1 K'e̱ nga komà 'òn na̱chrjein, ijchò Ananías ya̱ Cesarea xi xi̱ta̱ sko̱-la̱ no̱'miì. Tji̱ko̱ i'nga xi̱ta̱ jchínga xi xá tjín-la̱ ts'e̱ xi̱ta̱ judío ti̱koa̱ tji̱ko̱ jngoò xi̱ta̱ xi 'mì Tértulo xi chji̱ne̱ xo̱jo̱n ts'e̱ kjo̱tíxoma. Jñà xi̱ta̱ koi kiìkon Félix jè xi xi̱ta̱xá ítjòn tíjna nga kitsjaàtin 'én xi kondra̱ ts'e̱ Pablo. 2 K'e̱ nga jye ijchòko̱ Pablo nguixko̱n xi̱ta̱xá, tsibíts'ia̱ Tértulo nga kitsjaàtin 'én xi kondra̱ ts'e̱ Pablo; kitsò-la̱ Félix: —Ngaji̱ xi xi̱ta̱xá ítjòn tijni, ndaà yaxkón-leje̱n. Nga i̱t'aà tsi̱ji, 'ñó tísakó-naji̱n kjoa̱'nchán. Ndaà xá xi tíbitasòn i̱ na̱xa̱ndá-na̱je̱n xi kjoa̱ chji̱ne̱ tsi̱ji̱. 3 Kjit'aà na̱chrjein, kóho̱kji ñánda titsa̱jna-je̱n tjoé-naje̱n kjo̱ndaà tsi̱ji. Ndaà chjí-lè nga k'oa̱ s'ín nìchját'aà-náje̱n. 4 Majìn-naje̱n nga sií s'e̱n-lèje̱n; tjín-le kjo̱ndaà, ti̱ná'ya i̱tsé-náje̱n. 5 K'oa̱á s'ín ki'ya-je̱n xi̱ta̱ jè nga tíjtsa i̱sò'nde 'ñó ch'o tjín kjoa̱ xi ótsji nga síjóya xi̱ta̱ judío; jè-né xi xi̱ta̱ ítjòn-la̱ xi̱ta̱ Nazaret xi síkjatjiya ndi̱yá-la̱ Nainá. 6 Ti̱koa̱á mejèn-la̱ ch'o kisìtjé I̱ngo̱ Tsjeè-la̱ Nainá, k'oa̱á ma-ne nga kindobà'ñó-je̱n. [Mejèn k'oa̱s'ín si̱ko̱-je̱n koni s'ín tíchja̱ kjo̱tíxoma tsaje̱n, 7 ta̱nga jè Lisias xi xi̱ta̱ sko̱-la̱ soldado tsasìko̱. Ko̱ó kjoa̱ts'en tsafaá'an-naje̱n k'e̱ nga jye tínaya ntsa̱a-je̱n. 8 Ko̱ k'oa̱á kitsò Lisias nga jñà xi̱ta̱ xi óngui, i̱í kjoi̱í nguixkoiìn nga si̱ndaàjiìn.] Ko̱ma ngaji̱ sobà chjinangui-la̱ mé-ne nga jcha̱-ne mé kjoa̱ xi tjín-la̱ nga ongui-je̱n. 9 Jñà xi̱ta̱ judío xi ya̱ títsa̱jna, ti̱koa̱á síngásòn 'én nga kixi̱ kjoa̱. 10 Jè xi̱ta̱xá ítjòn kiskiìmiìtje̱n tsja nga kitsjaà'nde-la̱ Pablo nga kiìchja̱. Pablo kitsò: —Ji̱ xi̱ xi̱ta̱xá ítjòn tijni, tíjiìn-na nga kò kjìn nó tìnìkitasoìn xá i̱ i̱'nde jè; k'oa̱á ma-ne nga ko̱ kjo̱tsja-na̱, ti̱ 'an kichjàtjì-na yijo-na̱. 11 Ngaji̱, ko̱maá ki̱nchátsjiyi. 'An, sa̱á tjín-la̱ tejò na̱chrjein nga kiaà Jerusalén ya̱ i̱ngo̱ ítjòn nga kijtseèxkoán Nainá. 12 Ni̱ sa̱á jngoò k'a 'ya-na nga xi̱ta̱ otiìkjoòkoa̱a, ti̱koa̱á mì xi̱ta̱ na̱xa̱ndá binchaà'a ya̱ ndi̱tsin i̱ngo̱ ítjòn, ko̱ ni'ya i̱ngo̱ sinagoga, ko̱ ya̱ i̱jiìn na̱xa̱ndá. 13 Jñà xi̱ta̱ xi óngui-na mì kiì ko̱ma ko̱kixi̱ya-la̱ kjoa̱ xi ónè-na. 14 K'oa̱á xán-lè xi nguì kixi̱ kjoa̱, 'an, jè sìkitasòn-la̱ xi Nainá tsò-la̱ xi̱ta̱ jchínga-naje̱n; k'oa̱á s'ín sìkitasoàn koni s'ín tjín jè ndi̱yá xi̱tse̱-la̱ Cristo, jè xi tsò-la̱ jñà xi̱ta̱ koi nga ndi̱yá xìn-la̱ Nainá-né. 