1 K'e̱ nga mì ti̱ kiì komà kichìkjoa̱ ìsa̱-naje̱n nga mejèn-naje̱n si̱jiìn-naji̱n kó s'ín titsa̱jnaà ján Tesalonica, k'oa̱á komà-ne nga kichibaya-naje̱n nga kinìkasén-je̱n jè 'ntsè Timoteo, ko̱ ngaje̱n ya̱á tsitsajna-je̱n Atenas. 2 Kinìkasén-je̱n jè 'ntsè Timoteo, chi̱'nda-la̱ Nainá-né nga ti̱koa̱ chja̱ya 'én ndaà-la̱ Nainá xi kjoa̱ ts'e̱ Cristo koni ngaje̱n. Koií xá kiìkon-nò mé-ne nga katatsjá isa̱-nò nga'ñó nga isa̱ 'ñó ndaà kixi̱ ki̱tsa̱jnaà koni s'ín mokjeiín-nò, 3 mé-ne nga ni̱jngoò xi sihìndaà-ne kjoa̱ ts'e̱ kjo̱'ìn xi titsa̱nìkjioòn. Jñò, jye ndaà tíjiìn-nò nga k'oa̱á s'ín tjínè-la̱ nga ko̱s'ín ko̱matiaán. 4 K'e̱ nga ti̱sa̱ ya̱ titsa̱jnako̱-nòje̱n, k'oa̱á ki'mì-nòje̱n nga kjo̱'iín s'e̱-ná. I̱'ndei̱, jyeé titsa̱'yaà nga k'oa̱s'ín tímatioòn. 5 Koií kjoa̱-la̱ nga mì ti̱ kiì kiskoòña kjoa̱-na; kisìkasén Timoteo nga mejèn-na skoeè kós'ín titsa̱jnako̱o jè 'én xi mokjeiín-nò. Timakájno-na tsà jye kiskoòna̱cha̱n-nò jè xi̱ta̱ neií. Tsà koií na̱chrjein-la, xá xi ki'nè-je̱n, tsa ta kichija-né. 6 I̱'ndei̱, jè Timoteo jyeé j'iì-ne nga kiì Tesalónica; ndaà tsò o̱kixi̱ xi 'ya-naje̱n i̱t'aà tsa̱jòn koni s'ín mokjeiín-nò ko̱ nga tjín-nò kjo̱tsjachaà. K'oa̱ás'ín tsibeèno̱jmí-naje̱n nga kjit'aà na̱chrjein tsjaà ma-nò nga nikìtsjeèn-náje̱n. Ti̱koa̱á mejèn-nò nga jcha̱xkoòn-náje̱n koni ngaji̱n ti̱koa̱á mejèn-naje̱n jcha̱xkoòn-nòje̱n. 7 K'oa̱á ma-ne ndí 'ntsè ko̱ ndí tichjaá, na̱s'ín kjo̱'in ko̱ kjoa̱ kondra̱ titsa̱jnajiìn-je̱n, k'e̱ nga kina'yà-je̱n i̱t'aà tsa̱jòn nga 'ñó ndaà mokjeiín-nò i̱t'aà ts'e̱ Cristo, ti̱koa̱á ngaji̱n, 'ñó ndaà kjotsjaà-naje̱n. 8 K'e̱ nga kina'yà-je̱n nga kixi̱ onguít'aà-là Na̱'èn-ná, ngaji̱n jyeé mì ti̱ mé makájno-naje̱n. 9 Ngaje̱n, 'ñó tsee kjo̱tsja tjín-naje̱n nga nguixko̱n Nainá xi kjoa̱ tsa̱jòn skanda mì-la kiì kjoe̱hit'aà na̱chrjein nga k'oi̱-la̱je̱n kjo̱ndaà Nainá. 10 Ko̱ na̱chrjein ko̱ ni̱tje̱n nokjoát'aà-laje̱n Nainá mé-ne nga tsjá'nde-ne nga ko̱ma ko̱nguichón-nòje̱n. Ti̱koa̱ ko̱ma ko̱koòya-isa̱-nòje̱n mé-ne nga ko̱jngo-ni 'én xi chijat'aà-nò koni s'ín mokjeiín-nò 11 Mejèn-naje̱n nga ti̱jè-ne Na̱'èn-ná xi Nainá ko̱ jè Jesucristo xi otíxoma-ná, kàtatsjá'nde-naje̱n nga ko̱ma ko̱nguichón-nòje̱n. 12 Jè kjo̱tsjachaà-la̱ Na̱'én-ná ìsa̱ ndaà kàtasijiìn ini̱ma̱-nò, mé-ne nga ìsa̱ ndaà ko̱tsjachaà-nò xinguio̱o ko̱ ngats'iì xi̱ta̱ xi kj'ei̱í, koni ngaje̱n, ndaà matsjacha-nòje̱n. 13 Jè Na̱'èn-ná kàtatsjá-la̱ nga'ñó ini̱ma̱-nò mé-ne nga nìmé jé sa̱kòt'aà-nò ko̱ tsjeè ki̱tsa̱jnaà nga nguixko̱n Nainá xi Na̱'èn-ná k'e̱ nga kjoi̱í ìjngoò k'a-ne Jesucristo xi otíxoma-ná nga tji̱ko̱ ngats'iì xi ya̱ chja̱-ne.
