1 Jè Agripa kitsò-la̱ Pablo: —Tjí'nde̱é-lè nga ki̱nókjoa̱tji yijo-lè. Pablo kiskímiìtje̱n tsja; tsibíts'ia̱ nga kiìchja̱tjì yijo-la̱; kitsò: 2 —Ngaji̱ Agripa, matsjaà-na nga ma kichjàko̱-lè mé-ne nga kósikoa̱a yijo-na̱ ngats'iì kjoa̱ xi kondra̱ ts'a̱n tsjátin-na 'én xi̱ta̱ judío. 3 'Be-ná nga ji̱ Agripa, tíjiìn yijeé-lè ngats'iì kjo̱tíxoma xi tjín-la̱ xi̱ta̱ judío ko̱ kjoa̱ xi joóya-ne. K'oa̱á ma-ne sìjét'aà-lè, tjín-lè kjo̱ndaà, tsee t'i̱in takoìn, ndaà ti̱ná'ya-ná. 4 ’Ngats'iì xi̱ta̱ judío tíjiìn-la̱ kós'ín kisìjchá yijo-na̱ ján nangui-na̱ ko̱ Jerusalén tje̱n-ni nga sa̱ ti kjia skanda na̱chrjein i̱'ndei̱. 5 Jñà xi̱ta̱ koi, tsà mejèn-la̱ ko̱maá kèno̱jmí-lè. Ndaà tíjiìn-la̱ nga 'an, nguì xi̱ta̱ fariseo-ná; nga̱ jñà xi̱ta̱ fariseo xi isa̱ 'ñó bínè-la̱ yijo-la̱ nga beèxkón kjo̱tíxoma-la̱ Nainá mì k'oa̱á-ne koni jñà xi̱ta̱ judío xi i'nga. 6 'An mokjeiín-na nga ki̱tasòn kjoa̱ xi tìkoña-la̱ koni s'ín jye kitsjaà-la̱ tso'ba Nainá jñà xi̱ta̱ jchínga kjiìn-ná. Koií kjoa̱-la̱ nga i̱ tijna̱a. 7 Nga tejò tje̱-la̱ na̱xa̱ndá Israel, ko̱ na̱chrjein ko̱ ni̱tje̱n, jeya nchisíkíjna Nainá nga nchikoñaá-la̱ nga ki̱tasòn kjoa̱ koi. K'oa̱á xan-lè ngaji̱ Agripa, nga ti̱ koií-ne kjo̱ndaà xi an tìkoña-la̱; k'oa̱á ma-ne nga óngui-na jñà xi̱ta̱ judío. 8 ¿Jñò, mé-ne nga mì kiì mokjeiín-nò nga Nainá si̱ìkjaáya-la̱ xi̱ta̱ xi jye k'en? 9 ’An, nga sa̱ kjòtseé, k'oa̱á s'ín kisìkítsjeèn nga machjeèn-né nga kondra̱ kjítje̱ngui-la̱ Jesús xi Nazaret i̱'nde-la̱. 10 K'oa̱á kis'iaàn ján Jerusalén. Jñà xi̱ta̱ sko̱-la̱ no̱'miì kitsjaà-na o̱kixi̱ nga kjìn xi̱ta̱ tsjeè-la̱ Nainá kiskiniìs'en nda̱yá. K'e̱ nga kinìk'en xi̱ta̱ koi, 'an ti̱koa̱á kòjngoò takoàn. 11 Nga xki̱ xi ján ni'ya i̱ngo̱ sinagoga, kjìn k'a kitsjaà-la̱ kjo̱'in nga mejèn-na nga katíchja̱jno-la̱ Cristo. 'Ñó kisìjtikeè, skanda kiìtje̱ngui kondra̱-la̱ ñánda xìn na̱xa̱ndá xi tjín i̱sò'nde. 12 ’Koi xá kiì-na ján na̱xa̱ndá Damasco nga 'an tsatíxá-na jñà xi̱ta̱ sko̱-la̱ no̱'miì, ti̱koa̱ kitsjaà-na o̱kixi̱. 