Hebreos 3

1Jiòn ndí 'ndsé ra xi̱ta̱ na̱xi̱ndá tsje 'mì‑no ra xá ko̱'sín kiìchja̱‑no Nainá nga xi̱ta̱ 'tse̱ ki̱tso̱‑no, 'koa̱á 'sín nda ti̱kítsjen koni 'sín nga makjiín‑ná nga jè Cristo Jesús ra xá Nainá tsikíxá‑la̱ ko̱ nga na̱'mì ítjòn isíkíjna. 2Jesús, 'koa̱á 'sín nda tísíhitjasòn jè xá‑la̱ Nainá ra xá ko̱'sín ki'tsì‑la̱, koni 'sín nga jè Moisés ndaá isìhitjasòn xá‑la̱ ya̱ a̱'ta 'tse̱ na̱xi̱ndá‑la̱ Nainá. 3Tanga jè Jesús, isa̱á jeya tíjna koni jè Moisés. 'Koa̱á jngoya‑la̱ koni jngo xi̱ta̱ ra bínda ni'ya, isa̱á jeya bijna ra jè, nda mí 'koa̱‑ni jè ni'ya ra bínda. 4Nga'tsì ni'ya, tsijen xi̱ta̱á bínda; tanga jé Nainá ra tsikínda ijye nga'tsì tsajmì ra tjín ya̱ i̱sà'nde. 5Ra ngi kjo̱hixi̱, jè Moisés, koni xi̱ta̱ chi̱'nda‑la̱ Nainá, nda isìhitjasòn xá‑la̱ ya̱ a̱jin na̱xi̱ndá‑la̱ Nainá. Kií xá ki'sìn nga jè kitsjà 'én kó'sín ki̱tso̱ Nainá ra ko̱ma a̱skan‑ni. 6Tanga jè Cristo, ra I'ndí‑la̱ Nainá ma, jé batéxoma a̱'ta 'tse̱ na̱xi̱ndá‑la̱; ko̱ jè na̱xi̱ndá ra̱kiòo̱, jién‑né tsa ngi kixi̱ ki̱tsa̱jneé skanda 'kia̱ nga kje̱he'tà ni̱chjin koni 'sín nga 'ñó kji'tatakén nga ngi ko̱ó kjo̱tsja‑ná i̱nchichiñá‑lá kjo̱nda‑la̱ Nainá. 7'Koa̱á 'sín tsò jè Inìma̱ Tsje‑la̱ Nainá ya̱ xa̱jo̱n ra tjí'ta 'én‑la̱ Nainá nga tsò: Tsa i̱nchina'yá jiòn 'ndi̱ 'ndi̱‑ni̱ jè 'én‑la̱ Nainá, 8kì tà chjàn nítája inìma̱‑no koni 'sín ki'sìn jñà xi̱ta̱ ra kondra̱ kiì‑la̱ Nainá nga iskó'ta ya̱ i̱'nde'taxìn ñánda̱‑nioo̱ nga nangi kixì. 9['Koa̱á ma‑ni nga ko̱'sín kitsò Nainá:] Jñà xi̱ta̱ jchínga‑no iskó'tá‑na, ko̱ ichán nó kijtse jñà kjoa̱ ra kí'siaa̱n. 10'Koa̱á 'sín ma‑ni nga kísíjchán‑ko̱ jñà xi̱ta̱ kìi̱, ko̱ 'koa̱á 'sín kíxian‑la̱: “Jiòn, kji'tá ni̱chjin ta kj'ií 'sín ndi̱yá fìko̱‑no jè inìma̱‑no, ko̱ majìn‑no nga chjíbé jè ndi̱yá‑na̱.” 11'Koa̱á ma‑ni nga 'kia̱ nga 'ñó kjojti‑na, kítsja‑ná 'én‑na̱ nga kíxian: “Mì kì kjoa̱ha'sen‑jin ya̱ i̱'nde‑na̱ ñánda̱‑nioo̱ nga ma níkjáya.” 12Ndí 'ndsé, nda ti̱kinda̱a ijo‑no; kì ni̱jngo jiòn ra kjoa̱'cho síkíjnajin inìma̱‑la̱ nga mì kì makjiín‑la̱ mé‑ni nga mì ko̱se̱n'taxìn‑la̱ Nainá ra tíjnakon. 13Ta isa̱á 'ti̱ nga'ñó‑la̱ xàngio̱o nga jngó jngó‑no nga ni̱chjin nchijòn 'kia̱ nga tíjna‑isa jè ni̱chjin, mé‑ni nga ni̱yá ra ya̱ ko̱tájajín‑ni jè kjoa̱ 'tse̱ jé ra sko̱ónda̱cha̱‑la̱. 14Jién, ya̱á nakjoá‑né ya̱ a̱'ta 'tse̱ Cristo, tsa ngi ko̱'sín nda ko̱kjiín‑ná skanda 'kia̱ nga kje̱he'tà ni̱chjin koni 'sín nga kjokjiín‑ná nga ti̱'sa̱ ítjòn. 15Xa̱jo̱n ra tjí'ta 'én‑la̱ Nainá, 'koa̱á 'sín tíchja̱ nga tsò: Tsa i̱nchina'yá jiòn 'ndi̱ 'ndi̱‑ni̱ jè 'én‑la̱ Nainá, kì tà chjàn ko̱'sín nítája inìma̱‑no koni 'sín ki'sìn jñà xi̱ta̱ ra kondra̱ kijì‑la̱ Nainá. 16¿Yá xi̱ta̱‑ni ra kií'nchré 'én‑la̱ Nainá ko̱ a̱kjòn kondra̱ kijì‑la̱? Jñà‑ní nga'tsì xi̱ta̱ ra jè Moisés tsachrjekàjin ya̱ i̱'nde Egipto. 17¿Ko̱ yá xi̱ta̱‑ni ra ichán nó isíjchán‑ko̱ jè Nainá? Jñà‑ní xi̱ta̱ ra tsakátsji‑jé ko̱ ya̱á 'ken ya̱ a̱ya ndi̱yá ya̱ ñánda̱ nga nangi kixì. 18¿Ko̱ yá xi̱ta̱‑ni ra Nainá ko̱'sín kitsò‑la̱ nga mì kì kjoa̱ha'sen‑jin ya̱ i̱'nde‑la̱ ñánda̱ ma níkjáya? Jñà‑ní xi̱ta̱ ra mì kì isìhitjasòn‑la̱. 19Ko̱ 'koa̱á 'sín tísijin‑ná, nga kií mì kì 'jaha'sen‑jin‑ni ya̱ i̱'nde ñánda̱ ma níkjáya ta nga̱tjì‑la̱ nga̱ mì kì kjokjiín‑la̱.

will be added

X\