1 K'e̱ nga ijchò na̱chrjein-la̱ s'eí Pentecostés, ngats'iì xi̱ta̱ xi mokjeiín-la̱ i̱t'aà ts'e̱ Cristo ta̱ jngoò jtín títsa̱jna. 2 Tà ni̱to̱ón kina'yà jngoò-la̱ xi 'ñó one, koni jngoò tjo̱ xi 'ñó tí'ba xi ngajmiì inchrobà-ne. Kina'yà-la̱ kóho̱kji i̱'nga ni'ya ñánda títsa̱jna jñà xi̱ta̱. 3 Tsatsejèn-la̱ ni̱je̱n xi koni kjoàn ni'ín kjoàn; kjòxkoa̱ya íjngó íjngó kisijnasòn-la̱ jñà xi̱ta̱. 4 Ngats'iì xi̱ta̱, jngoò k'a ndaà kis'ejiìn ini̱ma̱-la̱ Ini̱ma̱ Tsjeè-la̱ Nainá; i̱kjoàn tsibíts'ia̱ nga kiìchja̱ 'én-la̱ xi̱ta̱ xi kj'ei̱í na̱xa̱ndá koni s'ín kitsjaà-la̱ Ini̱ma̱ Tsjeè-la̱ Nainá nga ki̱chja̱. 5 Na̱chrjein koi, kjìn xi̱ta̱ judío títsa̱jna [xi ijchó s'eí] ya̱ na̱xa̱ndá Jerusalén xi beèxkón Nainá xi inchrobà-ne ñánda nga xìn na̱xa̱ndá nga tíjtsa i̱sò'nde. 6 Jñà xi̱ta̱ xi ya̱ títsa̱jna xi ijchó s'eí ya̱ na̱xa̱ndá Jerusalén, ngats'iì kjòxkóya k'e̱ nga kiì'nchré-la̱ xi jane. Ti̱koa̱á tà kjòxkón-la̱ k'e̱ nga kiìnchré-la̱ xi̱ta̱-la̱ Cristo nga ma-la̱ chja̱ nga jngoò ìjngoò sko̱ya 'én-la̱ xi̱ta̱ xi xìn na̱xa̱ndá-la̱ xi ya̱ títsa̱jna. 7 Tà k'oa̱á komà-la̱, ti̱koa̱á tà kjòxkón-la̱, kitsò-la̱ xíkjín: —¿A mìtsà xi̱ta̱ Galilea ngats'iì xi̱ta̱ xi nchichja̱? 8 ¿Kós'ín ma-ne nga na'yá-lá 'én-ná xi nokjoá nga xìn na̱xa̱ndá-ná nga ìjngoò jngoá? 9 Ngats'iaá xi i̱ titsa̱jnaá, tjín xi̱ta̱ Partia, xi̱ta̱ Media, xi̱ta̱ Elam, xi̱ta̱ Mesopotamia, xi̱ta̱ Judea, xi̱ta̱ Capadocia, xi̱ta̱ Ponto, xi̱ta̱ Asia, 10 xi̱ta̱ Frigia, xi̱ta̱ Panfilia, xi̱ta̱ Egipto, xi̱ta̱ Libia xi ya̱ chrañàt'aà-la̱ Cirene. Ti̱koa̱ tjín xi̱ta̱ Roma xi i̱ títsa̱jna Jerusalén. Tjín xi nguiì xi̱ta̱ judío. Ti̱koa̱á tjín xi tà jahitjìya-la̱ nga xi̱ta̱ judío komà. 11 Ti̱koa̱á tjín xi inchrobà-ne Creta ko̱ Arabia. ¡Ngats'iaá na'yà-lá nga jngoò ìjngoò sko̱ya én-ná koni s'ín beèno̱jmí-ná kjo̱xkón xi s'ín Nainá. 