1 Pablo, k'e̱ nga ijchò na̱xa̱ndá Derbe ko̱ Listra, ya̱ kisatiìkjoò jngoò xi̱ta̱ xi kota'yàt'aà-la̱ Cristo xi Timoteo 'mì; nea̱-la̱ xi̱ta̱ judío-né xi mokjeiín-la̱ i̱taà ts'e̱ Cristo. Ta̱nga jè na̱'èn-la̱ xi̱ta̱ griego-né. 2 Jñà xi̱ta̱-la̱ Cristo xi títsa̱jna Listra ko̱ Iconio 'ñó ndaà kisìkíjna Timoteo. 3 Pablo mejèn-la̱ nga jè koa̱hìjtako̱; k'oa̱á komà-ne nga kisi'taà chi̱ba̱-la̱ kjoa̱ ts'e̱ circuncisión mé-ne nga ndaà kíjna-ne Timoteo i̱t'aà ts'e̱ xi̱ta̱ Judío; nga jñà xi̱ta̱ xi ya i̱'nde-la̱ jyeé beè nga na̱'èn-la̱ Timoteo, xi̱ta̱ griego-né. 4 Ngats'iì na̱xa̱ndá ñánda jahato, k'oa̱á kitsò-la̱ nga kàtasíkitasòn kjoa̱kixi̱ xi tsajoóya-ne jñà xi̱ta̱ xi tsibíxáya-la̱ Jesús ko̱ xi̱ta̱ jchínga xi títsa̱jna Jerusalén xi o̱tíxoma ya̱ ijiìn na̱xa̱ndá-la̱ Cristo. 5 Jñà xi̱ta̱ na̱xa̱ndá-la̱ Cristo, ìsa̱á 'ñó ndaà mokjeiín ìsa̱-la̱; na̱chrjein nchijòn tímakjìn-ya xi̱ta̱ xi nchimokjeiín-la̱. 6 Jè Ini̱ma̱ Tsjeè-la̱ Nainá mì kiì kitsjaà'nde-la̱ Pablo ko̱ xi̱ta̱ xi kjihijtako̱ nga 'én-la̱ Cristo kiì síka'bí ján nangui Asia; k'oa̱á ma-ne nga ya̱ jatojiìn nangui ñánda 'mì Frigia ko̱ Galacia. 7 K'e̱ nga ijchò chrañàt'aà-la̱ nangui Misia mején-la̱ nga ján kjoi̱ nangui Bitinia, ta̱nga jè Ini̱ma̱-la̱ Jesús mì kiì kitsjaà'nde-la̱. 8 Tà jahato Misia, ijchò skanda na̱xa̱ndá Troas. 9 Nga jye títsa̱jna Troas, Pablo, k'e̱ nga ni̱tje̱n, tsatsejèn jngoò-la̱ xi̱ta̱ koni tsà nijñá tí'bi-la̱ xi nangui Macedonia i̱'nde-la̱ xi tsasíjna kixi̱ nguixko̱n Pablo. Tsibítsi'ba-la̱, kitsò-la̱: “Nchroboí i̱ nangui Macedonia. Ti̱chját'aà-náje̱n.” 10 Pablo, k'e̱ nga jye kijtseè kjoa̱ koi, ni̱to̱ón tsitsa̱jnandaà-je̱n nga tsangui-je̱n ján nangui Macedonia; k'oa̱á s'ín kjòchi̱ya-naje̱n nga kixi̱í kjoa̱ nga Nainá tíchja̱-naje̱n mé-ne nga si̱ka'bí-je̱n 'én ndaà-la̱ Nainá xi kjoa̱ ts'e̱ Cristo ya̱ i̱'nde jè. 11 K'e̱ nga itjo-naje̱n ya̱ na̱xa̱ndá Troas, kichjoé jngoò-je̱n chitso, tsanguí kixi̱-je̱n ya̱ nangui xi kijnajiìn ndá xi 'mì Samotracia; xi komà inchijòn ijngoò k'a tsangui-je̱n skanda na̱xa̱ndá Neápolis. 12 Itjo-naje̱n Neápolis, tsanguí-je̱n Filipos, jngoò na̱xa̱ndá ítjòn ts'e̱ i̱'nde Macedonia xi 'ñó tjoé-la̱ nga'ñó i̱t'aà ts'e̱ Roma. Kjìn na̱chrjein tsitsa̱jna-je̱n ya̱ i̱'nde jè. 13 Jngoò na̱chrjein nìkjáya tsanguí jngoò-je̱n i̱'nde i̱ndiì na̱xa̱ndá ñánda tífa jngoò xa̱jngá nandá nga k'oa̱ s'ín kinìkítsjeèn-je̱n nga tjín jngoò i̱'nde ñánda chja̱t'aà-la̱ Nainá xi̱ta̱ judío. Tsitsa̱jna-je̱n; kinokjoàko̱-je̱n i̱t'aà ts'e̱ 'én ndaà-la̱ Nainá xi kjoa̱ ts'e̱ Cristo jñà íchjín xi maxkóya ya̱ i̱'nde jè. 14 Ya̱ tíjnajiìn jngoò chjo̱ón xi 'mì Lidia xi otíjna nikje chjí xi sko kjoàn i̱sén-la̱; ya̱á i̱'nde-la̱ ñánda 'mì Tiatira; ndaà beèxkón Nainá; jè Nainá kiskíxa̱jin kjo̱hítsjeèn-la̱ nga ndaà tí'nchré koni s'ín tíchja̱ Pablo. 