1 Ji̱ ndí 'ntsè xi 'mì-lè Gayo xi 'ñó ndaà chibá ko̱ xi nguiì ko̱ ini̱ma̱-na̱ nga matsjake̱-le, tikjiì-le Xo̱jo̱n jè 'a̱n xi xi̱ta̱ jchínga 'mì-na ya̱ i̱ngo̱. 2 Ji̱ ndí 'ntsè, 'a̱n, k'oa̱á s'ín tísíjé-la̱ Nainá, nga ndaà katitjo yije ni̱ta mé kjoa̱ xi s'i̱in ji̱, koni s'ín ndaà tímachikont'in ini̱ma̱-lè xi i̱t'aà ts'e̱ Nainá, k'oa̱á ti̱ s'ín ndaà katijna jè yijo-lè nga ni̱ mé ch'in katase-la̱. 3 Taxki̱ 'ñó kjotsja-na k'e̱ nga j'iì i'nga jñà 'ntsé xi tsibèno̱jmí-na nga k'oa̱á s'ín tiníjchí yijo-le koni s'ín tjín kjoa̱ kixi̱ i̱t'aà ts'e̱ Cristo. 4 Nì ti̱ mé kjoa̱ tjín-ne xi k'oa̱s'ín 'ñó matsja-la̱ ini̱ma̱-na̱, ta jè-ne k'e̱ nga 'nchre nga jñà xi 'ndí i̱xti-na̱ xan-la̱ nga k'oa̱á s'ín nchisíjchá yijo-la̱ koni s'ín tjín xi kjoa̱kixi̱. 5 Ngaji̱ 'ndí 'ntsè xi 'ñó matsjake̱-lè, 'ñó kixi̱ tiníjchí yijo-lè, k'e̱ nga k'oa̱s'ín ndaà nìs'in-la̱ ya̱ ni'ya-lè jñà xi̱ta̱ xinguia̱á xi bijchókon-le xi ti̱koa̱ 'én-la̱ Nainá mokjeiín-la̱; ko̱ isa̱á ta ndaà tjín isa k'e̱ nga ti̱koa̱ ndaà nìs'in-la̱ jñà xi̱ta̱ xinguia̱á xi xìn i̱'nde 'fi-ne. 6 Jñà xi̱ta̱ xinguia̱á k'oa̱á s'ín tsibéno̱jmí kixi̱ ya̱ nguixko̱n xi̱ta̱ na̱xa̱ndá-la̱ Cristo, nga ngaji̱ 'ñó matsjachi ngats'iì xi̱ta̱ xinguia̱á koi. K'oa̱s'ín ndaà ti̱si̱ko̱ isi k'e̱ nga kijchòkon-le; t'i̱-la̱ mé xi machjeén-la̱ k'e̱ nga tjímaya ya̱ ndi̱yá. K'oa̱s'ín ti̱koi̱i koni s'ín sasén-la̱ Nainá. 7 Nga̱ i̱t'aà ts'e̱ Cristo-né nga k'oa̱s'ín jye tsibínè-la̱ yijo-la̱ jñà xi̱ta̱ xinguia̱á koi, nga k'oa̱s'ín nchisíxá-la̱ Jesucristo, ko̱ majìn-la̱ nga jñà kiskoé tsojmì xi tsjá-la̱ xi̱ta̱ xi mì tsà i̱t'aà ts'e̱ Cristo mokjeiín-la̱. 8 Koií machjeén-ne nga jñá oko̱-ná nga ki̱si̱koa̱á jñà xi̱ta̱ xinguia̱á koi. Tsa k'oa̱s'ín ki̱si̱koa̱á, tsò-ne kjoa̱ nga ngásòn titsa̱nika'bísoán jè 'én kixi̱ xi ndaà tsò. 9 'A̱n jyeé kiskia jngoò Xo̱jo̱n nga kisìkasén-la̱ jñà xi̱ta̱ na̱xa̱ndá-la̱ Cristo, ta̱nga jè Diótrefes mì kiì sasén-la̱ koni s'ín ki'mì-la̱ji̱n, nga̱ jè, koií xi mejèn-la̱ nga ta jè ko̱tixoma. 10 K'e̱ nga ki̱jchoa, k'e̱é ko̱xán kixi̱-la̱ i̱t'aà ts'e̱ ngats'iì kjoa̱ ch'o xi tís'ín, nga 'ñó ch'o tsò 'én ndiso xi tíbínè-naje̱n. Ko̱ mì tsà ta ya̱ majngoò ikon, ti̱koa̱á mì kiì ma-la̱ nga sís'in-la̱ jñà xi̱ta̱ xinguia̱á xi bijchòkon ya̱ ni'ya-la̱. Ko̱ jñà 'ntsé xi mejèn-la̱ nga si̱ìs'ìn-la̱ xi̱ta̱ xinguia̱á, jé bíchjoa ikon-la̱, ko̱ ti̱koa̱á ochrjekàjiìn-né ya̱ na̱xa̱ndá-la̱ Cristo jñà 'ntsé xi k'oa̱s'ín síkitasòn kjo̱nda koi. 11 Ji̱ 'ndí 'ntsè xi 'ñó matsjake̱-lè, kì jñà chjìnguiì-la̱ jñà kjoa̱ xi ch'o tjín; ji̱, jñà chjíngui-la̱ jñà kjoa̱ xi ndaà tjín. Nga̱ jè xi̱ta̱ xi ndaà s'ín, xi̱ta̱ ts'e̱ Nainá-né; ta̱nga jè xi̱ta̱ xi ch'o s'ín, kj'eè kì beè yá-ne xi Nainá. 12 I̱t'aà ts'e̱ Demetrio, ngats'iì xi̱ta̱ k'oa̱á tsò nga 'ñó ndaà tjín koni s'ín tís'ín, skanda jè xi kjoa̱ kixi̱, k'oa̱á s'ín okó nga jè Demetrio, ndaá tjín koni s'ín tís'ín; k'oa̱á ti̱ s'ín bixón-je̱n nga ndaá tjín koni s'ín tís'ín, ko̱ ndaá 'yi nga 'én kixi̱-né koni s'ín bixón-je̱n. 13 Tjín isa-na mé 'én xi mejèn-na nga ko̱xán-le, ta̱nga majìn-na nga tà Xo̱jo̱n siìkasén-le; 14 jè xi mejèn-na nga kjíkon xátí-le; k'e̱é ìsa̱ ndaà jchi̱bano̱jmiá k'e̱ nga kijchòkon-le. 15 K'oa̱s'ín 'nchán kàtijna kjit'aà ini̱ma̱-lè. Jñà xi̱ta̱ xi ndaà óko̱-ná xi i̱ i̱'nde-la̱ tísíhixat'aà-le. Ko̱t'ín-la̱ jñà xi̱ta̱ xi ndaà óko̱-ná xi ya̱ títsa̱jnako̱-le, Nainá kàtasíchikont'in nga jngoò ìjngoò.
