1 K'oa̱á ma-ne bìtsi'bà-la̱ Nainá, an xi 'mì-na Pablo nga nda̱yá tijna̱a, koií nga̱tjì-la̱ nga an beèno̱jmí-nò 'én ndaà-la̱ Jesucristo, jñò xi mìtsà xi̱ta̱ Judío 'mì-nò. 2 Nga jyeé-la tíjiìn-nò nga kjo̱ndaà ts'e̱ Nainá-né nga an kitsjaà-na xá xi kjo̱ndaà tsa̱jòn, 3 koni s'ín kisìhiseèn-na Nainá nga tsakón-na jè kjoa̱ xi tjí'ma-la̱ skanda kjòtseé. Jyeé ìsa̱ kiskiì chiba-nò jñà 'én koi. 4 K'e̱ nga tsà ndaà kíxke̱jñoò xo̱jo̱n jè koni s'ín kiskiì ítjòn-nò, ya̱á jcha̱a nga 'a̱n ndaà tíjiìn-na̱ jè kjoa̱ tjí'ma i̱t'aà ts'e̱ Cristo. 5 Nga ìsa̱ kjòtseé, ni̱ jngoò xi̱ta̱ tíjiìn-la̱ jè kjoa̱ tjí'ma; ta̱nga i̱'ndei̱ jè Ini̱ma̱ Tsjeè-la̱ Nainá kisìhiseèn-la̱ jñà xi̱ta̱ xi xó jahájin-ne Nainá, jñà xi̱ta̱ xi tsibíxáya-la̱ Cristo ko̱ xi kiìchja̱ ngajo-la̱. 6 Jè kjoa̱ tjí'ma, jè-né nga jñà xi mìtsà xi̱ta̱ Judío, k'e̱ nga mokjeiín-la̱ 'én ndaà-la̱ Nainá xi kjoa̱ ts'e̱ Cristo, ngásón tjoé-la̱ kjo̱tjò-la̱ Nainá nga ngásón i̱xti-la̱ ma koni jñà xi̱ta̱ Judío; jngoò na̱xa̱ndá ko̱ma yije kóho̱tjín; ko̱ jñà xi mì tsà xi̱ta̱ Judío ngásón tjoé-la̱ kjo̱ndaà koni s'ín kitsjaà-la̱ tso'ba Nainá jñà xi̱ta̱ judío. 7 Ta kjo̱ndaà-la̱ Nainá-né nga 'an kitjoé-na xá jè. Jè kitsjaà kjo̱tjò-na nga chi̱'nda-la̱ ma k'e̱ nga kitsjà-na nga'ñó-la̱ mé-ne nga 'an kèno̱jmiá 'e̱n ndaà-la̱ Cristo. 8 'An, na̱sín ìsa̱ 'ñó nangui tijna̱a-la̱ ngats'iì xi̱ta̱-la̱ Nainá, ta̱nga Nainá kitsjaà-na kjo̱ndaà jè, nga an chjàyajiìn-la̱ 'én ndaà-la̱ Nainá xi kjoa̱ ts'e̱ Cristo jñà xi mìtsà xi̱ta̱ Judío, mé-nè nga skoe̱-ne kó kji 'ñó tse kjo̱ndaà tsjá Cristo skanda mì kiì bijchótji̱ngui-la̱ kjo̱hítsjen-ná. 9 Jè xá xi 'an kjònga̱tsja nga 'an sìhiseèn-la̱ jñà xi̱ta̱ mé-ne nga skoe̱-ne kó s'ín tjín kjoa̱ xi tjí'ma. Nainá xi tsibíndaà i̱sò'nde, jè tíjna'ma-la̱ kjoa̱ jè skanda ti̱sa̱ tàts'en-la̱ kjoa̱. 10 Koií k'oa̱s'ín komà-ne mé-ne skoe̱-ne i̱'ndei̱ ngats'iì ini̱ma̱ ch'o ko̱ ini̱ma̱ xi ndaà xi tjín-la̱ nga'ñó i̱jiìn i̱sén nga kjìn sko̱ya kjoa̱chji̱ne̱ tjín-la̱ Nainá. Ya̱á skoe̱ kjoa̱ koi i̱t'aà ts'e̱ na̱xa̱ndá-la̱ Cristo. 