1 Ndí 'ntsè ko̱ tìchjaá, an mejèn-na kàtasijiìn-nò jñà kjoa̱ chji̱ne̱ xi tsjá Ini̱ma̱ Tsjeè-la̱ Nainá. 2 Jñò, ndaà tíjiìn-nò k'e̱ nga ti̱kj'eè mokjeiín-nò 'én-la̱ Nainá, ya̱á tsanguit'aà-là xkósòn xi mì kiì ma chja̱ nga xìn ndi̱yá kiìko̱-nò nga mìtsà kixi̱ kjoa̱ nga Nainá. 3 K'oa̱á xan-nò, ni̱ yá xi̱ta̱ xi ko̱ma ki̱tso̱-la̱ Jesús: “¡Ch'o kàtamatin!”, tsà i̱t'aà ts'e̱ Ini̱ma̱ Tsjeè-la̱ Nainá tíchja̱. Ti̱koa̱á tsà mìtsà nga'ñó ts'e̱ Ini̱ma̱ Tsjeè-la̱ Nainá tíchja̱, mì kiì ko̱ma ki̱tso̱-la̱: “¡Ji-né Jesús xi otíxomoi!” 4 Ya̱ i̱jiìn na̱xa̱ndá-la̱ Nainá, kjìn ska̱ya kjoa̱ chji̱ne̱ tjín kjoa̱ ts'e̱ xá xi síkitasòn xi̱ta̱, ta̱nga jè xi tsjá kjoa̱ chji̱ne̱, ti̱jè-ne Ini̱ma̱ Tsjeè-la̱ Nainá. 5 Jñà xi̱ta̱, kjìn ska̱ya xá tjín-la̱ nga si̱ìxá-la̱ Na̱'èn-ná, ta̱nga ti̱jè-ne Na̱'èn-ná xi maxá-la̱. 6 Kjìn ska̱ya nga'ñó tjín kós'ín maxá, ta̱nga ti̱jè-ne nga'ñó-la̱ Nainá xi síxájiìn-la̱ ngats'iì xi̱ta̱. 7 Nga jngoò ijngoò xi̱ta̱, tjoé-la̱ jngoò kjoa̱ chji̱ne̱ xi okó nga ya̱ tíjnajiìn ini̱ma̱-la̱ Ini̱ma̱ Tsjeè-la̱ Nainá mé-ne nga ngats'iì xi̱ta̱ na̱xa̱ndá-la̱ Nainá ko̱chjeén-la̱ kjo̱ndaà xi tjoé-la̱. 8 Xi i̱t'aà ts'e̱ Ini̱ma̱ Tsjeè-la̱ Nainá tjín xi̱ta̱ xi 'biì-la̱ 'én xi tjín-la̱ kjo̱hítsjeèn; koa̱ tjín i'nga xi 'biì-la̱ 'én xi tjín-la̱ kjoa̱ chji̱ne̱, nga ti̱jè-ne Ini̱ma̱ Tsjeè-la̱ Nainá tsjá. 9 Tjín xi tjoé-la̱ kjoa̱chji̱ne̱ nga ndaà mokjeiín-la̱ nga ti̱jè-ne Ini̱ma̱ Tsjeè-la̱ Nainá tsjá-la̱, ti̱koa̱á tjín xi tjoé-la̱ kjoa̱chji̱ne̱ nga síndaà-ne xi̱ta̱ xi xk'én, nga ti̱jè-ne Ini̱ma̱ Tsjeè-la̱ Nainá tsjá-la̱. 10 Tjín xi tjoé-la̱ kjoa̱chji̱ne̱ nga ma-la̱ s'ín kjo̱xkón xi ndaà tjín, ko̱ xi ma-la̱ chja̱ ngajo-la̱ Nainá, ko̱ xi machi̱ya-la̱ mé ini̱ma̱ xi tísíxájiìn ini̱ma̱-la̱ xi̱ta̱ xi chja̱. Ko̱ tjín xi tjoé-la̱ nga ma-la̱ chja̱ 'én xi kj'ei̱í tsò xi mì yá xi̱ta̱ fìya-la̱, ti̱koa̱ tjín xi ma-la̱ síkatoya 'én xi kj'ei̱í tsò xi mì yá xi̱ta̱ fìya-la̱. 11 Ti̱jè ta jngoó-ne Ini̱ma̱ Tsjeè-la̱ Nainá xi síxá i̱t'aà ts'e̱ ngats'iì kjoa̱ koi nga síka'bí-la̱ nga jngoò ìjngoò xi̱ta̱ kjoa̱chji̱ne̱ xi jè mejèn-la̱ nga tsjá-la̱. 12 Yijo tsa̱ján, kjìn jchán ska̱ya tjín-la̱; ta̱nga koni s'ín tíkjoò, ta̱ jngoò ma-ne yijo. Na̱xa̱ndá-la̱ Cristo, k'oa̱á ti̱s'ín tjín, ta jngoò ma-ne. 13 Jñà xi xi̱ta̱ judío ko̱ xi mìtsà xi̱ta̱ judío, xi xi̱ta̱ chi̱'nda títsa̱jna ko̱ xi̱ta̱ xi títsa̱jnandeií ta jngoò ma-ne. Ngats'iaá jñá, tà ngásòn komaá bautizar i̱t'aà ts'e̱ xi ti̱jè-ne Ini̱ma̱ Tsjeè-la̱ Nainá nga jngoò na̱xa̱ndá-la̱ Nainá komaá koni tsà jngoò yijo. Nga jngoò ìjngoaá, Nainá kitsja-ná xi ti̱jè-ne Ini̱ma̱ Tsjeè-la̱. 14 Jè yijo-ná, mìtsà tà jngoò ska̱ya tjín-ne; kjìn jchán ska̱ya tíkjoòya. 