13 Ngaji̱, xi xi̱ta̱xá ítjòn tijni, k'e̱ nga ijchò nchisen, kijtseè ya̱ i̱ya ndi̱yá, jngoò ni'ín xi ngajmiì inchrobà-ne xi ìsa̱ 'ñó ote tsejèn mì k'oa̱á-ne koni ts'e̱ ts'oí. Nguì kisìhiseèn-né nga jngoò itjandiì-na ko̱ ts'e̱ xi̱ta̱ xi tjikoa̱a. 14 Chixot'aà-je̱n nangui, i̱kjoàn ki'nchrè jngoaà 'én hebreo xi kiìchja̱jiìn i̱sén-na; kitsò: “Saulo, Saulo, ¿mé-ne 'an tímitje̱ngui kondra̱-ná? Ti̱ jií tiyatoòn-ne yijo-lè, k'oa̱á ngaya̱-la̱ koni tsà nchra̱ja̱ tsjón-la̱ jè yá xi bìnès'en-la̱ nei-la̱.” 15 An kixan-la̱: “¿Yá-né ngaji̱ Na̱'èn?” Jè kitsò-na: “An-ná xi 'mì-na Jesús xi tì'mìtje̱ngui kondra̱-ná. 16 Ti̱sítji̱in; ti̱si̱jna kixi̱i; koií xá kàyaxkon-ná nga 'an si̱xá-ná; jií k'oií 'én jè kjoa̱ xi kà'yi ko̱ kjoa̱ xi i̱skan 'an ko̱ko soba-lè. 17 'Aán sìkinda̱-lè i̱t'aà ts'e̱ xi̱ta̱ na̱xa̱ndá-lè ko̱ ts'e̱ xi mì tsà xi̱ta̱ judío. Ya̱á sìkasén-lè 18 nga chíxa̱ngui xko̱n nga mì ta̱ tsjaà ya̱ ki̱nchamaya ndi̱yá jñò; ndi̱yá iseèn ki̱nchimaya. Kàtinchat'aà xìn-la̱ nga'ñó-la̱ xi̱ta̱ nei̱í; Nainá kàtjit'aà-la̱. K'e̱ nga ko̱kjeiín-la̱ i̱t'aà ts'a̱n, jcha̱at'aà-la̱ jé-la̱, ti̱koa̱ s'e̱-la̱ kjo̱tjò xi tjoé-la̱ xi̱ta̱ na̱xa̱ndá-la̱ Nainá xi xó kitjaàjiìn-ne.” 19 Ngaji̱ Agripa xi xi̱ta̱xá ítjòn tijni, an mì kiì kisìtájaàjñaà ini̱ma̱-na̱ jè kjoa̱ xi kijtseè ko̱ xi ki'nchrè xi ngajmiì inchrobà-ne. 20 Ta sa̱á, tsibèno̱jmí ítjòn-la̱ jñà xi̱ta̱ Damasco, i̱kjoàn tsibèno̱jmí-la̱ xi̱ta̱ Jerusalén, ti̱koa̱ tsibèno̱jmí-la̱ kóhokji nangui Judea, ko̱ jñà xi mì tsà xi̱ta̱ judío. K'oa̱á s'ín tsibèno̱jmí-la̱ nga kàtasíkájno jé-la̱ nga mì ti̱ jé ko̱hótsji-ne. Nainá kàtjít'aà-la̱; ndaà kàtas'ín mé-ne nga jcha̱-la̱ nga jye jahatjìya-la̱ kjo̱hítsjeèn-la̱. 