1 Pablo kiskoò'an jñà xi̱ta̱xá ítjòn kitsò-la̱: —Jñò xi xi̱ta̱ xinguia̱á judío 'mì-nò, ngats'ioò, k'oa̱á xán-nò, kjo̱hítsjeèn ts'a̱n, k'oa̱á tsò nga ndaà tìsìkitasoàn koni s'ín mejèn-la̱ Nainá skanda na̱chrjein i̱'ndei̱. 2 Jè no̱'miì ítjòn xi 'mì Ananías kitsò-la̱ jñà xi̱ta̱ xi nchat'aà chrañà-la̱ Pablo nga kàtasíjts'in-'a tso'ba. 3 Ta̱nga jè Pablo kitsò-la̱: —¡Ngaji̱, xi jò i̱sén tjín-lè, Nainá kàtasíjts'in'a ntso̱boi! Ngaji̱, koií xá tìjna-ne nga kìndaàjiìn-ná koni s'ín tíchja̱ kjo̱tíxoma ta̱nga ngaji̱, isa̱á nìkatònè-la̱ kjo̱tíxoma nga mejèn-lè si̱jts'in-'a-ná. 4 Jñà xi̱ta̱ xi nchat'aà chrañà-la̱ Pablo kitsò-la̱: —¿Mé-ne k'oa̱s'ín nokjoàjno-la̱ xi no̱'miì ítjòn-la̱ Nainá? 5 Pablo kitsò: —'Ntsè, mì kiì bexkoan tsà jè xi na̱'miì ítjòn tíjna. Kixi̱í kjoa̱, k'oa̱á s'ín tíchja̱ xo̱jo̱n kjo̱tíxoma-la̱ Nainá nga tsò: “Jè xi xi̱ta̱xá sko̱-la̱ na̱xa̱ndá mì kiì ko̱ma ki̱nókjoa̱jno-la̱.” 6 Pablo, k'e̱ nga kijtseèxkon jñà xi̱ta̱ xi títsa̱jna nga jò sko̱ya ma —tjín xi̱ta̱ fariseo ko̱ tjín xi̱ta̱ saduceo —'ñó kiìchja̱, kitsò-la̱: —'Ntsè, 'an, xi̱ta̱ fariseo-ná; ki'ndí-la̱ xi̱ta̱ fariseo-ná; koií kjoa̱-la̱ nga k'oa̱s'ín tísindaàjiìn-na na̱chrjein i̱'ndei̱ nga k'oa̱á s'ín mokjeiín-na nga faáya-la̱ jñà xi̱ta̱ xi biya. 7 K'e̱ nga k'oa̱ kitsò Pablo, kòjòya jñà xi̱ta̱ xi títsa̱jna junta; tsibíts'ia̱ jñà xi̱ta̱ fariseo ko̱ xi̱ta̱ saduceo nga tsohótiko̱ xíkjín. 8 Koi kjoa̱-la̱ nga jñà xi̱ta̱ saduceo mì kiì mokjeiín-la̱ tsà kixi̱ kjoa̱ nga faáya-la̱ mik'en, ti̱koa̱ mì kiì mokjeiín-la̱ tsà tjín xi 'mì àkja̱le̱ ko̱ xi 'mì ini̱ma̱; ta̱nga jñà xi̱ta̱ fariseo mokjeiín yije-la̱ kjoa̱ koi. 9 Ngats'iì xi̱ta̱ 'ñó jchán kiìchja̱; k'e̱é chincha kixi̱ xi̱ta̱ xi okóya kjo̱tíxoma-la̱ Nainá xi ya̱ chja̱-ne ts'e̱ xi̱ta̱ fariseo, kitsò: —Xi̱ta̱ jè, nì mé kjoa̱ xi ch'o tís'ín; tsà ini̱ma̱ tsohóko̱ ko̱ tsà àkja̱le̱ tsohóko̱; mì kiì ko̱ma jñá ki̱ncha ikón-lá Nainá. 10 Jè xi̱ta̱ sko̱-la̱ soldado, k'e̱ nga kijtseè nga ìsa̱ 'ñó makjan-la̱ jñà xi̱ta̱, kitsakjón-né tsà ya̱ si̱ìk'en Pablo. K'e̱é kiìchja̱ ìsa̱-la̱ soldado; kitsjaà-la̱ o̱kixi̱ nga kàtjìko̱ ìjngoò k'a ján cuartel. 