TIITO 3

1Yichulisa abandu bao oti bahoyeere ohubeeresa abemirisi nende ab'obunyala oluyaali, babe abawulisi, abetekefu ohuhola bulai omulimo kwoosi nende obwesikwa. 2Bakerakire batalomaloma bubi hu muundu yeesi, bahaye ohusoolana, nae babe abaloonga, handi beyekese eyiri abandu boosi bati b'esaambo ndayi. 3Olwohuba efwe fwesi abeene hale hwali abasiru, abajeemu, abakota. Hwali nihwahayira mu bulamu bw'obwekoombi bwefwe bubi, nende ohwesangaasa hwa buli ngeri. Hwali abetima handi abehiinda. Abandu bali nibatuhaya, handi fwesi nihwahayana abeene-na-beene. 4Nae obulayi nende esisa sy'ohudaha hwa Nasae Omuwonia weefwe nibyabonehana, 5yeecha yaatuwonia. Haba siyatuwonia olwohuba hwali nihuholere esiindu silayi mu bulungifu bweefwe, nae yatuwonia ohweema hu sisa syae syeene. Yatuwonia yatwooka mani hwebulwa ehabi ly'ohubiri, mani hwehola abayaaha mu Mwooyo Mwolerefu. 6Nasae yatuchuhaho Mwooyo Mwolerefu wae mu bungi ohubitira mu Yesu Kristo Omuwonia weefwe. 7Sino syaholehana hu hunyale ohulabisibwa hulw'esisa syae, hu hunyale ohuba abasiha b'obulamu butaakama buhusuubiramo. 8Emboosi chino chadyeeri. Ndaha womiise ebiindu bino, hu abo abafukiirira mu Nasae banyale ohumaliirira ohuhola ebiholwa bilai. Ebiholwa bino bilai muno handi bihoonya buli muundu. 9Nae leha ohweyingisa mu mayiingani k'obusiru, ohuhwesana hu bungi bw'enjibulo nyiingi, ohukabuhanamo, nende obusoolo budiira hu huhalaka amalako. Olwohuba ebiindu bino byoosi bibulamo obuhoonyi handi byabuhaya busa. 10Kesaho ohukerakira omuundu oleetera abandu ohukabuhanamo ehabi lala oba amahabi kabiri, nomala otyo, lehana nae elalira. 11Manya oti omuundu oyo yamala ohulema handi ebiholwa byae bibi byeekesa biti yamala ohweheengera omusango ohumuhira. 12Nihutumira Ariteema oba Tikiku, wanguyaangaho ohwiicha yindi mu Nikopooli, olwohuba heengereo ohuba eyo mu ndaalo ch'emboo. 13Kesaho koti lwonyala ohuhoonya Seena omunamalako nende Apolo betekehe ohuchaaka olukeendo lwaabwe. Handi bona oti bali nende buli siindu sihoyera hu lukeendo. 14Handi hubbirisa abandu beefwe oti bahoyeere ohweeka ohuholaanga ebiindu bilai, hu banyale ohuba abetekefu ohuhoonyaanga mu bidinyu bikwao bwaangu, bahayeenge ohubechaanga awo busa abula obuhoonyi bwoosi. 15Abandu bandi nabo boosi bahuheesere. Wesi heesa abandu batudaha, abo ab'efukiirira ndala naafwe. Nasae abakwiire esisa mweesi.

will be added

X\