1 Festo ijchò Cesarea nga jahas'en xi̱ta̱xá ítjòn; xi komà jàn na̱chrjein itjo-ne Cesarea, kiì Jerusalén. 2 K'e̱ nga jye tíjna Jerusalén, jñà na̱'miì ítjòn ko̱ xi̱ta̱ sko̱-la̱ xi̱ta̱ judío ijchòkon nga tsohóngui Pablo; kitsjaàtin 'én xi kondra̱ ts'e̱. 3 Xi̱ta̱ koi, kisìjé-la̱ kjo̱ndaà jè Festo nga kàtjanchrobáko̱ Pablo ya̱ Jerusalén. K'oa̱á s'ín jye tjíndaà-la̱ nga kítsa̱chjoà ikon-la̱ ya̱ i̱ya ndi̱yá mé-ne nga si̱ìk'en-ne. 4 Ta̱nga jè Festo, kitsò: —Majìn, mì kiì ko̱ma, nga jè Pablo nda̱yá tíjna ján Cesarea; 'an, jyeé ya̱ tífia. 5 Jñà xi̱ta̱xá-nò ko̱ma ko̱hijtako̱-na ján Cesarea mé-ne ko̱ma ko̱hóngui-ne xi̱ta̱ jè, tsà mé jé xi tjín-la̱. 6 Jè Festo tsibìjna-la̱ tsà nguì jiìn na̱chrjein ko̱ tsà te na̱chrjein ján Jerusalén; i̱kjoàn kiì ìjngoò k'a-ne ján Cesarea; nga komà inchijòn ijchò ni'ya osen, tsibìjnanè íxi̱le̱-la̱ ñánda otíxoma; i̱kjoàn kiskinìkjaá Pablo. 7 K'e̱ nga jahas'en ni'ya osen Pablo, jñà xi̱ta̱ judío xi j'iì-ne Jerusalén, kiì kinchat'aà chrañà-la̱ nga kitsjaàtin 'én ndiso xi 'ñó ch'o tsò ta̱nga mì kiì komà kjòkixi̱ya 'én xi kitsjaàtin. 8 Pablo tsasíko̱ yijo-la̱ kitsò: —Ni̱ mé jé xi tsohotsjià xi kondra̱ ts'e̱ kjo̱tíxoma-la̱ xi̱ta̱ judío, ni̱ jè kondra̱ ts'e̱ i̱ngo̱ ítjòn-la̱ Nainá, ni̱ jè kondra̱ ts'e̱ Cesar xi xi̱ta̱xá ítjòn ts'e̱ Roma. 9 Ta̱nga jè Festo mejèn-la̱ nga ndaà kíjnako̱ xi̱ta̱ judío; kiskònangui-la̱ Pablo, kitsò-la̱: —¿A mejèn-le nga k'oín ján Jerusalén mé-ne nga ya̱ kìndaàjña kjoa̱-lè? 10 Pablo kitsò: —Jye i̱ tijna̱a ñánda tjín kjo̱tíxoma-la̱ Cesar xi xi̱ta̱xá ítjòn ts'e̱ Roma. Mochjeén-né nga i̱ kàtasindaàjiìn-na. Ngaji̱ ndaà tíjiìn-lè nga nì mé kjoa̱ tsohotsjià i̱t'aà ts'e̱ xi̱ta̱ judío. 11 Tsà tjín-na jé, tsà ok'ìn-la̱ nga ki̱yá, tíjngoò takoàn nga kàtasík'en-na; ta̱nga tsà mì kixi̱í kjoa̱ 'én xi tsjátin-na, mì kiì ko̱ma ya̱ ko̱ngatsja i̱t'aà ts'e̱ xi̱ta̱ koi. Ti̱koa̱á-ne, jè kàtìndaàjiìn-na Cesar xi xi̱ta̱xá ítjòn ts'e̱ Roma. 12 Jè Festo, k'e̱é tsajoóya-ne ko̱ xi̱ta̱-la̱ xi títsa̱jnako̱ junta, i̱kjoàn kitsò: —Tsà k'oa̱á s'ín nìjì nga jè Cesar ki̱ìndaàjiìn-lè, tà sa̱á ján sìkasén-le. 13 K'e̱ nga jye tsato chiba na̱chrjein, jè xi̱ta̱xá Agripa ko̱ Berenice kiì ján Cesarea nga kisìhixat'aà Festo. 14 Kjìn na̱chrjein tsibìtsa̱jna ya̱ Cesarea; jè Festo tsibeèno̱jmí-la̱ Agripa kjoa̱-la̱ Pablo, kitsò-la̱: —Jè Félix, jngoò xi̱ta̱ kisìkíjnaya nda̱yá i̱jndé. 15 K'e̱ nga tsohóti̱jna ján Jerusalén, jñà xi̱ta̱ sko̱-la̱ no̱'miì ko̱ xi̱ta̱ jchínga-la̱ xi̱ta̱ judío kitsjaà-na 'én nga óngui. Kisìjé nga kàtiyaà. 