11 Xi komà nchijòn nga ni̱tje̱n, ijchò kasìt'aà-la̱ Na̱'èn-ná jè Pablo, kitsò-la̱: —Kì tsakjoòn-jèn, k'oa̱á s'ín mochjeén nga ki̱nókjoi̱i xi i̱t'aà ts'a̱n ján Roma, koni s'ín kinokjoì i̱ Jerusalén. 12 Nga kis'e i̱sén, jñà xi̱ta̱ judío tsajoòya-ne nga si̱ìk'en Pablo; k'oa̱á kitsò nga mì kì ko̱kje̱n ko̱ mì kiì skoí nandá; Nainá kàtatsjá-la̱ kjo̱'in tsà mì kiì kitasòn nga si̱ìk'en Pablo. 13 Tsatoó ichán ma-ne jñà xi̱ta̱ judío xi k'oa̱ s'ín tsajoóya-ne. 14 Xi̱ta̱ koi, kiìkon jñà xi̱ta̱ sko̱-la̱ no̱'miì ko̱ xi̱ta̱ jchínga ts'e̱ xi̱ta̱ judío, kitsò-la̱: —K'oa̱á s'ín tsibìnè-la̱je̱n yijo-na̱je̱n nga ni̱ mé xi chji̱ne̱-je̱n, Nainá kàtatsjá-naje̱n kjo̱'in tsà mì kiì kitasòn nga si̱k'en-je̱n Pablo. 15 Ngats'ioò xi tjín-nò xá ítjòn ts'e̱ Junta jè, ko̱t'ìn-là jè xi̱ta̱ sko̱-la̱ soldado nga kàtjanchrobáko̱ nchijòn-le̱ i̱ nguixko̱on. Tà k'oa̱á t'ìn-là nga ìsa̱ ndaà mejèn-nò jcha̱xko̱on kjoa̱ xi tjín-la̱. Ngaje̱n ki̱tsa̱jnandaà-je̱n ya̱ i̱ya ndi̱yá nga si̱k'en-je̱n k'e̱ nga ti̱ kj'eè fì i̱jndé. 16 Jè ti-la̱ ndichja Pablo, kiì'nchré kjoa̱ xi tsajoóya-ne xi̱ta̱ judío; k'e̱é kiì kisìkí'nchré Pablo ya̱ cuartel. 17 Pablo kiìchja̱ jngoò-la̱ soldado, kitsò-la̱: —Tikoi̱i ti jè ñánda tíjna xi̱ta̱ sko̱-la̱ soldado. Tjín 'én xi ke̱èno̱jmí-la̱. 18 Jè soldado kiìko̱ jè ti ñánda tíjna xi̱ta̱ sko̱-la̱, kitsò-la̱: —Jè Pablo xi tíjna nda̱yá kàchja̱-na kàtsò-na: “Tikoi̱i ti jè.” Tjín xó 'én xi ke̱èno̱jmí-lè. 19 Jè xi̱ta̱ sko̱-la̱ soldado, kitsobà'ñó tsja jè ti, kiìko̱ i̱t'aà xìn, kiskònangui-la̱ mé 'én xi ke̱èno̱jmí-la̱. 20 Jè ti kitsò: —Jñà xi̱ta̱ judío, jye ndaà tsajoóya-ne [nga mejèn-la̱ skóna̱cha̱n-lè]; si̱ìjé-lè nga kíkoi̱i nchijòn-le jè Pablo ján nguixko̱n xi̱ta̱xá judío nga mejèn xó-la̱ ìsa̱ ndaà tja̱nangui-la̱ mé kjoa̱ xi tjín-la̱. 21 Ngaji̱, kì kiì mokjeiín-lè. Xi̱ta̱ koi, ma-la̱ tsà ichán nga títsa̱jnachjoà-la̱ Pablo ya̱ i̱ya ndi̱yá nga mejèn-la̱ si̱ìk'en. Jye k'oa̱s'ín kitsjaà-la̱ tso'ba Nainá nga mì kiì ko̱kje̱n ti̱koa̱ mì kiì skoí nandá skanda k'e̱ nga si̱ìk'en Pablo. I̱'ndei̱, tà jè nchikoña-la̱ nga k'oi̱-la̱ 'én-lè koni s'ín nchisíjé. 