1 Jyeé i̱xti-la̱ Nainá-né ngats'iì xi̱ta̱ xi nguiì ko̱ ini̱ma̱-la̱ mokjeiín-la̱ nga jè Jesús, [jè-né xi Nainá kisìkas'én], jè-né xi Cristo. Ko̱ ngats'iì xi̱ta̱ xi tsjakeè xi na̱'èn tíjna-la̱, tjínè-la̱ nga ti̱koa̱ ko̱tsjakeè ngats'iì i̱xti-la̱ na̱'èn-la̱. 2 K'e̱ nga matsjachaá Nainá, ko̱ ti̱koa̱ nìkitasoán kjo̱tíxoma-la̱, 'ya-ná nga ti̱koa̱ matsjachaá jñà xi i̱xti-la̱ Nainá ma. 3 K'oa̱á s'ín tjín tsà kixi̱ kjoa̱ nga matsjachaá Nainá, jè-né nga ndaà si̱kitasoán kjo̱tíxoma-la̱. Ko̱ jè kjo̱tíxoma-la̱, mì tsà 'ñó 'in bitasòn. 4 Nga̱ ngats'iì xi̱ta̱ xi i̱xti-la̱ Nainá ma, síkijneé-la̱ ngats'iì kjoa̱ ch'o xi tjín i̱sò'nde. Koií ma nìkijne-lá kjoa̱ xi tjín i̱sò'nde nga̱ mokjeiín-ná i̱t'aà ts'e̱ Cristo. 5 Ni̱ yá xi ma si̱ikijne-la̱ jè kjoa̱ ch'o xi tjín i̱sò'nde, tajngoò-né jè xi̱ta̱ xi mokjeiín-la̱ i̱t'aà ts'e̱ Jesús, nga jè-né xi Ki'ndí-la̱ Nainá ma. Jè-né xi chíkjoa̱-la̱ nga si̱ikijne. 6 Jé-né Jesucristo xi j'iì i̱ i̱sò'nde. Ko̱ k'e̱ nga j'iì, jè nandá ko̱ jní xi ndaà tsakó. Ko̱ mì tsà tà jè nandá xi tsakó, ti̱koa̱á jè jní. Ko̱ jè Ini̱ma̱ Tsjeè-la̱ Nainá xi beènajmí kixi̱ yá-ne xi jè. Nga̱ jè Ini̱ma̱ Tsjeè-la̱ Nainá, nguiì kjoa̱ kixi̱-né. 7 Jàn ma-ne xi nguiì tsjá kixi̱ 'én-la̱ xi i̱t'aà ts'e̱ kjoa̱ koi: 8 Jè Ini̱ma̱ Tsjeè-la̱ Nainá, jè nandá, ko̱ jè jní. Ko̱ ngajàn koi, ngásòn tsò. 9 Tsa mokjeiín-ná jñà 'én xi tsjá xi̱ta̱ i̱sò'nde, machjeén-né nga isa̱ ndaà ko̱kjeiín-ná 'én xi jè sobà Nainá títsjá. Nga̱ jè 'én xi títsjá, jè tíbeèno̱jmí, yá-ne xi Ki'ndí-la̱ Nainá. 10 Jè xi nguiì ko̱ ini̱ma̱-la̱ mokjeiín-la̱ i̱t'aà ts'e̱ Ki'ndí-la̱ Nainá, ya̱á tíjiìn ini̱ma̱-la̱ nga kixi̱í kjoa̱ 'én xi tsjá Nainá. Ta̱nga jè xi mì kiì mokjeiín-la̱ i̱t'aà ts'e̱ Nainá, jè Nainá, ndiso tíhochrjengui, koií kjoa̱-la̱ nga mì kiì mokjeiín-la̱ 'én xi tsjá Nainá xi i̱t'aà ts'e̱ Ki'ndí-la̱. 11 Jè 'én xi kitsja Nainá, jè-né nga jè Nainá tsjá-ná kjoa̱bijnachon xi mì fehet'aà ni̱ta̱ kjé-ne. Ko̱ jè kjoa̱bijnachon jè, ya̱á sakó-ná i̱t'aà ts'e̱ Ki'ndí-la̱. 