1 'An xi 'mì-na Pablo, xi xó k'oa̱s'ín kinokjoà-na nga 'an tsibíxáya-na Cristo Jesús, nga k'oa̱ás'ín kjòmejèn-la̱ Nainá. Titsa̱nìxat'aà-nòje̱n ko̱ Sóstenes xi 'ntsé chibá i̱t'aà ts'e̱ Cristo. 2 Tìkji-nò xo̱jo̱n carta jè, jñò xi na̱xa̱ndá-la̱ Cristo maà xi titsa̱jna ján Corinto, xi jye kisìtsjeè-nò Nainá nga ya̱ titsa̱kjòko̱ò Cristo Jesús nga xó k'oa̱ s'ín jaájiìn-nò Nainá mé-ne nga xi̱ta̱ tsjeè-la̱ ko̱maà ko̱ ngats'iì xi̱ta̱ xi xki̱ xi ján chja̱t'aà-la̱ nga jeya síkíjna jè Na̱'èn-ná Jesucristo xi otíxoma-ná, ti̱koa̱ jè otíxoma-la̱ xi̱ta̱ koi. xi Na̱'èn-ná 'mì-lá, tikoa̱ Na̱'èn-ná tsò-la̱ jñà xi̱ta̱ koi. 3 Nainá xi Na̱'èn-ná, ko̱ jè Jesucristo xi otíxoma-ná kàtatsjá-nò kjo̱ndaà ko̱ kjoa̱'nchán ya̱ i̱jiìn ini̱ma̱-nò. 4 Kjit'aà na̱chrjein tsjaà-la̱ kjo̱ndaà Nainá xi i̱t'aà tsa̱jòn koií kjoa̱-la̱ jñà kjo̱ndaà xi kitsjaà-nò Nainá nga ndaà kisìchikontin-nò i̱t'aà ts'e̱ Cristo Jesús. 5 Nga̱ ya̱á i̱t'aà ts'e̱ Cristo, Nainá kisìchikontin ijye kjo̱hítsjeèn-la̱ ini̱ma̱-nò, kós'ín nokjoà, ko̱ kós'ín machi̱ya-nò 'én-la̱ Nainá. 6 Nga̱ k'oa̱ás'ín 'ya-la̱, nga jè 'én ndaà-la̱ Nainá xi kjoa̱ ts'e̱ Cristo kjòkixi̱yaá i̱jiìn ini̱ma̱-nò. 7 Ni̱mé kjo̱tjò-la̱ Nainá chija'ta-nò k'e̱ nga tákó titsa̱chiñá-là nga kjoi̱í ìjngoò k'a Jesucristo xi otíxoma-ná. 8 Nainá tsjá-nò nga'ñó skanda k'e̱ nga kjoe̱hit'aà na̱chrjein, mé-ne nga ni̱mé jé sa̱kòt'aà-nò k'e̱ nga ki̱tjojen ìjngoò k'a Jesucristo xi otíxoma-ná. 9 Nainá xi̱ta̱ kixi̱-né, síkitasòn-né koni s'ín tsjá 'én-la̱. Xó k'oa̱ás'ín kiìchja̱-nò nga ya̱ chraña ki̱tsa̱jnakjòko̱ò Jesucristo xi ki'ndí-la̱ tsò-la̱ nga jè otíxoma-ná. 10 Ndí 'ntsè ko̱ tìchjaá, i̱t'aà ts'e̱ o̱kixi̱ xi kitsjaà-na Jesucristo xi otíxoma-ná, tìbìtsi'bà-nò ngats'ioò, ngásòn ngáya titsa̱jnako̱o xinguio̱o, mé-ne nga mì ko̱jòya-ni kjo̱hítsjeèn-nò. Ta̱jngoò kjo̱hítsjeèn ti̱kjeén, ngásòn chósòn-là ni̱ta̱mé kjoa̱-ne. 11 Koií ko̱xan-nò ndí 'ntsè, nga jñà xi̱ta̱ ni'ya-la̱ Cloé, tsibèno̱jmí-na̱ nga kjoa̱siì tjín-nò. 12 Koií k'oa̱s'ín