22 Jè xi̱ta̱ sko̱-la̱ soldado, kitsò-la̱ jè ti nga ko̱maá kjoi̱-ne; kitsjaà-la̱ o̱kixi̱ nga ni̱ jngoò xi̱ta̱ ke̱èno̱jmí-la̱ nga jè ijchò síkjí'nchré. 23 Jè xi̱ta̱ sko̱-la̱ soldado kiìchja̱ jò-la̱ soldado-la̱ xi bít'in-la̱ soldado xi i'nga, kitsjaà-la̱ o̱kixi̱ nga kàtasíkítsa̱jnandaà jò sìndo̱ soldado xi ntso̱ko̱ kjoi̱-ne, jàn kàn ko̱ te xi koòyo̱ kítsa̱sòn-la̱, jò sìndo̱ xi ki̱cha̱ lanza k'oa̱ nga kjoi̱ skanda ján Cesarea k'e̱ nga ki̱jcho xi ñijàn nga ko̱jñò. 24 Ti̱koa̱ kitsjaà o̱kixi̱ nga kàtinchándaà koòyo̱ xi kìjnakjà-la̱ Pablo mé-ne nga ndaà kji̱ko̱-ne nga nimé xi ko̱mat'in skanda ñánda tíjna Félix xi xi̱ta̱xá ítjòn. 25 Jngoò xo̱jo̱n carta tsibíndaà xi tsò: 26 “Tjín-lè kjo̱ndaà ngaji̱ Félix xi xi̱ta̱xá ítjòn tijni; an, xi Claudio Lisias 'mì-na síhixat'aà-lè. 27 Xi̱ta̱ xi tìsìkasén-lè, jñà xi̱ta̱ judío kitsobà'ñó, kjo̱meé kisìk'en, ta̱nga 'an tsohósikoa̱a nga kiìkoa̱a soldado-na̱ nga jye kis'ejiìn-na nga xi̱ta̱ Roma-né. 28 An, mejèn-na nga skoeè mé kjoa̱ xi tjín-la̱. K'oa̱á komà-ne nga kiìkoa̱a ñánda títsa̱jna xi̱ta̱xá judío. 29 K'e̱ nga ijchòkoa̱a, kisijiìn-na nga tà koií kjoa̱-la̱ xi kjo̱tíxoma ts'e̱. Nì mé jé tjín-la̱ nga ki̱yá; skanda mì kiì ok'ín-la̱ nga nda̱yá kíjna i̱ya. 30 An, kis'eno̱jmí-na nga jñà xi̱ta̱ judío, k'oa̱á s'ín tsajoóya-ne nga mejèn-la̱ si̱ìk'en chijé. K'oa̱á ma-ne nga ji̱ tìsìkasén-lè. K'oa̱ ti̱ s'ín kixan-la̱ jñà xi̱ta̱ xi óngui nga nguixkoiìn kàtasìndaàjiìn-la̱ mé kjoa̱ xi tjín-la̱ kondra̱ ts'e̱.” 31 Jñà soldado, k'e̱ nga jye kitjoé-la̱ o̱kixi̱, kiìko̱ Pablo k'e̱ nga jye kòjñò skanda ján na̱xa̱ndá Antipatris. 32 Nga komà nchijòn jñà xi̱ta̱ soldado xi ntso̱ko̱ kiì-ne, kisìkátji-ne; inchrobà-ne skanda cuartel. Tà jñà kiìko̱ Pablo soldado xi koòyo̱ títsa̱jnasòn. 33 Jñà xi̱ta̱ soldado, k'e̱ nga ijchò Cesarea, kisìnga̱tsja jè xi̱ta̱xá ítjòn xo̱jo̱n carta xi 'ya; ti̱koa̱ kisìnga̱tsja Pablo. 34 Jè xi̱ta̱xá ítjòn, k'e̱ nga jye tsibíxke̱jiìn xo̱jo̱n carta, kiskònangui ñánda i̱'nde-la̱ Pablo. K'e̱ nga jye kis'eno̱jmí-la̱ nga nangui Cilicia i̱'nde-la̱, 35 kitsò-la̱: —K'e̱é ki'nchrè-lè k'e̱ nga kjoi̱í xi̱ta̱ xi óngui-lè. I̱kjoàn kitsjaà o̱kixi̱ nga kàtamakinda̱, ya̱á kíjna ni'ya osen-la̱ Herodes.
