1 Jñò ndí 'ntsè ko̱ tìchjaá, mì kiì komà ko̱sín kichjàko̱-nò koni xi̱ta̱ xi ndaà tíjiìn ini̱ma̱-la̱ Ini̱ma̱ Tsjeè-la̱ Nainá. Ta k'oa̱ás'ín kichjàko̱-nò koni tsà ta̱xki̱ xi̱ta̱ i̱sò'nde xi tà kjoa̱ ts'e̱ yijo-la̱ ótsji, koni tsà tákó ndí i̱xti xó xi i̱'taà ts'e̱ Cristo. 2 Mìtsà 'in tjín 'én xi tsakoòya-nò; k'oa̱s'ín ngaya-la̱ koni ndí i̱xti xó xi sa̱ nchihoki, tà tsjín 'biì, mìtsà tsojmì tája kine. Jñò, kj'eè kiì ndaà fahas'en-jin-nò 'én-la̱ Nainá, k'oa̱á ngaya̱-la̱ koni tsojmì tája xi kj'eè kiì ma chine ska̱nda na̱chrjein i̱'ndei̱. 3 Tákó k'oa̱ás'ín 'nè koni s'ín xi̱ta̱ xi kjoa̱ ts'e̱ yijo-la̱ ótsji. Ma chi̱ni̱cha-nò xinguio̱o, chìtiya-nò ni̱ ta mé kjoa̱-ne. Kjoa̱ koi, kjoa̱ ts'e̱ xi̱ta̱ i̱sò'nde-né. 4 K'e̱ nga bixòn: “'an, xi̱ta̱ ts'e̱ Pablo-ná,” ko jè xi ìjngoò tsò: “'an, xi̱ta̱ ts'e̱ Apolos-ná,” jñò, k'oa̱ás'ín nokjoà koni chja̱ xi ta̱xki̱ xi̱ta̱ i̱sò'nde. 5 'An xi Pablo 'mì-na, ko̱ Apolos, tà xi̱ta̱ chi̱'nda-náje̱n xi nìxá-la̱je̱n Nainá. I̱t'aà tsa̱je̱én kòkjeiín-nò 'én-la̱ Nainá, nga ìjngoò ìjngoò-je̱n ki'nè-je̱n xá xi Na̱'èn-ná kisìnga̱tsja-naje̱n. 6 'Aán tsakoòya-nò 'én-la̱ Nainá, k'oa̱á ngaya-la̱ koni jngoò xi̱ta̱ xi bítje̱ xojmá, jè Apolos kiskinìndá-la̱, ta̱nga jè Nainá tísíjchá. 7 Mìtsà jè xi̱ta̱ xi bítje̱ tsojmì, ni̱ mìtsà jè xi kinindá-la̱ xi chjí-la̱, ta̱ jngoò jè Nainá xi síjchá tsojmì xi sitje̱ xi 'ñó chjí-la̱. 8 Jè xi bítje̱ ko̱ xi kinìndá-la̱, ta jngoò xá tjín-ne xi s'ín. Ta̱nga jè Nainá tsjá-la̱ chjí-la̱ koni tjín xá xi kis'iìn nga jngoò ìjngoò. 9 Ngaji̱n, ya̱á ta̱ña nìxákjò-je̱n xá-la̱ Nainá. Koa̱ jñò-nò i̱'nde ñánda sitje̱ 'én-la̱ Nainá. Ti̱koa̱á jñò-nò ni'ya-la̱ Nainá xi ngaji̱n bíndaà-ji̱n. 10 Koni s'ín tjín kjo̱ndaà-la̱ Nainá xi kitjoé-na, an-ná xi chji̱ne̱ chrjó ítjòn, xi tsibijnà tàts'en chrjó-la̱ ni'ya. Kj'ei̱í xi̱ta̱á bíndaàsòn ni'ya. Ta̱nga jñà xi bíndaàsòn, ndaà kàtasíkinda̱ nga jngoò ìjngoò kós'ín ki̱ìndaà. 