12 Jè xi̱ta̱ xi Ki'ndí-la̱ Nainá tíjnajiìn ini̱ma̱-la̱, tjín-la̱ kjoa̱bijnachon xi mì kiì fehet'aà ni̱ta̱ kjé-ne; ta̱nga jè xi̱ta̱ xi mì tsà Ki'ndí-la̱ Nainá tíjnajiìn ini̱ma̱-la̱, tsjìn-la̱ kjoa̱bijnachon. 13 Jñò xi mokjeiín-nò i̱t'aà ts'e̱ Ki'ndí-la̱ Nainá, koií xá tíkjiì-nò Xo̱jo̱n jè mé-ne nga ndaà katasijiìn-nò nga jyeé tjín-nò kjoa̱bijnachon xi mì kiì fehet'aà ni̱ta kjé-ne. 14 K'oa̱á ma-ne nga 'ñó tjín takoán k'e̱ nga nakjoát'aà-lá Nainá. K'oa̱á s'ín ndaà kji̱'nchré-ná tsà k'oa̱s'ín si̱jét'aà-lá koni s'ín sasén-la̱ jè. 15 Tsa jye k'oa̱s'ín tíjiìn-ná nga Nainá 'nchré-ná k'e̱ nga tsà mé xi nìjé-lá, ti̱koa̱á jyeé 'yaá nga ti̱k'e̱é-ne nga nìjé-lá tsjá-ná mé xi nìjé-lá. 16 Tsà yá xi̱ta̱ xi skoe̱ jngoò xi̱ta̱ xíkjín xi ti̱koa̱ i̱t'aà ts'e̱ Cristo mokjeiín-la̱ nga ya̱ tíkajiìn jñà jé xi mì tsà kjoa̱biya fìko̱-ná, maá katítsi'batji, ko̱ jè Nainá tsjá-la̱ kjoa̱bijnachon jè xi̱ta̱ xi tíhótsji jé. Ta̱nga tà jñá-né xi ko̱xan-la̱ nga ma si̱tsi'batji jñà xi̱ta̱ xi mì tsà nguiì kjoa̱biya kjit'aà-la̱ jñà jé xi nchihótsji. Nga̱ tjín jé xi kjoa̱biya fìko̱-ná, ko̱ k'oa̱á xan nga mì tsà machjeén nga si̱tsi'batji jè xi̱ta̱ xi ko̱tjín jé xi tíhótsji. 17 Ta̱nga ngats'iì kjoa̱ ch'o xi s'ín xi̱ta̱, nguiì jé-né nga nguixko̱n Nainá. Ta̱nga tjín-né jñà jé xi mì tsà kjoa̱biya fìko̱-ná. 18 Jyeé tíjiìn-ná nga jñà xi i̱xti-la̱ Nainá ma, mì tsà ti̱ ya̱ títsa̱jnajiìn-ne jé, nga̱ jè Jesús xi Ki'ndí-la̱ Nainá ma, tís'ín kinda̱, ko̱ jè xi̱ta̱ nei̱í, mì ti̱ kiì mé xi ch'o síko̱-ne. 19 Jyeé 'ya-ná nga i̱xti-la̱ Nainá 'mì-ná; ta̱nga jñà xi̱ta̱ xi mì kiì mokjeiín-la̱ i̱t'aà ts'e̱ Cristo xi tjín nga tíjtsa i̱sò'nde, jè xi̱ta̱ nei̱í tíhotíxoma-la̱. 20 Ti̱koa̱á 'ya-ná nga koií xá j'iì-ne jè Ki'ndí-la̱ Nainá i̱ i̱t'aà nangui nga jè ndaà kisìkichi̱ya-ná mé-ne nga ma yaxkoaán xi nguiì jè sobà Nainá. Ko̱ ya̱á tìtsa̱jnakoa̱á jè xi nguiì jè sobà Nainá koií kjoa̱-la̱ nga ya̱ tìtsa̱jnakoa̱á Jesucristo xi Ki'ndí-la̱ ma, xi ti̱jé sobà-ne Nainá ko̱ xi ma-la̱ tsjá-ná kjoa̱bijnachon xi mì kiì fehet'aà ni̱ta̱ kjé-ne. 21 Jñò xi ndí i̱xti-na̱ xan-nò, kì jñà onguítji̱ngui-là jñà nainá xi beèxkón xi̱ta̱ xi mì tsà kixi̱ kjoa̱ nga Nainá.