tìxan-nò, tjín i'nga xi̱ta̱ xinguia̱á xi tsò: “'An, jé Pablo fìt'aà-la̱.” Tjín xi tsò: “'An, jè Apolos fìt'aà-la̱.” Tjín xi tsò: “'An, jè Cefas [xi ti̱koa̱ Pedro 'mì] fìt'aà-la̱.” Tjín xi tsò: “'An, jè Cristo fìt'aà-la̱.” ¿Mé-ne o̱bixón-nò? 13 ¿A kjìn ya ma-ne Cristo? ¡Majìn! ¿A jè Pablo xi kisit'aà kro i̱t'aà tsa̱jòn? ¡Majìn! ¿A i̱t'aà ts'e̱é Pablo komà bautizar? ¡Majìn! 14 Ndaà chjí-la̱ Nainá, 'an, mì tsà yá xi̱ta̱ kis'iaàn bautizar ya̱ na̱xa̱ndá tsajòn, ta jè Crispo ko̱ Gayo, 15 mé-ne nga mì yá xi̱ta̱ ki̱tso̱-ne: “I̱t'aà ts'e̱ Pablo komà bautizar.” 16 Saá tíbitsjen-na nga ti̱koa̱ kis'iaàn bautizar Estéfanas ko̱ xi̱ta̱ xíkjín, ta̱nga mì kiì bítsjeèn-na̱ tsà kis'iaàn bautizar xi kj'ei̱í xi̱ta̱. 17 Jè Cristo mìtsà koi xá kisìkasén-na nga xi̱ta̱ s'iaàn bautizar; koií xá kisìkasén-na nga 'an kichjàya 'én ndaà-la̱ Nainá. K'e̱ nga chjàya, mìtsà 'én-la̱ xi̱ta̱ chji̱ne̱ sìkjeén; majín-na nga chija nga'ñó-la̱ kro-la̱ Cristo. 18 Jñà 'én xi tìnokjoàya i̱t'aà ts'e̱ Cristo nga k'en-t'aà kro, ta kjoa̱ ská ma-la̱ jñà xi̱ta̱ xi ya̱ tjímaya ndi̱yá-la̱ i̱'nde kjo̱'in. Ta̱nga jñá xi jye titsa̱bitjokàjiaán kjo̱'in, k'oa̱á s'ín mokjeiín-ná nga jè 'én-la̱ Cristo nga'ñó-la̱ Nainá-né. 19 K'oa̱ás'ín tíchja̱ Xo̱jo̱n-la̱ Nainá nga tsò: Jñà xi̱ta̱ xi 'ñó tjín-la̱ kjoa̱ chji̱ne̱, 'aán koko-la̱ nga nìmé chjí-la̱ kjoa̱chji̱ne̱-la̱. 'Aán ko̱chrjeènguia kjo̱hítsjeèn-la̱ jñà xi̱ta̱ xi 'ñó machi̱ya-la̱. 20 Jñà xi̱ta̱ xi 'ñó tjín-la̱ kjoa̱chji̱ne̱, ko̱ xi 'ñó chji̱ne̱ xo̱jo̱n ko̱ xi joóya-ne kjoa̱ xi tjín i̱sò'nde, ¿i̱'ndei̱, ñánda títsa̱jnako̱ kjoa̱chji̱ne̱-la̱? Jè Nainá, kisìskáya-la̱ kjoa̱chji̱ne̱ xi tjín-la̱ xi̱ta̱ i̱sò'nde. 21 Nainá 'ñó xi̱ta̱ chji̱ne̱, mìkiì kitsjaà'nde-la̱ xi̱ta̱ nga i̱t'aà ts'e̱ kjoa̱chji̱ne̱-la̱ i̱sò'nde kijtseèxkon. Nainá k'oa̱ás'ín sasén-la̱ nga ochrjekàjiìn kjo̱'in jñà xi mokjeiín-la̱ i̱t'aà ts'e̱ 'én ndaà-la̱ Nainá xi kjoa̱ ts'e̱ Cristo, 'én xi tsò-la̱ xi̱ta̱ koi, kjoa̱ ská-né. 22 Jñà xi̱ta̱ judío [mì kiì mokjeiín-la̱] nga jè mejèn-la̱ skoe̱ kjo̱xkón xi 'ñó jeya tjín, ko̱ jñà xi mì tsà xi̱ta̱ judío [ti̱koa̱á mì kiì mokjeiín-la̱] nga koií ótsji xi 'ñó kjoa̱ chji̱ne̱. 