1 Mejèn-na nga ndaà kàtasijiìn-nò, nga 'ñó tikjaàtji-nò i̱t'aà tsa̱jòn ko̱ jñà xi̱ta̱-la̱ Cristo xi títsa̱jna ján na̱xa̱ndá Laodicea, ko̱ i̱t'aà ts'e̱ ngats'iì xi̱ta̱ xi kj'eè kiì beèxkon-na. 2 Koií k'oa̱s'ín tikjaàtji-nò mé-ne nga kàtas'e-la̱ nga'ñó ini̱ma̱-nò ko̱ mé-ne nga jè kjo̱tsjacha xi tjín-nò si̱ìkítsa̱jnajtín-nò. Jè xi mejèn-na nga isa̱ nda ko̱kixi̱ kjo̱hítsjen-nò nga ngui ndaà ko̱chiya-nò jè kjoa̱ xi tjí'ma-la̱ Nainá xi Na̱'èn-ná. Jè kjoa̱'ma jè, jè-né Cristo. 3 Nga ta jè Cristo tjín-la̱ ngats'iì kjo̱hítsjen ko̱ kjoa̱chji̱ne̱ xi 'ñó chjí-la̱. 4 Koií k'oa̱s'ín tixan-nò nga mì yá xi skóna̱cha̱n-nò nga si̱ìkjeén 'én xi ndaà tso ta̱nga mìtsà 'én kixi̱. 5 Na̱s'ín mìtsà ya̱ tìjna̱ko̱-nò, ta̱nga ini̱ma̱-na̱ tísíkítsjen kji'taà-nò. Matsjaà-na nga tì'be nga kixi̱ titsa̱jtión koni s'ín onguíko̱o yijo-nò ti̱koa̱ kixi̱ titsa̱jnaà nga mokjeiín-nò i̱t'aà ts'e̱ Cristo. 6 Koni s'ín kòkjeiín-nò i̱t'aà ts'e̱ Jesucristo xi otíxoma-nò, k'oa̱á ti̱ s'ín kixi̱ ti̱tját'aà kjit'aà-là 7 koni jngoò yá xi na̱nga̱ fì i̱ma̱-la̱ ko̱ koni jngoò ni'ya xi tísindasòn isa nga kàtakixi̱ya jè kjoa̱ xi mokjeiín-nò koni s'ín kichita'yà; ko̱ tjiì kjit'aà-là kjo̱ndaà Nainá. 8 Ti̱kindaà yijo-nò nga mì jñà skóna̱cha̱n-nò xi̱ta̱ xi 'én ndiso chja̱ xi nìmé chjí-la̱. Jñà kjo̱hítsjeèn koi, tà ya̱á nchrobá-ne i̱t'aà ts'e̱ xi taxki̱ xi̱ta̱ koni tsò kjo̱tíxoma xi tjín i̱sò'nde, mì tsà kjo̱tíxoma ts'e̱ Cristo. 9 Ya̱á tíjnajin yijo-la̱ Cristo, yá-ne xi ngui jè soba Nainá nga ni̱mé chijat'aà-la̱. 10 Nga Cristo titsajnàko̱o, tjín yije-nò ni̱ta̱ mé xi mochjeèn-nò. Jè Cristo otíxoma-la̱ ngats'iì nga'ñó ko̱ kjo̱tíxoma xi mì kiì tsejèn. 11 Ti̱koa̱á i̱t'aà ts'e̱ Cristo kisit'aà chi̱ba̱-nò kjoa̱ ts'e̱ circuncisión, ta̱nga mìtsà jè xi tsja xi̱ta̱ bít'aà chi̱ba̱-la̱ yijo-ná, jè-né nga jè Cristo tsibít'aà chi̱ba̱-la̱ ini̱ma̱-nò k'e̱ nga jahaxìn jé xi tjín-la̱ yijo jé-nò. 12 Ti̱koa̱ k'e̱ nga komà bautizar, k'oa̱á ngaya-la̱ koni tsa ya̱ kisìhijiìn-t'aà-là Cristo xi kjoa̱ ts'e̱ jé-nò. K'oa̱á ti̱ s'ín jaháya-nò koni s'ín jaháya-la̱ Cristo koií kjoa̱-la̱ nga mokjeiín-nò nga'ñó xi tjín-la̱ Nainá nga komà kiskiímihìtje̱n Cristo i̱t'aà ts'e̱ kjoa̱ biyaà. 