1 K'oa̱ás'ín jcha̱takòn-náje̱n koni xi̱ta̱ chi̱'nda xi síxá-la̱ Cristo, nga ngaje̱n kjònga̱tsja-je̱n nga ko̱kóya-je̱n kjoa̱ tjí'ma-la̱ Nainá. 2 Jngoò xi̱ta̱ xi xá manga̱tsja, mochjeèn-né nga kata'ya-la̱ nga kixi̱ síkitasòn xá-la̱. 3 An, mì kiì síkájnoa xi i̱t'aà tsa̱jòn kó tsò kjo̱hítsjen-nò, a ndaá tìsìkitasoàn, a xi ch'oó tìsìkitasoàn xá xi 'an kjònga̱tsja, ko̱ kó s'ín síkítsjen jñà xi̱ta̱xá xi bíndaàjiìn-la̱ xi̱ta̱ i̱sò'nde. Skanda 'an, mì ti̱ kiì xan-na tsà ndaà tjín ko̱ tsà ch'oó tjín xá xi tìs'iaàn. 4 An, na̱s'ín k'oa̱s'ín sìkítsjeèn nga tsjìn-na jé, ta̱nga mìtsà tsò-ne kjoa̱ nga nguì xi̱ta̱ kixi̱-ná. Nga̱ jè Na̱'èn-ná xi bíndaàjiìn-na. 5 K'oa̱á ma-ne kì tà chjà jé bìnè-là xinguio̱o nga ti kj'eè bijchó na̱chrjein. Chíña kjoa̱ k'e̱ nga kjoi̱í Na̱'èn-ná xi síhiseèn nga jcha̱-la̱ kjoa̱ xi tjí'ma ñánda nga jñò chon. Koa̱ si̱ìkatsején kó tsò kjo̱hítsjeèn xi tjíjin ini̱ma̱-la̱ xi̱ta̱. I̱kjoàn Nainá jeya si̱ìkíjna koni s'ín nga ok'ín-la̱ nga jngoò ìjngoò xi̱ta̱. 6 Ndí 'ntsè ko̱ tìchjaá, koi 'én tìchjàko̱-nò kjoa̱ xi mangásòn i̱t'aà ts'a̱n ko̱ i̱t'aà ts'e̱ Apolos xi kjo̱ndaà tsa̱jòn mé-ne nga mì kiì si̱katonè-là koni tsò 'én-la̱ Nainá. Kì k'oa̱á s'ín nìkítsjen nga jngoò chi̱'nda-la̱ Nainá isa̱ nda nachrjenguioò koni chi̱'nda xi i'nga. 7 Jiòn, ¿mé-ne koa̱ bixòn-nò nga isa̱ 'ñó chjí-nò koni xi̱ta̱ xi i'nga? ¿Mé kjo̱ndaà xi tjín-nò xi mì tsà Nainá kitsjaà-nò? Tsa jye kitjoé-nò ngats'iì kjo̱ndaà, ¿mé-ne nga 'nga ma-ne takòn koni tsà ta nga'ñó tsa̱jòn kisakò-nò? 8 Jñò, k'oa̱á s'ín machi̱ya-nò koni tsà jye ma yije-nò, koni tsà 'ñó xi̱ta̱ nchi̱ná i̱t'aà ts'e̱ Nainá. K'oa̱ás'ín nìkítsjeèn koni tsà xi̱ta̱xá ítjòn titsa̱jna ko̱ ngaje̱n mì tsà xi̱ta̱xá titsa̱jna-je̱n. Ndaà-la̱ tjín tsà kixi̱ kjoa̱ nga otíxoma, mé-ne ngaji̱n komà ko̱tìxomako̱-nòje̱n. 9 'An, k'oa̱á s'ín sìkítsjeèn, ngaji̱n xi i̱t'aà ts'e̱ Cristo kisìxáya-naje̱n, Nainá k'oa̱ás'ín kiskoòsòn-la̱ nga ngaji̱n-náje̱n xi fehit'aà-ne, xi tjínè-naje̱n nga ki̱yá-je̱n nga nguixko̱n i̱sò'nde, nga nguixko̱n xi̱ta̱ ko̱ àkja̱le̱. Jñà xi̱ta̱, tà nchikotsejèn-naje̱n nga tsja ma-la̱ mé kjo̱'in xi tíma'tin-je̱n. 10 Ngaji̱n, xi kjoa̱ ts'e̱ Cristo, xi̱ta̱ ská 'ya takon-naje̱n; ta̱nga jñò, i̱t'aà ts'e̱ Cristo, k'oa̱á s'ín 'ya-nò nga 'ñó tjín-nò kjoa̱chji̱ne̱. Ngaji̱n, k'oa̱á s'ín 'ya takon-naje̱n nga xi̱ta̱ indaà kjoa-náje̱n; ta̱nga jñò, xi̱ta̱ tájaà-nò. Ngaji̱n, mì yá xi̱ta̱ beèxkón-naje̱n; jñò, beèxkón-nò xi̱ta̱. 