23 Ta̱nga ngaji̱n k'oa̱á s'ín nokjoàya-je̱n nga kro k'ent'aà Cristo [xi̱ta̱ xi xó kisìkasén-ne Nainá]. Jñà xi̱ta̱ judío mì kiì mokjeiín-la̱ kjoa̱ xi komàtin Cristo, ko̱ jñà xi mìtsà xi̱ta̱ judío, kjoa̱ ská ma-la̱. 24 Ta̱nga jñà xi̱ta̱ xi xó jaàjiìn-ne Nainá, xi xi̱ta̱ judío ko̱ xi mìtsà xi̱ta̱ judío, k'oa̱á s'ín mokjeiín-la̱ nga jè Cristo nga'ñó-la̱ Nainá-né ko̱ kjoa̱ chji̱ne̱-la̱ Nainá-né. 25 Kjoa̱-la̱ Nainá xi ta kjoa̱ ská tsò-la̱ xi̱ta̱ i̱sò'nde, kjoa̱ chji̱ne̱-la̱ Nainá-né. Ìsa̱á tse kjoa̱chji̱ne̱ tjín-la̱ mì k'oa̱á-ne koni kjoa̱chji̱ne̱ xi tjín-la̱ xi̱ta̱ i̱sò'nde. Ko̱ jè kjoa̱-la̱ Nainá xi ta kjoa̱ indaà tsò-la̱ xi̱ta̱ i̱sò'nde, nga'ñó-la̱ Nainá-né. Ìsa̱á tse nga'ñó tjín-la̱ mì k'oa̱-ne koni nga'ñó xi tjín-la̱ xi̱ta̱ i̱sò'nde. 26 Jñò ndí 'ntsè ko̱ tìchjaá ti̱kítsjeèn k'e̱ nga sa̱ jaàjiìn-nò Nainá, chibaá ma-nò xi xi̱ta̱ chji̱ne̱ tsò-nò xi̱ta̱ i̱sò'nde, ko̱ chibaá ma-nò xi xi̱ta̱ ítjòn titsa̱jnaà, ti̱koa̱ chibaá ma-nò xi ya̱ ni'ya-la̱ xi̱ta̱ sko̱-la̱ kits'iòn. 27 Ta̱nga Nainá jaàjiìn jñà xi̱ta̱ xi tsò-la̱ xi̱ta̱ i̱sò'nde nga chiba kjo̱hítsjen tjín-la̱ mé-ne ko̱sobà-la̱ jñà xi̱ta̱ chji̱ne̱. Ti̱koa̱ jaàjiìn Nainá xi tsò-la̱ xi̱ta̱ isò'nde nga nimé chjí-la̱ mé-ne ko̱sobà-la̱ jñà xi̱ta̱ xi xi̱ta̱ ítjòn títsa̱jna. 28 Nainá jaàjiìn xi̱ta̱ i̱ma̱ ko̱ xi̱ta̱ xi bitjongui xi tsò-la̱ xi̱ta̱ i̱sò'nde nga nìmé chjí-la̱, mé-ne ki̱tjongui-ne jñà xi̱ta̱ xi tsò nga jñà títsa̱jna ítjòn, 29 mé-ne ni̱ jngoò xi̱ta̱ xi 'nga si̱ìkíjna-ne yijo-la̱ nga nguixko̱n Nainá. 30 Ta̱nga ti̱jè-ne Nainá kisìkítsa̱jnako̱-ná Cristo Jesús. K'oa̱á ti s'ín kis'iìn nga i̱t'aà ts'e̱ Cristo sakó-ná jè kjoa̱chji̱ne̱, nga jè Cristo, xi̱ta̱ kixi̱ s'ín-ná, xi̱ta̱ tsjeè s'ín-ná ko̱ síkítsa̱jnandei̱í-ná kjoa̱ ts'e̱ jé-ná. 31 Koni s'ín tíchja̱ Xo̱jo̱n-la̱ Nainá nga tsò: “Jè xi jeya síkíjna yijo-la̱, ta sa̱á Nainá jeya kàtasíkíjna.”