11 Mì ti̱ yá xi ko̱ma-la̱ kiìjna ìjngoò isa̱ tjàts'en chrjó ni'ya koni jè xi jye tíjna, nga jè Jesucristo tíjna koni tjats'en chrjó ni'ya. 12 Tjàts'en chrjó ni'ya, ko̱ma sindaàsòn-ne ki̱cha̱ oro, plata, nda̱jo̱ chjí xi 'ñó ndaà kjoàn, nas'ín yá, nas'ín xka̱ paja, o xka̱ ndiji. 13 Ta̱nga jñà xá xi s'ín nga jngoò ìjngoò xi̱ta̱, k'e̱é jcha̱-la̱ jè na̱chrjein k'e̱ nga sindaàjiìn-la̱ xi̱ta̱. Na̱chrjein jè, ni'ín kjoi̱íko̱, koa̱ jè ni'ín skót'aà nga jngoò ìjngoò ska̱ya xá xi komà. 14 Tsà jngoò xá ki̱chìkjoa̱ko̱-la̱ ni'ín xi skót'aà, tjoé-la̱ chjí-la̱ jè xi̱ta̱ xi ki̱ìndaàsòn. 15 Ta̱nga tsà jè xá xi kisindaàsòn, tsà ki̱ti̱, chijaá chjí-la̱. Ta̱nga jè xi̱ta̱ ki̱tjokàjiín kjo̱'in koni jngoò xi̱ta̱ xi bitjokàjiìn ni'ín. 16 Jñò, ¿a mìtsà tíjiìn-nò nga ni'ya i̱ngo̱ tsjeè-la̱ Nainá 'mì-nò? Nga jè Ini̱ma̱ Tsjeè-la̱ Nainá tíjnajiìn-nò. 17 Tsà yá xi̱ta̱ xi mejèn-la̱ si̱ìkits'ónjiìn-la̱ ni'ya tsjeè-la̱ Nainá, Nainá ti̱koa̱á si̱ìkits'ónjiìn-la̱ jè xi̱ta̱ xi k'oa̱s'ín s'i̱in. Nga jè ni'ya-la̱ Nainá, tsjeè-ne. Koa̱ jñò-nò xi ni'ya tsjeè-la̱ Nainá 'mì-nò. 18 Kiì yijo-nò chona̱cha̱an-là, tsà yá xi k'oa̱s'ín síkítsjeèn nga 'ñó tjín-la̱ kjo̱hítsjeèn xi ts'e̱ kjoa̱ chji̱ne̱-la̱ i̱sò'nde, to sa̱á ko̱s'ín katas'ín koni tsà tsjìn-la̱ kjo̱hítsjen, mé-ne nga ngui xi̱ta̱ chji̱ne̱ ko̱ma-ne. 19 Jè kjoa̱ chji̱ne̱-la̱ xi̱ta̱ i̱sò'nde, i̱t'aà ts'e̱ Nainá, kjoa̱ ská tsò-la̱. Xo̱jo̱n-la̱ Nainá, k'oa̱s'ín tíchja̱ nga tsò: “Nainá, k'oa̱á s'ín s'ín nga jñà xi̱ta̱ chji̱ne̱, ti̱ jñà-ne kjoa̱ maña̱-la̱ ki̱xojiìn-ne.” 20 Jè Xo̱jo̱n-la̱ Nainá, ìjngoò k'a tjít'aà ñánda tsò: “Nainá, beè-né nga nìmé chjí-la̱ kjo̱hítsjeèn-la̱ xi̱ta̱ xi chji̱ne̱ tsò-la̱ yijo-la̱.” 21 K'oa̱á ma-ne, jñò, kì ni̱ jngoò xi̱ta̱ xi 'nga nìkíjna. Nga̱ ngats'iì xi tjín, kjo̱nda tsajòn yije-nò. 22 Tsà jè Pablo, tsà jè Apolos, tsà jè Cefas [xi ti̱koa̱ Pedro 'mì], tsà jè i̱sò'nde, tsà jè kjoa̱bijnachon, tsà jè kjoa̱ biyaà, tsà jè na̱chrjein i̱'ndei̱, tsà jè na̱chrjein xi sa nchrobá, kjo̱ndaà tsa̱jòn yije-nò. 23 Jñò, ts'e̱é Cristo-nò, koa̱ jè Cristo ts'e̱é Nainá.
