1 Jñà kjoa̱ ti̱nchátsioò kjo̱ndaà xi tjín ngajmiì ya̱ ñánda tíjna Cristo nga ya̱ tíjnat'aà chrja kixi̱-la̱ Nainá, koií kjoa̱-la̱ nga ya̱ jaáya-kjo-nò ko̱ Cristo, 2 Koií ti̱kítsjeèn kjit'aà mé kjoa̱ xi tjín ngajmiì, kì koií nìkítsjeèn kjoa̱ xi tjín i̱sò'nde. 3 Nga̱ jñò, jyeé k'en kjoa̱ ts'e̱ i̱sò'nde, ko̱ jè kjoa̱bijnachoòn xi̱tse̱ xi tjín-nò nga ya̱ titsa̱jnako̱ Cristo, ya̱á tíjnatjò nga nguixko̱n Nainá. 4 Jè Cristo, jè-né xi kjoa̱bijnachoòn-nò; k'e̱ nga jè xi ko̱tsejèn ìjngoò k'a, jñò, ti̱koa̱á ya̱á ko̱tsejèn-ko̱ nga jeya ki̱tsa̱jnaà. 5 Ti̱kítsa̱jna kjoa̱ ch'o xi síjé yijo jé-nò xi kjoa̱ ts'e̱ i̱sò'nde: koni jñà kjoa̱ chijngui, ko̱ kjoa̱ tjé ko̱ kjoa̱ ch'o xi sasén-la̱ yijo-nò ko̱ ngats'iì kjoa̱ ch'o xi fahajin-nò, ko̱ nga kjìn tsojmì mejèn-nò. Kjoa̱ jè ti̱jé-ne koni tsà xkósòn yaxkón. 6 Koií kjoa̱-la̱ nga kjo̱'in tsjá-la̱ Nainá jñà xi̱ta̱ xi mì kiì 'nchréñijon-la̱. 7 Jñò, tikoa̱á k'oa̱á tjín kjoa̱ xi ki'nè kjòtseé k'e̱ nga ya̱ titsa̱jnajñoò kjoa̱ xi ch'o tjín. 8 Ta̱nga i̱'ndei̱ ti̱kítsa̱jnaà yije kjoa̱ koi: jñà xi kjoa̱ jti, ko̱ jñà xi kjoa̱ ts'e̱n, ko̱ jñà kjoa̱ xi ch'o tjín, ko̱ jñà kjoa̱ xi nakjoájno-la xi̱ta̱, ko̱ jñà 'én xi ch'o tsò nga nokjoà. 9 Kì 'én ndiso nokjoàko̱o xinguio̱o nga jye kichjaàxìn-là yijo-nò kjoa̱ jchínga-nò ko̱ ngats'iì kjoa̱ xi ki'nè nga sa kjòtsjeè. 10 Jyeé kichjoé xi kjoa̱ xi̱tse̱. Jyeé jahatjìya-la̱ kjo̱hítsjeèn-nò. K'oa̱ás'ín tímaxi̱tse̱ya koni kji i̱sén-la̱ Nainá xi tsibíndaà-nò skanda kóni nga ìsa̱ ndaà jcha̱xkoòn yá-ne xi Nainá. 11 I̱'ndei̱, mì ti̱ kiì 'ñó mochjeèn-ne yá-né xi xi̱ta̱ griego o yá-né xi xi̱ta̱ judío, yá-né xi tjít'aà chi̱ba̱-la̱ o yá-né xi tsjìn-la̱ chi̱ba̱ kjoa̱ ts'e̱ circuncisión, yá-né xi xi̱ta̱ xìn nangui-la̱ ko̱ yá xi̱ta̱-ne xi i̱ma̱ tímajchá, yá-né xi chi̱'nda tíjna'ñó o yá-né xi tíjnandei̱í. Jè Cristo xi isa̱ 'ñó chjí-la̱; ko̱ jè xi tíjnajiìn ini̱ma̱-la̱ ngats'iì xi̱ta̱-la̱. 