1 Ndí 'ntsè ko̱ ndí tichjaá, k'oa̱á s'ín tsakòya-nòje̱n nga koa̱s'ín si̱jchá yijo-nò koni s'ín sasén-la̱ Nainá. Ko̱ kixi̱í kjoa̱, jyeé ko̱s'ín titsa̱'nè. Ta̱nga i̱'ndei̱ bítsi'ba-nòje̱n ti̱koa̱ bìnè-nòje̱n i̱t'aà ts'e̱ Jesús xi otíxoma-ná nga isa̱á 'ñó ndaà tjiì-là nga'ñó yijo-nò nga ko̱s'ín ti̱kitasòn. 2 Jyeè tíjiìn-nò kó s'ín tjín kjo̱tíxoma xi kits'iì-nòje̱n koni s'ín kitsjaà-naje̱n jè Jesucristo xi otíxoma-ná. 3 Jè xi mejèn-la̱ Nainá nga nguiì tsjeè si̱jchá yijo-nò, mì ti̱ kjoa̱ chijngui si̱s'in-là. 4 Nga jngoò ìjngoò-nò ti̱kinda̱a yijo-nò; k'oa̱á s'ín ti̱kjeén nga ngui tsjeè ti̱tsa̱jna koni s'ín sasén-la̱ Nainá. 5 Kì bi'nde-là nga síkijne-nò jñà kjoa̱ ch'o xi síjé yijo-nò koni s'ín jñà xi̱ta̱ xi mì kiì beèxkon Nainá. 6 Jñò xi 'ntsé chibá i̱t'aà ts'e̱ Cristo, kì k'oa̱á tjín kjoa̱ xi kaàjñoò mé-ne nga mì xinguio̱o chóna̱cha̱n-là nga mì xinguio̱o jcha̱ton. Tsà k'oa̱s'ín s'eèn, kjo̱'iín tsjá-nò Nainá. Jyeé k'oa̱s'ín tsibeèno̱jmí-nòje̱n. 7 Nainá mìtsà koi xá kiìchja̱-ná nga ch'o s'eén, jè xi mejèn-la̱ nga tsjeè ki̱tsa̱jnaá. 8 Jè xi ochrjekàngui kjoa̱ koi, mìtsà kjo̱hítsjeèn ts'e̱ xi̱ta̱ ochrjekàngui, kjo̱hítsjeèn ts'e̱ Nainá ochrjekàngui; nga jè xi tsjá-nò Ini̱ma̱ Tsjeè-la̱. 9 Mì kiì mochjeèn nga xo̱jo̱n skiít'aà isa̱-nò xi ts'e̱ kjoa̱tjòcha. Nainá jye tsakóya-nò kós'ín si̱ìtjòchaà xinguio̱o nga jngoò ìjngoò. 10 Jyeé ko̱s'ín titsa̱'nè nga matsjachaà ngats'iì xi̱ta̱ xinguio̱o xi títsa̱jna kóhokji ya̱ nangui Macedonia. Ta̱nga k'oa̱á s'ín bìtsi'ba-nòje̱n nga isa̱ ndaà ti̱tsjachaà xinguio̱o. 11 Tìnè-là yijo-nò nga 'nchán titsa̱jna, kì kjoa̱-la̱ xinguio̱o chingàjñoò, t'e̱en xá-nò koni tjín xá xi ma-nò, koni s'ín jye ki'mì-nòje̱n ngats'iì kjoa̱ koi. 12 Mé-ne nga skoe̱xkón-nò jñà xi̱ta̱ xi mì kiì mokjeiín-la̱ 'én-la̱ Nainá. Koa̱ jñò, ni̱mé chijat'aà-nò. 13 Ndí 'ntsè ko̱ ndí tichjaá, mejèn-naje̱n nga kàtasijiìn-nò mé kjoa̱ xi matin jngoò xi̱ta̱ xi biyaà, mé-ne nga mì ko̱baá-nò koni jñà xi̱ta̱ xi nìmé nchikoña-la̱. 14 Koni s'ín mokjeiín-ná nga Jesús k'en, i̱kjoàn jaháya-la̱, k'oa̱ ti̱ s'ín mokjeiín-ná nga Nainá si̱ìkjaháya-la̱ xi̱ta̱ xi jye k'en, jñà xi mokjeiín-la̱ i̱t'aà ts'e̱ Jesús. 15 Nga̱ koií 'én beèno̱jmíya-je̱n koni tsò 'én xi tsibíjna Jesús nga jñá xi titsa̱jnakoaán skanda k'e̱ nga kjoi̱í ìjngoò k'a Na̱'èn-ná Jesucristo, mìtsà jñá kjiín ítjòn-lá jñà xi jye k'en. 16 Nga̱ jè sobà Na̱'èn-ná kitjojen ìjngoò k'a-ne ngajmiì; 'ñó ki̱chja̱ nga tsjá o̱kixi̱, ki̱ná'ya jngoò-la̱ jta̱ ts'e̱ àkja̱le̱ ítjòn, ko̱ ki̱ná'ya-la̱ chrjo-la̱ Nainá; i̱kjoàn jñà xi̱ta̱ xi jye k'en nga mokjeiín-la̱ i̱t'aà ts'e̱ Cristo, kjoa̱áya ítjòn-la̱. 17 I̱kjoàn jñá xi tákó titsa̱jnakoaán jè na̱chrjein jè, ya̱á támijiìntje̱nkoa̱á i̱jiìn ifi nga kixokjoaá Nainá ya̱ i̱jiìn i̱sén. K'oa̱ás'ín ko̱ma nga ya̱ ki̱tsa̱jnakoa̱á Nainá ni̱ta̱mé na̱chrjein-ne. 18 K'oa̱á ma-ne nga ti̱je takòn xinguio̱o nga teno̱jmìya-là koni tsò jñà 'én koi.
