1 Jñà na̱chrjein koi, j'iì i'nga xi̱ta̱ xi inchrobà-ne Judea nga tsibeèno̱jmí-la̱ xi̱ta̱-la̱ Cristo, kitsò-la̱: “Mì kiì ki̱tjokàjñoò kjo̱'in tsà mì kiì si̱t'aà chi̱ba̱-la̱ yijo-nò kjoa̱ ts'e̱ circuncisión koni s'ín tíchja̱ kjo̱tíxoma xi kiskiì Moisés.” 2 Pablo ko̱ Bernabé 'ñó tsajoòkjoò ko̱ jñà xi̱ta̱ koi; tsohótiyaá-ne jñà kjoa̱ koi; i̱kjoàn kisìkasén Pablo ko̱ Bernabé ján Jerusalén; tsobàhijtako̱ i'nga xi̱ta̱-la̱ Cristo xi títsa̱jna ya̱ Antioquía nga kiìkon jñà xi̱ta̱ xi tsibíxáya-la̱ Jesús ko̱ xi̱ta̱ jchínga xi otíxoma ya̱ na̱xa̱ndá-la̱ Cristo nga si̱ndaàjiìn kjoa̱ koi. 3 Jñà xi̱ta̱ na̱xa̱ndá-la̱ Cristo xi títsa̱jna Antioquía, kisìchját'aà-la̱ nga kiì-ne xi̱ta̱ koi. Jahato Fenicia ko̱ Samaria; tsibeèno̱jmí nga jñà xi mì tsà xi̱ta̱ judío ti̱koa̱ jyeé tífatjiya-la̱ nga Cristo nchifìt'aà-la̱. Ngats'iì xi̱ta̱ xi mokjeiín-la̱ i̱t'aà ts'e̱ Cristo, 'ñó kjòtsjaà-la̱. 4 Pablo ko̱ Bernabé, k'e̱ nga ijchò ján Jerusalén, jñà xi̱ta̱ na̱xa̱ndá-la̱ Cristo ko̱ xi̱ta̱ jchínga xi ya̱ o̱tíxoma ko̱ xi̱ta̱ xi tsibíxáya-la̱ Jesús, ndaà kiskoétjò; xi̱ta̱ koi, tsibeèno̱jmí yije mé kjoa̱ xi kis'iìn Nainá nga kisìchját'aà-la̱. 5 Ya̱ títsa̱jnajiìn i'nga xi̱ta̱ fariseo xi jye kòkjeiín-la̱ 'én ndaà-la̱ Nainá xi kjoa̱ ts'e̱ Cristo; chincha kixi̱, kitsò: —Jñà xi mì tsà xi̱ta̱ judío xi jye mokjeiín-la̱, machjeèn-né nga si̱t'aà chi̱ba̱-la̱ kjoa̱ ts'e̱ circuncisión; ti̱koa̱ si̱nè-la̱ nga kàtasìkitasòn kjo̱tíxoma xi kiskiì Moisés. 6 Kjòxkóya xi̱ta̱ xi tsibíxáya-la̱ Jesús ko̱ xi̱ta̱ jchínga xi otíxoma ya̱ i̱jiìn na̱xa̱ndá-la̱ Cristo nga tsajoòya-ne kjoa̱ koi. 7 Tsee jchán tsajoòya-ne kjoa̱ koi; chaán tsasíjna kixi̱ Pedro, kiìchja̱, kitsò: —'Ntsè, jñò, jyeé tíjiìn-nò nga kjòtseé jahajiìn-na Nainá nga an kèno̱jmí-la̱ 'én ndaà-la̱ Nainá xi kjoa̱ ts'e̱ Cristo jñà xi mì tsà xi̱ta̱ judío mé-ne nga ti̱koa̱ ko̱kjeiín-la̱. 8 Nainá xi beè ini̱ma̱-ná, k'oa̱á s'ín tsakó kixi̱-ná nga ti̱koa̱ kiskoétjò xi̱ta̱ koi nga k'oa̱á ti̱ s'ín kitsjaà-la̱ Ini̱ma̱ Tsjeè-la̱ koni s'ín kitsjaà-ná jñá. 9 Nainá, kisìtsjeè ini̱ma̱-la̱ xi̱ta̱ koi k'e̱ nga kòkjeiín-la̱ i̱t'aà ts'e̱ Cristo, nga mì kiì faájiìn xi̱ta̱, tà ngásòn fìko̱-ná ngats'iaá, xi xi̱ta̱ judío 'mì-ná ko̱ xi ta̱xki̱ xi̱ta̱. 10 I̱'ndei̱, ¿mé-ne kondra̱ onguí-là kjo̱hítsjeèn-la̱ Nainá, tsa koi na̱chrjein-la̱ ko̱jtì-la̱? Nga bìnè-lá xi̱ta̱ xi kota'yàt'aà-la̱ Cristo nga si̱ìkitasòn kjoa̱ ts'e̱ kjo̱tíxoma. Ni̱ jñá ko̱ ni̱ jñà xi̱ta̱ jchínga-ná chíkjoa̱-ná nga nìkitasoán. 