15 Komà bautizar Lidia ko̱ ngats'iì xi̱ta̱ ni'ya-la̱; xi komà i̱skan tsibítsi'ba-naje̱n kitsò: —Jñò tsà kixi̱í kjoa̱ nga mokjeiín-nò nga an, ndaà mokjeiín-na i̱t'aà ts'e̱ Nainá, tikjiaán ni'ya-na̱, ya̱ si̱kjáya. Ngaje̱n kjo'ñó tsitsa̱jna-je̱n. 16 Jngoò na̱chrjein k'e̱ nga titsa̱honguí-je̱n i̱'nde ñánda nokjoat'aà-la̱je̱n Nainá, kisatiìkjoò jngoò-je̱n tsàti chi̱'nda xi ini̱ma̱ ch'o-la̱ nei̱í tíjiìn ini̱ma̱-la̱; maá-la̱ bíndaà nga kot'aàsòn xi̱ta̱. Jñà nei-la̱ tsàti jè, ndaà jchán síkijne to̱n nga koi xá s'ín. 17 Tsòti jè, kiìtjingui-na̱je̱n; 'ñó chja̱ tje̱ngui-naje̱n, nga tsò: —Xi̱ta̱ koi, chi̱'nda-la̱ Nainá-né xi 'ñó jeya tíjna; ti̱jñà-ne xi beèno̱jmí-nò ndi̱yá xi kitjokájiìn-nò kjo̱'in. 18 Jè tsòti, kjìn na̱chrjein k'oa̱ s'ín kitsò-naje̱n. Pablo chaán kòjti-la̱, kisìkátjifaya'a; kiìchja̱-la̱ jè tjo̱ nei̱í xi tíjiìn ini̱ma̱-la̱. Kitsò-la̱: —I̱t'aà ts'e̱ Jesucristo, k'oa̱á xan-lè, ti̱tjo̱kàjiìn ini̱ma̱-la̱ tsòti jè. Ti̱ k'e̱é-ne kjòndaà-ne. 19 Jñà nei-la̱, k'e̱ nga kijtseè nga kitjaàxìn-la̱ kjoa̱ xi ma-la̱, nga mì ti̱ kiì kisìkijne-ne to̱n, kitsobá'ñó Pablo ko̱ Silas, kiìko̱ nguixko̱n xi̱ta̱xá. 20 Chinchá osen ñánda títsa̱jna xi̱ta̱xá, kitsò: —Jñà xi̱ta̱ koi xi xi̱ta̱ judío, fì kátsji kjo̱si i̱ na̱xa̱ndá-ná. 21 Kjo̱tíxoma xi okóya mì kiì ndaà tjín, mì kiì tjí'nde-ná nga chjoé, mì kiì k'oa̱ s'ín s'e̱én, koií kjoa̱-la̱ nga xi̱ta̱ Roma-ná jñá. 22 Ngats'iì xi̱ta̱ na̱xa̱ndá sa kondra̱ kiì-la̱ jè Pablo ko̱ Silas; jñà xi̱ta̱xá kitsjaà o̱kixi̱ nga tsatejndajno nikje-la̱, i̱kjoàn tsajá-la̱. 23 K'e̱ nga jye 'ñó tsajá-la̱, i̱ngajò, kiskinìs'en nda̱yá; i̱kjoàn kitsjaà-la̱ o̱kixi̱ jè xi̱ta̱ xi síkinda̱ nda̱yá nga ndaà kàtasíkinda̱ xi̱ta̱ koi. 24 Jè xi̱ta̱ xi síkinda̱ ndayá, k'e̱ nga kits'iì-la̱ o̱kixi̱, ya̱á chinchá i̱ya ñánda ìsa̱ 'ñó tjín. Tsibít'aà'ñó ntso̱ko̱ i̱t'aà yá ts'e̱ nda̱yá. 25 K'e̱ nga jye ijchò osen ni̱tje̱n, jè Pablo ko̱ Silas, nchichja̱t'aà-la̱ Nainá ko̱ nchiseè-la̱; jñà xi̱ta̱ xi i'nga xi ti̱koa̱ kjo̱'in títsa̱jna, tà nchi'nchré-la̱. 