12 Ngats'iì xi̱ta̱ tà kisinchaàxkón-né, mì ti kiì machi̱ya-la̱, kitsò-la̱ xíkjín: —¿Kó tsòya-ne kjoa̱ koi? 13 Tjín i'nga xi̱ta̱ xi tà tsijnokeè-né, kitsò: —¡Ch'i̱í xi̱ta̱ koi! 14 K'e̱é tsasíjna kixi̱ Pedro ko̱ xi̱ta̱ xi tejngoò ma-ne; 'ñó kiìchja̱jiìn-la̱ xi̱ta̱, kitsò: —Jñò, xi̱ta̱ xinguiaá xi Judío 'mì-ná ko̱ ngats'ioò xi xìn na̱xa̱ndá-nò xi i̱ titsa̱jnaà Jerusalén, ndaà kàtasijiìn-nò, ndaà ti̱ná'ya én xi kichjàko̱-nò. 15 Jñò bixón-nò “ch'i̱ xi̱ta̱ koi”. ¿Kós'ín ko̱ma-ne nga ko̱ch'i̱ nga sa̱á ijchò xi ñijaàn nga ta̱jñòya? 16 Koií tíbitasòn én xi kiìchja̱ Joel, xi̱ta̱ xi kiìchja̱ ngajo-la̱ Nainá. 17 “K'oa̱á tsò Nainá: k'e̱ nga jye tífehet'aà na̱chrjein, síka'bí-la̱ Ini̱ma̱ Tsjeè-na̱ ngats'iì xi̱ta̱ xi tjín nga tíjtsa i̱sò'nde; jñà i̱xti x'i̱n ko̱ i̱xti íchjín-nò, aán ki̱chja̱ ngajo-na; jñà i̱xti xo̱ngó-nò, skoe̱ kjo̱xkón xi okó Nainá; jñà xi̱ta̱ jchínga-nò k'oi̱í-la̱ nijñá xi i̱t'aà ts'e̱ Nainá 18 O̱kixi̱-né na̱chrjein koi, jñà chi̱'nda-na̱ xi x'i̱n ko̱ íchjín si̱ìka'bi-la̱ Ini̱ma̱ Tsjeè-na̱ mé-ne nga ki̱chja̱ ngajo-na. 19 Ján ngajmiì kjìn kjo̱xkón jch'a̱-la̱, ti̱koa̱á i̱ i̱t'aà nangui jch'a̱-la̱ kjo̱xkón nga xíxteèn jní-la̱ xi̱ta̱, nga ko̱ ni'ín ko̱ ni̱'ndi̱ tsjè xi kjoa̱ ts'e̱ kjo̱jchán. 20 Jè ts'oí, ko̱jñò-né, jè sá, jní kji ko̱ma k'e̱ nga ti̱ kj'eè 'fiì Na̱'èn-ná nga kjoi̱í kíndajin-la̱ xi̱ta̱ jè na̱chrjein xi jeya ko̱ 'ñó xkón. 21 Ta̱nga ngats'iì xi̱ta̱ xi ki̱chja̱t'aà-la̱ Nainá ki̱tjokájiìn kjo̱'in.” ['Koa̱á tsò 'én-la̱ Nainá xi kiskiì Joél (2:28-32)] 22 ’Ti̱ná'ya xi xi̱ta̱ Israel 'mì-nò 'én xi k'oa̱ xán-nò: Jñò, ndaà tíjiìn-nò, Nainá tsakó nga Jesús xi Nazaret ts'e̱, tjín-la̱ kjo̱tíxoma. Xkoòn ki'ya-nò nga kis'iìn ngats'iì kjo̱xkón ko̱ kjoa̱ ts'e̱ seña xi tseé nga'ñó tjín-la̱. 23 Koni s'ín tjíndaà-la̱ Nainá nga tis'a̱ tàts'en-la̱ kjoa̱, jñò, kindobà'ñó xi̱ta̱ jè nga kinìk'eèn nga kinìnga̱tsja xi̱ta̱ xi mì kiì beèxkón kjo̱tíxoma nga tsakat'aà krò. 24 Ta̱nga Nainá kisìkjaáya-la̱; kisìkíjnandei̱í kjoa̱ ts'e̱ kjo̱'in xi tjín-la̱ kjoa̱biya nga mìkiì ko̱ma nga ya̱ si̱jna'ñó i̱t'aà ts'e̱ kjoa̱biya. 25 Jè xi̱ta̱xá ítjòn xi David ki'mì, kitsò i̱t'aà ts'e̱ Jesús: “Kijtseè kjit'aà-ná Nainá k'e̱ nga tíjna nguixkoaàn; i̱ tíjnat'aà ntsa̱a kixi̱ mé-ne nga nì mé xi ko̱matian. 