'An, mokjeiín yije-na koni s'ín tíchja̱ xo̱jo̱n ts'e̱ kjo̱tíxoma-la̱ Nainá xi kiskiì Moisés ko̱ ts'e̱ xi̱ta̱ xi kiìchja̱ ngajo-la̱ Nainá. 15 'An, k'oa̱á ti̱ s'ín mokjeiín-na i̱t'aà ts'e̱ Nainá koni s'ín mokjeiín-la̱ jñà xi̱ta̱ xi óngui-na nga faáya-la̱ xi̱ta̱ xi biya, jñà xi xi̱ta̱ kixi̱ ko̱ xi mì tsà xi̱ta̱ kixi̱. 16 Koií k'oa̱ s'ín bìnè-la̱ yijo-na̱ nga tsjeè síkíjna kjo̱hítsjeèn-na̱ nguixko̱n Nainá ko̱ nguixko̱n xi̱ta̱. 17 ’Nga jye kò kjìn nó mì ti̱ kiì f'i̱-na na̱xa̱ndá-na̱ Jerusalén, j'i̱í ìjngoò k'a-na nga j'i̱ko̱-la̱ to̱n jñà xi̱ta̱ i̱ma̱ ko̱ kitsja-la̱ kjo̱tjò Nainá. 18 K'oa̱á tjín kjoa̱ xi tìs'iàn k'e̱ nga jye kisìtsjeèya yijo-na̱ koni tjín kjo̱tíxoma-la̱ xi̱ta̱ judío. K'e̱ nga kijtseè-na jñà xi̱ta̱ judío xi Asia i̱'nde-la̱ nga ya̱ tijna̱ ya̱ ndi̱tsin i̱ngo̱, mì tsà kjìn ma xi̱ta̱ xi títsa̱jnako̱-na. Ti̱koa̱á mì tsà kjoa̱siì tìbìts'ia. 19 Jñà xi̱ta̱ xi kijtseè-na ya̱ ndi̱tsin i̱ngo̱, tsà mé kjoa̱ xi tjín-la̱ xi kondra̱ ts'a̱n, jñà sabá kàtjanchrobá nga kàtatsjá 'én. 20 Tsà majèn, jñà xi̱ta̱ xi i̱ títsa̱jna kàteèno̱jmí tsà mé jé kisakòt'a-la̱ i̱t'aà ts'a̱n k'e̱ nga tsohóti̱jna nguixko̱n xi̱ta̱xá judío. 21 A xi koií jé xi tíma-na nga 'ñó kichjà k'e̱ nga tìjnajiìn-la̱ xi̱ta̱xá judío nga kixan-la̱: “Na̱chrjein i̱'ndei̱ tísindaàjiìn-na nga mokjeiín-na nga faáya-la̱ xi̱ta̱ xi biya.” 22 Jè Félix, ndaà tíjiìn-la̱ koni s'ín tjín ndi̱yá xi̱tse̱ ts'e̱ Jesucristo. Tsibíchróbá kjoa̱ koi. Kitsò: —K'e̱ nga kjoi̱í Lisias xi xi̱ta̱ sko̱-la̱ soldado, k'e̱é skònanguì-ìsa̱-nò kjoa̱ xi tjín-nò. 23 Félix kitsjaà-la̱ o̱kixi̱ jñà soldado-la̱ nga si̱ìkíjna ìsa̱ nda̱yá Pablo, ta̱nga ko̱maá ko̱jme'ndei̱í ya̱ i̱ya nda̱yá, ti̱koa̱á ko̱maá ki̱jchòkon xi̱ta̱ xíkjín ko̱ amigo-la̱. 24 K'e̱ nga komà jàn ñijòn na̱chrjein, ijchò ìjngoò k'a Félix; tji̱ko̱ Drusila xi chjo̱ón-la̱ ma xi ti̱koa̱ xi̱ta̱ judío. Kiskinikjaá Pablo nga mejèn-la̱ kji̱'nchré-la̱ kós'ín mokjeiín-la̱ i̱t'aà ts'e̱ Na̱'èn-ná Jesucristo. 25 Pablo, tsibeèno̱jmí-la̱ kós'ín tjín xi kjoa̱ kixi̱, mé xi s'e̱én nga kíkjoán-lá kjoa̱ xi ch'o tjín xi síjé yijo-ná; ti̱koa̱ tsibeèno̱jmí-la̱ nga sa̱ nchrobá na̱chrjein nga Nainá ki̱ìndaàjiìn. Félix tà kitsakjòn-né; k'e̱è kitsò-la̱: —T'in-ne. Kj'ei̱í na̱chrjein kichjà ìjngoò k'a-lè k'e̱ nga ko̱'an-na. 26 Jè Félix, k'oa̱á s'ín tísíkítsjeèn, mejèn-la̱ to̱n ko̱chrjekájno-la̱ Pablo nga si̱ìkíjnandei̱í; k'oa̱á ma-ne nga kjìn k'a kiìchja̱-la̱. 27 K'e̱ nga tsato jò nó, jatjìya xá-la̱ Félix. Jè jahas'en xi 'mì Porcio Festo. Jè Félix, mejèn-la̱ nga ndaà tsibìjnako̱ jñà xi̱ta̱ judío; kisìkíjna ìsa̱ nda̱yá Pablo.
