1 Jñò, k'e̱ nga tsà kjoa̱si tjín-nò ko̱ xi̱ta̱ xi̱nguio̱o, ¿mé-ne jñà mejèn-nò koi̱ìndaàjiìn-nò jñà xi̱ta̱xá xi mìtsà xi̱ta̱-la̱ Cristo? ¿A mìtsà tà jñà katíndaàjiìn-nò xi xi̱ta̱ na̱xa̱ndá-la̱ Cristo? 2 ¿A mìtsà tíjiìn-nò nga jñá xi xi̱ta̱ na̱xa̱ndá-la̱ Cristo 'mì-ná, jñá kíndaàjiìn-lá xi̱ta̱ i̱sò'nde? Tsà jñò koi̱ìndaàjiìn-là xi̱ta̱ i̱sò'nde, ¿a mì chíkjoa̱-nò nga ta jñò kìndaàjiìn-là xi̱ta̱ xinguio̱o kjoa̱ xi chiba tjín? 3 ¿A mìtsà tíjiìn-nò nga ti̱koa̱ i̱t'aà tsa̱ján kíndaàjiìn-lá àkja̱le̱? Tsà jñá kíndaàjiìn-lá àkja̱le̱ ¿a mì ko̱ma-ná kíndaàjiìn-lá xi̱ta̱ xinguia̱á kjoa̱ xi tjín i̱ i̱sò'nde? 4 K'oa̱á ma-ne tsà ta kjoa̱ ts'e̱ i̱sò'nde-né xi tjín-nò, ti̱nókjoa̱ jngo-là xi̱ta̱ 'ntsè xi jñò nachrjenguiò nga 'mì-là nì mé chjí-la̱, jè katìndajiìn-nò. 5 Koií koa̱ xan-nò mé-ne nga kàtasoba-nò. ¿A mìtsà tíjna jngoò xi̱ta̱ xinguio̱o xi tjín-la̱ kjo̱hítsjeèn nga ko̱ma-la̱ koi̱ìndaàjiìn-la̱ xi̱ta̱ xi 'ntsé chibá? 6 Mìtsà ta koií kjoa̱-la̱ nga bixkaánko̱o xinguio̱o, ska̱nda ya̱á onguìko̱o xinguio̱o nguixko̱n xi̱ta̱xá xi mì kiì beèxkon Nainá nga bìndaàjiìn-nò. 7 Kixi̱í kjoa̱, ch'oó tjín kjoa̱ k'e̱ nga ti̱ jñò bixkàn-ko̱-nò xinguio̱o. ¿Mé-ne mìtsà to saá nìkjeiín-là xinguio̱o k'e̱ nga ch'o síko̱-nò? To saà ti̱kjeiín-la nga kàtasíchijé-nò? 8 Ta̱nga jñò, k'oa̱á ti̱s'ín ch'o nìko̱o xinguio̱o, ti̱ jñò nìchijé-là. 9 ¿A mìtsà tíjiìn-nò nga jñà xi mì tsà xi̱ta̱ kixi̱, mì kiì kjoa̱has'enjiìn i̱'nde ñánda tíhotíxoma Nainá? Jñà xi̱ta̱ xi kjoa̱ chijngui s'ín, jñà xi xkósòn beèxkón, jñà xi̱ta̱ xi jye chixàn xi kjoa̱ chijngui s'ín, jñà xi̱ta̱ xi'ndè xi ti̱ x'i̱n xíkjín oyijòko̱-ne, 10 jñà xi̱ta̱ chijé, jñà xi̱ta̱ tse mejèn, jñà xi̱ta̱ xi xán 'biì, jñà xi xi̱ta̱ chja̱jno-la̱, jñà xi̱ta̱ xi kona̱cha̱n-la̱ xíkjín nga síchi̱jé-la̱, kì yijo-nò chona̱cha̱n-là nga jñà xi̱ta̱ xi koa̱tjín kjoa̱ch'o xi s'ín mì kiì kjoa̱has'enjiìn ñánda tíhotíxoma Nainá. 