1 Jñò xi i̱xti 'mì-nò, ti̱ná'yañijon-là xi̱ta̱ jchínga-nò nga Cristo titsa̱jnako̱o. Koií kjoa̱ xi kixi̱ tjín. 2 Nga̱ tsò jè Xo̱jo̱n-la̱ Nainá:“Jcha̱xkoín na̱'èn-lè ko̱ nea̱-lè, mé-nè nga ndaà kijna-ne koa̱ tseé ko̱ma-lè i̱ i̱sò'nde.” Ngats'iì kjo̱tíxoma xi kitsjaà Nainá, jè jè xi tsjá ítjòn jngo-la̱ kjo̱ndaà jñà xi̱ta̱ xi síkitasòn. 4 Jñò xi na̱'èn 'mì-nò, kiì i̱xti-nò nìjti-là; k'oa̱á s'ín ti̱jchá nga ndaà ti̱kixio̱o koa̱ ndaà ta̱kóya-là koni s'ín mejèn-la̱ Na̱'èn-ná. 5 Jñò xi chi̱'nda maà, ndaà ti̱kitasòn-là xi nei-nò ma i̱ i̱t'aà nangui; ndaà jcha̱xkón nga tíjngoò takòn koni tsà xá ts'e̱ Cristo titsa̱'nè. 6 Ndaà ti̱xá-là nei-nò; mì tà k'e̱é ndaà nìxá k'e̱ nga tímakinda̱ nga tà jè nei-nò ndaà ki̱tsa̱jnako̱o; k'oa̱á s'ín t'e̱en koni tsà chi̱'nda-la̱ Cristo maà nga nguì ko̱ó ini̱ma̱-nò ti̱xá koni s'ín mejèn-la̱ Nainá. 7 K'oa̱á s'ín ti̱xá nga nguiì ko̱ kjo̱tsja-nò koni tsà xá-la̱ Na'èn-ná titsa̱'nè ko̱ mì tsà ts'e̱ xi ta̱xki̱ xi̱ta̱. 8 Ndaà 'yaà nga jngoò ìjngoò xi̱ta̱, Nainá, k'oa̱á s'ín tsjá-la̱ chjí-la̱ koni tjín xá xi s'ín, na̱s'ín xi̱ta̱ chi̱'nda ko̱ xi mì tsà xi̱ta̱ chi̱'nda. 9 Jñò xi nei-la̱ xá 'mì-nò, k'oa̱á ti̱ s'ín tjò t'e̱en chi̱'nda-nò. Kì taxki̱ chitiko̱o chi̱'nda-nò nga mejèn-nò kjo̱'in bìnè-là. Ndaà tíjiìn-nò nga jè Nei-la̱ xi̱ta̱ chi̱'nda-nò ko̱ jè Nei-nò, ti̱jé-ne xi tíjna ján ngajmiì. Nga jè, mì kiì faájiìn xi̱ta̱; tà ngásòn fìko̱. 10 Jñò 'ntsè, jñà kjoa̱ koi xi fehit'aà-ne; k'oa̱á xán-nò: Ti̱nchátsjioò nga'ñó ts'e̱ ini̱ma̱-nò i̱t'aà ts'e̱ Na̱'èn-ná Jesucristo; 'ñó ti̱tsa̱jnako̱o ngats'iì nga'ñó xi 'ñó tsee tjín-la̱ Cristo. 11 Ti̱si̱ko̱ó yijo-nò, chjoé yije nga'ñó xi tsjá-nò Nainá mé-nè nga tájaà titsa̱jna-nò nga mì jè xi̱ta̱ nei̱í skòna̱cha̱n-nò. K'oa̱á ngaya-la̱ koni jñà soldado nga 'ya yije ki̱cha̱-la̱ k'e̱ nga fì kjo̱jchán. 12 Nga mìtsà jñà xi̱ta̱ i̱sò'nde titsa̱bixkánkoa̱á. Jñà ko̱ndra̱-ná xi xi̱ta̱xá ítjòn tjín-la̱ i̱jiìn iseèn, jñà xi mì kiì tsejèn, ngats'iì xi tjín-la̱ kjo̱tíxoma ts'e̱ xi̱ta̱ nei̱í, koa̱ xi sko̱-la̱ titsa̱jna nga jñà otíxoma i̱sò'nde jñò, ngats'iì nga'ñó-la̱ xi̱ta̱ nei̱í xi tjíma i̱jiìn i̱sén nga tíjtsa i̱sò'nde. 13 Koií ko̱xan-nò, chjoé yije nga'ñó xi tsjá-nò Nainá mé-nè nga 'ñó ki̱tsa̱jna-nò jè na̱chrjein k'e̱ nga mejèn-la̱ skóna̱cha̱n-nò xi̱ta̱ nei̱í. K'e̱ nga jye si̱kijneè, tákó k'oa̱á s'ín kixi̱ ki̱nchà-là ni̱ta̱ mé kjoa̱-ne. 14 K'oa̱á s'ín 'ñó ki̱xi̱ ti̱tsa̱jnandaà; nguiì 'én kixi̱ ti̱nókjoa̱à mé-ne nga ki̱tsa̱jnandaà kjoa̱ ts'e̱ xi̱ta̱ nei̱í koni s'ín jñà soldado nga 'ñó bíkjá xincho̱-la̱ [mé-ne nga mì si̱ìjti-la̱ nikje-la̱ k'e̱ fì kjo̱jchán.] Ko̱ nguiì kixi̱ titsa̱jnaá nga nguixko̱n Nainá mé-ne nga ndaà kójtsa ini̱ma̱-nò koni jngoò soldado xi ndaà kijtsa ini̱ma̱-la̱ jè chrjoa̱ xi 'mì coraza. 