn mokjeiín-ná 'én-la̱ Nainá. 11 Chítsejèn-là tsí ki̱tsian-ne letra xi ntsa̱a tìkjiì-nò. 12 Jñà xi̱ta̱ xi mejèn-la̱ nga kjo̱'ñó s'ín-nò nga sit'aà chi̱ba̱-nò kjoa̱ ts'e̱ circuncisión, tà koií xi mejèn-la̱ nga ndaà síkítsa̱jna yijo-la̱ nga nguixko̱n xi̱ta̱; ko̱ majìn-la̱ nga xi̱ta̱ ki̱tji̱ngui kondra̱-la̱ tsa ko̱s'ín keèno̱jmíya nga ya̱ k'ent'aà krò Cristo. 13 Jñà xi̱ta̱ xi tjít'aà chi̱ba̱-la̱ kjoa̱ ts'e̱ circuncisión, ti̱koa̱á mì kiì síkitasòn kjo̱tíxoma, ta̱nga mejèn-la̱ nga sit'aà chi̱ba̱-nò mé-ne nga i̱t'aà tsa̱jòn ndaà si̱ìkítsa̱jna-ne yijo-la̱ k'e̱ nga skoe̱ nga jñò jye tjít'aà chi̱ba̱-nò. 14 Ta̱nga 'an, ni̱ mé kjoa̱ xi mejèn-na nga ndaà síkíjna yijo-na̱; ta jè ta̱jngoó krò-la̱ Na̱'èn-ná Jesucristo nga ndaà síkíjna yijo-na̱. K'oa̱á ma-ne nga jñà kjoa̱ ch'o xi tjín i̱sò'nde, i̱t'aà ts'a̱n, títsa̱jnak'en-né ko̱ 'an tijna̱k'eén-la̱ jè i̱sò'nde. Mì ti̱ k'oa̱á tjín kjoa̱ xi sisìn-na. 15 Xi i̱t'aà ts'e̱ Cristo, mì tsà jè xi chjí-la̱ tsà tjít'aà chi̱ba̱-ná ko̱ tsà tsjìn-ná chi̱ba̱ kjoa̱ ts'e̱ circuncisión; jè xi chjí-la̱ nga jè Nainá jyeè kisìkátjiya-ná ko̱ jye xi̱ta̱ xi̱tse̱ kjoán. 16 Kàtas'e-la̱ kjoa̱'nchán ko̱ kjoa̱ i̱ma̱ takòn ya̱ i̱jiìn ini̱ma̱-la̱ ngats'iì xi̱ta̱ xi k'oa̱s'ín nchisíkitjasòn koni tsò 'én jè; jñà-né xi xi̱ta̱-la̱ Nainá ts'e̱ na̱xa̱ndá Israel. 17 K'oa̱á ma-ne i̱'ndei̱, kì ti̱ yá xi kjoa̱ ótsji isa-na nga jyè tjít'aà chi̱ba̱-la̱ yijo-na̱ kjo̱'in xi kitsjaà-na̱ xi̱ta̱ xi kjoa̱ ts'e̱ Na̱'èn-ná Jesús. 18 Jñò 'ndí 'ntsè ko̱ 'ndí tìchjaá, jè kàtasijiìn ini̱ma̱-nò kjo̱ndaà-la̱ Jesucristo xi otíxoma-ná. K'oa̱s'ín kàtama.
