1 An, xi Simón Pedro 'mì-na̱, nga 'a̱n xi chi̱'nda-la̱ Jesucristo ma, ko̱ nga ti̱koa̱ 'an tsibíxáya-na̱, tísíkasén-nò xo̱jo̱n jè, jñò xi ngásòn 'ñó ndaà mokjeiín-nò koni s'ín mokjeiín-naje̱n; nga xi̱ta̱ kixi̱-né jè Jesucristo xi Nainá ma ko̱ xi ochrjekàjiìn-ná kjo̱'in. 2 Koni s'ín nga isa̱ ndaà titsa̱yaxkon Nainá ko̱ jè Jesucristo xi otíxoma-ná, k'oa̱á s'ín isa̱ ndaà kàtasakó-nò kjo̱ndaà ko̱ kjoa̱'nchán ya̱ i̱jiìn ini̱ma̱-nò. 3 Jè nga'ñó-la̱ Nainá tsjá yije-ná xi mochjeèn-ná nga titsa̱jnakoaán ko̱ nga ndaà yaxkoán Nainá. Koií kjoa̱-la̱ nga tsjá-ná ngats'iì kjo̱nda koi nga yaxkoaán jè xi ko̱ kjoa̱jeya-la̱ ko̱ nga'ñó tsjeè-la̱ kiìchja̱-ná. 4 I̱t'aà ts'e̱ kjoa̱ koi, kitsjaà-ná kjoa̱ xi 'ñó ndaà tjín ko̱ xi 'ñó tse chjí-la̱ koni s'ín kitsjaà tso'ba Nainá, mé-ne nga ti̱koa̱ ko̱ko̱t'aà-ná nga k'oa̱s'ín s'e̱én koni s'ín s'ín Nainá nga jye chinchat'aàxìn-là kjoa̱ xi ch'o síjé yijo-ná i̱ i̱sò'nde xi ta síkits'ón-ná. 5 K'oa̱á ma-ne, 'ñó tìnè-là yijo-nò jñà kjoa̱ koi. Koni s'ín nga mokjeiín-nò i̱t'aà ts'e̱ Cristo, k'oa̱á ti̱ s'in mochjeén-né nga ndaà xi̱ta̱ katama jñò. Nga jye ndaà xi̱ta̱ ma, ti̱koa̱ mochjeén-né nga katas'e-nò xi kjoa̱ chji̱ne̱. 6 Nga jye tjín-nò kjoa̱ chji̱ne̱, ti̱koa̱á mochjeén-né nga kixi̱ tatixoma-là yijo-nò. Ko̱ nga jye kixi̱ otíxoma-là yijo-nò ti̱koa̱ mochjeén-né nga s'e̱-nò kjoa̱tsejta. Ko̱ nga jye tjín-nò kjoa̱tsejta, ti̱koa̱á mochjeén-né nga ngui ndaà chaxkón Nainá. 7 Nga jye ndaà yaxkón Nainá, ti̱koa̱ mochjeén-né nga ndaà ti̱tsjachaà xinguio̱o. Ko̱ nga jye ndaà matsjachaà xinguio̱o, ti̱koa̱á mochjeén-né nga ngui ndaà ti̱tsjachaà ngats'iì xi̱ta̱ xi kj'ei̱í. 8 Jñò, tsà tjín-nò kjo̱ndaà koi, ko̱ tsa kjit'aà na̱chrjein tík'aasòn-nò, mì jyò ki̱tsa̱jnaà; ngui ndaà ko̱chjeèn-nò nga isa̱á ndaà jcha̱xkoòn Jesucristo xi otíxoma-ná. 9 Ta̱nga tsa tjín i'nga xi tsjín-la̱ kjo̱ndaà koi, k'oa̱á ngaya-la̱ koni xi̱ta̱ xka̱n xi mì kiì ndaà tsejèn-la̱; jyeè kijcha̱ajiìn-la̱ nga Nainá jye kisìjchaa̱t'aà-la̱ jé xi kis'e-la̱ nga sa ítjòn. 