1 Jñò xi na̱xa̱ndá-la̱ Cristo maà xi titsa̱jnaà ján nangui Galacia, titsanìhixot'aà-nòje̱n 'an xi 'mì-na Pablo, ko̱ ngats'iì xi̱ta̱-la̱ Cristo xi i̱ titsa̱jnako̱-na. Jè xá ítjòn xi 'an tjín-na, mì tsà i̱t'aà ts'e̱ xi̱ta̱ i̱sò'nde kitjoé-na ko̱ mì tsà taxki̱ xi̱ta̱ tsibít'aà-na. Jè sobá Jesucristo ko̱ Nainá tsibíxáya-na, jè xi Na̱'èn 'mì-lá xi jè kisìkjáya-la̱ Jesús i̱t'aà ts'e̱ kjoa̱biya. 3 Jè Na̱'èn-ná xi Nainá ko̱ Na̱'èn Jesucristo xi otíxoma-ná kàtatsjaà-nò kjo̱ndaà ko̱ kjoa̱'nchán ya̱ i̱jiìn ini̱ma̱-nò. 4 Jñò, jyeé tíjiìn-nò nga jè Jesucristo kitsjaà kjo̱tjò yijo-la̱ nga k'en xi kjoa̱ ts'e̱ jé-ná, mé-ne nga ko̱chrjekàjiìn-ná jñà kjoa̱'cho xi tjín i̱ i̱sò'nde. Jesucristo, k'oa̱á s'ín kisìkitasòn koni s'ín mejèn-la̱ Na̱'èn-ná xi Nainá. 5 Jeya kàtìjna Nainá ni̱ta̱mé na̱chrjein-ne, ni̱ta̱mé nó-ne. K'oa̱ás'ín kàtama. 6 'An, tà maxkón-na nga jñò, ta̱ ni̱toón chinchat'aàxìn-là Nainá nga kj'ei̱í 'én tsanguì-t'aà-là ko̱ kijneì tákòn Nainá xi xó kiìchja̱-nò mé-ne nga i̱t'aà ts'e̱ kjo̱ndaà-la̱ Cristo si̱jchá yijo-nò. 7 Ta̱nga tsjìn ìjngoò sa 'én ndaà-la̱ Nainá xi kjoa̱ ts'e̱ Cristo xi kj'ei̱í tsò. Ta̱nga tjín i'nga xi̱ta̱ xi binchá ská-nò xi mejèn-la̱ si̱ìkjatjìya-la̱ 'én ndaà-la̱ Nainá xi kjoa̱ ts'e̱ Cristo. 8 Ta̱nga tsà tjín xi̱ta̱ xi kj'ei̱í tsò 'én xi okóya xi mì k'oa̱á tsò koni tsò 'én ndaà-la̱ Nainá xi kjoa̱ ts'e̱ Cristo xi ji̱n beèno̱jmí-je̱n, kàtatsjá-la̱ kjo̱'in Nainá, na̱s'ín ti 'an-na o na̱s'ín jngoò àkja̱le̱ xi ngajmiì nchrobá-ne katatsjá-naje̱n kjo̱'in. 9 Koni s'ín ki'mì-nòje̱n nga sa̱ ítjòn, tákó k'oa̱ás'ín tixan ìjngoò k'a-nò. Tsà yá xi kj'ei̱í tsò 'én xi beèno̱jmí-nò koni tsò 'én ndaà-la̱ Nainá xi jye kichjoétjò, Nainá kàtatsjá-la̱ kjo̱'in. 10 An, mìtsà kjo̱ndaà-la̱ xi̱ta̱ otsjià, kjo̱ndaà-la̱ Nainá otsjià. Mìtsà koií otsjià nga ndaà kóti̱jna nga nguixko̱n xi̱ta̱. Tsà ko̱s'ín s'iaàn, mì-là tsà kixi̱ kjoa̱ nga chi̱'nda-la̱ Cristo ma. 11 Jñò 'ntsè ko̱ tìchjaá, k'oa̱s'ín kàtasijiìn-nò; jè 'én ndaà-la̱ Nainá xi kjoa̱ ts'e̱ Cristo xi 'an beènojmiá, mìtsà kjo̱hítsjeèn-la̱ xi ta̱xki̱ xi̱ta̱. 