13 Jñò, nga sa̱ ítjòn, titsa̱jnaà k'en-nò i̱t'aà ts'e̱ Nainá koi kjoa̱-la̱ jé-nò nga jè Cristo kj'eè kiì bít'aà chi̱ba̱-la̱ ini̱ma̱-nò nga faháxìn jé xi tjín-la̱ yijo jé-nò. Ta̱nga i̱'ndei̱, Nainá jyeé kisìkítsa̱jnakon-nò ko̱ Cristo nga kisijchat'aà-nò ngats'iì jé-nò. 14 K'oa̱á ngaya-la̱ koni tsa jye kisìkjeheya-ne xo̱jo̱n xi kitjámiì'nga xi kondra̱ tsa̱ján. Jaháx'ìn-ne, ya̱á tsohójnat'aà krò ñánda k'en-t'aà Cristo. 15 Jñà nga'ñó xi tjín i̱jiìn i̱sén ko̱ ngats'iì xi otíxoma, Nainá jaháxìn yije-la̱ nga'ñó-la̱. Ya̱á kisikijne-la̱ k'e̱ nga jè Cristo k'en-t'aà krò. Ko̱ ngats'iì xi̱ta̱, ya̱á kijtse nga kisìchja. 16 K'oa̱á ma-ne jñò, kì kiì nìs'in-là xi̱ta̱ xi chja̱jno-nò nga tsò-nò nga mì kiì nìkitasòn kjoa̱ ts'e̱ tsojmì xi chine, xi 'yo, kjoa̱ ts'e̱ s'eí xi bitjo, kjoa̱ ts'e̱ nga otsejen xi̱tse̱ ijngoò k'a sá, ko̱ ts'e̱ na̱chrjein nìkjáya. 17 Ngats'iì kjoa̱ koi, k'oa̱á ngaya-la̱ koni tà 'nguién-la̱á kjoa̱ xi i̱xkan j'iì; ta̱nga jè xi nguiì kjoa̱ kixi̱, jè Cristo. 18 Kì kiì biì'nde nga faáxìn-nò jè kjo̱ndaà xi jye titsa̱jnaàjñoò jñà xi̱ta̱ xi beèxkón àkja̱le̱; k'oa̱á tsò-la̱ yijo-la̱ nga mì tsà xi̱ta̱ 'nga ikon. Jè xi mejèn-la̱ nga jñò k'oa̱ ti s'ín s'e̱èn. Jñà xi̱ta̱ koi tsò-né nga i̱nga nijñá ki'seno̱jmí-la̱ kjoa̱ jè, ko̱ 'ñó 'nga sikítsa̱jna yijo-la̱ xi ta kjo̱hítsjeèn ts'e̱, ta̱nga nìmé chjí-la̱. 19 Xi̱ta̱ koi mìtsà ya̱ ndaà fìt'aà-la̱ Cristo. Nga jè Cristo tíjna sko̱-la̱ na̱xa̱ndá-la̱ ko̱ jè tsjá-la̱ kjo̱hítsjen ko̱ nga'ñó ko̱ jè síkítsa̱jnajtín xi̱ta̱-la̱ koni s'ín ma yijo-ná nga jñà naxá-ná bítéya nindaà-ná, mé-ne nga ndaà si̱ìxá-ne na̱xa̱ndá-la̱ Cristo koni s'ín mejèn-la̱ Nainá. 20 Jñò, ta̱ñaá k'en-ko̱ò Cristo, k'oa̱á ma-ne nga mì kiì ti̱ tjí'nde-nò nga jñà si̱kitasòn kjo̱tíxoma xi tjín i̱sò'nde. ¿Mé-ne tákó k'oa̱s'ín 'nèhe-nò koni tsà kjoa̱ ts'e̱ i̱sò'nde otíxoma-nò nga nìkitasòn-nò kjo̱tíxoma 21 xi tsò: “Kiì kiì nìkoi̱i tsojmì koi, kì kiì chi̱niì, kì ntsei̱ì nìko̱-ne.”? 22 Jñà kjo̱tíxoma koi, tà ts'e̱é tsojmì xi chija k'e̱ nga tímochjeèn. Tà kjo̱tíxoma ts'e̱ xi̱ta̱-né koni s'ín okóya. 23 Jñà kjo̱tíxoma koi, k'oa̱á s'ín 'ya-la̱ koni tsa tjín-la̱ kjoa̱chji̱ne̱ ta̱nga mì tsà kixi̱ kjoa̱. Nga̱ síjé-ná nga ndaà si̱kitasoán kjoa̱ xi 'in tjín mé-ne nga ndaà jcha̱xkoán kjo̱tíxoma xi tjín-la̱ i̱ngo̱; ti̱koa̱á tsò-né nga mochjeén nga mì xi̱ta̱ 'nga ikon ko̱maá, ko̱ nga kínè-lá kjo̱'in yijo-ná. Ta̱nga jñà kjoa̱ koi nìmé chjí-la̱, nga mì kiì ma osíko̱-ná nga nìkítsa̱jnaá jñà kjoa̱ ch'o xi síjé yijo-ná.
