1 Jè Jesús, jè 'Én xi síkíjnakon-ná xi tíjna skanda tis'a̱ tàts'en-la̱ kjoa̱. Ta̱nga i̱'ndei̱, jyeé kina'yà-la̱je̱n, ko̱ xko̱ón ki'ya-naje̱n, kiìchitsejèn-la̱je̱n kó kji, ti̱koa̱á ntsa̱á kinìko̱-na̱je̱n. 2 Jè 'Én jè, ki'ya tsìjeén-la̱. Ko̱ ki'ya-náje̱n. Ko̱ nguiì kjoa̱ kixi̱-né xi beèno̱jmí-je̱n xi i̱t'aà ts'e̱. Ko̱ ti̱koa̱á beèno̱jmíyaà-nòje̱n jè 'Én xi síkíjnakon ini̱ma̱-ná ni̱ta̱ kjé-ne. Jè 'Én jè, k'e̱ nga tis'a̱ ítjòn, ya̱á tíjnat'aà-la̱ Nainá. Ta̱nga i̱'ndei̱, jyeé tsatsejèn-naje̱n. 3 Beèno̱jmí-naje̱n kjoa̱ xi ki'ya-je̱n ko̱ xi kina'ya-je̱n, mé-ne jñá, k'oa̱ tis'ín ngásòn ki̱tsa̱jnakoa̱á, koni s'ín ndaà titsa̱jnakoa̱á Nainá xi Na'én-ná ma ko̱ Ki'ndí-la̱ xi Jesucristo. 4 Koií xá titsachjì-nòje̱n Xo̱jo̱n jè mé-ne nga nguiì ko̱ kjo̱tsja kàtasakò kjit'aà-la̱ ini̱ma̱-ná. 5 K'oa̱á s'ín tjín jñà 'én xi tsakóya-naje̱n Jesucristo, ko̱ koií-né xi nokjoàyajiìn-nòje̱n: Jè Nainá, kjoa̱ iseèn-né. Xi i̱t'aà ts'e̱, tsjìn xi kjoa̱ jñò. 6 Tsà kixoán nga ndaà titsa̱jnakoa̱á Nainá, ta̱nga tsà ya̱ titsa̱nìjchá yijo-ná ya̱ ñánda jñò choòn, ñánda tjín kjoa̱ch'o, 'én ndisoó xi titsa̱nokjoá; mì tsà kjoa̱ kixi̱ xi titsa̱'né. 7 Ta̱nga tsà ya̱ titsa̱jnaá ñánda iseèn choòn, koni jè Nainá ya̱á tíjna ñánda iseèn choòn, ndaá titsa̱jnakoa̱á xinguia̱á, ko̱ jè jní-la̱ Jesucristo xi Ki'ndí-la̱ Nainá ma, sítsjeè yije jñà jé xi tjín-ná. 8 Tsà kixoán: "tsjìn-na jé", ti̱ jñá titsa̱chona̱chan-lá yijo-ná; mì tsà kjoa̱ kixi̱ xi titsa̱nokjoá. 9 Ta̱nga tsà kéno̱jmí yije-lá Nainá jñà jé xi tjín-ná, ko̱maá jè kjót'aàtakoán nga si̱ìjcha̱at'aà-ná jé-ná ti̱koa̱á si̱ìtsjeèya-ná ngats'iì kjoa̱ xi ch'o 'né. Nga̱ jè Nainá síkitasòn 'én-la̱, ko̱ nguiì kjoa̱ kixi̱í xi s'ín. 10 Ta̱nga tsà kixoán: "Kj'eè tsà jé otsjia," jè Nainá ndisoó titsa̱nachrjekànguiaá, ko̱ mì tsà kixi̱ kjoa̱ nga mokjeiín-ná jè 'én-la̱.