11 Jñò, k'e̱ nga sa̱ kjòtseé k'oa̱ tis'ín ki'nè i'ngaà; ta̱nga i̱'ndei̱, jye kisanìjno kjoa̱ ts'e̱ jé-nò, jye xi̱ta̱ tsjeè-la̱ Nainá komà, ko̱ jye xi̱ta̱ kixi̱ komà i̱t'aà ts'e̱ nga'ñó-la̱ Jesucristo xi otíxoma-ná ko̱ i̱t'aà ts'e̱ Ini̱ma̱ Tsjeè-la̱ Nainá. 12 Tjín i'nga xi̱ta̱ xinguioò xi tsò: “'An tjí'ndeé-na ni̱ta̱mé kjoa̱ xi s'ian.” Kixi̱í kjoa̱ tjí'nde-né, ta̱nga mì kiì ok'in-la̱ tsà k'oa̱'sen yijeé ngats'iì kjoa̱; k'oa̱á ma-ne, 'an, mì kiì tsjaà'nde-la̱ yijo-na̱ nga siìkijne-na jngoò kjoa̱. 13 Tikoa̱á tjín i'nga xi tsò: “Jñà tsojmì xi ma chine, ts'e̱é i̱ntso'bà, koa̱ jè i̱ntso'bà mochjeèn-la̱ tsojmì xi ma chine.” Kixi̱í kjoa̱, ta̱nga i̱ngajò kjoa̱ koi, Nainá si̱ìkjet'aà. Ta̱nga jè yijo-ná, mìtsà mì tsà ko̱'sín ko̱chjeén nga kjoa̱ chijngui s'e̱én, i̱t'aà ts'e̱ Nainá ko̱chjeén; ijo-ná, ts'e̱é Nainá. 14 Koni s'ín kis'iìn Nainá nga kisìkjaáya-la̱ Na̱'èn-ná Jesús, jñá k'oa̱á tis'ín kjoa̱áya-ná i̱t'aà ts'e̱ kjoa̱ biyaà nga tjín-la̱ nga'ñó Nainá. 15 ¿A mìtsà tíjiìn-nò nga jè yijo-ná, ya̱á tíkjoòko̱ ts'e̱ Cristo? ¿A ko̱maá si̱kjeén yijo-la̱ Cristo nga si̱jngoòt'aà-lá ts'e̱ chjo̱ón ská? Majìn, mì kiì ko̱ma. 16 ¿A mìtsà 'yaà, k'e̱ nga jngoò xi̱ta̱ x'i̱n, tsà chjo̱ón ská kíjnako̱, jngoò yijoó ko̱ma? Nga k'oa̱á s'ín tíchja̱ Xo̱jo̱n-la̱ Nainá nga tsò: Ingajò xi̱ta̱ koi, jngoò yijoó ko̱ma. 17 Ta̱nga jè xi Na̱'èn-ná tíjnako̱, ya̱á majngoòko̱ ini̱ma̱-la̱ ko̱ ts'e̱ Na̱'èn-ná. 18 Ti̱nchat'aàxìn-là kjoa̱ chijngui. Jngoò xi̱ta̱, ni̱ta mé jé xi ótsji xi kj'ei̱í jé, mìtsà yijo-la̱ tíbeèton. Ta̱nga jè xi̱ta̱ xi kjoa̱ chijngui s'ín, yijo-la̱á beèton. 19 ¿A mìtsà tíjiìn-nò nga jè yijo-nò ni'ya-la̱ Ini̱ma̱ Tsjeè-la̱ Nainá-né xi jñò kitsjaà-nò Nainá nga tíjnajiìn ini̱ma̱-nò? Yijo-nò, mìtsà ti̱ tsa̱jòn-nò. 20 Nainá jye tsakatse-nò, tse tsibíchjítji-nò. Koií kjoa̱-la̱ jcha̱xkón Nainá, ndaà ti̱kjeén yijo-nò nga ts'e̱é Nainá.
