1 Jñò xi xi̱ta̱ na̱xa̱ndá-la̱ Cristo 'mì-nò xi ján titsa̱jna na̱xa̱ndá Colosas nga kixi̱ onguít'aà-là Cristo, 'an xi Pablo 'mì-na ko̱ 'ntsè Timoteo titsa̱níhixot'aà-nòje̱n nga 'a̱n tsibíxáya-na Jesucristo nga k'oa̱ás'ín kjòmejèn-la̱ Nainá. Nainá xi Na̱'èn-ná, ko̱ jè Jesucristo xi otíxoma-ná kàtatsjá-nò kjo̱ndaà ko̱ kjoa̱'nchán ya̱ i̱jiìn ini̱ma̱-nò. 3 Kjit'aà na̱chrjein k'e̱ nga nokjoát'aà-la̱je̱n Nainá xi i̱t'aà tsa̱jòn, 'biì-laje̱n kjo̱ndaà Nainá xi Na̱'èn-la̱ Jesucristo jè xi otíxoma-ná. 4 Koií kjoa̱-la̱ nga̱je̱n jyeé k'oa̱s'ín kina'ya-je̱n nga ndaà mokjeiín-nò i̱t'aà ts'e̱ Cristo Jesús. Ti̱koa̱ matsjachaà ngats'iì xi̱ta̱-la̱ Nainá. 5 Koií k'oa̱s'ín 'nè-nò nga titsa̱chiñá-là nga tjoé-nò kjo̱ndaà xi tíjnatjò-la̱ Nainá ján ngajmì; koni s'ín kjochi̱ya-nò k'e̱ nga kina'yaà 'én ndaà-la̱ Nainá xi kjoa̱ ts'e̱ Cristo xi ngui kjoa̱kixi̱. 6 Tejè-ne jè 'én ndaà-la̱ Nainá xi kjoa̱ ts'e̱ Cristo xi jye k'oa̱s'ín kina'yà, 'ñó tínakjoáya nga tíjtsa i̱sò'nde ko̱ 'ñó kjìn xi̱ta̱ nchifatjíya-la̱ kjo̱hítsjeèn-la̱ koni s'ín komatiòn jñò k'e̱ nga jahatjìya-la̱ kjo̱hítsjeèn-nò nga jahas'en-jiìn-nò kjo̱ndaà-la̱ Nainá xi ngui kjoa̱kixi̱. 7 K'oa̱ás'ín tsakóya-nò Epafras jè xi̱ta̱ xi matsjachaà-je̱n nga taña nìxákjo-je̱n i̱t'aà ts'e̱ Nainá; nga jè Epafras, jngoò chi̱'nda-la̱ Cristo xi kixi̱ síxá xi i̱t'aà tsa̱jòn. 8 Jyeé tsibèno̱jmí-naje̱n nga jè Ini̱ma̱ Tsjeè-la̱ Nainá síkítsjen-nò nga ndaà matsjachaà xi̱ta̱. 9 K'e̱ nga kina'yà-je̱n, mì kiì nijchajiìn-je̱n nga bitsi'batji-nòje̱n. K'oa̱ás'ín nijét'aà-laje̱n Nainá nga ngui ndaà kàtachi̱ya-nò koni s'ín mejèn-la̱ jè; jè Inìma̱ Tsjeè-la̱ kàtatsjá-nò kjo̱hítsjeèn ko̱ kjoa̱chji̱ne̱. 10 Ti̱koa̱á nìjét'aà-la̱je̱n nga k'oa̱s'ín ti̱jchá yijo-nò koni s'ín ok'ín-la̱ nga síjchá yijo-la̱ xi xi̱ta̱-la̱ Nainá, nga kjit'aà na̱chrjein k'oa̱s'ín t'eèn koni s'ín mejèn-la̱, nga k'oa̱ s'ín t'e̱èn ngats'iì kjoa̱ xi ndaà tjín ko̱ nga isa̱ ndaà jcha̱xkon yá-né xi Nainá. 