1 Sijét'aà-la̱ jñà xi̱ta̱ jchínga xi xá ítjòn tjín-la̱ nga ya̱ síxájiìn-nò ya̱ na̱xa̱ndá-la̱ Nainá. Ti̱koa̱á 'an, xi̱ta̱ jchínga-ná nga xá ítjòn tjín-na koni jñà xi̱ta̱ koi; kijtseè-ná kjo̱'in xi ki'se-la̱ Cristo; ti̱koa̱á s'eé-na kjoa̱jeya xi i̱skan jcha̱-la̱. 2 Ti̱kinda̱a jñà xi̱ta̱-la̱ Nainá xi jñò kjònga̱tsja koni tsà orrè; kiì kjo̱'ñó 'nè-là yijo-nò; ko̱ó kjo̱ndaà-nò nga ti̱kinda̱a koni s'ín mejèn-la̱ Nainá. Mìtsà koií kjoa̱ nga tse to̱n sikijne. Tà ko̱ó kjo̱tsja-nò nga k'oa̱ t'e̱en. 3 Kì yaton-jèn jñà xi̱ta̱ xi jñò manga̱tsja koni tsà nei-la̱ ma. Jñò ti̱nchá ítjòn-là, ta̱kó-la̱ ndi̱yá-la̱ Nainá mé-ne ko̱ma skíngui-nò. 4 Mé-ne k'e̱ nga kjoi̱ì ìjngoò k'a jè Paxtò ítjòn, tjoé-nò kjoa̱jeya-la̱ Nainá koni jngoò korona xi mì kiì fehejno ote-la̱ ni̱ta̱ kjé-ne. 5 Ti̱koa̱ jñò xi i̱xti xo̱ngó 'mì-nò, ti̱kitasòn-là jñà xi̱ta̱ jchínga xi otíxoma ya̱ i̱jiìn na̱xa̱ndá-la̱ Nainá. Ngats'ioò, indaà kjoa̱ tanguíko̱o xinguio̱o, nga: Jè Nainá kondra̱á tíjna-la̱ jñà xi̱ta̱ xi 'nga ikon, Koa̱ jñà xi̱ta̱ xi indaà kjoa̱ tjín ini̱ma̱-la̱, tsjá-la̱ kjo̱ndaà. 6 Nangui titsa̱jna-là Nainá nga tsee nga'ñó tjín-la̱ koni s'ín síko̱-nò, mé-ne k'e̱ nga ki̱jchò na̱chrjein jè Nainá 'nga si̱ìkítsa̱jna-nò. 7 Tsja Nainá, ti̱kítsa̱jnaya ngats'iì kjoa̱ xi makájno-nò nga jè tísíkinda̱-nò. 8 Tikinda̱a yijo-nò, kjit'aà na̱chrjein titsa̱jnandaà nga jè xi̱ta̱ nei̱í xi kondra̱-nò, k'oa̱ás'ín tsóbandiì-nò k'oa̱á ngaya-la̱ koni jngoò xa xi tíkjindáya nga 'ñó ijo-la̱, nga tíhótsji yá xi ski̱ne̱. 9 Nga ndaà mokjeiín-nò, 'ñó ti̱ncha-là xi̱ta̱ nei̱í. Nga jyeè tíjiìn-nò nga jñà xi̱ta̱ xinguio̱o xi títsa̱jna nga tíjtsa i̱sò'nde, ti̱koa̱á k'oa̱á tjín kjo̱'in xi nchisíkjeiín. 10 K'e̱ nga jye ko̱to chiba na̱chrjein nga titsa̱nìkjioón kjo̱'in, jè sobà Nainá sindaàya-nò, si̱kíjnandaà-nò, tsjá-nò nga'ñó, ko̱ kixi̱ si̱ìkítsa̱jna-nò. Te̱jé-ne Nainá xi ko̱ kjoa̱ tjòchaà-la̱ kiìchja̱-ná nga s'e̱-ná kjoa̱jeya-la̱ ni̱ta̱kjé-ne nga Jesucristo titsa̱jnakoa̱á. 11 Ts'e̱é Nainá ngats'iì nga'ñó xi tjín skanda ni̱ta̱kjé-ne. K'oa̱s'ín kàtama. 12 Silvano, xi 'ntsè xan-la̱, nga kixi̱ tjín xá-la̱, jè kisìchját'aà-na nga kiskiì-nò xo̱jo̱n carta jè. K'oa̱ás'ín tibìnè-nò ko̱ tisíkixi̱ya-nò nga ngats'iì 'én xi tisìkasén-nò, nguì k'oa̱á s'ín tjín kjo̱ndaà-la̱ Nainá. Kixi̱ titsa̱jnako̱o kjo̱ndaà koi. 13 Nchisíhixat'aà-nò jñà xi̱ta̱ na̱xa̱ndá-la̱ Cristo xi i̱ títsa̱jna Babilonia xi xó tañaà kitjaàjiìn-nò. Ko̱ jè Marcos xi ki'ndí-na̱ xan-la̱ i̱t'aà ts'e̱ Cristo, ti̱koa̱á tísíhixat'aà-nò. 14 Ti̱ìxot'aà xinguio̱o nga nguì ko̱ ini̱ma̱-nò. Kàtas'e-la̱ kjoa̱'nchán i̱jiìn ini̱ma̱-nò ngats'ioò xi ya̱ nokjoà-nò i̱t'aà ts'e̱ Cristo. K'oa̱s'ín kàtama.