11 Ska̱nda jè hora jè, kji̱nchrá-naje̱n, xindá-naje̱n, tsjìn-naje̱n nikje xi chíkjá-je̱n, 'ñó beètoòn-naje̱n xi̱ta̱, tà tjaàsòn-naje̱n, tsjìn-naje̱n ni'ya. 12 Skanda bijtaá-naje̱n nga 'ñó nìxá-je̱n. K'e̱ nga chja̱'òn-ko̱-nàje̱n xi̱ta̱, ngaji̱n, nìjét'aà-laje̱n Nainá nga kàtasíchikon-tin. K'e̱ nga kondra̱ fì-na̱je̱n xi̱ta̱, chíkjoa̱ko̱ó-naje̱n. 13 'Òn chja̱ko̱-naje̱n xi̱ta̱, ngaji̱n ndaà nokjoá-laje̱n. K'oa̱s'ín beè takòn-naje̱n koni tsà tjé-la̱ i̱sò'nde. Ska̱nda na̱chrjein i̱'ndei̱, jñà xi̱ta̱ k'oa̱ás'ín beè takon-naje̱n koni tsojmì xi ningui-ne nga bíxteèn. 14 Koni s'ín tìkjiì-nò, mìtsà tìs'iìn sobà-nò. Kjo̱hítsjeèn tìtsja jngoò-nò koni tsà i̱xti ts'a̱n xi matsjakeè. 15 Na̱s'ín te jmiì ma-ne xi okóya-nò i̱t'aà ts'e̱ Cristo, ta jngoò ma-ne xi na̱'èn-nò. 'An-ná xi komà na̱'èn-nò nga mokjeiín-nò i̱t'aà ts'e̱ Cristo Jesús nga 'aán tsibèno̱jmí ítjòn-nò 'én ndaà-la̱ Nainá xi kjoa̱ ts'e̱ Cristo. 16 K'oa̱á ma-ne bìtsi'bà-nò nga k'oa̱s'ín ti̱jchá yijo-nò koni 'an. 17 Koií kjoa̱-la̱ tisìkasén-nò Timoteo, xi ki'ndí-na̱ xan-la̱ nga 'ñó matsjakeè ko̱ kixi̱ síxá-la̱ Na̱'èn-ná. Jè si̱íkítsjeèn-nò kós'ín ti̱jnakoa̱ Cristo Jesús nga mokjeiín-na̱ i̱t'aà ts'e̱, koa̱ kós'ín okoòya-la̱ xi̱ta̱ na̱xa̱ndá-la̱ Cristo nga kijndà na̱xa̱ndá ñánda bijchoa. 18 Tjín i'nga xi̱ta̱ xinguio̱o xi 'ñó 'nga chja̱, k'oa̱á-là s'ín síkítsjeèn tsà mì kiì kjíkon-nò. 19 Ta̱nga tsà Nainá mejèn-la̱, kjìkon ni̱to̱ón-nò. K'e̱ nga ki̱jchoà, skoe̱e jñà xi̱ta̱ xi 'nga chja̱, a nga'ñó-la̱ Nainá xi tjín-la̱ a xi tà jè 'én-la̱ xi 'nga chja̱. 20 K'e̱ nga jè Nainá tíhotíxoma jngoò-la̱ xi̱ta̱, mì tsà ta kjoa̱ ts'e̱ 'én mochjeén, ko̱ó nga'ñó-la̱ Nainá mochjeén. 21 Jñò, ¿kós'ín mejèn-nò nga kjián? ¿A mejèn-nò nga kjo̱'in tsjà-nò k'e̱ nga kijchòkon-nò, a xi mejèn-nò nga ko̱ kjo̱ndaà-na̱ ko̱ kjo̱tsjaà-na̱ kijchòkon-nò?