11 Mì kiì ko̱'sín ko̱ma. Nga̱ k'oa̱á s'ín mokjeiín-ná nga jñá, ko̱ xi ta̱xki̱ xi̱ta̱, ta ngásòn kjo̱ndaà-la̱ Na̱'èn-ná Jesucristo ki̱tjokàjñaá kjo̱'in. 12 Jyò tsibìtsa̱jna ngats'iì xi̱ta̱ xi ya̱ títsa̱jna. Kiì'nchré-la̱ Bernabé ko̱ Pablo nga tsibeèno̱jmí-la̱ xi̱ta̱ nga 'ñó tsee kjo̱xkón ndaà xi kis'iìn Nainá xi i̱t'aà ts'e̱ nga nguixko̱n jñà xi mì tsà xi̱ta̱ judío. 13 K'e̱ nga jye kiìchja̱ Bernabé ko̱ Pablo, k'e̱è kiìchja̱ Jacobo, kitsò: —'Ntsè xi i̱ titsa̱jnaà, ti̱ná'ya-ná. 14 Jè Simón Pedro, jyeé tsibeèno̱jmí-ná kó s'ín komà nga ti sa̱ ítjòn nga Nainá jaàjiìn jñà xi mì tsà xi̱ta̱ judío nga na̱xa̱ndá-la̱ ko̱ma. 15 K'oa̱á s'ín mangásòn 'én koni s'ín kiskiì jñà xi̱ta̱ xi kiìchja̱ ngajo-la̱ Nainá nga kitsò: 16 K'e̱ nga ko̱ma i̱skan, ki̱tjojen ìjngoò k'a nga kìndaàya xi̱tse̱-na kjo̱tíxoma-la̱ xi̱ta̱xá ítjòn David xi jye its'on; jè xi jye chixòña, ijngoò k'a síkixi̱ya-na. sikíjna jngoò-na xi̱ta̱ xi ko̱tíxoma ngajo-la̱ David. 17 mé-ne jñà xi̱ta̱ xi i'nga ko̱hótsji-ne Nainá, ngats'iì xi mì tsà xi̱ta̱ judío, jñà xi 'ín ts'a̱n tjít'aà. 18 K'oa̱á tsò Nainá, nga tsibeèno̱jmí kjo̱hítsjeèn xi tjín-la̱ skanda tisa̱ tà'tsen-la̱ kjoa̱. 19 ’An, k'oa̱á xán-nò nga mì kiì si̱nè-la̱ kjoa̱ xi 'in tjín jñà xi mì tsà xi̱ta̱ judío, jñà xi nchifatjìya-la̱ nga Nainá nchifìt'aà-la̱. 20 Ta jè xi mochjeén nga si̱kasén-lá xo̱jo̱n mé-ne nga mì kiì ski̱ne̱ ngats'iì tsojmì xi ya̱ sinchá nguixko̱n kjoa̱xkósòn; ti̱koa̱ kì ti̱ kjoa̱ chijngui s'ín-ne, mì ti̱ kiì ski̱ne̱-ne jní ko̱ ngats'iì yijo-la̱ cho̱ xi mì kiì xíxteèn jní-la̱. 21 Skanda kjòtseè, xki̱ xi ján na̱xa̱ndá tjín xi̱ta̱ xi bíxke̱jiìn xo̱jo̱n kjo̱tíxoma xi kiskiì Moisés ya̱ ni'ya i̱ngo̱ sinagoga nga jiìn jiìn na̱chrjein nga na̱chrjein nìkjáya. 22 Jñà xi̱ta̱ xi tsibíxáya-la̱ Jesús ko̱ ngats'iì xi̱ta̱ na̱xa̱ndá-la̱ Cristo ko̱ xi̱ta̱ jchínga xi ya̱ otíxoma, tsajoóya-ne nga jaajiìn i'nga xi̱ta̱ xíkjín xi kisìkasén ján Antioquía. Jñà kitjaàjiìn Judas xi ti̱koa̱ Barsabás 'mì ko̱ Silas, jñà xi̱ta̱ xi ndaà yaxkón ya̱ i̱jiìn na̱xa̱ndá-la̱ Cristo. Tsobàhi̱jtako̱ Pablo ko̱ Bernabé. 23 Kisìk'a jngoò xo̱jo̱n xi tsò: “Ngaje̱n, xi̱ta̱ xi tsibíxáya-la̱ Jesús ko̱ xi̱ta̱ jchínga, nìhixat'aà-nòje̱n jñò xi mì tsà xi̱ta̱ judío 'mì-nò xi 'ntsé chibá i̱t'aà ts'e̱ Cristo xi titsa̱jnaà ya̱ na̱xa̱ndá Antioquía, ko̱ i̱'nde Siria ko Cilicia. 