1 K'e̱ nga k'oa̱'mì-nòje̱n kjoa̱ koi, ¿a bìts'ia ìjngoò k'a-je̱n nga ndaà nìkítsa̱jna-je̱n yijo-naje̱n? Jñò, ¿a k'oa̱á s'ín nìkítsjeèn nga mì kiì tjí'nde-na nga ma si̱ìxá tsa tsjìn-na xo̱jo̱n xi jñò k'oi̱-ná o xi kj'eií xi̱ta̱ tsjá-na koni s'ín síjé xi̱ta̱ xi kj'eií? 2 Majìn, jñò sobà-nò xi xo̱jo̱n-naje̱n ma xi tíjiìn i̱jiìn ini̱ma̱-naje̱n. Ngats'iì xi̱ta̱ beè-né koa̱ bíxke̱jiìn-né. 3 K'oa̱ás'ín ndaà 'ya-je̱n nga jñò-nò xi koni xo̱jo̱n-la̱ Cristo xi i̱t'aà tsaje̱n kitjei. Jngoò xo̱jo̱n carta xi mìtsà tinta kitjei-ne, ko̱ó Ini̱ma̱ Tsjeè-la̱ Nainá xi tíjnakon kitjei-ne; mìtsà ndo̱jo̱ kitjeit'aà, ya̱á kitjeit'aà yijo ini̱ma̱-la̱ xi̱ta̱. 4 Kjoa̱ koi, k'oa̱ás'ín makixi̱ya nga i̱t'aà ts'e̱ Cristo mokjeiín-naje̱n i̱t'aà ts'e̱ Nainá. 5 Xi ta nga'ñó tsaje̱n tsjìn-naje̱n kjo̱hítsjeèn mé xi s'e̱n-je̱n. Ta̱nga jè Nainá tsjá-naje̱n kjo̱hítsjeèn k'e̱ nga mé xi 'nè-je̱n. 6 Jè Nainá tsjá-naje̱n kjo̱hítsjeèn nga chi̱'nda-la̱ ma-je̱n mé-ne nga ko̱ma ki̱nókjoa̱ya-naje̱n i̱t'aà ts'e̱ kjo̱ndaà xi̱tse̱ xi Nainá tsibíndaàjiìnko̱ jñà xi̱ta̱. Mìtsà kjoa̱ ts'e̱ kjo̱tíxoma xi xo̱jo̱n tjít'aà, ts'e̱é Ini̱ma̱ Tsjeè-la̱ Nainá. Jè kjoa̱ xi ts'e̱ kjo̱tíxoma sík'en-ná nga nguixko̱n Nainá, ta̱nga jè Ini̱ma̱ Tsjeè-la̱ Nainá síkíjnakon-ná. 7 Jè kjo̱tíxoma xi kitjoé-la̱ Moisés xi ndo̱jo̱ kitjeit'aà, kjoa̱ biyaà j'iìko̱. Ta̱nga k'e̱ nga sa kitjoé ítjòn-la̱ kjo̱tíxoma jè, k'oa̱ás'ín ki'ya-la̱ kjoa̱ jeya-la̱ Nainá. Jè Moisés, k'e̱ nga j'iì-ne nga kiì mijìnjno nindoò, jñà xi̱ta̱ Israel mì kiì komà kiskoò'an Moisés nga 'ñó ote ni'ín kji isén-la̱; ta̱nga xi komà i̱skan, chaán kichijà xi ote kji isén-la̱. Tsà k'oa̱s'ín kis'e-la̱ kjoa̱jeya, jè kjoa̱ xi tjíne-la̱ nga chija, 8 ìsa̱ jeya tjín kjo̱ndaà xi̱tse̱ xi tsjá-ná Nainá k'e̱ nga tsjá-ná Ini̱ma̱ Tsjeè-la̱. 9 Nga jeya j'iì jè kjo̱tíxoma xi kjoa̱ biyaà tsibínè-ná, ìsa̱á 'ñó jeya ki̱tasòn 'én xi nokjoáya-je̱n nga xi̱ta̱ kixi̱ síkítsa̱jna-ná Nainá. 10 Na̱s'ín 'ñó kis'eè-la̱ kjoa̱ jeya jè kjo̱tíxoma xi jye tsato, ta̱nga mì kiì mangásònko̱ jè kjoa̱jeya xi tjín-la̱ kjo̱ndaà xi̱tse̱; ìsa̱á 'ñó jeya tíjna. 11 Tsà jè kjoa̱ xi tíchijangui kis'eè-la̱ kjoa̱ jeya, ìsa̱á jeya tjín kjoa̱ xi̱tse̱ xi mì ti̱ kiì chi̱ja-ne ni̱ta̱ kjé-ne. 12 Nga tíjngoò takón-je̱n nga titsa̱chiñà-laje̱n kjoa̱ koi, k'oa̱á ma-ne nga mì kiì masobá-naje̱n nga nokjoá-je̱n. 13 Mìtsà k'oa̱s'ín 'nè-je̱n koni kis'iìn Moisés nga nikje tsibíjtsa isén-la̱, mé-ne nga jñà xi̱ta̱ Israel mì kiì komà kiskoò'an-ne nga jye tíchijangui xi ote kji isén-la̱. 14 Ta̱nga jñà xi̱ta̱ Israel kjòtájajiín kjo̱hítsjeèn-la̱. Skanda na̱chrjein i̱'ndei̱, k'e̱ nga bíxke̱jiìn Xo̱jo̱n-la̱ Nainá xi tjít'aà kjoa̱ jchínga xi tsibíndaàjiìn-ko̱ xi̱ta̱, tókó k'oa̱ás'ín ma-la̱ koni tsà nikje xo̱ba̱ kijtsa kjo̱hítsjeèn-la̱. Ta̱ jngoó i̱t'aà ts'e̱ Cristo ko̱ma tjáxìn nikje jè. 15 Ska̱nda na̱chrjein i̱'ndei̱, jñà xi̱ta̱ Israel, k'e̱ nga bíxke̱jiìn xo̱jo̱n xi kiskiì Moisés, tákó k'oa̱ás'ín ma-la̱ koni tsà nikje xo̱ba̱ tíjtsa'ma kjo̱hítsjeèn-la̱. 16 Ta̱nga k'e̱ nga jngoò xi̱ta̱ síkjahatjíya-la̱ kjo̱hítsjen-la̱ nga fìt'aà-la̱ Na̱'èn-ná xi otíxoma-ná, tjaxín-la̱ nikje xo̱ba̱ xi tíjtsa'ma kjo̱hítsjeèn-la̱. 17 Nga̱ jè Na̱'èn-ná, jè sobà-né xi Ini̱ma̱ Tsjeè-la̱ Nainá. Ya̱ ñánda tíjna Ini̱ma̱-la̱ Na̱'èn-ná, jñà xi̱ta̱ títsa̱jnandeií-né kjoa̱ ts'e̱ kjo̱tíxoma. 18 Ngats'iaá jñá mì ti̱ nikje xo̱ba̱ títsa'ma-ne kjo̱hítsjen-ná. I̱t'aà tsa̱ján k'oa̱ás'ín ngaya-la̱ koni jngoò chi̱tsín xi ma chitsejèn-ya̱á xi okó kjoa̱ jeya-la̱ Na̱'èn-ná. Kjit'aà na̱chrjein isa̱ jeya tíhotsején koni kji Na̱'èn-ná nga jè Ini̱ma̱ Tsjeè-la̱ tísíkjatjiya-ná.
