1 'An, Pablo, tísíkas'én-nò xo̱jo̱n jè, nga koa̱ás'ín kjòmejèn-la̱ Nainá nga an tsibíxáya-na Cristo Jesús. 'An, ko̱ 'ntsè Timoteo titsa̱nìkas'én-nòje̱n xo̱jo̱n jè. Titsa̱nìhixot'aà-nòje̱n jñò xi xi̱ta̱ na̱xa̱ndá-la̱ Nainá 'mì-nò, xi titsa̱jnaà ya̱ na̱xa̱ndá Corinto, ko̱ ngats'iì xi̱ta̱ tsjeè-la̱ Cristo xi títsa̱jna kóho̱kji nangui Acaya. 2 Nainá xi Na̱'èn-ná, ko̱ jè Jesucristo xi otíxoma-ná kàtatsjá-nò kjo̱ndaà ko̱ kjoa̱'nchán ya̱ i̱jiìn ini̱ma̱-nò. 3 Ndaà kàtayaxkón Nainá xi Na̱'èn-la̱ ma Jesucristo xi otíxoma-ná. Jè Nainá xi Na̱'èn-ná ma, tsee kjo̱hi̱ma̱takòn tjín-la̱ i̱t'aà tsa̱ján. Ko̱ jè, kjit'aà na̱chrjein síje takoán. 4 K'e̱ nga mé kjo̱'in titsa̱jnajñaá, jè Na̱'èn-ná síje takon-ná mé-ne jñá, k'oa̱ ti s'ín si̱je takoán xinguia̱á xi ti̱koa̱ kjo̱'in títsa̱jnajiìn koni s'ín kisìje takón-ná Nainá. 5 Koni tjín kjo̱'in xi tsee nikjiaán xi kjoa̱ ts'e̱ Cristo, k'oa̱á ti̱s'ín tse kjo̱jetakòn sakó-ná i̱t'aà ts'e̱ Cristo. 6 Ngaje̱n, tsà kjo̱'in titsa̱nìkjeiín-je̱n, kjo̱ndaà tsajòn-nò nga s'e̱-nò kjo̱jetakòn, koa̱ kitokájñò kjo̱'in. Tsà Nainá síje takòn-naje̱n, jè-né nga ti̱koa̱ jñò s'e̱-nò kjo̱jetakòn, koa̱ kichíkjoa̱ ko̱-nò kjo̱'in xi ji̱n titsa̱nìkjeiín-je̱n. 7 Tjín kixi̱í kjoa̱ xi chiñà-la̱je̱n i̱t'aà tsajòn. Tíjiìn-naje̱n, koni s'ín tíhoko̱t'aà-nò kjo̱'ìn xi titsa̱nìkjeiín-je̱n, k'oa̱tis'ín o̱kot'aà-nò kjo̱jetakòn xi tjín-naje̱n. 8 Jñò 'ntsè ko̱ tìchjaá, mejèn-naje̱n nga kàtasijiìn-nò kjo̱'in xi kis'e-naje̱n ján nangui Asia. Tseé jchán kjo̱'in kinìkjeiín-je̱n. Jyeè mì ti̱ kiì kichjíkjoa̱ko̱-nàje̱n skanda mì ti̱ kiì bixón-naje̱n tsà kitsa̱jnakoòn ìsa̱-je̱n. 9 K'oa̱ás'ín komà-naje̱n nga jye-la tjínè-la̱ nga ki̱yá-je̱n. K'oa̱á s'ín komàtin-je̱n mé-ne nga isa̱ ndaà kjót'aà takòn-naje̱n Nainá xi ma-la̱ síkjaháya-la̱ mik'en, nga mì tà yijo-naje̱n kjót'aà takòn-je̱n. 10 Nga jye kjo̱me k'en-je̱n, ta̱nga Nainá tsasíko̱-naje̱n nga kisìkatojiìn-naje̱n kjo̱'in ko̱ tákó si̱ìkatojiìn isa̱-naje̱n kjo̱'in. Ko̱ k'oa̱ás'ín kjit'aà takòn-je̱n nga jè si̱ìkatojiìn ìsa̱-naje̱n ni̱ ta mé kjoa̱-ne. 11 Jñò, mochjeèn-né nga si̱chját'aà-náje̱n nga ki̱nókjoa̱t'aà-là Nainá i̱t'aà tsaje̱n mé-ne nga isa̱ kjìn ko̱ma-ne xi̱ta̱ xi ki̱chja̱t'aà-la̱ Nainá, ti̱koa̱á kjìn ko̱ma xi̱ta̱ xi tsjá-la̱ kjo̱ndaà Nainá koni s'ín machikon-tin-je̱n. 12 Tjín jngoò kjoa̱ nga ndaà nìkítsa̱jna̱-je̱n yijo-naje̱n. K'oa̱ás'ín beè-la̱je̱n takon-je̱n nga i̱t'aà ts'e̱ Nainá nchrobá-ne nga tsjeè ko̱ kixi̱ tihonguíko̱-je̱n yijo-naje̱n i̱ i̱sò'nde, ko̱ jè tíjna ítjòn i̱t'aà tsa̱jòn. Mìtsà kjoa̱chji̱ne̱-la̱ xi ta̱xki̱ xi̱ta̱ nga ko̱'nè-je̱n, kjo̱ndaà-la̱ Nainá-né. 13 Mì tsà kj'eií kjoa̱ nga titsa̱chji-nòje̱n, ta jè-né nga kíxke̱jñoò ko̱ kjoa̱sejiìn-nò koni tsò 'én xi tjít'aà xo̱jo̱n jè. K'oa̱á s'ín majngo takoan nga nguiì ndaà kji̱ya-nò 14 koni s'ín jye kjòchi̱ya chiba-nò nga tsja katama-nò i̱t'aà tsa̱je̱n ko̱ nga ti̱koa̱ tsjaá ko̱ma-naje̱n i̱t'aà tsa̱jòn k'e̱ nga kjoi̱í ìjngoò k'a Jesucristo xi otíxoma-ná. 15 'An, jyeé nda tíjngo takoan i̱t'aà ts'e̱ kjoa̱ koi, k'oa̱á ma-ne nga k'oa̱s'ín kiskoosòn-la̱ nga jò k'a kjíkon-nò mé-ne jñò, jò kjo̱ndaà sa̱ko-nò. [Ta̱nga mì k'oa̱á s'ín tsitasòn.] 16 K'oa̱á s'ín kisìkítsjeèn, k'e̱ nga k'ia nangui Macedonia nga ya̱ jahato ítjòn-nò. Tjín-nè nga kjoa̱hato ijngoò k'a-nò k'e̱ nga kji̱nchrobá-na mé-ne jñò ko̱ma sichját'aà-ná nga kjián nangui Judea. 17 K'e̱ nga k'oa̱s'ín kiskoosòn-la̱, ¿a k'oa̱á s'ín kinìkítsjeèn nga 'an, tísískáko̱-nò? Majìn, nga mì k'oa̱á s'ín s'ian koni s'ín xi taxki̱ xi̱ta̱ i̱sò'nde. Mìtsà ítjòn xan-nò: “ko̱ma-né,” ko̱ ti̱k'e̱-ne íjngoò k'a xan-nò: “Mì kiì ko̱ma.” 18 Tí'beè Nainá, 'én kixi̱í xi kixan-nò, ngaji̱n, mì k'oa̱á s'ín nokjoà-je̱n nga bixón-je̱n “jon, ko̱ma-né” ko̱ “mì kiì ko̱ma”. 19 Timoteo, Silvano ko̱ 'an, k'oa̱ás'ín nokjoáyajiìn-nòje̱n i̱t'aà ts'e̱ 'én-la̱ Jesucristo xi ki'ndí-la̱ Nainá. Tsjìn-la̱ 'én xi tsò jon ko̱ majìn. Nainá jngoò k'a síkitasòn i̱t'aà ts'e̱ Cristo nga tsò “jon, ko̱ma-né”. 20 Ngats'iì 'én xi chja̱ Nainá koni s'ín tsjá tso'ba, i̱t'aà ts'e̱ Cristo bitasòn yije-né. Nga jè Cristo xi tsò “ko̱ma-né”. Ko̱ i̱t'aà ts'e̱ Cristo, jñá bixón-ná, “K'oa̱s'ín kàtama”, mé-ne jeya kíjna-ne Nainá. 21 Jè Nainá, xi síkixi̱yandaà-ná nga jè titsa̱jnakoa̱á Cristo [xi xó jaàjiìn-ne Nainá], ti̱koa̱ jñá xó jahajiìn-ná Nainá. 22 Ko̱ tejè-ne Nainá xi tsibit'aà chi̱ba̱-ná koni jngoò sello; kisìkíjnajiìn ini̱ma̱-ná jè Ini̱ma̱ Tsjeè-la̱ xi tjoé ítjòn-ná nga kixi̱ kjoa̱ nga ti̱koa̱ tjoé yije-ná kjo̱nda xi tjíndaà-la̱ nga tsjá-ná. 23 Tíkotsejèn Nainá, jè tíbeè ini̱ma̱-na̱, mé-ne kj'eè kiì fì-na Corinto koni s'ín tíjiìn-na; koií kjoa̱-la̱, majìn-na̱ nga 'on ko̱ma-la̱ ini̱ma̱-nò nga 'én ts'en kichjàko̱-nò. 24 Ngaji̱n, majìn-nòje̱n nga ngaji̱n, kjo̱'ñó ko̱tìxoma-nòje̱n i̱t'aà ts'e̱ 'én xi mokjeiín-nò. Ta sa̱á nìchját'aà-nòje̱n mé-ne nga s'e̱-nò kjo̱tsja nga kixi̱ titsa̱jnaà koni s'ín mokjeiín-nò.