12 Jñò xi xó k'oa̱s'ín jahajiìn-nò Nainá ko̱ xi ngui xi̱ta̱ tsjeè-la̱ maà nga ndaà matsjake-nò, k'oa̱ás'ín chjoé xi kjoa̱ xi̱tse̱ nga kàtahi̱ma̱chaà xi̱ta̱; kàtas'e-nò kjo̱ndaà; kì 'nga matakon; indaàkjoa̱ t'eèn; ko̱ kata'se-la̱ kjoa̱tsejta ini̱ma̱-nò. 13 Ni̱ta̱mé kjoa̱ xi tjín-nò ti̱kjeiín-là xinguio̱o, ti̱jcha̱at'aà-là xinguio̱o tsà mé kjoa̱ xi ch'o síko̱-nò. Jñò, k'oa̱á tis'ín t'e̱en, koni s'ín kisìko̱-nò Cristo nga kisìjchahat'aà-nò. 14 Jè xi tíjna ítjòn ts'e̱ kjoa̱ koi, jè-né nga ti̱tsjachaà xinguio̱o, nga jè kjoa̱tjòchaà xi ndaà síkítsa̱jnatín-ná. 15 Kjoa̱'nchán-la̱ Cristo ndaà kàtatíxoma i̱jiìn ini̱ma̱-nò; nga̱ Nainá xó k'oa̱ás'ín kiìchja̱-nò nga 'nchán ki̱tsa̱jnako̱o xinguio̱o mé-ne nga ta jngoò yijo ko̱ma-nò. Ko̱ mochjeèn-né nga kjit'aà na̱chrjein tjiì-là kjo̱ndaà Nainá. 16 Jè 'én-la̱ Cristo 'ñó ndaà kàtasijiìn kjit'aà ya̱ i̱jiìn ini̱ma̱-nò. Ta̱kóya-là xinguio̱o ko̱ tikixi̱ya nga ti̱kjeèn kjo̱hítsjeèn xi tjín-la̱ kjoa̱chji̱ne̱. Ti̱jndá-là Nainá nga tjiì-là kjo̱ndaà xi tíjiìn ini̱ma̱-nò; ti̱jndá-là so ts'e̱ salmo, ko̱ so xi jeya síkíjna Nainá, ko̱ so xi ya̱ nchrobá-ne ya̱ i̱jiìn ini̱ma̱-nò. 17 Ngats'iì 'én xi nokjoà ko̱ ngats'iì xá xi 'nè, i̱t'aà ts'e̱ Jesucristo xi otíxoma-ná koa̱'teèn. Ko̱ i̱t'aà ts'e̱ Jesucristo tjiì-là kjo̱ndaà Nainá xi Na̱'èn-ná. 18 Jñò íchjín xi x'i̱n tjín-nò, nangui titsa̱jna-là x'i̱n-nò koni s'ín ok'ín-la̱ jñà xi̱ta̱-la̱ Cristo. 19 Jñò xi íchjín tjín-nò, tjòchaà jchaà íchjín-nò, kì toòn 'yaà. 20 Jñò xi i̱xti 'mì-nò, ndaà ti̱ná'yañijòn-là xi̱ta̱ jchínga-nò, nga jè Nainá ndaà sasén-la̱ kjoa̱ koi. 21 Jñò xi Na̱'èn 'mì-nò, kì ta̱xki̱ siì nokjoá-ko̱ i̱xti-nò mé-ne nga mì siìkjaàjeèn-la̱ ikon. 22 Jñò xi chi̱'nda maà, ndaà ti̱kitasòn yije-là nei-nò i̱ i̱t'aà nangui; kì tà k'e̱é nìxá k'e̱ nga tíkotsejèn-nò nga ta jè xi mejèn-nò nga ndaà ki̱tsa̱jnako̱o. Ngui ko̱ó ini̱ma̱-nò nga ti̱kitasòn-là k'oií kjoa̱-la̱ nga yaxkón Nainá. 23 Ni̱ta̱mé kjoa̱ xi s'e̱èn, nguiì ko̱ó ini̱ma̱-nò nga t'eèn koni tsà i̱t'aà ts'e̱ Na̱'èn-ná titsa̱nìkitasòn ko̱ mìtsà i̱t'aà ts'e̱ xi taxki̱ xi̱ta̱. 24 Jyeé 'yaà nga jè Na̱'èn-ná Jesucristo tsjá-nò chjí-nò nga tjoé-nò jè kjo̱tjò xi tsjá-nò Nainá nga i̱xti-la̱ maà koi kjoa̱-la̱ nga jè titsa̱nixát'aà-là Jesucristo xi otíxoma-nò. 25 Ta̱nga jè xi ch'o tjín kjoa̱ xi s'ín, k'oa̱á s'ín ko̱chjí-la̱ koni tjín kjoa̱ ch'o xi s'ín. Nainá mìtsà fahájiìn xi̱ta̱, ngásòn ngáya fìko̱ ngats'iì.