15 Tsà jè ntso̱koaá ki̱tso̱: “An, mìtsà tsja xi̱ta̱ ma, mìtsà ya̱ chja-na jè yijo.” Mìtsà koi kjoa̱-la̱ nga o̱kitso̱ nga mì ya̱á chja̱-ne yijo. 16 Tsà jñà líká ki̱tso̱: “An, mìtsà xko̱n xi̱ta̱ ma, mìtsà ya̱ chja-na jè yijo.” Mìtsà koi kjoa̱-la̱ nga o̱kitso̱ nga mì ya̱á chja̱-ne yijo. 17 Tsà kóho̱kji yijo-ná, tsà nguiì xkoaán ko̱ma, ¿kós'ín ki̱ná'ya-ná? Tsà jè yijo-ná, tsà nguiì líká ko̱ma, ¿kós'ín ki̱jne̱-ná? 18 Ta̱nga Nainá nga jngoò ìjngoò ska̱ya yijo-ná, ya̱á kisìkítsa̱jna i̱'nde-la̱ yijo-ná ñánda nga jè kjòmejèn-la̱. 19 Yijo-ná tsà tà jngoò sko̱ya ko̱ma, mì-la tsà yijo xi ngui tíjngo. 20 Kixi̱í kjoa̱ na̱s'ín kjìn ska̱ya tíkjoòya yijo-ná, ta̱nga ta̱jngoò ma-ne. 21 Jñà xkoaán mì kiì ko̱ma ki̱tso̱-la̱ jñà ntsa̱á: “mì kiì mochjeèn-na̱.” Jè skoaá ti̱koa̱á mì kiì ko̱ma ki̱tso̱-la̱ jñà ntso̱koa̱á: “mì kiì mochjeèn-na̱.” 22 Ta̱nga i̱t'aà ts'e̱ yijo-ná, tjín-né xi 'mì-lá nga chiba nga'ñó tjín-la̱ ta̱nga isa̱á ndaà mochjeén. 23 I̱t'aà ts'e̱ yijo-ná xi 'mì-lá nga mì kiì ndaà tsejèn, jñà-ní xi nìkákjá nikje mé-ne nga isa̱ nda ko̱tsèjen-ne. Bíjtsa'ma-né jè yijo-ná, jñà xi mì kiì tjí'nde-la̱ nga jcha̱-la̱. 24 Mìkiì mochjeèn nga sijtsa'ma yijo-ná xi tsejèn. Nainá jye k'oa̱s'ín tsibíndaà nga ìsa̱ ndaà jchaxkón jè xi 'mì-lá nga ìsa̱ chiba chjí-la̱, 25 mé-ne nga mì ko̱jòya-ne. To̱saà nga jngoò ìjngoò ska̱ya kàtasíkinda̱ xíkjín. 26 Tsà tjín jngoò ska̱ya yijo-ná ñánda ijò ma, ok'ìn yije-la̱ xíkjín kóho̱kji nga ma ijò. Koa̱ tsà tjín ñánda ndaà tíyaxkón, ndaá s'e yije-la̱ kóhokji yijo. 27 Jñò, k'oa̱á ngaya-la̱ koni yijo-la̱ Cristo. Katjín, katjín xá xi kitjoé-nò ya̱ i̱jiìn na̱xa̱ndá-la̱ Nainá. 28 Nainá k'oa̱á s'ín kiskoòsòn-la̱ mé xá xi s'i̱ìn xi̱ta̱: jñà títsa̱jna ítjòn xi̱ta̱ xi bíxáya-la̱ Nainá; xi ma-ne jò, xi̱ta̱ xi chja̱ ngajo-la̱ Nainá; xi ma-ne jàn, xi̱ta̱ xi okóya 'én-la̱ Nainá. Ti̱koa̱ tjín xi ma-la̱ s'ín kjo̱xkón xi ndaà tjín. Ko̱ tjín xi ma-la̱ síndaà-ne xi̱ta̱ xi xk'én; tjín xi ma-la̱ síchját'aà; tjín xi otíxoma mé kjoa̱ xi ko̱ma; ko̱ tjín xi chja̱ 'én xi kj'ei̱í tsò xi mì yá xi̱ta̱ fìya-la̱. 29 Mì tsà ngats'iì nga ma bíxáya-la̱ Nainá. Mì tsà ngats'iì nga Nainá chja̱ ngajo-la̱. Mì tsà ngats'iì nga ma-la̱ okóya 'én-la̱ Nainá. Mì tsà ngats'iì nga ma-la̱ s'ín kjo̱xkón xi ndaà tjín. 30 Ko̱ mì tsà ngats'iì nga ma-la̱ síndaà-ne xi̱ta̱ xk'én. Mìtsà ngats'iì nga ma-la̱ chja̱ 'én xi kj'ei̱í tsò xi mì yá xi̱ta̱ fìya-la̱. Mìtsà ngats'iì ma-la̱ síkatoya 'én xi kj'ei̱í tsò xi mì yá xi̱ta̱ fìya-la̱. 31 Ta̱nga jñò, mochjeèn-né nga ti̱nchátsjioò jñà kjoa̱chji̱ne̱ xi isa̱ ndaà tjín. Ta̱nga i̱'ndei̱ 'aán koko-nò jngoò ndi̱yá xi ìsa̱ ndaà tjín kó s'ín si̱jchá yijo-nò.