26 Ti̱ k'e̱-ne tà ni̱to̱ón j'iì jngoò ch'ón xi 'ñó jchán ts'a. Jñà xoho̱tjoa̱-la̱ nda̱yá kitáx'a̱, ti̱koa̱ jñà na'ñó ki̱cha̱ cadena xi tjít'aà 'ñó-ne xi̱ta̱ xi títsa̱jna nda̱yá, jngoò k'a kitájnda̱'ñó. 27 Jè xi̱ta̱ xi síkinda̱ nda̱yá, k'e̱ nga jaa-la̱, kijtseè nga ti̱xá yije xoho̱tjoa̱-la̱ nda̱yá. Kisìkítsjeèn, maá-la̱ tsà jye tsanga yije xi̱ta̱ xi títsa̱jna kjo̱'in. Kiskoé jngoò ki̱cha̱ ndojò nga mejèn-la̱ si̱ìk'en yijo-la̱. 28 Jè Pablo, k'e̱ nga kijtseè, ni̱to̱ón 'ñó kiìchja̱-la̱ kitsò-la̱: —Kì k'oa̱á nìkoi̱i yijo-lè; i̱í titsa̱jna yije-je̱n. 29 Jè xi̱ta̱ xi síkinda̱ nda̱yá kisìjé jngoò ni'ín nga kjòhiseèn-ya ndayá; chi̱ba̱-la̱ tíhotsé-né k'e̱ nga jahas'en cuarto ñánda títsa̱jna Pablo ko̱ Silas; i̱kjoàn kisìkatje̱n yijo-la̱ ya̱ i̱ngui ntsa̱ko̱. 30 I̱kjoàn tsachrje-ne nda̱yá Pablo ko̱ Silas; kiskònangui-la̱, kitsò-la̱: —Na̱'èn, ¿mé xi s'ia̱an nga ki̱tjokàjña kjo̱'in? 31 Pablo ko̱ Silas kitsò-la̱: —Kàtakjeiín-lè i̱t'aà ts'e̱ Na̱'èn-ná Jesucristo mé-ne nga ki̱tjokájñoò kjo̱'in ngaji̱ ko̱ ngats'iì xi̱ta̱ ni'ya-lè. 32 K'e̱é tsibeèno̱jmí-la̱ 'én-la̱ Na̱'èn-ná ngats'iì xi̱ta̱ xi ya̱ títsa̱jna ni'ya-la̱. 33 Ti̱ jè-ne ni̱tje̱n jè, jè xi̱ta̱ xi síkinda̱ nda̱yá, tsaníjno ñánda kit'iì-la̱ Pablo ko Silas; xi̱ta̱ jè ti̱koa̱ komà bautizar kóho̱tjín xi̱ta̱ xi ya̱ títsa̱jna ni'ya-la̱. 34 Nga jye komà i̱skan, kiìko̱ ni'ya-la̱ nga tsakjèn kjoò kóho̱tjín xi̱ta̱ ni'ya-la̱ xi nguì tà kjo̱tsja nga jye kòkjeiín-la̱ i̱t'aà ts'e̱ Nainá. 35 Nga komà inchijòn, jñà xi̱ta̱xá kisìkasén policia-la̱ nga kisìkasén-la̱ o̱kixi̱ jè xi síkinda̱ nda̱yá nga tà k'oa̱ s'ín kàtjitjo-ne Pablo ko̱ Silas. 36 Jè xi̱ta̱ xi síkinda̱ nda̱yá kisìkí'nchré Pablo kitsò-la̱: —Jñà xi̱ta̱xá, jyeé kàtsjá-na o̱kixi̱ nga ma ki̱tjo'ndeií-nò. Ndaà tanguíi-nò. 37 Ta̱nga je Pablo kitsò: —Ngaje̱n xi̱ta̱ Roma-náje̱n. [Mì kiì tjí'nde nga taxki̱ siko̱-naje̱n.] Ta̱nga kis'eé-naje̱n yá nga nguixko̱n na̱xa̱ndá k'e̱ nga skanda ti̱kjeé 'ya-la̱ mé jé xi tjín-naje̱n; ta̱nga i̱'ndei̱ mejèn-la̱ nga tà kjoa̱ chijé ko̱chrje-naje̱n nda̱yá; jñà kàtjanchrobá sobà nga kàtachrjè-naje̱n. 38 Jñà policía, k'oa̱á s'ín kiì keèna̱jmí-la̱ jñà xi̱ta̱xá koni s'ín kitsò Pablo. K'e̱ nga kiì'nchré jñà xi̱ta̱xá nga jè Pablo ko̱ Silas nga xi̱ta̱ Roma, tsì ndaà kitsakjòn. 39 K'e̱é ni̱to̱n kiì nga tsachrje-ne nda̱yá Pablo ko̱ Silas; i̱kjoàn tsibítsi'ba-la̱ kjoa̱ xi komàtin; kitsò-la̱ nga ta kjo̱ndaà kàtitjojiìn na̱xa̱ndá. 40 Pablo ko̱ Silas, k'e̱ nga jye itjo-ne nda̱yá, kiì ni'ya-la̱ chjo̱ón xi 'mì Lidia. Ya̱á tsohóko̱ na̱jmí xíkjín xi ngásòn mokjeiín-la̱ i̱t'aà ts'e̱ Cristo nga 'ñó kàté-la̱ ikon; i̱kjoàn kiì-ne.