24 Jye kina'ya-je̱n nga i̱ itjokàjiìn i'nga xi̱ta̱ xi ijchòkon-nò nga siì síko̱-nò nga chja̱ko̱-nò 'én xi síkits'ón jiìn-la̱ ini̱ma̱-nò, ta̱nga mì tsà ngaje̱n tsatíxá-la̱je̱n. 25 Ngats'iì-je̱n, k'oa̱á s'ín kichoòsòn-làje̱n nga kinìkasén i'nga-nòje̱n xi̱ta̱ tsaje̱n xi kiìkon-nò. Tsobáhi̱jta-ko̱ xinguia̱á Pablo ko̱ Bernabé, xi̱ta̱ xi 'ñó matsjacha-je̱n. 26 Jñà xi̱ta̱ koi, jye k'oa̱s'ín tsibínè-la̱ yijo-la̱ ni̱ta̱ mé kjo̱'in xi komàtin xi kjoa̱ ts'e̱ Na̱'èn-ná Jesucristo. 27 Titsa̱nìkasén-nòje̱n Judas ko̱ Silas; ngats'iì 'én xi tjít'aà xo̱jo̱n, jñà xi̱ta̱ koi keèno̱jmíya ìjngoò k'a-nò xi tà 'én ko̱òko̱-nò. 28 Ngaje̱n ko̱ Ini̱ma̱ Tsjeè-la̱ Nainá ndaà kisaseèn-naje̱n nga mì kjo̱'ñó ko̱ma-nò kjoa̱ ts'e̱ kjo̱tíxoma xi 'in tjín; tà koi-né xi ndaà mochjeèn: 29 nga mì kiì ma chji̱neè yijo-la̱ cho̱ xi ya̱ biya nguixko̱n xkósòn; mì kiì ma chji̱neè jní ko̱ mì kiì ma chji̱neè yijo-la̱ cho̱ xi mì kiì xíxteèn jní-la̱; ti̱koa̱á kì ti̱ kjoa̱ chijngui nìs'in-là; tsà chja̱àxìn-là yijo-nò ngats'iì kjoa̱ koi, ndaà s'e̱; k'e̱ chibá.” 30 Xi̱ta̱ koi, k'e̱ nga jye kisìhixat'aà xíkjín, ni̱to̱ón kiì skanda ján Antioquía; k'e̱ nga ijchò tsibíxkóya ngats'iì xi̱ta̱-la̱ Cristo, kisìnga̱tsja xo̱jo̱n xi 'ya. 31 Jñà xi̱ta̱ na̱xa̱ndá-la̱ Cristo, k'e̱ nga jye tsibíxke̱jiìn xo̱jo̱n, tsjaá komà-la̱ nga ijchò-la̱ 'én xi kisijehikon. 32 Jè Judas ko̱ Silas ti̱koa̱á Nainá chja̱ ngajo-la̱; ndaà kisìje ikon jñà xi̱ta̱-la̱ Cristo; kitsjaà-la̱ nga'ñó. 33 Xi̱ta̱ koi, kjìn na̱chrjein tsibìtsa̱jna Antioquía. Nga komà i̱skan kisìhixat'aa xíkjín, kiì-ne Jerusalén; kiìkon-ne jñà xi̱ta̱ xi kisìkasén. 34 [Ta̱nga jè Silas ndaà kisasèn-la̱ nga tsibìjna Antioquía.] 35 Jè Pablo ko̱ Bernabé, ya̱á tsibìtsa̱jna Antioquía; tsakóya isa̱ 'én-la̱ Nainá ti̱koa̱ kiìchja̱ya 'én ndaà-la̱ Nainá xi kjoa̱ ts'e̱ Cristo. Ti̱koa̱á kjìn xi̱ta̱ xi kj'eií kisìxákjo. 36 K'e̱ nga komà i̱skan, Pablo kitsò-la̱ Bernabé: —Tíkjiaán ìjngoò k'aá kóho̱kji na̱xa̱ndá ñánda nga tsibeèno̱jmiá 'én-la̱ Nainá mé-ne nga jcha̱á kó s'ín títsa̱jna xi̱ta̱ xinguiaá. 37 Jè Bernabé mejèn-la̱ kji̱ko̱ Juan, xi ti̱koa̱ Marcos 'mì; 38 ta̱nga jè Pablo mì kiì kisasèn-la̱ nga jè kji̱ko̱, koií kjoa̱-la̱ nga kitsjeiìn takòn ján Panfilia nga mì ti̱ kiì tsobáhi̱jtako̱-ne nga kisìxá jè xá xi tjíma-ne. 39 K'oa̱á s'ín komà-ne nga kisakò kjoa̱ nga mì kiì kjòngásòn 'én-la̱; chinchat'aà xìn-la̱ xíkjín; jè Bernabé kiìko̱ Marcos; kiìsòn-ndá skanda Chipre. 40 Jè Pablo, jahàjiìn Silas nga tsobáhi̱jtako̱. Jñà xi̱ta̱-la̱ Cristo kisìkítsa̱jnaya tsja Nainá nga kiì. 41 Kiì kóhokji nangui Siria ko̱ Cilicia nga ya̱ chinchima nga isa̱ nda kisì'ñó ikon jñà xi̱ta̱ na̱xa̱ndá-la̱ Cristo.