16 'An, k'oa̱á kixan-la̱ nga jñà xi̱ta̱xá Roma, mì ta̱xki̱ sík'en xi̱ta̱ k'e̱ nga ti̱ kj'eè 'ya-la̱ jé xi tjín-la̱. Ítjòn joó'a kjoa̱-la̱ ko̱ jñà xi̱ta̱ xi óngui mé-ne nga ko̱ma ki̱nchako̱-ne yijo-la̱. 17 Koií kjoa̱-la̱, k'e̱ nga j'iì i̱jndé jñà xi̱ta̱ koi, mì kiì kisìchjà na̱chrjein; nga ko̱ma inchijòn, nga jye tìjnasoán íxi̱le̱-na̱ nga tìhotiìxoma, ni̱to̱ón kiskinìkjaá xi̱ta̱ jè. 18 K'e̱ nga jye títsa̱jna osen jñà xi̱ta̱ xi óngui, mì tsà koi kjoa̱ tsohóngui koni s'ín 'an tísíkítsjeèn. 19 Tà k'oa̱á tjín 'én xi kitsjaàtin xi kondra̱ ts'e̱ Pablo koni s'ín beèxkón Nainá ko̱ i̱t'aà ts'e̱ jngoò xi̱ta̱ xi 'mì Jesús xi jye k'en; ta̱nga jè Pablo tsò-né nga tíjnakon-né. 20 'An, mì kiì be mé xi s'iaàn i̱t'aà ts'e̱ kjoa̱ koi. K'e̱é kiskònangui-la̱ Pablo, a mejèn-la̱ nga ján kjoi̱ Jerusalén mé-ne nga ya̱ si̱ndaàjiìn-la̱ kjoa̱ xi fìnè. 21 K'oa̱á s'ín kisìjé Pablo nga jè Cesar ki̱ìndaàjiìn-la̱. Koií k'oa̱ s'ín kitsja-na o̱kixi̱ nga nda̱yá tíjnaya isa skanda k'e̱ nga ko̱ma sìkasén-la̱ Cesar. 22 Agripa kitsò-la̱ jè Festo: —Ti̱koa̱á 'an mejèn-na nga ki'nchrè-la̱ xi̱ta̱ jè. Festo kitsò: —Nchijòn-le̱ ki̱ná'ya-la̱. 23 Nga komà inchijòn, ijchò Agripa ko̱ Berenice. K'e̱ nga jahas'en ni'ya osen 'ñó ndaà kisìsin-la̱. Kjìhijtako̱ jñà xi̱ta̱ sko̱-la̱ soldado ko̱ jñà xi̱ta̱ sko̱-la̱ na̱xa̱ndá. Festo kitsjaà o̱kixi̱ nga kiìchjaà Pablo. 24 Festo kitsò: —Ngaji̱ Agripa xi xi̱ta̱xá ítjòn tijni, ngats'ioò xi i̱ titsa̱jnaà: chítsejèn-là xi̱ta̱ jè. Ngats'iì jñà xi̱ta̱ judío, 'ñó síjét'aà-na ján Jerusalén ko̱ i̱ Cesarea nga 'ñó chja̱ nga mejèn-la̱ si̱ìk'en. 25 Ta̱nga 'an, nì mé xi matsjit'aà-na i̱t'aà ts'e̱ nga machjeén-la̱ nga ki̱yá. Ta̱nga tso'baá kisìjé-ne nga jè ki̱ìndaàjiìn-la̱ Cesar xi xi̱ta̱xá sko̱-la̱ tíjna-la̱ ngats'iì xi̱ta̱. 'An, k'oa̱á s'ín kiskoòsòn-la̱ nga ya̱ sìkasén. 26 Ta̱nga 'an, ni̱ mé kjoa̱ xi matsji-na i̱t'aà ts'e̱ xi̱ta̱ jè, kós'ín sìkasén-la̱ xo̱jo̱n jè Cesar xi xi̱ta̱xá sko̱-la̱ tíjna-la̱ ngats'iì xi̱ta̱. K'oa̱á ma-ne nga sìjét'aà-nò jñò xi i̱ titsa̱jna ko̱ ngaji̱ Agripa xi xi̱ta̱xá ítjòn tijni, mé-ne k'e̱ nga jye chjinangui-lá, 'an sakó-na o̱kixi̱ nga sìkasén xi̱ta̱ jè. 27 'An, k'oa̱á ma-na, nga nì mé chjí-la̱ tsà ta̱xki̱ sìkasén jngoaá xi̱ta̱ xi nda̱yá tíjna tsà mì sík'á jngoò xo̱jo̱n xi 'ya-la̱ mé jé xi tjín-la̱.