12 Mìtsà i̱t'aà ts'e̱ xi ta̱xki̱ xi̱ta̱ komà-na ko̱ nga kjòchi̱ya-na 'én koi; jè sobá Jesucristo kisìhisen-na nga tsakóya-na. 13 Jñò, jyeé kina'ya kó kis'ian nga ti sa̱ ítjòn, k'e̱ nga ya̱ kiìt'aà-la̱ kjo̱tíxoma-la̱ xi̱ta̱ judío. 'An, tsangatji̱ngui-la̱ jñà xi̱ta̱ na̱xa̱ndá-la̱ Cristo nga kòjtikeè; mejèn-na nga kàtachija. 14 Koni s'ín tjín kjo̱tíxoma-la̱ jñà xi̱ta̱ judío, kjìn jchán xi̱ta̱ na̱xa̱ndá-na̱ xi ta̱ña jchínga-je̱n, kisìkítsa̱jna tji̱nguiaà nga 'an, ìsa̱ 'ñó ndaà kisìkitasoàn koni s'ín tjín xkósòn xi tjín-la̱ xi̱ta̱ jchínga-na̱. 15 Ta̱nga Nainá k'oa̱ás'ín kisaseèn-la̱ nga 'an jaàjiìn-na k'e̱ nga tákó ya̱ tijna̱ya'ma i̱ntso̱'ba̱ nea̱-na̱, nga nguì tà ko̱ó kjo̱ndaà-la̱ nga 'a̱n kiìchja̱-na̱. 16 ko̱ kisìkatsejèn-na̱ Ki'ndí-la̱ mé-ne ko̱ma kichjàya-jiìn-la̱ 'én ndaà-la̱ jñà xi mìtsà xi̱ta̱ judío. Mìtsà yá xi kiskònangui-la̱ xi ta̱xki̱ xi̱ta̱; 17 ko̱ mìtsà ya̱ kiaà ján na̱xa̱ndá Jerusalén ñánda títsa̱jna jñà xi̱ta̱ xi isa̱ kjòtseé tsibíxáya-la̱ Cristo koni 'an. Tà sa̱á ya̱ kiaà i̱'nde Arabia; xi komà i̱skan-ne inchrobà ìjngoò k'a-na̱ ya̱ na̱xa̱ndá Damasco. 18 K'e̱ nga jye tsato jàn nó, skanda k'e̱é kiaà ján Jerusalén nga mejèn-na skoe̱xkoan Cefas [xi ti̱koa̱ Pedro 'mì]; chrj'oòn na̱chrjein tsohótijna ya̱ ni'ya-la̱. 19 Xi̱ta̱ xi kisìxáya-la̱, mìtsà yá xi kijtseèxkoan xi kj'ei̱í, ta jè ta̱jngoò Jacobo xi 'ntse̱ ma Na̱'èn-ná. 20 Jñà 'én koi xi 'a̱n tísíkasén-nò, ngui 'én kixi̱-né, tíbeè Nainá, mìtsà 'én ndiso. 21 K'e̱ nga jye komà i̱skan, kiaà ján nangui Siria ko̱ ya̱ nangui Cilicia. 22 Ta̱nga jñà na̱chrjein koi, kj'è kì beèxkon-na jñà xi̱ta̱ na̱xa̱ndá-la̱ Cristo xi títsa̱jna ya̱ nangui Judea. 23 Tà k'oa̱á tsò 'én xi kiì'nchré: “Jè xi kiìti̱ngui kondra̱-ná nga sa̱ kjòtseé, i̱'ndei̱, 'én ndaà-la̱ Nainá xi kjoa̱ ts'e̱ Cristo chja̱ya, jè 'én xi mejèn-la̱ kisìchja nga sa ítjòn.” 24 Jñà xi̱ta̱ koi, jeya kisìkíjna Nainá nga jye jahatjìya-na.