26 Koií kjoa̱-la̱ nga matsja-la̱ ini̱ma̱-na̱, ti̱koa̱ matsja-la̱ nijen-na̱ nga s'e. Yijo-na̱ ti̱koa̱á ndaà si̱ìkjáya nga skóña kjoa̱, 27 koi kjoa̱-la̱ nga mì ya̱á si̱kíjni ini̱ma̱-na̱ ya̱ i̱'nde-la̱ mik'en, ti̱koa̱ mìkiì koi̱'ndi nga ki̱'ndo yijo-na̱, xi chi̱'nda tsjeè-lè 'mì-ná. 28 Tsakoò-ná ndi̱yá nga ma kóti̱jnakoan, tse ko̱tsja s'e̱-la̱ ini̱ma̱-na̱ nga ji tijnako̱-ná.” ['Koa̱á tsò 'én-la̱ Nainá xi kiskiì David (Salmo 16:8-11)] 29 ’'Ntsè, koa̱xán-nò xi nguì kjoa̱ kixi̱: xi̱ta̱ jchínga-ná David, jye kjòtseé k'en, ti̱koa̱ kisihi̱jiìn-né. Jè i̱tsjó-la̱, tíjna skanda na̱chrjein i̱'ndei̱. 30 Ta̱nga jè David, jngoò xi̱ta̱ xi kiìchja̱ ngajo-la̱ Nainá. Jye k'oa̱s'ín tíjiìn-la̱ koni s'ín kitsjaà-la̱ tso'ba Nainá nga tje̱ ts'e̱ ki̱tjokájiìn Cristo nga jè kíjna ngajo-la̱ koni xi̱ta̱xá ítjòn. 31 Jè David, k'oa̱á s'ín kiìchja̱ i̱t'aà ts'e̱ Cristo koni tsà jye kijtseè nga jye jaàya-la̱. Kitsò: “Mì kiì ya̱ kisijna ini̱ma̱-la̱ ya̱ i̱'nde-la̱ mik'en, ti̱koa̱á mì kiì i'ndo yijo-la̱.” 32 Nainá, jyeé kisìkjaáya-la̱ Jesús. Ngats'iì kjoa̱ xi komà, k'oa̱á s'ín beèno̱jmí-nòje̱n nga xkoòn ki'ya-naje̱n. 33 Nainá jeya kisìkíjnat'aà chrja kixi̱-la̱; kitjoé-la̱ Ini̱ma̱ Tsjeè-la̱ koni s'ín kitsjaà tso'ba Nainá. Jè Jesús kisìka'bísòn ìjngoò k'a Ini̱ma̱ Tsjeè-la̱. Koií kjoa̱-la̱ nga k'oa̱s'ín titsa̱'yaà ko̱ titsa̱na'yà. 34 Jè David, mìtsà ngajmiì kiì mijìn; ta̱nga k'oa̱á kitsò: “Jè Nainá kitsò-la̱ jè xi Nei-na̱: Ti̱jnat'aà-ná i̱ kixi̱-na̱, 35 skanda k'e̱ nga sìkítsa̱jnanguia kondra̱-lè ñánda nchasòn ntso̱koiì.” 36 ’Jñò xi xi̱ta̱ na̱xa̱ndá Israel tsa̱jòn, ndaà jcha̱a yijeè nga 'ñó kixi̱ tjín kjoa̱ nga jè Jesús xi jñò tsakat'aà krò, Nainá, k'oa̱á s'ín kisìkíjna nga jè-né xi Na̱'èn-ná, ko̱ ti̱ jè-ne xi Cristo [xi̱ta̱ xi xó kisìkas'én-ne Nainá]. 