15 Kjit'aà na̱chrjein titsa̱jnandaà nga si̱ka'bió 'én ndaà-la̱ Nainá mé-ne nga kata'se-la̱ kjoa̱'nchán jñà xi̱ta̱. K'e̱ nga ko̱s'ín s'eèn, 'ñó ki̱tsa̱jnaà koni jngoò soldado nga tjín-la̱ nga'ñó xoxté-la̱ nga ma fì. 16 K'e̱ nga ndaà mokjeiín-nò i̱t'aà ts'e̱ Nainá, jè ko̱si̱ko̱-nò xi kjoa̱ ts'e̱ xi̱ta̱ nei̱í k'e̱ nga jè bítin-nò nga binchaàtsjioò jé; k'oa̱á ngaya-la̱ koni s'ín jngoò soldado nga kjoé escudo-la̱, jè xi síkits'o ni'ín flecha xi títì-la̱ xi̱ta̱ nei̱í. 17 Jè kjoa̱ nga bitjokájioòn kjo̱'in, jè ngaya-la̱ jè tsí'nguién ki̱cha̱ xi osìko̱ sko̱ soldado. Koa̱ jñà 'én ndaà-la̱ Nainá jè ngaya-la̱ ki̱cha̱ ndojò xi tsjá Ini̱ma̱ Tsjeè-la̱ Nainá. 18 Kiì bìkjoàn-là nga bìtsi'bà-là Nainá; ti̱jét'aà kjit'aà-là koni s'ín beèno̱jmíya-nò Ini̱ma̱ Tsjeè-la̱ Nainá. Kjit'aà na̱chrjein titsa̱jnandaà; kiì nìhindaà-jèn nga bitsi'batjiò ngats'iì xi̱ta̱ na̱xa̱ndá-la̱ Nainá. 19 Ti̱koa̱ titsi'batjì-ná i̱t'aà ts'a̱n mé-nè nga Nainá tsjá-na 'én xi kichjà, koa̱ mé-ne nga mì kiì tsakjoòn-na k'e̱ nga kéno̱jmí-la̱ xi̱ta̱ jè 'én ndaà-la̱ Nainá xi kjoa̱ ts'e̱ Cristo xi ochrjekàjiìn-ná kjo̱'in mé-ne nga ko̱ma skoe̱-ne jè kjoa̱'ma xi tíjna-la̱ Nainá skanda kjòtseé. 20 Nainá kisìkasén-na nga 'an kichjà ngajo-la̱ i̱t'aà ts'e̱ 'én ndaà-la̱; koií kjoa̱-la̱ nga nda̱yá tijna̱aya; sijét'aà-nò nga tìtsi'batjì-ná mé-ne nga mì tsakjoòn-na nga kéno̱jmiá 'én ndaà-la̱. 21 Tisìkasén-nò jè 'ntsé Tíquico jè xi matsjachaá, ti̱koa̱ ndaà síxá-la̱ Nainá. Jè o̱ki̱tso̱ yije-nò xi i̱t'aà ts'a̱n, kó s'ín tijna̱a, ko̱ mé xi tis'ian. 22 Koií xá tísìkasén-nò nga ke̱èno̱jmí-nò xi i̱t'aà tsa̱je̱n kós'ín titsa̱jna-je̱n ko̱ mé-ne nga kàtatsjá-nò nga'ñó ts'e̱ ini̱ma̱-nò. 23 Jè Nainá xi Na̱'èn-ná ko̱ jè Jesucristo xi otíxoma-ná kàtasíkijna 'nchán i̱jiìn ini̱ma̱-nò ngats'ioò xi xinguia̱á chibá; kàtatsjá-nò nga tjòchaà t'e̱en xinguio̱o, nga mokjeiín-nò i̱t'aà ts'e̱ Nainá. 24 Jè kjo̱ndaà-la̱ Jesucristo xi otíxoma-ná kàtìjna-ko̱ ngats'iì xi̱ta̱ xi mì kiì síkjahatjiya-la̱ kjo̱hítsjen-la̱ nga kjit'aà na̱chrjein ndaà matsjakeè Na̱'èn-ná Jesucristo. K'oa̱s'ín kàtama.
