1 An Pablo, tíkji-le xo̱jo̱n jè. Nga an tsibíxáya-na Jesucristo nga k'oa̱á s'ín kjòmejèn-la̱ Nainá. K'oa̱á s'ín kitsjaà tso'ba Nainá nga kíjnakon ini̱ma̱-ná i̱t'aà ts'e̱ Cristo Jesús. 2 Ngaji̱ Timoteo xi 'ñó matsjakeè-lè koni tsà ki'ndí ts'a̱n xan-lè, Nainá xi Na̱'èn-ná ko̱ Na̱'èn-ná Jesucristo kàtatsjá-lè kjo̱ndaà, kàtahi̱ma̱keè-lè, kàtas'e-la̱ kjoa̱'nchán i̱jiìn ini̱ma̱-lè. 3 Mì kiì jcha̱hajiìn-na ko̱ na̱chrjein ko̱ ni̱tje̱n bìtsi'batjì-lè ti̱koa̱ tsjaà-la̱ kjo̱ndaà Nainá, jè xi an bexkoán koni s'ín kijtseèxkón jñà xi̱ta̱ jchínga-na̱ nga nguiì tsjeè tjín kjo̱hítsjeèn-na̱. 4 K'e̱ nga bítsjeèn-na kjoa̱ ts'e̱ ndáxkoiìn mejèn-na nga skoeè ìjngoò k'a-lè mé-ne nga ko̱tsja-la̱ ini̱ma̱ -na̱. 5 Bítsjeèn-na nga nguiì ndaà mokjeiín-lè i̱t'aà ts'e̱ Cristo koni s'ín kòkjeiín ítjòn-la̱ nea̱ájchá-lè Loida ko̱ nea̱-lè Eunice. An k'oa̱á s'ín makixi̱-na nga ngaji̱ ti̱koa̱ ndaà mokjeiín-lè. 6 Koií k'oa̱ s'ín tìsìkítsjeèn-lè nga ìsa̱ ndaà ti̱kjiín kjo̱tjò xi kitsjaà-lè Nainá nga ndaà ti̱xá-la̱, jè kjo̱tjò xi kitjoé-lè k'e̱ nga an tsakàsòn-lè ntsa̱a. 7 Nainá, mì tsà ini̱ma̱ tsakjón kitsjaà-ná. Jè kitsjaà-ná Ini̱ma̱ Tsjeè-la̱ nga tsjá-ná nga'ñó, nga tsjá-ná kjoa̱tjòchaà, nga tsjá-ná kjo̱hítsjeèn kós'ín s'e̱én nga kixi̱ si̱jchá yijo-ná. 8 Koií kjoa̱-la̱ kì masobà-lè nga nokjoákoi̱i xi̱ta̱ i̱t'aà ts'e̱ Na̱'èn-ná Jesucristo. Ti̱koa̱ kì masobà-lè xi i̱t'aà ts'a̱n nga nda̱yá tíjna'ya koií kjoa̱-la̱ nga ya̱ siìxát'aà-la̱ Na̱'èn-ná. Ti̱kjeiín-ko̱-ná kjo̱'in xi i̱t'aà ts'e̱ én ndaà-la̱ Nainá xi kjoa̱ ts'e̱ Cristo. Jè Nainá tsjá-lè nga'ñó xi ko̱chjeén-lè. 9 Nainá, jyeé tsachrjekàjiìn-ná kjo̱'in. K'oa̱á s'ín kiìchja̱-ná nga tsjeè si̱jchá yijo-ná. Mì tsà koi kjoa̱-la̱ nga ndaà ki'nè. Koi-né nga k'oa̱ s'ín kjòmejèn-la̱ Nainá ti̱koa̱ kitsjaà-ná kjo̱ndaà-la̱ xi i̱t'aà ts'e̱ Cristo skanda tis'a̱ tàts'en-la̱ kjoa̱ k'e̱ nga ti̱ kj'eè sindaà i̱sò'nde. 10 I̱'ndei̱ Nainá jyeé tsakó kjo̱ndaà-la̱ nga jye j'iì Jesucristo xi ochrjekàjiìn-ná kjo̱'in. Jaàxìn-ná nga'ñó-la̱ kjoa̱biyaà. Xi i̱t'aà ts'e̱ 'én ndaà-la̱ Nainá xi kjoa̱ ts'e̱ Cristo, tsakó-ná kjoa̱bijnachoòn ti̱koa̱ tsakó-ná nga mì tsà jngoò k'a ki̱yá ni̱ta̱ kjé-ne. 11 Nainá, aán kisìnga̱tsja-na xá jè nga an kichjàya 'én ndaà-la̱ Nainá xi kjoa̱ ts'e̱ Cristo. tsibíxáya-na i̱t'aà ts'e̱ xá-la̱ nga an ko̱koòya-la̱ jñà xi mì tsà xi̱ta̱ judío. 12 Tse kjo̱'in tìsìkjiaán tà jè nga̱tjì-la̱ 'én xi an chjàya. Ta̱nga mì kiì masobà-na. Jyeé tíjiìn-na nga i̱t'aà ts'e̱ Cristo mokjeiín-na. Ti̱koa̱á ndaà tíjiìn-na nga ta̱ jngoò jè Nainá xi tjín-la̱ nga'ñó. Ndaà si̱ìkinda̱ jè xá xi an kisìnga̱tsja-na skanda jè na̱chrjein k'e̱ nga kjoi̱í ìjngoò k'a-ne Jesucristo. 13 Ndaà tíjiìn takoìn 'én ndaà xi an tsakoòya-lè koni s'ín tjín 'én xi mokjeiín-ná ko̱ kjoa̱tjòchaà xi tjín-ná nga Cristo titsa̱jnakoa̱á. 14 Ndaà ti̱kitasoìn xá ndaà xi ji kjònga̱tsjei. Jè si̱ìchját'aà-lè Ini̱ma̱ Tsjeè-la̱ Nainá xi tíjnajiìn ini̱ma̱-ná. 15 Jyeé tíjiìn-lè ngats'iì xi títsa̱jna nangui Asia, jye kitsjeiìn takòn-na, koni jè Figelo ko̱ Hermógenes. 16 Nainá kàtahi̱ma̱keè xi̱ta̱ ni'ya-la̱ Onesíforo. Kjìn k'a j'iì síjehikon-na. Mì kiì kjòsobà-la̱ na̱s'ín nda̱yá tíjna'ya. 17 Tà sa̱á, k'e̱ nga j'iì i̱ Roma skanda mì kiì kisìkjáya nga 'ñó tsohótsji-na skanda kó nga kisakò-la̱ ñánda tijna̱a. 18 Na̱'èn-ná kàtahi̱ma̱keè jè Onesíforo k'e̱ nga ki̱jchò na̱chrjein-la̱ Nainá. Ngaji̱ jyeé ndaà tíjiìn-lè, ndaà kisìchját'aà-ná ján Éfeso.