21 Koií kjoa̱-la̱, jñà xi̱ta̱ judío, kitsobà'ñó-na ya̱ ndi̱tsin i̱ngo̱; mejèn-la̱ nga si̱ìk'en-na. 22 Ta̱nga Nainá tsasìko̱-na; tákó k'oa̱á tìs'ian skanda i̱'ndei̱; k'oa̱á s'ín tìbèno̱jmí yije-la̱ ni̱ta̱ yá xi̱ta̱-ne. Mì tsà kj'ei̱í 'én okoòya; koi 'én bèno̱jmiá xi tsakóya Moisés ko̱ xi̱ta̱ xi kiìchja̱ ngajo-la̱ Nainá, kjoa̱ xi ko̱ma nga tífì ìsa̱ na̱chrjein. 23 K'oa̱á s'ín tsakóya xi̱ta̱ koi, nga jè Cristo [xi xó kisìkasén-ne Nainá] tjínè-la̱ nga k'en, ta̱nga jè jaáya ítjòn-la̱ mé-ne nga k'e̱no̱jmí-la̱ xi̱ta̱ na̱xa̱ndá-la̱ ko̱ xi mì tsà xi̱ta̱ judío kós'ín ko̱hiseèn-jiìn ini̱ma̱-la̱ nga ko̱ma ki̱tjokàjiìn kjoa̱jñò. 24 Jè Festo, k'e̱ nga kiì'nchré 'én-la̱ Pablo nga tíhosìko̱ yijo-la̱, 'ñó kiìchja̱ kitsò: —¡Ngaji̱ Pablo, tímaskáyaá-lè; jè xo̱jo̱n tísískáya-lè! 25 Ta̱nga jè Pablo kitsò: —Ngaji̱ Festo xi xi̱ta̱xá tijni, mì tsà tímaskáya-na; k'oa̱á s'ín tjín; 'én kixi̱í xi tìchjà. 26 Jè Agripa xi xi̱ta̱xá ítjòn tíjna, tíjiìn yijeé-la̱ kjoa̱ koi; k'oa̱á ma-ne ma'ñó takoàn nga nguixko̱n jè tìchjà 'én koi; 'an, k'oa̱á s'ín makixi̱ya-na nga jè, ti̱koa̱á 'ñó ndaà tíjiìn-la̱ kjoa̱ koi; nga mì tsà tjí'ma koni s'ín komà. 27 Ngaji̱ Agripa xi xi̱ta̱xá tijni, ¿a mokjeiín-lè koni s'ín kitsò jñà xi̱ta̱ xi kiìchja̱ ngajo-la̱ Nainá? 'An, be-ná nga mokjeiín-lè. 28 Jè Agripa kitsò-la̱ Pablo: —Tà chibaá chi̱ja-la̱ tsà kinìkijne-ná nga 'an, xi̱ta̱-la̱ Cristo ko̱ma. 29 Pablo kitsò: —Tsà tse ko̱ tsà chiba chija-la̱, 'an k'oa̱á s'ín mejèn-na nga nguixko̱n Nainá nga kàtakjeiín-lè xi xi̱ta̱xá ítjòn tijni; ti̱koa̱ kàtakjeiín-la̱ ngats'iì xi̱ta̱ xi nchi'nchré-na. K'oa̱ s'ín kàtamatiòn koni 'an ta̱nga mì k'oa̱á s'ín na'ñó kicha̱ cadena si̱t'aá'ñó. 30 K'e̱é tsasítje̱n Agripa ko̱ Festo ko̱ Berenice, ngats'iì xi̱ta̱ xi ya̱ títsa̱jna. 31 Xìn kiì nga tsajoóya-ne kjoa̱ koi. Kitsò-la̱ xíkjín: —Xi̱ta̱ jè, nì mé kjoa̱ tjín-la̱ nga ki̱yá, ti̱koa̱á mì kiì ok'in-la̱ nga nda̱yá kíjna'ya. 32 Agripa kitsò-la̱ jè Festo: —Xi̱ta̱ jè, ko̱maá-la kíjnandei̱í-ne tsà mì k'oa̱á s'ín kisìjé nga jè ki̱ìndaàjiìn-la̱ Cesar xi xi̱ta̱xá ítjòn ts'e̱ Roma.