11 K'oa̱ ti̱ s'ín nijet'aà-laje̱n Nainá nga tse nga'ñó katatsjá-nò koni s'ín tjín nga'ñó-la̱ xi mì kiì fehet'aà, mé-ne nga kixi̱ kitsa̱jna-nò ni̱ta̱mé kjoa̱ xi sa̱ko-nò, ti̱koa̱ s'e̱-nò kjoa̱tsejta ko̱ kjo̱tsja. 12 Tji-là kjo̱ndaà Na'èn-ná nga jè kisìkítsa̱jnanda-nò nga ti̱koa̱ tjoé-nò kjo̱tjò xi jè jye tjínda-la̱ ján ngajmi ñánda iseèn choòn nga tsjá-la̱ ngats'iì xi̱ta̱-la̱ xi ya̱ chja̱-ne na̱xa̱ndá-la̱ Nainá. 13 Nainá kisìkítsa̱jnandei̱í-ná i̱t'aà ts'e̱ nga'ñó-la̱ xi̱ta̱ nei̱í jè xi otíxoma ñánda jñò choòn; yaá kisìkítsa̱jna-ná ñánda tíhotíxoma Ki'ndí-la̱ xi 'ñó matsjakeè, 14 jè xi ko̱ jní-la̱ tsibìchjí-tjì-ná nga kisìkítsa̱jnandei̱í-ná ti̱koa̱ kisìjchat'aà-ná jé-ná. 15 Ni̱ saá jngoò xi̱ta̱ beèxkon Nainá ta̱nga jè Ki'ndí-la̱ tsakó-la̱ xi̱ta̱ yá-ne xi Nainá. Nga̱ jè Ki'ndí-la̱ xi tíjna ítjòn-la̱ ngats'iì xi kisindaà i̱sò'nde. 16 Nga ko̱ Cristo, Nainá tsibíndaà yije xi tjín ngajmiì ko̱ xi tjín i̱ i̱t'aà nangui, xi tsejèn ko̱ xi mì kiì tsejèn, ngats'iì nga'ñó xi tjín i̱jiìn i̱sén, xi titsa̱jna ítjòn, xi otíxoma, xi xá ítjòn tjín-la̱, ko̱ jñà nga'ñó xi mì kiì tsejèn-ná, i̱t'aà ts'e̱é Cristo kisinda yije-ne ko̱ ts'e̱-né. 17 Cristo, ìsa̱á kjòtseè tíjna mì k'oa-ne ngats'iì tsojmì xi tjín, ko̱ jè tsjá-la̱ nga'ñó ngats'iì tsojmì mé-ne nga ndaà kítsa̱jna-ne. 18 Jè Cristo tíjna sko̱-la̱ na̱xa̱ndá-la̱ nga ti̱jè-ne yijo-la̱ ko̱ i̱t'aà ts'e̱é kjòts'ia̱-ne. K'e̱ nga jaháya-la̱ Cristo i̱t'aà ts'e̱ kjoa̱biya, jè tsibíjna ítjòn-la̱ i̱t'aà ts'e̱ xi̱ta̱ xi faháya-la̱ mé-ne nga jè kíjna ítjòn-la̱ ni̱ta̱mé xi tjín. 19 Nainá k'oa̱ás'ín kisaseèn-la̱ nga jngoò k'aá ya̱ tsibìjnajiìn yijo-la̱ Cristo, 20 nga i̱t'aà ts'e̱ Cristo, Nainá tsajoóndaàko̱ yije-ne ngats'iì xi tjín i̱sò'nde ko̱ xi tjín ngajmiì; i̱t'aà ts'e̱ jní-la̱ Jesucristo xi kixíxteèn ján i̱t'aà krò, Nainá kisìkijne 'nchán kjoa̱. 