37 K'e̱ nga kiì'nchré 'én xi o̱kitsò jñà xi̱ta̱ xi ya̱ títsa̱jna, kisìkájno i̱jiìn ini̱ma̱-la̱; k'e̱é kiskònangui-la̱ Pedro ko̱ xi̱ta̱ xíkjín xi i'nga xi tikoa xó tsibíxáya-la̱ Jesús. Kitsò-la̱: —'Ntsè, ¿mé xi s'e̱n-je̱n? 38 Pedro kitsò-la̱: —Ti̱kájno jé-nò, kì ti̱ jé binchaàtsji-nò; t'e̱en bautizar yijo-nò i̱t'aà ts'e Jesucristo nga jngoò ìjngoò-nò, mé-ne nga si̱ìjcha̱at'aà-nò Nainá, ti̱koa̱ tsjá-nò Ini̱ma̱ Tsjeè-la̱. 39 Koni s'ín kitsjaà tso'ba Nainá, 'én xi tsibíjna tsa̱jòn-nò; ti̱koa̱á ts'e̱é i̱xti-nò, ko̱ ngats'iì xi̱ta̱ xi kjiìn títsa̱jna, nga yije xi jè sobá Nainá xó ki̱chja̱-la̱. 40 Pedro, kjìn 'én kiìchja̱jiìn-sa̱-la̱. 'Ñó kiìchja̱ko̱. Kitsò-la̱: —¡Ti̱nchat'aàxìn-là kjo̱'in xi tjoé-la̱ jñà xi̱ta̱ koi xi ch'o s'ín! 41 Jñà xi̱ta̱ xi kòkjeiín-la̱ én xi kiìchja̱ Pedro komà bautizar; ma-la̱ tsà jàn jmiì xi̱ta̱ xi jahas'ent'aà na̱chrjein jè. 42 Kóho̱tjín, kixi̱í chinchako̱ 'én xi kiì'nchré koni s'ín tsakóya-la̱ jñà xi̱ta̱ xi tsibíxáya-la̱ Jesús, ti̱koa̱ kjit'aà na̱chrjein maxkóya nga kjèn-ko̱ xíkjín ti̱koa̱ chja̱t'aà-la̱ Nainá. 43 Ngats'iì xi̱ta̱ xi ya̱ títsa̱jna tà kitsakjòn-né k'e̱ nga kijtseè ngats'iì kjo̱ndaà ko̱ kjo̱xkón xi kis'iìn jñà xi̱ta̱ xi tsibíxáya-la̱ Jesús. 44 Jñà xi̱ta̱ xi jye kòkjeiín-la̱ i̱t'aà ts'e̱ Cristo bitsa̱jnajtín-né kóho̱tjín; síxkoa̱ya yije mé tsojmì xi tjín-la̱. 45 Otíjna nangui-la̱ ko̱ tsojmì xi tjín-la̱, i̱kjoàn síjòya to̱n-la̱ koni s'ín mochjeèn-la̱ nga jngoò ìjngoò. 46 Na̱chrjein inchijòn bixoña ya̱ ndi̱tsin i̱ngo̱ ítjòn, ko̱ ya̱ ni'ya-la̱ xíkjín nga kjèn-kjoò nga tjín-la̱ kjo̱tsja ko̱ indaàjiìn tjín ini̱ma̱-la̱. 47 Jeya kisìkíjna Nainá; jñà xi̱ta̱ na̱xa̱ndá tsjakeè komà xi̱ta̱-la̱ Cristo; jè Nainá, na̱chrjein inchijòn kisìkjahas'en-t'aà-ìsa na̱xa̱ndá-la̱ Cristo jñà xi̱ta̱ xi jè mejèn-la̱ nga ki̱tjokájiìn kjo̱'in.