10 K'oa̱á ma-ne, jñò, ndí 'ntsè, isa̱ 'ñó tji-là nga'ñó yijo-nò nga tikixi̱ya kjoa̱ nga Nainá xó k'oa̱á s'ín kiìchja̱-nò ko̱ jaájiìn-nò. Tsa k'oa̱s'ín s'e̱en kjit'aà, ni̱ mé jé ska̱jion. 11 Nga k'oa̱ás'ín ko̱ma nga tjáxa̱'nde-nò nga ki̱tjáseèn ñánda tíhotíxoma ni̱ta̱kjé-ne jè Jesucristo xi ochrjekàjiìn-ná kjo̱'in ko̱ xi otíxoma-ná. 12 Koií kjoa̱-la̱ kjit'aà na̱chrjein sikítsjeèn yije-nò kjoa̱ koi, na̱s'ín jye ma-nò ko̱ jye kixi̱ titsa̱jnako̱o jè kjoa̱kixi̱-la̱ Nainá koni s'ín mokjeiín-nò na̱chrjein i̱'ndei̱. 13 K'e̱ nga tákó tijna̱kon ìsa̱a i̱ i̱sò'nde jè, mochjeèn-né nga síkítsjeèn-nò nga ko̱s'ín ti̱jchá yijo-nò. 14 Jè Jesucristo xi otíxoma-ná jye k'oa̱s'ín kitsò-na nga jyeè kjochrañàt'aà nga kjoe̱het'aà na̱chrjein-na̱. 15 Ti̱koa̱á 'an tíbínè-la̱ yijo-na̱ nga tísíkítsjen-nò mé-ne k'e̱ nga 'an xi jye ki̱yá, nga na̱chrjein nchijón k'oa̱á s'ín ti̱kítsjeèn kjoa̱ koi. 16 Nga mì tsà ta cuento xi ta xi̱ta̱ kisìkítsjen koni s'ín tsibeno̱jmí-nòje̱n kó kji nga'ñó kis'e-la̱ Na̱'èn-ná Jesucristo ko̱ nga kjoi̱í ìjngoò k'a. Nga xkoón ki'ya-naje̱n kjoa̱jeya-la̱ nga 'ñó tsee nga'ñó tjín-la̱. 17 Ki'ya-náje̱n k'e̱ jè Nainá xi Na̱'èn-ná nga jeya ko̱ 'nga kisìkíjna Jesucristo. Kina'ya-la̱ ya̱ i̱jiìn i̱sén ya̱ ñánda 'ñó ote kji 'én xi kitsò: "Jè jè xi ki'ndí-na̱ xi 'ñó matsjakeè nga xó 'an jaájiìn-na." 18 Nga̱je̱n sobà kina'yà-laje̱n jñà 'én xi ngajmiì inchrobà-ne k'e̱ nga titsajnako̱-je̱n Jesucristo ya̱ i̱sò'nga nindoò tsjeè-la̱. 19 Nga yije kjoa̱ koi, k'oa̱ás'ín ìsa̱ ndaà makixi̱ya koni s'ín kiìchja̱ jñà xi̱ta̱ xi kiìchja̱ ngajo-la̱ Nainá. 'Ñó ndaà-ne nga na'ya-la̱ 'én koi. K'oa̱ás'ín ngaya-la̱ koni jngoò ni'ín xi síhi̱seèn ya̱ i̱'nde ñánda jñò chon skanda k'e̱ nga s'e̱ i̱sén, i̱kjoàn síhiseèn-jiìn ini̱ma̱-ná koni jè ni'ño tse. 20 Ítjòn k'oa̱ás'ín ndaà kàtasíjiìn-nò, jñà 'én xi tjít'aà Xo̱jo̱n-la̱ Nainá, mì tsà ta jngoò xi̱ta̱ kitsjaà kjo̱hítsjeèn-la̱ nga kitjei. 21 Nga jñà xi̱ta̱ xi kiìchja̱ ngajo-la̱ Nainá, ni̱ jngoò 'én xi ta̱ kjo̱hítsjeèn ts'e̱ nga kiìchja̱ya. Jé Ini̱ma̱ Tsjeè-la̱ Nainá kisìkichi̱ya-la̱ kjo̱hítsjen-la̱ xi̱ta̱ koi nga komà kiìchja̱ya 'én-la̱ Nainá.