21 Jñò, nga sa̱ ítjòn, ti̱koa̱á titsa̱jnat'aà xìn-la Nainá; kondra̱á tsanguì-là ya̱ i̱jiìn ini̱ma̱-nò, koií kjoa̱-la̱ nga ch'o tjín kjoa̱ xi ki'nè. 22 Ta̱nga i̱'ndei̱ jye ndaà tsajoóko̱-nò Nainá koií kjoa̱-la̱ jè kjo̱'in xi kisikjeiín Cristo i̱ i̱t'aà nangui k'e̱ nga k'en. Koií k'oa̱s'ín kis'iìn-ne mé-ne nga tsjeè ki̱tsa̱jnaà-nò, ko̱ ni̱mé jé xi s'e̱-nò ko̱ ni̱mé xi ch'o ki̱tjonguio̱o nga nguixko̱n Nainá. 23 Kjoa̱ koi mochjeén-né nga kixi̱ ti̱tsa̱jnaàko̱o koni s'ín mokjeiín-nò. Ko̱ kì binchàt'aàxìn-là kjoa̱ xi titsa̱chiñà-là i̱t'aà ts'e̱ 'én ndaà-la̱ Nainá xi kjoa̱ ts'e̱ Cristo, 'én xi jye kina'yà-là. Jè 'én jè, xki̱ xi ján tínokjoàyajiìn-la̱ xi̱ta̱ kóho̱kji i̱sò'nde; ko̱ 'an xi 'mì-na Pablo, 'aán kjònga̱tsja nga okoòya 'én. 24 I̱'ndei̱ matsjaà-na̱ nga kjo̱'in tísíkjiaán xi kjoa̱ tsa̱jòn nga k'oa̱ás'ín tísíjngoaà i̱jiìn yijo-na̱ koni s'ín chijat'aà-na kjo̱'in xi kitsjaà-na Cristo xi kjo̱ndaà ts'e̱ na̱xa̱ndá-la̱ nga ti̱jé-ne yijo-la̱. 25 'Aán tísíkjeén-na Nainá nga 'an tísíxákoa̱a na̱xa̱ndá-la̱, xá xi kisìnga̱tsja-na xi kjo̱ndaà tsa̱jòn nga ngui ndaà kéno̱jmiá 'én ndaà-la̱, 26 jè 'én xi tíjna'ma-la̱ Nainá nga ti̱sa̱ tàts'en-la̱ kjoa̱, ta̱nga na̱chrjein i̱'ndei̱, Nainá jye tsakó-la̱ xi̱ta̱-la̱. 27 Jè Nainá k'oa̱ás'ín kjòmejèn-la̱ nga tsakó-la̱ jñà xi̱ta̱-la̱ kó s'ín tjín kjoa̱'ma-la̱ xi 'ñó jeya tíjna xi kjo̱ndaà ts'e̱ xi mì tsà xi̱ta̱ judío. Jè kjoa̱'ma, jè-né nga jè Cristo tíjnajiìn inìma̱-nò jñò xi mìtsà xi̱ta̱ judío 'mì-nò, k'oa̱á ma-ne nga titsa̱chiñà-là jñò kjoa̱jeya-la̱ Nainá xi tsjá-nò ján ngajmiì. 28 K'oa̱ás'ín nokjoàya-jiìn-la̱je̱n ngats'iì xi̱ta̱ i̱t'aà ts'e̱ Cristo; 'ñó nokjoàko̱-je̱n nga nguiì ko̱ kjoa̱chji̱ne̱ okoòya-la̱je̱n mé-ne nga ngats'iì xi̱ta̱ xi fìt'aà-la̱ Cristo ni̱mé chi̱jat'aà-la̱ jè na̱chrjein k'e̱ nga ngaje̱n si̱ìnga̱tsja-je̱n nga nguixko̱n Nainá. 29 K'oa̱á ma-ne nga 'ñó tíbinè-la̱ yijo-na̱ nga tísiìxá, tìsìkjeén jè nga'ñó xi tsjá-na Cristo.