11 Nga ti̱sa̱ tàts'en-la̱ kjoa̱, Nainá k'oa̱á s'ín tjíndaà-la̱ nga i̱t'aà ts'e̱ Cristo ki̱tasòn yije kjoa̱ koi. 12 I̱'ndei̱, nga Cristo titsa̱jnakoa̱á, jyeé 'ñó takoán. Ko̱maá chi̱koa̱á Nainá ñánda tíjna nga mì ti̱ kiì xkón-oná nga jyeé mokjeiín-ná i̱t'aà ts'e̱ Cristo. 13 K'oa̱á s'ín siìjé-nò nga kì nìkjaàjen-là takòn jè kjo̱'in xi tísíkjiaàn nga an beèno̱jmí-nò 'én ndaà-la̱ Nainá xi kjoa̱ ts'e̱ Cristo. Ìsa̱á ndaà kàtatsja-la̱ ini̱ma̱-nò nga kjo̱ndaà tsa̱jòn-nò. 14 Koií kjoa̱-la̱ nga òsijna̱xkónchit'aà-la̱ nga bìtsi'bà-la̱ Nainá xi Na̱'èn-ná. 15 Nga i̱t'aà ts'e̱ Nainá nchrobá-ne nga tjín na̱'èn ko̱ tjín i̱xti nga jngoò ìjngoò ni'ya xi̱ta̱ xi tjín ngajmiì ko̱ xi tjín i̱sò'nde. 16 Nainá, nga tse nga'ñó tjín-la̱, k'oa̱á s'ín bìtsi'bà-la̱ nga kàtatsjá-nò nga'ñó-la̱ xi ts'e̱ ini̱ma̱-nò nga jè Ini̱ma̱ Tsjeè-la̱ Nainá kàtasíxájiìn ini̱ma̱-nò. 17 Jè Cristo, ndaà kàtijnajiìn ini̱ma̱-nò, nga mokjeiín-nò i̱t'aà ts'e̱; 'ñó ndaà kata'se-nò kjoa̱tjòchaà-la̱ Nainá koni jngo yá xi na̱nga̱ fì i̱ma̱-la̱ ko̱ koni jngoò ni'ya xi na̱nga̱ tjíhijiìn chrjó-la̱. 18 K'oa̱á s'ín ko̱ma-ne nga jñò ko̱ ngats'iì xi̱ta̱-la̱ Nainá, jcha̱xkoòn koa̱ ko̱chi̱ya-nò nga 'ñó tsee kjoa̱tjòcha xi tjín-la̱ Cristo, 'ñó tiyà, 'ñó ndojò, 'ñó na̱nga̱ ko̱ 'ñó 'nga. 19 Nguì ndaà jcha̱a jè kjoa̱tjòchaà xi tjín-la̱ Cristo xi ìsa̱ 'ñó otonè-la̱ ngats'iì kjo̱hítsjen-ná skanda mì kiì machi̱ya-ná, mé-ne nga nì mé chi̱jat'aà-nò koni jè Nainá, nì mé chi̱jat'aà-la̱. 20 Nainá, 'ñó tsee nga'ñó tjín-la̱, tsa k'e̱ nga mé xi nìjé-lá, skanda isa̱á 'ñó síkatonè-la̱ koni s'ín nìjé-lá ko̱ nga koni s'ín nìkítsjeén. K'oa̱á s'ín tsjá yije-ná nga ko̱ nga'ñó-la̱ xi síxájiìn ini̱ma̱-ná. 21 Jeya katìjna Nainá ya̱ i̱jiìn na̱xa̱ndá-la̱ ko̱ i̱t'aà ts'e̱ Cristo ni̱ta̱ mé na̱chrjein-ne, ni̱ta̱ mé nó-ne. K'oa̱s'ín kàtama.
